ذو التيجان 👑مكتملة👑

👑الجزء 45👑

جمعات سبأ جلايلها كتفتف وقربات كتعتر وتعرج مقاراش تفارق الرجل على ختها بالخلعة حتى وصلات عندو وشافت بيه بنص عين لقاتو كيشوف فيها  وحناكها مطبعين  بالحموم  وشعرها مدفور فالجنب مشنتف ..هز ليها وجهها من فكها  وبدا كيزير عليها ويشوف فعينيها معصب والغضب باين فعينيه وقال
شنو كيحساب ليك راسك؟؟  مغنلقاكش؟  هانتي رجعتي حتى لعندي  باش نقطع ليك هاد اللسان الطويل
طلق ليها من وجهها ومارضاتش بقات ساكتة وعينيها كيتحجرو بالدموع والنفس تحبسات فيها ..بغات طرطق عليه واخا يكون شكون ما بغا يكون لاكن ماقدراتش وطرطقات لداخل حتى كان قلبها غيوقف..تمنات تشق الارض وتبلعها ولا تجي شي عاصفة طيرها وماتبقاش واقفة ديك الوقفة فوق طاقتها وقدرة تحملها  وهي بحال الحمامة بين يدينه متقدر دير والو
بقا كيشوف فحالتها وسكت ماهضرش ..غير دوك الشوفات  اللي دار فيها كانو كافيين باش طرطرق الفلفلة الحارة فصدر سبأ وهي مارضياش ونفسها كتقلى وتتشوط على نار مهيلة .
شار بصبعو لعبدية قربات وقالت ليها. رديها بلاصتها ..عطيوها  تاكل باينة من لبارح ماكلات .. وشوفو ياكما ناقص يد ولا رجل ..وردي ليا الخبار
قلب عينيه مشا بحالو وخلاها طيحاتهم حجر تقال  فصمت حتى بغاو عينيها يطرطقو ومشات مع عبدية داتها للحمام لقات تما شادية ويامنة كيغسلو الحالة والطيابات مقابلينهم .. غير دخلات ناضت ليها شادية بالمعيور ماخلات فيها غير اللي نسات ويامنة مركنة فالمنشفة فارقة شعرها الوسط كتشرح فيه  وتشكي وحتى واحد مادايها فيها .. مشات سبأ نيشان لواحد الركنة تركنات وتكمشات وخلاتها كتعاير وطرطقات بالبكا وبلا متشعر هزات واحد الحجرة دالرجلين وبدات كتنزل على يدها حتى سال الدم ..حيدوها ليها الطيابات قبل متبدل البلاصة وتنزل على راسها وشدوها خلاوها كتلوى وكتخرج كاع ماكانت شادة حتى خلعاتهم كاملين وقالت ليهم يامنة وهي كتهرب اللور
ياكما مسكونة بسم الله الرحمان الرحيم
تخلعات شادية وهربات للقنت حتى هي تيقات هضرة يامنة وحتى الطيابات حساب ليهم نفس الشيء وبقاو شادين معاها حتى تهدات وجلسات كترد النفس ماهضرات مانطقات ودوروها دغيا كيغسلو ليها حالتها وهي محنية على ركابيها كتشوف قدامها وساكتة
دخل الملك لجناحو  كتب مرسول كيخبر فيه الملك الاصيل باللي لقا سبأ وردها للقصر باش مايبقاوش كيقلبو عليها ورسلو مع رسول القصر وجلس مقابل مع الشرفة داير يديه تحت فكه كيفكر    فاللخر عيط لذو الفقار دخل عنده دار ليه التحية وقال  غدا فالصباح غتخرج سبأ من العمبر ودخلها للكوزينة .. عطيها الاعمال الشاقة حتى تتأدب ..ومتنعسش  فالعمبر ..تنعس مع الخدم ..ممنوع تفوت خط الخدم  ولا ترد الكلام بكلام ولا يحن فيها شي واحد
تبسم ذو الفقار وقال
امرك امولاي
حرك راسو بالايجاب تنهد وقال :واخا هي تستاهل الدبيحة على قلة الاداب  اللي فيها
خرج ذو الفقار  وفنفس الوقت طلعات عبدية لجناح روح الندى كتجري ودخلات عليها لقاتها متكية كتخمم والوصيفات كيدلكو ليها عضامها
عبدية : لاللة ..المتعوسة رجعات الاللة
هزات روح الندى راسها وتقادات فالجلسة وقالت
شكون؟؟
عبدية: شادية
حلات روح الندى عينيها وقالت تحت سنانها .. جابك الله ابنت الحرام ورجعتي حتى لعندي..هانا غنوريك دابا تسنطيح مع سيادك كي داير .. سيري جيبيها ليا لهنا دابا
هبطات   عبدية كتجري لقاتهم  خرجو من الحمام ولبسوهم لباس نضيف بحال كاع الوصيفات وبان فيهم الضوء  وجالسين فواحد البيت قدام الميدة عامرة ماكلة كياكلو ويقولو ماكلينا .. وقفات عليهم عبدية وشافت فشادية قالت ليها كولي مزيان ماعرفتي اش تابعك المنحوسة
هزات شادية راسها شافت فيها مخلوعة وقالت
اش تابعني الاللة عبدية
دورات عبدية راسها وقالت  ليها نوضي  زيدي قدامي وغتعرفي
تلفتات شافت فيامنة لقاتها كتاكل الطبلة ورجعات شافت فسبأ لقاتها بعيدة على الماكلة ومكتشوفش جيهتها ..ربعات عبدية يديها وقالت. ليها
مالكي ماكتاكليش؟
بقات سبأ ساكتة وراسها بين يديها وعاودات  سولاتها  وقالت ليها كولي. هاااخير قدامك
ردت بلاصتها يامنة وفمها عامر وقالت كتشير بيدها
غا خليها انا ناكل بلاصتها ..
رجعات شافت فيها عبدية وقالت
كليها واش ماعتزيديش تاكلي
مارداتش سبأ وبقات هاكاك على نفس الحالة فاللخر خرجات جرات شادية وطلعات لجناح روح الندى  وطول الطريق وشادية متعصر فيديها وتسول على شنو بغاتها وشنو كيتسناها حتى وصلات ودخلاتها عبدية حانية الراس خايفة ووقفاتها قدام روح الندى اللي ناضت وقفات كتشوف فيها وهزات يدها حتى للسما وعطاتها طرشة حتى عواج ليها الحنك وقالت
فين حدك  تهربي وانا اللي جبتك بيدي لهاد البلاد؟
شدات شادية حنكها كتبكي وطايحة فالارض وروح الندى كتشوف فيها وتشير بصبعها وقالت  كتجبد الورقة من طيات توبها
هضري.. شنو كيعني هادشي؟؟؟ شنو كيعني هادشي اللي رسمتي نطقي
نوضوها الوصيفات وقفوها وهي كتشوف فالورقة وقالت  كتفتف موت الاللة ..
شداتها روح الندى من شعرها بغضب وقالت
شنو قلتي اخر مرة ؟. هاا؟ قلتي ليا زوجيني ونوريك الحل.. يالاه هضري دابا ولا عندفنك حية
بلعات شادية ريقها وقالت
الحل هوا هادا اللة مولاتي .. خليت ليك الرسم واخا غرني الشيطان وجابهتك
جراتها روح الندى  حتى لعندها وقالتها شنو كيعني هاد الرسم .. هضري شنو كيعني
بلعات شادية ريقها وقالت
ليها كيعني باللي سيدي. يور ..خاصو يسبق الموت قبل متوقع .. حيت فكفك  الموت محتوم .. والحل هوا يتحقق ..خاصو يتدفن ..وتشرق عليه الشمس ويضوي عليه القمر ..من بعد يخرج من القبر هادا هوا الحل
زيرات روح الندى عليها بغضب وقالت وانا كيفاش غادي ندير لهاد الحل ؟ كيفااااش؟واش انا عندي فروج ؟. واش عندي قنية انشدها ندفنها شوية ونخرجها؟كيفاش غندير نخرجو من هاد التنبؤات ديالك الكحلة هضري
ضربات روح الندى فخادها وقالت كتمشي وتجي
اوييلي وحدي على ندفنو ؟!!! كي غندير ليه ندفنو وهوا قد الصور دالمدينة ..لالالالا منقدرش.. ندفنو ونطمرو اويلي منقدرش منقدرش ندفن ولدي بيديا واخا غير بالضحك..شوفي ليا شي حل من غير هادا .. ولا عاودي شوفي ليا شي خط اخر
جلسات عطاتها يدها وشادية كتجمع شعرها المنتوف وتمسح فخناينها ..طلات على اليد وقالت
الحرب دازت الاللة اللي كانت طالعة ليا ..وخسرتي فيها
تنهدات روح الندى وقالت : خصرت فيها بصح مع وجه الويل مع كحل السعد اللي خارج ليا فعودي.. خسرت اكبر خسارة فحياتي واللي سعيت ليه كامل جا كوش عليه ودار وادي تحت يدو
هزات شادية يدها وقالت
ايوا الحمد لله خرج هادشي صحيح..بقا ليك غير هاد الدفين خاصو ولابد يتم
شنقاتها عليها روح الندى مخرجة عينيها وقالت. ليها قولي ليا شي حل من غير هادا.. شوفي ليا شي واحد يموت بلاصتو ونلبسو لباسو ونعلق ليه حتى التاج على   راسو ..المهم نتفك من هاد الموصيبة
تنهدات شادية وقالت
نجربوها الاللة .. نجربوها ونشوفو واش باقا غطلع لينا ولا تفكات
حركات روح الندى واسها وقالت ليها كملي انا الصباح غادي نحضر هادا اللي يموت بلاصتو سيري كملي
طلات شادية على يدها وقالت ليها
قلبك مضيووم ومغبون وحلول نصين .. جرحو عميق وطري من هدي سنين
خرجات فيها روح الندى عينسها وقالت ليها ونتي مالك ومال قلبي شوفي ليا شنو يوقع شنو غيجرا باش نرد بالي من اللي جاي.. شوفي ليا ولاد الحرام اللي ضايرين بيا شكون .. وشنو غيوقع
قرمات شادية كتشوف وقالت .. هاد الساعة السما صافية والبحر هادي.. بلاتي.. بلاتي؟!!! هيييييه بسم الله الرحمان الرحيم … مرى الاللة .. قد وقامة شان وهمة فسيفة الشيطان .. واقفة اي فالطريق وعوالة على خزيت .. مضمرة ليك على الشر وفقلبها الضغينة .. هاهي كضحك ليك ..كضحك ليك بسم الله الرحمان الرحيم..اللي شافها يقول ماكتحرك الدجاجة من بلاصتها ..وهي كتوجد ليك الدقة  الساكتة اللي  ماتخليكش تحلي عينك الاللة
خرجات روح التدى عينيها وشافت فيها قالت ليها اوييلي شكون هاد بنت الحرام؟؟ كنعرفها ؟
شافت شادية وقالت ليها اييه الاللة ..وقريييية ليك هاهي..هاهي غير حداك خدامة ليك ..
ودت روح الندى بالزربة وقالت : شنو خدامة شنو واش خدامة ليا السحور ولا داكشي المعقول شمن خدمة ؟ وصفيها ليا كيف دايرة؟
حنات شادية راسها وقالت ليها قريبة من قلبك الاللة .. قريبة منو بزاف وباغا تاخد كلشي باغا تشطب كلشي .. باغا تخليك الله كريم ولا تصفيها ليك فمرة .. جاياك من جهة العدو الحبيب.. ايييه .. شكون هوا العدو الحبيب الاللة
هزات روح الندى يدها وقالت
اشمن عدو حبيب حيدي عليا وكملي شكون هاد بنت الحرام ؟؟ واش من جيهة هاد العدو الكحل؟
شافت شادية وقالت ليها من جيهتو وقريبة ليه ..جاياك فالطريق ردي بالك ردي بالك راها جاياك  ..خطك هنا حبس الاللة خاص شوية من هادشي اللي تقال يفوت باش يطلع الخط حديد
جمعات روح الندى يدها وقالت
شوفي انا ماكرهتش تقراي لولدي الخط نعرف واش طالعة فيه الموت ولا طالعة غير عندي
تخلعات شادية وقالت ليها وكيفاش غادي نقرا ليه هاد الخط وانا منقدرش نوصل حتى للطريق منين كيدوز الاللة
سدات روح  الندى عينيها  عاضة فالصبر وقالت ليها شوفي. ياك كتحلمي تزوجي بيه ومانعرف شنو .. انا غادي نعطيك عشية .. عشية وصافي معاه.. الى ماقريتيش ليا فيها خط يدو وديتيها قالشي لاخر  غنصفيها ليك بلا منشوف وجهك سمعتي.. واخا نتي ماشي ديالو اذلالة العبيد
هبطات شادية راسها بأسى وقالت مترددة
سمحي ليا الاللة ..سمحي ليا كدبت عليك .. انا باقا عزبة ومكاين والو من داكشي اللي قلت ليك .. غير من خوفي على ختي تخرج الزنقة ضحيت وما جا فطريقي غير هاد التضحية ..
هزات روح الندى يدها كاع  ما داتها فهضرتها وقالت ليها كتشير تمشي
سيري سيري دابا  سيري.   وفكري غشنو قلت ليك وعقلي.. يالاه رجعي بحالك.. عندك الزهر واقفة عليك اما كن وريتك سخونيك الراس باش كترجع