ذو التيجان 👑مكتملة👑

👑الجزء 34👑

ناضت من الغيبوبة المؤقتة ويدها مزال مزيرة على الخاتم والسترة دولدها .. لقات كلشي داير بيها وحلات عينيها شافت فيهم وقالت بصوت مقطع
خليوني ناعسة ..علاش كتفيقوني خليوني كما انا .. اش بغيتو عندي
شدات فيها عبدية وهي كتبكي مشوطة على ماجرا وهي براسها خاص  اللي يواسيها .. اما لاللة روح الندى حالتها تشفي العدو .. حالتها وصلات للخر ديالها وبقا فيها غير الفتات .. تحطمات وتكسرات كأنها صومعة ورابت ..ناضت وقفات قدامهم  كتهضر بوحدها والكل مخلوع عليها وماقدروش يفرزو كلامها .. غادية جارة قفطانها البيج دالموبرة المحلول من الجناب  حتى للخصر والقميص تحت منو شفاف مشبك ..لا حزام لا تاج لا حتى حاجة معلقة .. وجهها ابيض بحال السحابة وفمها ناشف وشعرها محلول بحال الزربية  كحل ورا ضهرها وغادية كتجر فالبلعة دالصم وتردد

يور .. شادية .. الرسم .. الخط .. شادية .. قتلوه ..قتلو ولدي
بقات غادية وسط القصر وكتهضر وكاع العبيد والخدم واقفين مخلوعين وتابعينها خايفين طيح ولا توقع ليها شي حاجة ..
بقات هاكاك غلدية بلا عقل تقول ناعسة وعينيها محلولين .. خرجات للساحة ووقفات كتشوف قدامها وكتهضر كأنها كتشوف شي واحد وكتهضر معاه ويديها طايحين .. فجأة سمعات صهيل الخيل وصوت الركض فالارض وحلات عينيها تلفتات بالغرض البطيء .. شافت عود الامير راجع ووالسرج على ضهرو خاوي وداخل كيجري حتى وقف قدامها وهز رجليه فالسما وضربهم مع الارض .. بقا كينقز قدامها ويصهل ويهز رجليه حتى كيقرب ينزل عليها وكيرجع.. مدات يديها شدات فيه هبطاتو وحطات وجهها على وجهو عنقاتو وعينيها محلولين كأنها تسطات.. بدات كدور يدها على وجهه وتعضر والعود كينفخ ويسوط ويضرب برجلو فالارض والكل اللي حاضر واقف كيشاهد وكيبكي .. هزات راسها بدات كدور بيه ودوز يدها   حتى دارت على دم  فوق السرج وهزات يدها كتشوف فيها  بملامح شاحبة .. بغات تركب على الخيل لاكن شدات فيها عبدية  متخلاتهاش ..نترات روح الندى يدها وطلعات فوق الخيل ومشا كيجري بيها في حين شار ذو الفقار براسو لبعض الرجال وركبو الخيل تبعوها وهي غادية كتجري  فوق الخيل والشعر والتوب كيطير فالسما . فهاد الاثناء كان واحد  من رجال الملك كيراقب بوابة القصر الكبيرة وشافها خارجة ومشا كيجري يخبر الملك محمد اصيل اللي كان مزال فالرياض جنب الامير . تحنا قدامو التابع ديالو وقال
مولاي.. الملك روح الندى خرجات من القصر فوق العود دسمو الامير .. باين على حالتها تشيرات ولا خرجات العقل   .. ماعليهاش سيفة الملكة ..تقول جنية وتسيفات فسيفتها
ناض الاصيل وقف وقال
اشمن طريق  سلكتات؟
رد الاخر وقال : ماسالكا حتى طريق .. تقول الخيل اللي مسلكها
خرج الاصيل على وجه السرعة ركب العود ديالو وعطا وجلو للريح كيجري والغبابر كطير والعجاج موراه  عرفها فين مشات وعرف العود فين يكون داها .. مشا كيجري لحق عليها للبلاصة فين تم صيد الامير ولقاها تما جالسة على اثار الدم فالارض  فالمكان اللي تشد فيه وكتلعب بصباعها فوق التراب والتوب وراسها مدلي والخيل حداها كيشمشم فالارض
نزل من فوق العود غادي جيهتها كيشوف فيها  وفالحالة اللي وصلات ليها وشكوكو كتتأكد واليقين كيدخلو وشاف السترة فيها شاداها وحالتها بحال اي ام فقدات ولدها الوحيد ..
هزات عينيها  من  رجليه وهي طالعة حتى لعينيه وناضت وقفات  كتعتر فجلايلها وبقات كتشوف فيه  مطولا وحتى وقف قدامها كيشوف فيها وفالحالة اللي وصلات ليها .. غرغرو عينيها وقالت والضحكة كتخرج من فمها  ببساطة
مااات .. صافي كلشي تسالا
عقد حجبانو وقال : شكون اللي مات
قربات منو شافت فيه مزيان  وقالت
ولدي … ولدك .. ولدك اللي كتقلب عليه ..مشا .. مشا وبقيت انا.. هانتا شوف..شوف شنو خلااا من موراه
تصدم وتأكدات جميع الشكوك ووصل اخيرا بعد معانات وبحث طويل لحقيقة ولده وانزاح الهم وارتاح القلب لاكن الحقد بقا عامي ليه العنين وقال
نتي السبب.. نتي اللي وصلتي راسك لهاد المواصل .. هانتي خسرتي كلشي ..رتاحي دابا
عطاتو بالضهر كضحك ورجعات جلسات فوق الرملة كتلعب وكتغني وتشطب بداك الطرف ديال التوب وهوا كيشوف فيها مصدوم ..  فيها .. ناضت جمعات اشلائها ومشات جرات العود من لجامو غادية بيه فالطريق بلا متعرف فين غادية.
تبعها الاصيل وقف قدامها وقال بغضب شديد
خبيتي عليا ولدي حتى كبر ورجع راجل ..  وقابلتيني معاه عيني عينك ولعبتي بيا وضحكتي عليا كما بغيتي ..  وقلت ليك اروح الندى ماتلعبيش معايا راني ماشي قدك ..ونبهتك ونتي تماديتي ..حلفت باش نهار نعرف ولدي منعقلش عليك وغادي نصفيها ليك فمرة ..ولاكن اللي فيك دابا كافيك ..هادا اكبر عقاب وعذاب اكثر من الموت
بقات كتشوف فيه وهضرتو دخلات من ودن وخرجات من ودن وماعطاتو حتى جواب وماكانتش اصلا مركزا معاه وحتى العقل اللي يركز مكاينش .خلاتو واقف وزادت جارة العود وغادية سارحة بيه وهوا واقف فبلاصتو عاطيها بضهرو وكيشوف قدامو وينهج .. برد ليه القلب وكانت تعابير وجهه كتشفا فيها بالمعقول..زاد  وخلاها حتى وصل للعود ديالو ووقف جمع القبضة ديدو وجبد واحد الخنجر  بخفة يدو من حزامو وبدا كيضرب بيه الشجر المدلي حداه ويخدش الجدع وغرسو فواحد الشجرة بغضب وتعصر حتى خرجو عروقو ورجع هز راسه فالسما ونتر الخنجر من الشجرة بغضب حطو فجنبو وضار وراه مشا تبعها جرها من يدها وجر العود ورجع بحالو ركبها قدامو  فوق العود وهي كسدة بلا روح   وشد اللجام لحصان الامير وانطلق بيها كيجري  للرياض فين ناعس الامير ودخل العود ودخلها جارها من يدها نيشان لواحد البيت لاكن مابغاتش تدخل .. هوا كيدفع وهي كتدفع وضرب فاللخر طلقها خلاها مشات جلسات جنب حصان الامير وتكات عليه كدوز يدها وتغني. ليه .. بقا الاصيل كيشوف حتى عيا  وخلاها فديك الجريدة جالسة ووصا عليها الحراس  وتلفت كيسول على حكيم .. قبل ميكمل السؤال جا حكيم كيجري وراسو كيسيل بالدم وقال
مولاي.. مولاي .. سمو الامير هرب
دفعو الاصيل ومشا كيجري لبيت الامير لقا غير الفراش خاوي والحراس كيتلواو كل واحد فقنت .. طج الاصيل من حوايجو بغا يطير وبدا كيغوت با يتبعوه .. ناضو كيجريو يلحقو عليه  ومنهم حكيم لاكن وقفو الملك وقاليه نتا غتمشي للقصر تجيب شي وصيفات يقابلو روح الندى .. وجلس هنا حضيها  وعنداك توقع ليها شي حاجة ..هاد المرة والله منرحمك احكيم .
خرج من الرياض كيجري وتلاقا واحد من الحراس راجع عندو وحنا ليه الراس وقال
مولاي .. سمو الامير هرب على العود ديالك
سد الملك عينيه وشد راسه وهزو فالسما وقال بغضب
جيب اي. عود الحمار تحررك