جرات مسعودة بنتها وكموستها فيدها وزادت كتقلب منين دوز وفين تمشي؟
وصلات حتى لواحد المجمع فالسوق ديال عربات النقل فباب السوق ووهي حاللة فمها فهاد البلاد الغريبة عليها وعلى قبيلتها !! مولفة غير بديور الطين والنوالات والجبال والكديات ..ماشي بحال هادالاصوار العالية المحاوطة المدينة وهاد الناس لكتار واليد عاملة الكثيرة .. شي غادي شي جاي والبيع الشرا فكل مكان .. تلفتات يامنة للجنب حدا باب سور من اسوار السوق والزرابي والخيام المعلقة عليه وشافت راجل لابس الكحل وطاقية مدورة على راسو ومستف حداه بنات عاريات بلا حوايج عارضهم للبيع .. طيحات اللثام على وجهها وحلات فمها وخرجات عينيها وقالت
وااامي…واااهيا العالي
ضارت مسعودة وراها شافت ماشافت عينين يامنة وكانت غتسخف من الصدمة ورجعات اللور خبات وجهها وهبطات ليامنة راسها كتولو
ويلي وياي ويلي ويلي تي شهاد المسخ وهاد المنكر اناري تي شهاد الشي
خبات وجهها هربات تالفة وسط السوق وماعارفاش راسها باللي راه فسوق العبيد و الحريم .. داخت وهي كتشوف النسا كل مجموعة فين واقفة وجالسة شي بلا حوايج وشي لابس غير شطيطة ومربوطين بالسلاسل من رجليهم ومزيينين بالورد من راسهم والحلي فعنقهم ويديهم ..داخت مسعودة وتلفات ليها الطريق ماعرفات راسها فين وشنو كيوقع؟ الرجال كيدورو بالنسا ويقلبوهم بحال البضاعة وفيهم اللي باينة على وجهها مجبرة وفيهم اللي هازة يدها كتعرض نفسها للبيع فاش كيبان ليها شي تاجر كبير ..
ضربات مسعودة يامنة هزات ليها ضهرها وقالت كتغوت
حدري عينيك الكافرة بالله حدري عينيك يعطيك العمى .. اويلي اويلي يا ريلي اش هاد جهنم الكحلة فين دخلت انا
مشات كتقلب على طريقها مني جات وجارة وراه يامنة بحال البهيمة غير مدرمة وكرشها سابقاها وعينيها معلقين وفمها محلول .. لاكن مسعودة واخا خرجات لباب السوق وسط البياعة ماهناهاش خاطرها وفضولها تعرف شنو كيوقع ومشات طلات على واحد ليهودي فقشابة ترابية ولحية طريلة شايبة وقالت ..
السلام اسيدي.. بغيت نسولك الله يزازيك بيخير ..تا واش كدير اناري؟ شكون هادو ؟
شاف فيها اليهودي وقال كيحقق فيها وفبنتها بلغة عربية تقيلة
بلا شك نتي من المغرب جايا .. هانتي الاللة ..عندي اللي تشهات خاطرك وحباتها .ك اختاري لا تحتاري وبثمن زوين
عقدات حجبانها قالت ليه تا واش جالس تبيع فالنسا اناري؟؟ هاوييلي حي شهادشي
تخلعات وخرجو عينيها خافت على راسها وعلى بنتها ومشات هربات حارة يامنة بعدو من سوق العبيد رجعو للعربات وبدات دور وتسول على غرناطة حتى وراوها العربة اللي غادية ليها ومشات كتجري سبقات بنتها دفعاتها ركبات وطلعات حداها جلسات جنب حتى كانت غتقلب الكروسة هي وبنتها بالغلض ونوضها مولاها جلسها من الجهة لاخرى كينكر ومد ليها يدو تخلصو
بلعات ريقها كتمتم وتقلب على الكموسة فشونها حتى جبداتها ويامنة قدامها مكمشة فلاحفها وخايفة من الغاشي.
جبدات شي ريالات مداتهم ليه وقال ليها زيدي
بدات تبكي عليه قالت ليه واسيدي ..راه فلوس البقرة والعجل هادشي اللي قضاو ليا ..بحرا وصلوني لهنا ..كن تشووووف الشريف شداز عليا وشحال من قافلة مشيت معاها وعاد السفينة هي اللخرة صفاتها ليا ..صافي هادشي اللي بقا لي غير قبل عليا
شدهم وفهم من كلامها غير شوية واخا تعابير وجهها وبكاها الصفر كان كافي باش يفهم شكاها ..
انطلقت العربة تخت الشمس هازة الناس وضرباتهم شلا طرقان حتى قربو لغرناطة فين يرتاحو ويكملو الصبح مسيرتهم ..رااحت البغال شوية من الطريق وتنصص الليل والناس فالكروسة جالسين كيتسناو الحال يصبح .. وقبل مايصبح الحال داز عليهم طوفان من الرجال فوق الخيل كيجري مافهمو راسهم من رجليهم حتى لقاو راسهم وسط السهام والسيفو وبدا مول العربة كيغوت ويقول
هربو ..هربو العدو دخل علينا هربو هربو
نقزات يامنة بالخلعة كتغوت وسط النزال ويديها على راسها وسمحو فحوايجهم وكل واحد فين صد بالخلعة وتلفات مسعودة على بنتها وماجا فين يصبح الحال حتى كلشي تشير وشي ماعارف الطريق اللي يشد
شرقات الشمس الحارة على مسعودة اللي جالسة وناشرة رجليها فالارض وكنبرخ وتبكي وتعيط
وااااا يامنة …واااا يامنة فين صديييتي… واهيا العالي شوف من حالي … وا رجال البلاد … واربي ربي .. واربي ربي ربي .. وا ربي شرف من حالي لا فلوس بقاو عندي لا طريق نشد لا بنتي فخضني.. يا ربي وقف معايا ..يا ربي صبرني ياربي
جلسات تغوت وتبكي تنوح ومشات كتقلب ماقدراتش تفوق ديك البلاصة فين ناضت القتيلة ..
اما يامنة فشرقات عليها الشمس تحت واحد الكدية بين الشجر على طريق واحد الواد صغير كيرشرش وهي ناعسة كتشخر حتى حركاتها واحد العصا وحلات عينيها مخلوعة قفزات وقالت
مييي وا مي
رد عليها راجل كبير بلحيتو وراه جوج بغال وعود محملين ومجملين ومعاه واحد الخويدم عبد وقال ليها كيشوف فحالتها ويحقق فيها
شكاديري هنا ؟
بوحدك فهاد الغابة ؟
ناضت حالتها حالة وكربزة بحال الكرداسة والحزام دالقفطان نازل والحية مربوط على كتفها والغابر والقش لاسق فيها وقالت كتكتم وتبرك على الحروف بحال عادتها
عاااا عاااا امن عليا ونقوليك
عقد حجبانو وقال
عليك الامان
بلعات ريقها وقالت كتبكي وتنخنخ
ااانا تلفت على مي … تلفات عليا مماااي واااقيلا صفاوها ليها .. وو و انا هربت من القطاطعية اللي هجمو علينا
بقا كيحقق فيها وقال
مك ماصفاها ليها حتى واحد .. رجعات للسوق كتقلب عليك زيدي نوصلك عند مك
حلات عينيها وقالت
بصاااح ..رجعات كتقلب عليا ..شتي اناا راه انا هيا موموووو عينيها .. قيصها في عينيها وماتقيصعاش فياا اااه اه
شاف فالعبد وشار ليه براسو وقاليه جيبها
شدها العبد من يدها وجرها قاليها زيدي نوريك مك
شافت يمين يسار كتقلب على شطايطها وهزات بلغتها كتجري تبعاتهم غادية وراهم وهما ضاربين الطريق حتى بغات طيح بالعيا ومابقارش رجليها هازينها وقالت سخفانة
خالييني نجلس شوية فوق البغلة ..
تلفت التاجر وقاليها . قربنا نوصلو ماشتاكيتيش لمك
تنهدات كتبلع ريقها وقالت
وا تواااحشاشتها ولاكن الركابي اللي يديوني عندها صاافي ماتو ليا الشريف
تنهد التاجر ووقف القافلة بغا حتى هوا يرتاح من عناء الطريق وجلسو فواحد القنت تحت الشجر وجبدو المونة ياكلو شوية ..لاحو ليها طرف دالخبز شداتو هنشراتو فرمشة عين وبدات دور فعينيها حشمات تقوليه زيدني .عطاوها تشرب وناضو كملو طريقهم حتى وصلو للمدينة وتجاوزو الحدود ودخلو بين اصوارها العالية الكبيرة وابوابها الكثيرة من بوابة سوق المدينة الكبير ودخلو كيتساراو جارين القافلة وبداو يفرقو بضاعتهم على التجار ريتساومو عليها ويامنة ساكتة وتابعاهم .. تعاشات العشية وتباعت البضاعة وبقات غير يامنة مور البغال خاوية وغاديك والسوق بغا يروح والليل قرب يطيح .. مشات يامنة كدور فعينيها وتشوف حتى لقات راسها من دا وجديد فسوق فيه النسا والحريم شي عريان شي لابس شطيطة .. درقات وجهها وبدات طل بنص عين وتفرج فالرجال بحال السلعة للبيع ..ها الخدم ها العبيد ..
وقف التاجر قدام واحد من النخاسين اللي كيبعيو النسا وسلم عليه وباينة بيناتهم معرفة قديمة .. تلفت النخاس شاف فيامنة وقال
اش هاد البضاعة الجديدة جبتي لقرطبة هاد المرة
تلفت التاجر وقال كيشوف فيامنة
لقيتها فحدود غرناطة .. تشري؟
رد النخاس وقال : نشري هاد الخطية شوف حالتها كيف دايرة
رد التاجر وقال: الباقي عليك نتا تحف عليها شوية وهاهي واجدة
حك النخاس لحيتو وقال كيشوف فيها
حيدي حويجك نشوف اشنو تحت دو الشراوط
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
