مع الضهر والقافلة فطريقها وصل مرسول لقاضي لقضا وكان مرسول صادم بالنسبة ليه بحيث كانت كتوضح ليه الامور وخبراتو بغيابها وعدم الرجوع والرحيل الى الابد وبلا ميحاول يبحث عليها ولا يوصل ليها ..جاتو صدمة على قلبه ماقدرش يتحملها وطاح فبلاصتو مرض وتأزم ولزم الفراش وفيديه الرسالة مابغاش يطلق منها ..كانت صدمة قوية على قلبه جبداتو شهر فالفراش ونهار على نهار كتساء حالته حتى صبح واحد الصباح مفارق الحياة من شدة الحزن والاسى .
مرت سنة
فالقلعة نازل محمد اصيل الصغير كيجري وتابعاه يمامة من اللور كتعيط حتى خرج فالامير يور طالع مع الدروج شدو هزو فالسما قاليه فين هارب؟ فين كتجري ؟
وقفات يمامة كضحك قالت ليه من الصباح وانا كنجري موراه سخفني
ضحك قاليها علاش مكاينش البنات اللي يعاونوك. فيه؟
قالت ليه كاين..
مشا هازو فيدو ودخل عند روح الندى لقاها واقفة قدام المرايا كضحك وتلبس حوالقها وتلفتات عنده قالت ليه شكون جا. عندي
حلات يديها عنقاتو وقالت ليه كي داز الصباح فالموسم ؟
قاليها مزيان الحمد لله .. كي صبحتي ؟
قالت ليه مزيان كنحمدو الله ونشكروه
قاليها جيت نطل عليك ونخرج ..اصيل هاهوا معاك
خرج مع الباب غادي وتصادف مع شادية جاية ومعاها جوج من الخدم فجنابها ..اشمنك يا لباس واشمنك يا مجوهرات ..فيدها ترابي صغير كدور وتسارا بيه وغير شافتو تبسمات وقالت ليه مولاي.. نهارك مبروك
تبسم قاليها كيف داير ولدي ..
قالت ليه ساكت داير عقله
مسح على راسو وقاليها دخليه من الشمس باقي صغير
مداتو لوحدة من البنات اللي معاها قالت ليها دخليه ينعس ابدرية
شداتو بدرية دخلاتو وتمات شادية غادية جنب الامير وشادة ليه فيدو كدللع قالت ليه تشهينا شي نزاهة فجنان الزيتون . من نهار تزوجنا ما خرجنا للنزاهة
قاليها كيضحك كاع يامنا نزاهة ماشي ضاروري نخرجو برا
تنهدات بعمق قالت ليه احسن حاجة درنا رجعنا بحالنا..شفتي سبحان الله كلشي تقاد راسو بلا مانديرو حتى مجهود..بلادنا مكاينش ما حسن منها
طبطب على ضهرها قاليها مامتشي غير فين مشاك الله .. هادا حال الدنيا كتقلب ودور نهار ليك نهار عليك
باسها فخدها ومشا خلاها دخل جناحو حيد حوايج الموسم ولبس حوايج الصيد بحال عادته وخرج وقف برا لقا عابد حادر ليه الراس وقاليه
اش حب الخاطر امولاي
مسح الامير على يديه قاليه رسل ليا يمامة علمها باللي غنخرجو للصيد
وصل عابد الكلام ليمامة وخرجات لابسة سروال واسع بقفطان مزير شوية قصيد حد الركبة بالمجدول مفتوح من الجناب والدفيرة طويلة على ضهرها ..هزات السهام والقوس ونزلات لحقات عليه كتجري لقاتو فوق العود كيتسناها ..ركبات العود ديالها حتى هي وتبعاتو كتجري مع الباب وفطريقها شافت رسول القصر داخل
مشا نيشان قابل روح الندى وحدر راسو قاليها جاك مرسول من غرناطة الاللة
شدات المرسول قالت ليه صافي يمكن ليك تمشي
حلاتو قراتو ولواتو كتنهد .. دخلات عليها عبدية شافت المرسول فيدها قالت ليها شداكشي
قالت ليها روح الندى غير الاصيل كاتب ليا كما العادة.. كيلمح ليا نرجع ..وقالي مابقا والو ويفكو الحصار راهم فمفاوضات على قرطبة ..
قالت ليها عبدية ونتي شنو كتقولي؟
تنهدات روح الندى قالت ليها انا مابقيتش غنحط يدي فشي حاجة اعبدية..راكي شفتي شنو وقع ليا واخا كلشي من الخير.. شفتياش داز عليا من ورا رغباتي.
قالت ليها عبدية الحمد لله اللي خرجات هاكا..
قالت ليها روح الندى تمنيت كن ماجهضتش اعبدية.. تمنيت كن ولدتو وربيتو ..ولاكن الاقدار حكمات ماعندنا منديرو..كنشوف حتى نعيا ونقول كلشي من خير..عندها الحق شادية فاشقالت ليا ولدك غيموت ..شوفي شحال وانا هازة الهم ومريضة وكنطبل فالماء عند بالي يور .. شكون قال غادي نحمل شي نهار اعبدية
قالت ليها عبدية هادي تعلمك دخلي سوق راسك..ماتبقاي تابعة قراية الكف وتخربيق راه اللي بغاها الله هي اللي غتكون
تنهدات روح الندى قالت ليها حررمت اعبدية ..حررمت وكندعي الله يسمح ليا.. غنخلي الاحوال كما هي ونمشي معاها بالصفا والنية على الاقل ببالي مرتاح ماشي هازة هم الغيب وكلشي بالمقلوب
خبات الرسالة وخرجات تشم الهوا فالقصبة ولقات تما شادية جالسة مفرشين ليها فوق الربيع كتلعب مع ولادها وضحك وتزاد عليهم حتى مخمد اصيل الصغير وبدا كيجري هوا وتيليلا فالربيع ويلعبو ..تنهدات روح الندى قالت لعبدية تبارك الله درادي كبرو ..
ضحكات عبدية قالت ليها حنا اللي كنكبرو اروح الندى
جلسات روح الندى جنب شادية على واحد المخدة وطلات على خفيدها الصغير وقالت ليها
كيكبر شي هاد البخيخيش ولالا
قالت ليها شادية كيكبر الاللة روح الندى دابا شوية تلقايه كيجري مع خوتو هنايا .
فالغابة واقفة يمامة شادة القوس ووراها يور شاد ليها يديها بجوج كيصيدو الحجل ومركزين على واحد الحجلة قاليها بخفوت
بشوووووية وحطي راس السهم على الراس باش الى تحركات يالاه يصيبها الوسط
بقات ساكتة متبعة معاه حتى طلقات السهم لاكن طارت الحجلة وتنهدات قالت ليه شداني لشي صيد كاع خليني نجلس نرتاح
تسرحات على الربيع كتشوف فالشجر ضاير بيها الفوق وتكا حداها الامير دار يديه تحت راسو فصمت وتنهد
سمعات تنهيدتو العميقة وقالت ليه مالك اللي سمعك يقول كاع هاد الجبال واقفين على ضهرك
قاليها السلطان غفر للامير سلطان على مادار .. ورجعو والي فالبلاصة اللي كان فيها
قالت ليه غير قولها ماكاين لاش تكتمها ..قول رجعو والي على بلاد القوط
بقا ساكت وتلفتات عمدو على كرشها والقش لاسق فراسها قالت ليه مشات ديك الايام ايور .. مشات وانا ماهازاش فقلبي من جيهتكم ..ربي شاهد عليا .. ولاكن اللي مافهمتش علاش مقلق؟ واش حيت السلطان غفر لخوك
ماردش عليها بقاساهي فالسما وقالت ليه كما كان الحال كيبقا خوك ..وتعاقب ..والسلطان ماغفر ليه حتى وصل لخط النهاية مع الصليبين وغادي يسترجع قرطبة. فأقرب وقت. بلا اسالة الدماء.
حرك ليها راسو بالايجاب وتلفت شاف فيها لقا راسها فيه الورق يابس وبدا يحيد ليها القش على شعرها ويتأمل ملامحها وقاليها
جا الوقت فين خصنا نتجمعو انا ونتي
هبطات عينيها كتشوف قدامها قالت ليه خليتيني انا اخر حاجة ..
قاليها حيت نتي اهم حاجة ..وخصها الوقت والخاطر يكون رايق ماشي مشطون
قالت ليه شنو بغيتي تقصد
شد ليها فيدها قاليها اللي بغيت نقصد راك عارفاه .. كتفهميني قبل منهضر
تنهدات بعمق وقلبات وجهها ساهية حتى حسات بيه حط ليها تاج من الربيع على راسها وقاليها تزوجي بيا ؟
تلفتات شافت فيه مصدومة وبقات كتشوف فيه مطولا اكثر وبلا متشعر حركات ليه راسها بالايجاب قالت ليه اه ..
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
