رواية : إمرأتي
الفصل العشرون
الكاتبة Jawhara
****************
تبكي سراً، وتضحك علناً، تلك هي الأرواحُ التي أرهقها الحني
****************
جيلان ..
وصلت لبيت خالو سعد بعدما اخذت رقم موبايله من بيبي لأن ماعندي رقمه ، اتعس لحظات من دخلت لبيت اهلي وكلت لبيبي طلكني حسام اسمع ضحكة نذير المشمت بية كال حيل تستاهلين دفرج مثل الكلبة رجعتي
ماحجيت شي وياه للاسف شكد حقود هاي واني ما يوم انطية مجال يتقربلي هو حب من طرف واحد ،
بيبي ماقبلت اروح كالت ظلي هنا ، شلون تريدني ابقى ونذير موجود ومن وراه صارت المشكلة حتى حسام يثبت عنده اني دافعت على نذير لأن عندي شي وياه ، مستحيل ابقى هنا خلص كولشي الا الكرامة والظاهر اني جنت دايستها وهسة حسيت الله يعين والله يجبر بخاطري الله يعلم شكد حبيته لحسام وشكد جنت حريصة ما امشي بطريق الحرام تزوجته وخلص مايفيد الندم على ايام وأشهر مضت
طلعت من البيت وبيبي تقنع بية ابقى ذكرتني بموقف عمتي ام حسام رادتني ابقى ،
ماكو غيره خالو سعد الي ما اطيقه للاسف عرفت متأخر شكد جان يعاملني بحرص خوفا علية بس اني شنو سويته تمردت عليه كلما ينصحني اعترض على أسلوبه بس ريمان هي الي فاهمته صح وعلى مرامه أما اني التمرد الي جنت اواجهه بي يخلي يمد أيده علية
خلص جيلان لكل جواد كبوة والصار درس الي يعلمني شلون اعيد ترتيب حياتي
وصلت لبيت خالو سعد قبل المغرب جنت تعبانه كولش دفعت أجرة السايق ونزلت اني وجنطتي خالو لكيته واكفلي بداية بوابة المزرعة لابس دشداشة رمادية وايديه بجيوبه من صرت قريبة عليه فتح ذراعه أخذني بحظنه وهو يسالني عن أحوالي ،، متحملت كمية الحنية الي لمسته عنده ذكرني بامي الله يرحمها وريحتها الطيبة بجيت بحظنه واني اتذكر شكد ماطيقه وشكد بعيدة عليه ، ماحسيت الا رجلية مايشيلني سندني ودخلنا جوة وصاح على رهام زوجته طلعت من المطبخ
_ هلا حبيبتي حمدلله على السلامه تعاي ارتاحي داخل
خالو ماعافني اسمعه يكللها البنت تخربطت
دخلني للغرفه جوة مددت عالسرير وراحت جابتلي مي د اشرب
سندت راسي بيدها شربت مي ورجعت راسي عالمخدة
خالو سعد حجى بصوت قوي ..
_ انتي واضح التعب عليج ارتاحي وبعدين نكعد نسولف لأن ماريد اضغط عليج تا تحجين ، انتي من ذاتج احجي
عافني وطلع ظلت زوجته كعدت على طرف السرير.
**********
بيت حسام ..
كاعدين بالاستقبال يسمعون كل الحجي الي كالته ام حسام بعدما طلبت من بنتها تتصل على اخوها يرجع
ايدي على خدي مدري شاحجي بقيت ساكته مقهورة على حال اختي صدوك ماعدها حظ اجت تسوي زين طاحت بيها لو باقية ساكته ممدافعه على نذير قابل شيسويله والله مدري شاحجي ياربي وادور عيني كل شوية تروح لحيدر الي منزل راسه ساكت ، كولشي سمع وعرف وهذا قهرني أكثر يعني ام حسام كولش مو وكتج سولفتي الصار
التفتت على بيبي انهدت على حسام الي دخل سلم علينا وعيونه حمرا وحالته حالة
أنت تقرأ
إمرأتي
Romanceفي وقت اشتياقي لك، تتركّز كلّ أفكاري وتهرب منّي إليك، ويشدّني الشوق والحنـين بشدّة إليـك قصة رومانسية اجتماعية ، بقلمي ،الكاتبة Jawhara
