إمرأتي

الفصل السادس عشر

رواية : إمرأتي

الفصل السادس عشر
الكاتبة Jawhara

**************
* غريبة هي الأيام . . .
عندما نملك السعادة لا نشعر بها . .
ونعتقد أننا من التعساء . .
ولكن ما أن تغادرنا تلك السعادة
الف التي لم نقدرها حق قدرها . .
احتجاجاً ربما علينا . .
حتى تعلن التعاسة عن وجودها الفعلي . . فنعلم أن الألم هو القاعدة . .
وما عداها هو الشذوذ عن القاعدة . .
ونندم ساعة لا يفيد الندم على ما أضعنا وما فقدنا . . .

**************

جيلان ..

انتظرت حسام ما تغديت عمتي ومريم كالو تغدي يتأخر ماقبلت رغم جنت كولش جوعانة
بس حبيت اتغدى وياه
فعلا تأخر ساعة تلاثة ومراجع احتمال عدهم اجتماع ، صعدت لغرفتي مددت بفراشي وموبايلي بيدي من ايام واني محجيت وية ريمان ولا متصلة على بيبي احس حاجز بيناتنا ومراح يتقبلوني مثل الأول رغم جنت مقهورة من ريمان لأن اتصلت و اخذتني لخالو سعد الي عاملني بهمجية وقسوة ، تبقى اختي وعدها وكفات حلوة وياية ، خالو سعد ما اطيقه مو كره لا ابد ما أكرهه لكن ماحب أسلوبه وياية مرة من المرات عاندته وسوالي خلع بالكتف ورضوض عصابجي وهمجي ما اعرف زوجته شلون متحملته وهي شكد مبينة رقيقة ومثقفه
گلبي رف على بيبي اريد اسمع صوتها كلت اتصل عليها حجيت وياها وتطمنت هي بخير سالتني عن اخباري كلتلها زينة لأن ماريد يعرفون شي شسوي اول وتالي يحجون ويكولون تستاهلين هذا اختيارج فاسكت احسن ولو هالايام حسام مغير أسلوبه عن اول فترة من اجيت هنا ، كالت متجين بخطوبة سيرين ما نطيتها كلمة احتمال ماروح باركتلها وكلت لبيبي تسلملي عليها إذا ما اتصلت اني
وبيبي مكالت شي يمكن متريدني اتصادم وية نذير الي وصل البارحه ..

_ نذير رجع البارحه ماخذ شهادة الدكتوراه

رديت بدون اهتمام لأن اصلا ماعندي شي وياه هو يحبني اني ما ابادله هاي المشاعر !!

_ مبروك عليه ويرجع لو يستقر هنا ؟

_ لا بعد شيسوي يرجع ، وهاي سيرين حتتزوج منو يبقى عدنا ، خل يتزوج ويعيش ويانه
_ اي شكو بيها

_ عمتج هبوب تكول لو راضية بنذير جان هسة الفرحه فرحتين تخرجه وزواجه

_ بيبي صدوك تحجين اني تزوجت بعد خل يشوف نصيبه شسويله
_ خسرتي والله

_ عندي زوجي الله يحفظه الي شسوي بنذير
كوليله لا يجيب اسمي على لسانه لا هو ولا عمتي

فكيت عيني من اندفعت الباب لأن جانت مردودة ودخل حسام تقرب مني وعينه على الموبايل سلمت على بيبي وسديته ، عدلت جسمي وكعدت من تقرب علية
ضيك حاجبه وسأل وهو يوكف فوك راسي ..

_ منو هذا الي يجيب اسمج ؟!! وليش ضايجه ؟!!!
_ ماكو شي د احجي وية بيبي

_ جيلان مو على حسام هاي الكلاوات احجي شنو الي ما اعرفه ؟!!!!