خرجات لعشية مكفسة عند عويشة ورجعات كتزطم فحوايجها وتبكي.. اما لاللة روح الندى رجعات لجناح الامير وماقدراتش تصبر وتسناتو حتى دخل لقاها جالسة وقلب وجهه ..لاكن هي مابقا كايبان ليها حتى واحد من غير الجارية اللي جاب معاه .. ويغضب حتى يعيا ويتعصب حتى يعيا ..المهم تعرف مكان الجارية ويوقع الي بغا يوقع مايكونش كفس من اللي غيرق الى مشا حتى عرف الحقيقة ولا رسلو ليه رسالة كما رسلوها ليها ..
وقفات قدامو عيني عينك وهزات راسها قالت ليه فين سيفطتي الجارية اللي جبتي معاك ؟
تلفت شاف فيها وعقد حجبانو كيتساؤل والمنشفة مدورة على خصرو ووحدة اخرى فيدو وقال
علاش كتسولي عليها؟ شنو بغيتي بالضبط فهميني
جمعات النفسوالقوة وقالت
غتقول ليا فين سيفطتيها .. وفين مشات
عطاها بالضهر غادي حتى تقولي ليا علاشبغيتي تعرفي
مشات وقاات قدامو وقفاتو وقالت
انا مك ..وكنخاف عليك .. وبغيت نعرففثن مشات باش نعرف شنو تحت راسها
مشح يديه وقال مافراسها والو .. راسها خاوي كيصفر وانا قريت اشنو اراسها ..تهنيتي دابا
ربعات يديها وقالت ماكيهمنيش اشنو قريتي انا خاصني هاد البنت ..ومكانش خاصك تخرجها حتى تستاشر معايا انا اللي كنحكم وخاصك طيعني
كمش الفوطة ورجع وجهه احمر وخرج عينيه قاليها صافي عييت..صافي بزاف عليا هادشي.. ديما كديري اللي فراسك بلا متشرحي بلا ماتعطيني تبرريرات بلا والو .. نتي اللي كتحكمي؟. واخا حكمي ..هانتي حكمي كيف حبات خاطرك .. من اليوم غادي تحكمي وانا غنطيع صافي ..خليني نلبس عليا دابا
خرجات وخلاتو كيلبس ومشات لجناحها هازة راسها ومقصحة قلبها وسدات عليها حتى صبح الحال وتنادم معاها الحال وندمات على الكلام اللي قالت وخرجات من جناحها سبقات منو هوا الاول ..مشات لجناحو تصبح عليه لاكن مالقاتوش . وفراشو بقا كما هوا مرتب منعسش فيه .. مافهماتش شنو وقع وبقات كدور فالبيت لقاتو كما هوا .. الذهب فبلاصتو والمال فبلاصتو وكل حاجة فبلاصتها ..حتى الحوايج بلاصتهم من غير اللبسة دالصيد اللي مكايناش..ضنان انه خرج يصيد لاكن استغربات للفراش اللي بقا كما هوا ..خرجات عند الحراس اللي فباب جناحو سولات عليه خبروها باللي خرج بالليل ومارجعش .. تزاد معاها الزايد بدا الشك كيدخلها وبدا الخوف كيركبها وقلبها كيجري ويتسارع ورجعات دخلت لجناحو كتقلب حتى حسات براسها زطمات على شي حاجة وهبطات راسها شافت فالارض لقات رسالة ..هزاتها قدامها كتقرا لقاتو كاتب ليها
نتي الري ونتي الشوار . نتي ختاريتي شنو بغيتي تكوني ..وانا ختاريت شنو بغيت نكون .. من اليوم كل واحد فينا فطريق
طاحت الورقة من يدها وطاح هم العالم على قلبها حلات فمها كتنفس تقول الروح كطلع حتى جات فالارض على طولها ويدها على صدرها كتحاول تنفس.. دخلات جارية من الجواري دالصباح لجناح الامير اللي كتساعدو ولقات لاللة روح الندى طايحة وبقات كتغوت جمعات عليها الخدم والوصيفات هزوها فوق الفراش وعتقوها بالماء وبداو يقراو عليها القرآن وهي كتبكي وكتجر فوسادتو وتعنق .. تشوطات حتى بقا فيها غير الرماد وسمحات فكلشي وهجرات كلشي وتوحدات مابقات كتسول فحتى حاجة ولا هامها شي حاجة .. لولا عبدية و وذو الفقار اللي مسيرين شؤون القصر والديوان لا تخرب كلشي وبقات غير السمية .. حتى الحياة فالقصر ولات مملة وحتى جناح العمبر خيمات عليه سحابة كحلة ..الهضرة بقات كدور حتى وصلات للملك محمد اصيل ووقف كيضحك فجناحو وقال لحكيم
مزياان .. مزيان هادشي اللي وقع احكيم .. هادي الفرصة اللي كنت كنتسنى ..حا الوقت فين خصنا نتحركو
هبط حكيم راسو وقال
امر امولاي
رفع الملك محمد اصيل راسو وقال
هانا غنوريك الدقة اللي مكتنوضش العجاج .. غدا احكيم الصباح غادي تشد طريق نتا واتباعك لقشتالة .. وماضيعوش الوقت .. عندكم شهر نبغي العجاج ينوض .
ضرب حكيم على صدرو وخرج وبقا الاصيل واقف كيتأمل من شرفة جناحه فاتجاه قرطبة وقال
قربات نهايتك الحية .. وغنشدك من رقبنك ونخرج منك كاع العداب اللي دوزتي عليا ..
تنهد وخرج من جناحو ااح عليه عبايتو ووصادف لاللة جوريا فالطريق عندو وجهها اصفر ..حدرات ليه راسها وقالت
مولاي ..سمعت باللي وقع شي مشكل بين الملكة روح الندى والامير يور ..سمعت باللي تنازل على كلشي وخرج من القصر
تبسم رتب على كتفها وزاد مع الطريق خرج طلع على الخيل ديالو وشد الطريق حتى ليشبونة ودخل للقصر القديم التابع لبلادو .. استقبلو المجيئ ديالو المفاجأ وبالزربة قادو الترتيبات ورافقوه حتى لجناحو الخاص ووقفو مصافين قدامو . هز راسو فالسما وامر يحضرو ليه سبأ.. خرجو فالحين جهزوها وحضروها ليه وسط جناحو ..دخلات حادرة راسها كضحك وطاحت عندو رجلو باست ليه يدو ووقفها كيشوف فتعابير وجها الجميل اللي عمرو شاف بحاله ..دوز يدو على شعرها وقال
وفين وصلتي فالتعليم ؟
تبسمات ببرائة وقالت
كنتعلم باللي والنهار امولاي .. هادشي كله من فضلك من بعد الله سبحانه وتعالى
تبسم وتفاجأ وقال ::باين كتعلمي وراسك خفيف.. وحتى الدين شديتيه من الطريق الصحيح
تبسم وقال: جلسي اسبأ.. وعاودي ليا شنو وقع معاك بالضبط انا جاي باش نعرف منك اشنو وقع
جلسات جنبو بدات كتحكي وتعاود حتى سالات وسكتات كتشوف فيديها
حرك راسو بالايجاب وقال
حتى واحد معارفك هنا .. باش نتفاداو بحال هاد المشاكل اللي وقعات .. المهم.. كيفاش تعاملو معاك فقصر الملكة روح الندى؟
تنهدات وشردات قدامها وقالت : عاملو بحال الاميرة امولاي .. وصاهم عليا سمو الامير الله يجازيه بالخير ..ماخلاوني مخصوصة من حتى حاجة
هز الملك محمد اصيل راسو وقال : كيفاش تعامل معاك فاش عرفك من عندي
هبطات راسها وتنهدات وقالت : فالحين قالي رجعي … وماتناش معايا الكلام امولاي..
حك فلحيتو وقال: ماقصاش عليك؟
حركات راسها بالنفي وقالت بلعكس.. عمرني شفت شي امير حنين بحالو .. متواضع .. امير مع الامير وفقير مع الفقير ..غامر بحياتو ونقدني من القطاطعية .. واخا مهضرتش بزاف وماجلستش معاه بزاف .. ولاكن حسيت بيه .. وحسيت بيه اكثر ماباغينيش.. ماطمع فزين ما طمع فصغر .. ماتغرش .. كاع الدياب دالسوق اللي شافوني طمعوفيا .. اما سمو الامير فما تلفتش جيهتي.. واخا شريت راسي ليه وعطيت راسي هدية . حررني وانا من خوفي لسقت فيه ..حسيت معاه بالامان ..حسيت بيه غادي يحميني ..واخا بززت نفسي عليه . فعلا مابغانيش امولاي ورفضني وفوق نفسه مشيت معاه .
تنهد الملك ومسح عاى راسها وقال
الاحساس مكيخونش اسبأ.. كملي تعليمك .. الجمال ماشي هوا كلشي..العقل هوا كلشي.. لعقل اسبأ.. والى كان الراس واعي ومتعلم كيفوق الجميع العقول.. والتباتة..والرزانة .. والصمت .. هادو اهم الاشياء خاصك تعقلي عليهم .. نوضي كملي تعليمك راه مابقا ليك والو وتصومي ..يالاه .
ناضت باست ليه يدو وخدات الرضى وخرجات من جناحو خلاتو شارد ورجع بيه الزمان اللور تفكر روح الندى فاش صامت عامها الاول ..
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
