رواية : إمرأتي
الفصل الثامن والعشرون
الكاتبة Jawhara
********************
هذا المساء ليس ككلّ مساء فعبق شوقك يلوّح بحضورك، في كلّ أركان خياليّ
********************
سيرين ..
_ تفضلي عمة عجبج هالشكل
اخذت ام منصور الي كاعدة على كرسي تراقب جنتها واكفة تخبز عالتنور الي مخلينه ورى البيت ، تمثلت الكرصة بين ايديها وباستها وحطتها على كصتها ..
_ عاشت ايدج والله يبنيتي شغلج وخبزج كلش زين
ابتسمت بفرحة لأن هالفترة عمتي راضية علية الحمدلله مو مثل قبل بكولشي تتدخل وادقق يمكن لأن كمت اسوي الي تريده صح تعبت بالبداية الحمدلله ثمرة تعبي مراحت اهم شي اكون مرتاحة وية منصور حبيبي الي من يوم تزوجنا وعلاقتي تقوى بي يكفيني اشوف نظرة الحب والاحترام بعيونه فدوة اروحله ، أما عمتي فاتضحلي گلبها الطيب واهم شي تريد جنة معدلة على كولتها
_ خل اروح اجيب الدجاجة والشواية اشويها هنا بالتنور
_ ها سيرين كملتي تا نشوي الدجاجة
طلعت أميرة وبيدها شواية الدجاج راحت كشفت قبغ التنور حتى تخليها بداخله
ردت عليها سيرين وهي تشيل الخبز ..
_ توني د اجي اخذها ، فدوة أميرة شيلي الخبز لأن ظهري كام يوجعني
ام منصور وكفت واجت اخذت الخبز من سيرين وكالتلها ..
_ روحي اسبحي وارتاحي والعصر موعدج يم الدكتورة الي تراجعها هنوف
_ عمة والله صحتي زينة بس مرات يجيني هالوجع
_ بنيتي انتي بشهر الخامس وماراجعتي بس مرة
_ لعد يجي منصور يلا اروح
_ باجر ينزل بالسلامة بعد بكيفج ناجلها لباجر لو عكبة سودة علية ينزل تعبان خوما ياخذج بنفس اليوم
_ ها لعد منو يوديني ؟!
_ ريكان يوصلنا
_ تمام اروح أسبح لعد
دخلت البيت ورى عمتي الي بيديها الخبز وفاتت للمطبخ اسمعها تهلي ، يگلبي هذا منصور نزل اليوم فديته دخلت بسرعه اتاكد جان حاظن عمتي باس راسها وايديها ، واني بدون وعي مني تقربت عليه من ترك عمتي والتفت علية مبتسم حظنته وبست خده واني اهمسله بحب واضح ..
_ حمدالله على سلامتك حبيبي
لمني بحظنه ورد بهدوء وعيونه بعيوني ..
_ يسلمج الله شلونج
_ هسة صرت زينة
ابتعدت بسرعه من دخل حماية ريكان سلم على اخوه وراحو داخل همة وعمتي واني صعدت لغرفتي حضرت ملابسي وملابس لمنصور وفتت للحمام سبحت ومن طلعت لكيته واكف اباب الحمام ساند أيده عالحايط
اول ما شافني أخذني بحظنه ..
_ ادور بعيوني وين رحتي ثاريج هينة ، ليش ما انتظرتيني يولي صارلي نص شهر تولهت عليج
_ خبزت واحتريت ، بعدين شلون انت جاي وما استقبلك وانا متعطرة ونظيفة
أنت تقرأ
إمرأتي
Romanceفي وقت اشتياقي لك، تتركّز كلّ أفكاري وتهرب منّي إليك، ويشدّني الشوق والحنـين بشدّة إليـك قصة رومانسية اجتماعية ، بقلمي ،الكاتبة Jawhara
