رواية: إمرأتي
الفصل الثالث عشر
الكاتبة Jawhara
***************
* لا أحب العثور على أحد مثاليّ . .
لكنّك بالفعل الشخص المثالي . . .
الذي بحثت عنه دائمًا.
***************
جيلان ..
الايام الفاتت فكرت اني على شنو مطولتها سالفتي مادام رجع يطلبني ويدور رضاي خلص ارجع وانسى سالفة يطلكني
وبيوم عقد ريمان اجى اني جنت متعمدة يجي بهذا اليوم لأن اتصل علية وكلتله تعال وعرفو بي هالرجال نسيب وماكو افضل من هيج لمة ، باركت لريمان وبداخلي فرحانه لأن تتزوج من حيدر مبين عليه يحبها ، ودعت بيبي وعمة والبنات ورحت صعدت بسيارة حسام الي اول ما صرنا بوحدنا طلع بالسيارة وركنها على جهة بعيدة من بيت اهلي والتفت علية بجسمه قريب مني مد أيده مسح خدي
وتنهد ..
_ بهذلتيني ولج حتى اني ما اعرف شلون دا اركض وراج
رديت بصوت بارد وعيني نزلتها ..
_ ممجبور ، تريد تعوفني هاي اني كدامك كول انزلي بعد ماريد اشوفج
_ ليش هيج طافية ليش هيج حزينه ومسلمة لكولشي ؟!!!
رفعت راسي وعيني على مستوى جتافه ..
_ لأن انذليت وانداس علية أكثر فترة شبعت بيها بسط واهانه هي هاي الفترة كرهت نفسي وانت تخيل إذا جيلان تكره نفسها
جر حسرة وذبها وعينه علية يلتهمني بنظراته واني واعية لهاي النظرة والقصد منها ما اهتميت لأن فعلا داخلي مقهور
شغل سيارته وطلعنا لبيت اهله من نزلنا سلمت على أمه لأن تلكتني تهلي وترحب هي ومريم ..
_ شلونج عمة
_ هلا جيلان شلونج عيني صرتي زينة لأن حسام كال تعبانه
_ الحمدلله ، مريم شلونج
_ هلو جيلان انتي شلونج
تباوسنا ورديتلها بابتسامه هادئة وعفتهم وصعدت لغرفتي فتحت الكنتور طلعت تراك لبسته ورتبت شعري وكعدت على طرف الجرباية ، مارفعت راسي من دخل حسام التهيت العب باظافيري انتبهت حلقتي مدري وينها من زمان مالبستها اتذكر اشتراها حسام من تزوجنا يمكن باقية عنده ضيكت حاجبي وسألته بدون ما ارفع راسي وباقية العب باظافيري ..
_ حلقتي وينها ؟!
اجى كعد بصفي وايديه حظنت ايدية وصفن بيهن وهو يتلمسهم بنعومة ..
_ موجودة ضامها بالقاصه انتي خليتيها عندي تتذكرين !؟؟
هزيت راسي من ذكرني وعيني على أيديه الي زحفت على طول ذراعي وحظنت اجتافي
حظني وحط راسي على صدره وشفايفه على راسي
_ ضعفانه من هذا مشكل عندج فقر دم
مسح على طول ظهري واني باقية ما تحركت بحظنه
_ يلا اغير ملابسي وننزل جوة وصيت على مشاوي يرادلج تغذية
_ ما أشتهي
بعدني عنه وباوع بوجهي ..
_ ماريد هذا الحجي ، كل وكت تأكلين وجبتج وبين الوجبات عصائر وفواكه د تصيرين زينه
سكتت مارديت انتظرته يحجي هو هماتين ساكت بس أنفاسنا بالغرفة الهدوء سيطر عالمكان
،،،
حسام ..
صعدت لغرفتي جانت كاعدة منزلة رأسها تلعب باصابيعها مديت ايدي حظنتهن وسألتها على حلقتها متدري وينها ناسيتها عندي مسدت ذراعها وحاوطت جتفها حظنتها لصدري وبستها برأسها واني اضغطها بحظني
كلتلها ننزل د تتاكل لأن تحتاج تغذية وفقر الدم نسبته نازلة عدها تكول ما أشتهي بس اني ما اخليها تبقى مقاطعه الاكل لازم تتغذى
أنت تقرأ
إمرأتي
Roman d'amourفي وقت اشتياقي لك، تتركّز كلّ أفكاري وتهرب منّي إليك، ويشدّني الشوق والحنـين بشدّة إليـك قصة رومانسية اجتماعية ، بقلمي ،الكاتبة Jawhara
