دارت يديها على وجهها ومابقاوش ركابيها قادين يهزوها ..جلسات على سداري فديك الواحة اللي سقفها عاري وقالت ليه انا منقدرش نقول ..قول نتا نشوف اش غتقول
فالبلاصة طرطق صبعو لذو الفقار دخل وخدا منو ورقة وقلم ورسل رسالة ليور ولد الهم اللي بلا شك غيعرف الحقيقة تم تم مافيها نيقاش ولا حلان الفم .
والخبار السخونة فيساع كتوصل وفيساع كتحضر الحفيظ السلامة ..كي شد المرسول قراه ..كان ساعتها على عودو خارج وفالبلاصةغير الاتجاه ..
نيشان لرياض الهم اللي مكيجي منو غير الغم .. دخل عند بالو غيلقاه ساعة تصدم فاش لقا فالقت مو.. عمر روح الندى ما تحدو ليها لحديد ولا خناز ليها لقديد..ديما سابقة لاحقة وحتى حاجة متفوتها ولا تغلبها ..ولاكن هاد المرة واهلي فين وصلات راسها ..القضية عندها حمضات حتى طلعات حموضتها على وجهها وعطات ريحتها . ماهضرات مانطقات ل زمات الصمت وتبكمات ..وتمنات كن كانت صمكة .اما السطان يور اللي دخل عليهم بلباس الصيد يديه خاوين فحزامو خنجر وعلى راسو وشحاح تقول قطاطعي ..كم ما تفاصل حوايجو اللي. واخا ديال الصيد توبها وخياطتها فيها فن كيهضر ويقول انا اللي كاين مكاين ما حسن .
تبسم باستغراب وفنفس الوقت تساؤل بعينيه وقال
مجتامعين بلا متعلموني؟ شي مشكل واقع وانا مافخباريش؟
دورات وجهها وعينها بغات تدمع وتعرضات ليها بصبعها وقفاتها وسدات عينيها .تكلم الاصيل كيشوف فيه بتعمن وهوا قدامو جوج رواح ..روح الندى وولدو يور .. واحد فيهم غتنزل كفتو ..يهضر يقول اللي كاين ويبرئ راسو من من هصايل روح الندى ولا يسكت على ما دارت ويخسر ولدو اللي ما صدق كسبو
بقا الاصيل ساكت .. وروح الندى ساكتة وهوا كيشوفو فيهم بحوج مافهمش. شنو اللي كيوقع
قاليهم مالكم ساكتين تقول رمضان ماغيجيش ولا شنو
سدات روح الندى عينيها شافت فالاصيل وشاف فيها حتى هوا شار ليها براسها تهضر لاكن هبطات راسها ماقدراتش وقاليها
تهضري نتي اروح الندى؟ولا نهضر انا
بقات ساكتة وهبطات راسها كتبكي ..تبدلو ملامح يور وهوا كيشوف فيها كتبكي وقاليهم ياك لاباس؟
تنهد الاصيل بعمق قاليه كاين سر كبير خاصك تعرفو..وخاصك تفهمو ..وتتمعن فيه مزيان قبل ماتحكم ولا تضلم ولا تندم
عقد يور حجبانو كيشوف فيهم بجوج قاليهم شنو اللي كاين ؟؟
شاف فروح الندى قاليها شنو عندك ؟ انا متأكد بيناتكم شي حاجة وزدت تأكدت اكثر من هادشي دابا..واش شي متعلقة بالسياسة؟ بالعرش ؟ بالبلاد؟
حرك ليه الاصيل راسو قاليه المسألة متعلقة بعائلتك ..بأصولك ..
هزات روح الندى راسها وقلبها غيسكت قاليت اصيل
ماداهاش فيها وسد عينيه تنهد وقاليه سمعني مزيان شنو غنقوليك ..
رد يور مصغر عينيه كيتساؤل قاليهم بعائلتي؟!! اشمن عائلة فيهم؟
قاليها الاصيل عائلتك الحقيقية..اصلك الحقيقي اللي غادي تعرفو ..شنو كتعرف على باك ؟
قاليه يور اش غنعرف ؟ اشمن اصل اشمن حقيقة؟
قاليه الاصيل شنو اللي كتعرف على باك ؟
رد عليها يور قاليه با كان ملك ومات فالحرب وطاحت البلاد..وهرباتني مي فكرشها ولداتني فسفينة وهزاتني حتى وصلاتني لتارودانت
شدات روح الندى على صدرها كتعصر وتبكي فصمت والاصيل كيسمع ليه وقاليه وجزء واحد اللي صحيح من هاد الحكاية.. اما الباقي كلو كدوب.
قوات دقات القلب فصدر يور وقاليها شنو كتقول اشنو اللي صحيح واللي غالط؟
جمع الاصيل النفس ومسح على وجهه وقاليه باك ماماتش..باك باقي حي..ناضت روح الندى من بلاصتها كتعتر وتبكي ومشات وقفات قدامو جنب الاصيل وهزات يدها المرعودة شدات ليه فيدو ليمنة حطاتها على راسها وهزات ليه يدو ليسرى حطاتها على على راس الاصيل اللي مافهمش اشنو بغات دير لاكن بسرعة سد عينيه وسد حتى يور عينيه وصدرو كيتنفض من بلاصتو وهوا كيعيش كل حدث بحدث لامن جهة مو ولا من جهة باه حتى بدا كيتأوه بالصبر ويغزز سنانو ويديه كيرجفو تقول كيمتص شي قوة شرانية وبجهد هاد القوة اللي تنفض نفضة بحال البرق ضار فيلاصتو مع الدورة جبد الخنجر غرسو لاصيل فكرشو ورجع خرجو طيحو وتلفت لروح الندى اللي تخلعات دارت يديها على فمها وطار عليها بالخنجر بيديه ح فالسماء وهي كتشوفو فيه عينيه حومر مابقاش بنادم رجع وشح ويديه فوق راسها حابسها فوق طاقتو من النزلة عليها وقطرات على وجهها قطرة من دم الاصيل والخنجو كيترعد فيدو موقفو فالهوا .دخل ذو الفقار ومعاه حراس الرياض كيجريو لقاو الاصيل طايح على جنبو شاد بلاصة الطعنة ومزير على سنانو وعينيه ومشا كيجري عندو شد فيه ومشا الحارس بغا يشهر سيفو على يور لاكن قبل مينوي كانت عند يور خفة يد ماتخليش العين تركز مع الحركة وفرمش عين ضار وراه نيشان غرسو ليها فحلقو وخرجو ورجع اللور كيشوف فيهم وينهج وقاليهم شياطين .. شياطين لقيتو حمار درتو بيه ما بغيتو .. درتي بيا اللي بغيتي حيت حمار .
بقا كيرحع باللور ويحرك راسو وهي كترد عليه بالنفي غير براسها وتبكي وخرح خلاها تما وركب الخيل ديالو مشا وبقات هي فالرياض طايحة على ركابيها كتشوف قدامها وتهضر بوحدها وطلقاتها بغوتة فالسما ربي لي خلقها وغابت حدا الاصيل اللي كانت الطعنة قوية على الجسد ماخلاتوش يوقف وهوا كيتقاتل باش ينوض حتى وقف على ركابيه شاد فيها كيتنفس بزز وقال لذو الفقار
رجع للقصر دغيا .. رسل اللي يسعفنا هنا مكانيش اك الوقت قليل ..
خرج ذو الفقار كيجري وتلفت الاصيل حداه قرب من روح الندى حط يدو على عنقها حس بيها مزال كتنفس ورجع شاف فيدو اللي شادة الجرج كانت كتقطر بالدم تقول عوينة وطرقات ..جر وشاح كانت حاطاه على راسها جمعو وحطو على الجرح وتلفت ضرب ليها وجهها بصبعانو باش تفيق لاكن كان غايبة سارحة عجول لاخرا
تسعفات روح الروح الندى والاصيل فالرياض كل واحد فبيت وتما جاو الحكماء وآمر الاصيل ذو الفقار يتستر على اللي وقع وحتى واحد مايسيق الخبار لشنو واقع او تتسرب الخبار حيت غتجبد ليهم مشاكل اكبر من اللي راهم فيها والاعداء كيتسناو غير الفرصة فين يدخلو على البلاد و ويشتتوها والمتمردين عطا الله غير هما وعاد الجيش الى سمع بالخبار كيتزعز والى تزعزع غيتهور ..وبلا منساو سلطان ولي العهد اللي غادي يبان بزز منو ويقدر يغرو شيطانو ويتولى الحكم ويرونها ..الحاصول روينة غادي تترون ديال بصح وبلا زيادة فالكلام ..والاصيل مابغاش يوصل لهاد الحريرة كلها ويطيح استقرار البلاد وتنوض السيبة ويدخلو الاعداء اللي حالفين حتى يرجعو الاندلس اللي خداو ليهم لمسلمين . وهادشي ماشي غير على غرناطة ..حتى قرطبة وكاع اراضي الاندلس اللي تحت حكم الدولة الاموية
بعد النزيف الحاد اللي نزف من الاصيل خلاه يفقد الوعي وغاب والحكماء خافو يفقدو سلطانهم اللي باينة غادي يودع وموحاا يعيش . دارو ما فجهدهم وقفو النزيف وضمدو الجرح وكواوه لاكن بقا العمر بيد الله.. واش غادي يعيش ولا يموت .. وهادشي كيشكل خطر على البلاد وحاولو يديرو المستحيل باش يتسترو عليه لاكن كان من بين حراسهم جسوس صليبي اللي تسل من الرياض كيشوف وراه حتى بعد بين النخل وتلاقا مع صليبي اخر مد ليه الرسالة وقاليه
وصلها لملك قشتالة ليوم قبل غدا ..الخبار طايبة وهادي هي الفرصة نسترجعو اراضينا
شدها الصليبي وطلع فوق الخيل مشا كيجري وشد طريق الخرجة من المنطقة فين كاين الرياض ..لاكن بلا ميحس خرجو ليه جنود الخفاء من حيت لا يدري طوقوه واخا عيا يجري وعيا يهرب ويحارب فالاخير كتفوه وحيدو ليه الرسالة وجمعوه ردوه للرياض تحت رجلين الصدر الاعضم حكيم اللي كان وصل فالحين فاش سمع الخبر وحضر معاه اطباء القصر وتحفظ على السر .. هز الصدر الاعضم راسو خارج الرياضة فواحة دايرة باصوار الرياض الكبير وفتح الرسالة قراها لقاها مكتوبة باللغة القشتالية… وكان كيعرف يقرا اللغة لانه تربا وكبر فالاندلس وكانو كيتعلمو اللغات للتواصل بسهولة بين البلدان .
ملكي ملك بلاد قشتالة .. سقطات اعمدة الاندلس وناضت القتيلة بين غرناطة وقرطبة ..الملك محمد اصيل على حافة الموت بسبب طعنة من الملك يور ..والبلاد مهزوزة والخبر متستر عليه وانت اول من يعلم .
غزز حكيم سنانو قطع ديك الورقة طراف وتحنا هزو من ودنيه بجوج خرج عينيه فيه وقاليه شكون الجسوس هنا ؟؟ شكون عطاك الرسالة
بقا الواصل ساكت ودخل اثناءها الجسوس اللي كان لباسو نفس لباس جنود الاصيل شافو بين يديه وخرج عينيه وبسرعة حدر راسه باش حتى واحد مينتابه ليه ..
عطا حكيم للواصل ما عطا فجهدو باش يولد ولدو ..جاهد فيه حتى خلا راسو غادي جاي وجرو من ودنيه حتى طارت ليه وحدة دخلو لواحد البيت خاوي مغبر لاحو تما وخلا معاه رئيس الحرس اللي كان اسمه احمد يافع وكان من المخلصين والاقوياء للاصيل ..قاليه حكيم خرج منو الهضرة بالسيف ولا بلخاطر .. مكاينش اللي طيح البلدان قد الجواسيس وهاد الجاسوس خاصو يبان
خرج من الرياض سرح عينيه كانو حراس محسوبين وكان متأكد أن الجسوس واحد منهم لاكن شكون فيهم ..رفع راسو امرهم يبقاو فالاماكن ديالهم حتى واحد مايتحرك ..وحط واحد على راسهم يبقا مراقب شكون فيهم خوا مكانو ..لاكن مع الاسف كان هاد الواحد اللي حط على راسهم هوا الجسوس الحقيقي اللي كيتود ويبين اخلاصه الكاذب حتى ماقدر حتى واخد فيهم يشك فيك .
رجع دخل عند أحمد يافع لقاه كيحاول يخرج منو الكلام لاكن بلا فائدة ..عذبوه حتى مابقاش كيقدر يشوف واستغل فرصة اقتراب الصدر الاعضم منو كيهددو وخرج الخنجر من حزام الصدر الاعضم وغرسو فكرشو حتى خرج الدم من فمو وهاكا مات فالبلاصة الواصل وخدا السر معاه وتهنى من العذاب وخلا الصدر الاعضم واحمد غيطقو من الغضب
الصدر الاعضم. احمد يافع.. نشر جنود على طريق الغرب ..وزيد من الجنود على طريق الشمال ..طوقو جميع الاتجاهات بالجنود المخفية وشددو الحراسة ماخاصناش نغلطو ..ماخاصناش نخطاو وماخاسش الجيش يسيق الخبار والا غيوقع اهتزاز ويأدي للمترد..واهم حاجة واللي خصنا نردو بالنا منها ..الخبار ماخاصهاش تخرج من هنا وماخاصش الامير سلطان يعرف او حتى واحد من القصر..ونشر من رجالنا اشباح الليل.. يقلبو على السلطان يور اللي مارجعش للقصر..خاصنا نكونو حذيرين بزاف اكثر من اي وقت اخر ..الفتيلة شعلات بين المملكات وخاصنا نهمدو النار على بيدمن ينوض الشلطان بالسلامة
أنت تقرأ
ذو التيجان 👑مكتملة👑
Roman d'amour💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
