صبح الصباح وصبحات عبدية جالسة بديك الحالة .. بغات تخرج ولاكن خافت تحصل و بلا شك رجالك الاصيل غيبقاو يتختلو بالقبيلة حتى يطيحوها فالمصيدة ..وهاد المرة الى حصلات ..غيعصرها الاصيل فالمعصرة دالزيتون حتى تقطر الحقيقة بزز منها .
تنهدات ويدها على خدها جالسة ومسعودة كتخوي اتاي فوق الميدة والبغرير والخبز محطوط وقالت ليها وعينيها كيمشيو ويجيو ويشطحو فبلاصتهم وتغمز وسط الكلام بلا نخازات
مسعودة: هي دابا شادية وعويشة !! فالقصر مع لاللة ولاتي ومتتعين ومخليني انا هنا. فهاد القهرة !!
تنهدات عبدية من قوة الهضرة والبحث ديال مسعودة وقالت
راهم فبلاد بعيدة ..قطعو الجبال والبحور ماعندهم كيف يديرو يوصلو ليك
خبطات مسعودة البراد مكمشا شنايفها اللي بحال الخط وقالت مخرجة عينيها
ايوا الى ماعندهم كي يديرو يوصلو ليا .. انا الاللة غادي نوصل ليهم .. وغادي نقطع الوديان والبحور حتى نلقاهم .. تي عطيني غا النعت الصحيح وانا غنعرف كيف ندير حتى نوصل ليهم
شدات عبدية راسها اللي تنفخ بالهضرة دمسعودة وقالت
راني قلت ليك الاللة راهم فبلاد بعيدة واش غير اجي وقطع الوديان والبحور
حطات نسعودة بونية على الميدة وقالت
يا والله حتى نوصلهم .. تتي غا قولي ليا سميتها وتسوخري اللور .. ايلا مايلقاوني واقفة ليهم في باب الخيمة راني ماي مسعودة
تنهدات عبدية وقالت : اشمن خيمة الاللة هادا راه قصر ..واش عارفة شنو هوا قصر؟؟ قصر بحال المدينة وفوسط مدينة واش غير اجي ودخل ليه
دق الدقان وهما كيتحدثو وتقفزات عبدية مخلوعة قالت ..
مولاي الاصيل هادا
ناضت مسعودة تشوف شكون وقالت ليها. تي اشمن اصيل ولا حصير .. راه هلل الهلال والبهايم خصها تخرج ترعى وناس ناضو يقضيو شغالهم
ماخلاتها عبدية تحل الباب ووقفو بجوج كيسولو شكون حتى سمعو صوت راجل قال
ذو الفقار اعبدية
دفعات عبدية مسعودة حيداتها من قدام الباب وحلات طلات عليه لقاتو ملتم ولابس لباس التجار وجار حمارة عليها سلعة النسا وشاف فيها من تحت لثامه وهبطو شوية اكد ليها شكون هوا ولاح ليها كموسة قاليها
حدا باب المسيد اعبدية
شدات عبدية الكموسة ورجعات اللور ومشا هوا كيعيط. ها السواك ..ها الكحل ..ها الداد ..
سدات عبدية الباب وحلات الكموسة لقات فيها حوايج الرجال وعمامة وجبداتهم لبساتهم بالزربة ومسعودة كدور بيها وتسول
قولي ليا فين بناتي.. قولي ليا ولا راه غندير صبعي فودنيا ونعيط على اهل القبيلة نجمعهم عليك ..
جمعات عبدية حوايجها بالزربة مخلوعة وقالت ليها
شتي نتي ..راك مزال معارفك بالخطر اللي داير بينا ..البولة جبتها فسروالي من الاندلس بالخلعة حتى لعندك ..ولاكن نتي سرك تكوني بلاصتي باش تعرفي علاش كنهضر ..بغيتي يالاللة تعرفي فين بناتك؟؟
ايوا تبعيهم للاندلس ..لقصر قرطبة تما غتلقايهم بسلامة عليك
خرجات عبدية كتجري ملتمة بحال الراجل ومشات كتختل هاربة للمسيد دالقبيلة ولقات تما ذو الفقار دوزها بلا ميعرفها حتى واحد وطيرها لقصر الامير يور اللي تما ودخلات كتجري وتسول عليه قالو ليها خرج للصيد بحال العادة .
استقبلوها الخدم والحشم اللي تما وتعجبو لهاد المجية ديالها لاكن خبات وطمرات كلشي ومابغات تهضر مع حتى واحد ..انفاردات هي والقائد ذو الفقار فواحد البيت وسدو عليهم كيكتبو مرسول للاللة روح الندى
لاللة مولاتي.. تبعت الخط كما قلتي لي وعلمتيني..الحمد لله درتي بحساب هاد النهار وعلمتيني باش الى شي نهار طحت فيدو نرسلو للنعث اللي عطيتني .. الحمد راني رسلتو ومشا برجلو على رجلي ..وتما لقيت الحمية اللي فكاتني ودابا راني فلت من يديه وراني فأمان الله فقصركم فتاروادانت حتى تخبريني واش نجي ولا نبقا هنا .
لوات المرسول وجمعاتو وعطاتو لذو الفقار اللي واجب عليه يرجع لعند الملكة من بعد ما تمم المهمة بنجاح وسبق الاصيل للنعت وحط ليه تما مفاجأة اللي تلفاتو على طريق عبدية
كمشات روح الندى المرسول من بعد ما قراتو وذو الفقار واقف قدامها وضحكات حتى دمعو عينيها وعطاتو بالضهر غادية جاية كتجر فقفطانها اللي بلا حزام وقالت
ااااه يا ربي .. تشهييييت نشوف وجه الاصيل ..تشهيييت نشوف وجهه هاد الساعة وهوا غيطرطق من حر الشمتة .. امنيتي نشوف وجهه هاد اللحضة ..وحتى الى مت بعدا نموت شبعانة ضحك …
تنهدات ولوات المرسول غادية تحرقو فالمدفئة اللي قدامها وقالت
..باااقي ماشفتي والو امولاي.. مستاهن بعقلي وقوتي ..ولاكن غادي نوريها ليك غير صبر ..صبر عليا وغتشوف شنو مزال ندير فيك .
مشات جلسات دارت رجل غلى رجل كتبات الرد لعبدية وأمراتها تبقا تما مع يور حتى تقرر فأمرها وناضت هزاتر
عطاتولذو الفقار وهزات حاجبها وقالت ..
رسل هاد المرسول لعبدية .. ونتا اذو الفقار عند اكرامية على هاد الخدمة النقية اللي درتي ليا
لاحت ليه كموسة دالفلوس ليدو شدها وحنا راسو باحترام كيشكرها ..
ابتسمت وقالت ليه بكل سعادة وارتياح
هادي مهمتك الثانية … بغيتك تجيب ليا خبار الحرب اللي بين الاصيل وملك القوط … بغيت نعرف خبار النصر ديالهم قبل ماتوصل للاصيل.. بخيتك تكون بحال البراق ..
تكلم ذو الفقار وقال : ولاكن حنا مزال ماعرفناش واش غينتاصر ولا لالا الاللة
ضحكات بسخرية وقالت : غينتاصر كون متأكد .. نتا غير جيب ليا خبارو … الاصيل مستحيل يخسر هاد الحرب واخا يقدم فيها اغلى مكيملك .. حيت ماعندوش الوجه يقابلني بالفشل ديالو .. هادا علاش غادي يربح الحرب وغيسحق ديك الارض .. نار الغضب اللي شاعلة فيه هاد الشهر بسبب الشمتة مغطفيها ليه غير خبار النصر .. اما الى خسر … صافي غينتاحر. هههه
ضواو انوار القصور واصوار القصر برقات .. ورح الندى مقاداها سعادة .. ضحكات ليها الايام والفرح والسعد فالقصر غير كيتسارا من قنت لقنت ..ايوا اله يدومها فرحة .. ماشي غير عليها ..على جميع اهل القصر .. كي شفتي دابا القصر مافيهش غير العرب.. فيه حتى لغرب .. فيه حسنوات فيهم اللي سلمو وفيه اللي مزال ماسلم .. الزين مشتت فالقصر .. ويلعبو مع العبيد والخدم .. يرميو الورد ويرشو بالماء .. يدورو على نافورات القصر ووقهقهاتهم واصلة حتى للجردة ..شي داخل شي خارج ..شي كيشطح وشي كيغني ..لا رجال غراب يدخلو لقصر ولا ضياف .
نزلات روح الندى كتمختو وتسارا وضحك مع الحريم وهما كيلعبو وكتسنط للعود والشعر وانغامه .. وقفات الوسط جنب نافورة كتشرشر بالماء وقالت كضحك مع البنات
يالاه يالاه …تجمعو قدامي البنات براكة من اللعب ..
تجمعو البنات كيجريو قدامها وكاين اللي مشات بالفرحة باست ليها يدها وكل وحدة كفاش عبرات على الحب ديالها لملكتها … تجمعو العبيد وتصافو قدامها ووقف عابد جنبها كيقاد ليه الحريم حتى تقاد كلشي وبقات غير الروينة ديال الورد والمخاد والتواب باش كيانو كيلعبو ويشطحو مشتتين فارجاء المكان ..
ابتسمت وهي كتشوف فيهم وقالت كضحك
يخليلي الزين اللي عندي والبيوضة .. ايوا البنات مخاصكمش تبقاو علطيينها فير للعب والضحك والتنقاز .. لازمكم تتعلمو شوية اللي ينفعكم .. وعابد هوا اللي غيتكلف بتربيتكم الغزالات .
دخل اثنائها عبد من العبيد فجأة كيجري وهبط راسو قدامها وقال
لاللة لاللة ..مولاي الامير سلطان ابن الملك حاكم غرناطة فطريقو لزيارتكم الاللة .. وراه قرب يوصل.
ابتسمت وهزات حاجبها ضحكات وقالت
ايوا وهاد الزيارة ..بخبار الوالي ولا خفية .؟ ههه
عطاتو بالضهر كضحك وقالت كتنهد
ااااح عليك الحمرا ومادايرة فيا .. مزال غادي نطيرك للاصيل ونخليه يشوف فيك غير من بعيد لبعيد .. كملو لعبكم البنات ..وفاش يجي الامير رحبو بيه وماتخليوهش يقنط ..حتى نوجد ونهبط
لاحت ليهم بوسة فالهوا ومشات كتمختر وخلات الموسيقى والزين كيتراقص وحتى العبيد اللي مشاو مع هوا البنات من نهار حلو عينيهم كيضحكو ويبسطو معاهم بحال العادة ودقة فيا دقة فيك جري عليا نجري عليك والضحك كيسرح مع الهوا فالسماء
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
