دخل الاصيل لغرفة مغلقة خارج منها صوت حكيم بغضب وبكاء عبدية.. حنا الكل للاصيل اللي وقف قدام عبدية وهي جالسة فالارض مهبطة راسها ولابسة قفطان مزرق بالورد وبلغة فرجلها وبلغة مرمية حداها وسروال قنديريزي مجموع بلاستيك تحت الركبة .. مسكينة مرعودة وحالتها تشفي العدا وغتموت غير بالخلعة وهي على قد الحال..حيدات يديها على وجهها وتنهصص وهزات راسها وعينيها بتتاقل شافت فيه من البوت وهي طالعة للحزام اللي داير على خصرو حتى لعقاد عنقو وحلات عينيها فعينيه الشرانية وهبطات راسها بسرعة خبات وجهها مدعورة وكترعد من الخوف
تكلم الاصيل وقال كيشوف فيها ..مزال ماهضرات ؟
رد حكيم بالنفي وقال : مابغاتش تهضر امولاي .
حرك راسو بالايجاب وقال بغضب
وفية للالة روح الويل ..ولاكن غنشوفو هاد الوفاء ديالك شحال غيبقا صامد ..
حرك راسو لحكيم وبسرعة جبدو خنشة وخرجو منها الرجال لفعة كحلة زحلة كتلحلح بلسنانها وراسها كيشطح ..شدوها وقربو من عبدية اللي ماقدراتش تشوف فيها وكتغوت لربي اللي خلقها حتى بالت فسروالها وهبطات البولة قدام عينيه كيشوفو فيها سايحة فوق الارض المسطحك بالتراب.. شاف حكيم فالملك لقاه كيشوف حتى هوا ماشافوه عينيهم وكيتسنا الجواب
شدوها العبيد من يديها ورجليها وحطو ليها الحية بين عينيها حتى غابت وسلمات امرها ..خواو عليها سطل دالما فيقوها وغير حلات عينيها لقات الاصيل قدامها بحال قباط الارواح وهي تهز راسها كتتوسل وقالت
..رحمني امولاي ..رحمني وانا اللي كنعرفو نقولو ليك …منخبي عليك حتى حاجة غير رحمني وماتخليهم يأديوني
حرك راسو بالايجاب وقال : يالاه دوي..ولدي اللي هربات بيه روح الندى فكرشها ..فييين هوا
بلعات ريقها كتشوف فيه بهوف وقالت : حي امولاي حي وكاين موجود
قرب بعينيه عندها وقال
فين كاين ؟
شافت فيهم كترجف وفالحية اللي كتتخرك وسط الخنشة وقالت ..كاين ففف..ففتاروادانت امولات
اعتارفات عبدية للملك بمكان ولدو المخفي وهزوها من رجليها داك الصباح مع الفجر ومشاو رجلها على رجلهم والملك برجلو مشا وفسفينة خشبية كبيرة وبحرو فطريقهم لتاروادانت .. يام وليالي وواخا قطعو الشط شدو طرقان طويلة ..المسألة كلها خداها الاصيل حرب بالنسبة ليه وخاصو كيسكب هاد الحرب وبرجلو وقف عليها ومشا يبحث بنفسه حيت الضايع من يديه من دمو ولحمو وخاصو يرد الدم لماليه واخا يكلفو الثمن غالي.
وصلو لتاروادانت بلا ما يعرفهم حتى واحد شكون يكونو .. مان لباسهم لباس التجار لكبار وحاولو ما أمكن مايلفتو لانتباه فالمدينة حيت اصلا صغيرة وناسها قلال والغريب دغيا كيبان واها يعيا يتلتم ..هادا علاش دارو براسهم انهم تجار وحطو رحالهم فقصبة بعيدة شوية على المدينة واللي سولهم شكون نتوما كيرد حكيم ويقول حنا تجار جوالة وجابتنا طريق الصين من هنا وغاديين للاندلس ..نرتاحو شي يامات ونكملو طريقنا ..
وخفاو الهوية الحقيقية واخا كان واضح على الملك من هبته وقامته وشخصيته انه شي حجرة تقيلة وتقيلة نيت هادا علاش كان كيتفادا الكلام ولا تلفت الانضار وكان بعيد على عينين الناس حتى كرات عبدية بمكان ولدو وهزوها فنصاص الليل بلا ميهولو القبيلة وناسها وحد مايسيق ليهم الخبار ..مشاو لعين المكان وعبدية قدامهم كترجف ومضويين الطريق بالقنديل حى وصلو لواحد الدار فوق راس الجبل ووقفات كتشوف فبابها وترعد
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
