جمعات قوتها مابغاتش ضيع الوقت قالت ليه السي يحيى .. انا جيت وجبت ليك جوابي
شاف فيها قاليها الله يسمعني خبار الخير الاللة روح الندى
بقات ساكتة مطولا وقالت ليه انا قابلة
قبل مايعيش الفرحة قالتليه ولاكن بشرط
قاليها شرطي وامري الاللة
قالت ليه غنتزوج بيك ..ولاكن فالسر
استغرب قاليها كيفاش فالسر؟
قالت ليه حتى واحد مايسيق الخبار
قاليها ميمكنش !!! الزواج راه خصو الاعلان
قالت ليه انا قابلة ..ولاكن ولدي لا ..الى غتقدر ضحي وتصبر معايا يكون حسن ..هادشي الى كنتي بصح عاشق صادق كما قلتي
بقا ساكت كيشوف فيها ماردش عليها وجاه داكشي فشكل خصو تفكير..لاكن روح الندى ماعطاتوش مهلة يرتب افكاره وشافت فالصمت ديالو الرفض وجمعات كبريائها وناضت قالت ليه خليت ليك الراحة السي يحيى ..حسبني ماقلتليك والو
وقفها قبل ماتمشي قاليها عشقك صادق الاللة روح الندى؟
رقفات وتلفتات عندو شافت فيه مطولا قالت ليه شنو اللي غيخليني نضحي براسي وبيك ونقدم على هاد الخطوة؟ شنو غيكون الدافع فنضرك؟
بقا كيشوف فيها وتبسم قاليها ماشي خسارة فيك التضحية الاللة روح الندى ..شرطك على عيني وراسي واللي قلتيها هيا اللي تكون
جات عيشة هازة واحد لاللة وماليقصرية ديال الطعام بالكديد وسبع خضاري حطاتها ليهم وشار ليها القاضي بيدو قاليها مرحبا ليك الاللة ..لا كلام على طعام
ضحكات روح الندى وجلسات قالت ليه باش يدوز ليا رسل للامام يجي ياكل معانا
بقا القاضي كيشوف فيها مبسم من عينيه وقاليها هي اللولة الاللة روح الندى
شار بيدو للخادم ديالو رسلو يجيب الامام ومد ليها معلقة خشبية قاليها نشركو الطعام هوا اللول
شداتها وهبطات الملحفة كتاكل وهوا كيشوف فيها فكل مرة وعينو جهة الباب حتى كلاو وسالاو عاد وصل الامام ودخلوه لبيت اخر تجمع فيه هوا والقاضي كيهضرو على سبب الدعوة وعيطو لروح الندى دخلاتها عيشة عندهم جلسات بعيدة ورا ستار كحل شفاف
بدا الامام كيسألها قاليها الحالة ديالك الاللة ..حرة ولا جارية
تكلمان قالت ليه حرة اسيدي
قاليها مسلمة ؟
قالت ليه مسلمة
قاليها مزيان
كمل الاسئلة ديالو وقاليها واش قابلة بالسي يحيى المنصوري زوجا لك على مهر قدره سبعين قطعة
قالت ليه بصوت خجول اه اسيدي قابلة
رجع للقاضي طرح عليه نفس الاسئلة قاليه قابل وتزوجو وقراو فاتحتهم وناض الامام تبسم ومد يدو للقاضي قاليه مبروك عليك السي يحيى ..بالرفاه والبنين ان شاء الله ..وان شاء الله زواجكم غيكون مبارك بهاد اليوم المبارك
تبسم القاضي وشكرو وخرج معاه في حين حيدات روح الندى الثام تنفسات الصعداء واستوعبات شنو دارت وسمعات زغارت عيشة جايين والمباركات ليها وتبسمات مامصدقاش راسها انها فعلا تزوجات وتجاوزات جميع الخطوط الحمراء وتجرآت لاقصى لحدود وتحدات الكل واولهم نفسها
رجع القاضي لعندها وخرجات عيشة مهبطة راسها خلاتهم بجوج وقرب ليها بعيون براقة واقف وقفة مستقية وصدرو عريض مستاقم هبط ليها داك الملحفة وقرب باس جبينها بشوية وقال ليها
هادا اسعد يوم فحياتي الاللة روح الندى.. الى بغات تجي الموت غير تجي
شافت فيه قالت ليه مغتجيش..مزال العمر طويل ان شاء الله ..حنا مادرنا غير الحلال السي يحيى
فتح كف يدو ليها كيتأمل فملامح وجهها قاليها ربي كيبغيني..يسر ليا فكولشي ورزقني فرحة ماكنت كنتاضرها ..
مدات ليه يدها وسط كفو وهزها باسها وسد عينيه تنعم بملمسها وشاف فيها قاليها طلعي ترتاحي فبيتك
قالت ليه بابتسامة خاصني نرجع للقصر.. ولاكن كنواعدك غادي نرجع غدا
سكت ماقال والو وباس يدها قاليها على خاطرك الاللة روح الندى ..
دارت الحايك على راسها وخرجات مبسمة مشات وبقا القاضي واقف فمكانو كيتنهد وعيط على عيشة قاليها عاودي بيت لاللة رو الندى من جديد ..جيبي ليه كلشي جديد .. خصنا جناح كبير يليق بلاللة روح الندى .. والخزانة دالكتب حولوها للبيت اللي حداه ..وجهزي ليا حوايج يليقو بيها فاش تجي تلقا كلشي واجد ماتحسش بالفرق
قالت ليه عيشةغدا يصبح كلشي كما طلبتي يا السي يحيى
وصلات روح الندى للعربة دخلات فيها وجلسات جنب عبدية وقطعات الحس حتى وصلات للقصر ويالاه نزلات من العربة لقات يور والسلطان قدامها كيتمشاو ..ماطولاتش فيهم الشوفة وقلبات عينيها مشات دخلات لجناحها وجلسات سدات عينيها رتاحت وعبدية عند راسها كتسول اشوقع
وقفات روح الندى جمعات قوتها وقالت ليها رافعة راسك انا تزوجت اعبدية
طاحت عبدية على طولها جات جالسةقالت ليها اش درتي!!
عطاتها روح الندى بالضهر مشات جهة الشرفة وقالت ليها كيف كتسمعي..وراضية على زواجي وعلى راجلي..ربي هداه ليا ومن خيرة الرجال..نقولو لا باش سيهم الاصيل وداك المسخوط يبقاو على خاطرهم ! مالي عبدة عندهم ؟!
وقفات عبدةي كضرب حناكها قالت لبها اويلي جنتي على راسك اروح الندى .. هادي اللخرة ليك
ضارت عندها روح الندى قالت ليها اللي بغا يوقع يوقع ..الى كان عمري طويل حتى واحد مغيحدو ليا غير تهناي..وزايدون انا تزوجت فالسر باش يبقا السيي يحيى بعيد على بطش الاصيل وغيرة يور المجنونة ..مكان عندي حتى حل من غير هادا
قالت ليها عبدية ومالكي مزروبة ؟!!
قالت ليها روح الندى ماعندي مانتسنى .. انا لقيت راحتي ورتاح قلبي لسيي يحيى ..صافي وقررت ونفدت .هادشي يبقا سر والله يجعلو يبقا مخفي حتى للموت ماعنديش مشكل
بقات علدية ساكتة شادة راسها مالقات ماتقولوروح الندى كتمشي وتجي فالبيت وقالت ليها جمعي حوايجنا اعبدية
قالت ليها عبدية فين غتمشي؟
قالتل ليها روح الندى غنمشي لدار راجلي..وحتى غتمشي معايا
تصدمات عبدية قالت لبها اويلي وكيفاش غديري لهادي واش هتري!!!
قالت ليها روح الندى نتي غير جمعي انا قادة بشغلي
بدات عبدية بالمجوهرات هما اللولين وروح الندى كتمشي وتجي وتفكر وخرجات مشات نيشان لجناح الامير يور سولات الحرس واش كاين قالو ليها كاين ودخلات عندو فاجآتو وهزات راسها قالت ليه جيت نعلم غدا غنمشي لتارودانت
ناض وقف شاف فيها متفاجأ قاليها فين ؟
قالت ليه رافعة راسها غنمشي لتارودانت..ياكما ممنوع عليا ولا حرام!
قاليها وعلاش بغيتي تمشي لتارودانت ؟اشنو السبب
قالت ليه بيساطة توحشت ارضي وبلادي..توحشت قصري وحريتي..توحشت اهلي وحبابي وشعبي وتراب بلادي..الانسان مكيرتاح غير فدارو يا السي الامير..خليك هما مع باك انا اصلا ماعندي باش نفعكم
بقا كيشوف فيها وشنو كتقول وقاليها خلينا بعدا ندرسو هادشي ماجاتش تمشي بين ليلة ونهار
قالت ليه ماعندك مادرس.. درس غير حياتك ومستقبلك اما انا راني حياتي مدروسة وباينة ..قاليها وعندك عادي تمشي وتخلي ولدك وحفايدك هنا وتزيدي!!
قالت ليه حفايدي راه عندهم مواتهم ..ونتا كبرتي مابقيتش مسؤولة عليك..الولد فاش كيكبر على حضن مو كيصغار فحضن مراتو ..ونتا تبارك الله عندك الحضان ضايرين بيك من كل جهة .. خليت ليك الراحة
قلبات عينيها خرجات خلاتو واقف كيشوف فيها ومشات رجعات لجناحها كتجمع حوايجها بشوية عليها في حين خرج يور ديك الساعة مشا عند الاصيل لجناحو لقا معاه شامة جالسة ..غير دخل ناضت خرجات خلاتهم وقال للسلطان لاللة روح الندى بغات تمشي لتارودانت.. ماعرفت اشنو ندير باش نمنعها
وقف الاصيل متفاجأ قاليه تمشي لتارودانت!! وعلاش؟
قاليه يور توحشات البلاد قنطات هنا ومامرتاحاش..منقدرش نخليها تمشي وحنا. داخلين على حرب..فأي لحضة يتقلب علينا كولشي وخروجها من البلاد لبلاد اخرى خطار علينا وعليها
قاليه الاصيل ماعندها فين تمشي ..انا غنفهمها اشنو كاين راه مجايبة للدنيا خبار وغتبقا حتى دير زبلة يغرق فيها جمل ..مك وانا عارفها اكثر منك فاش كيزندو عوادها كتبدا تشير بيهم
خرج الاصيل مشا عندها نيشان لجناحها دخل عليها لقاها كتستف فالصنادق ووقف كيتمنضر ..ناضت وقفات ربعات يديها كتنهد وقاليها شفتك جمعتي القافلة فين عوالك تزططي؟
قالت ليه غنرجع بحالي لتارودانت الى كتب الله
قاليها الله مزالك ماكتب ليك تمشي ومزال مطولة معانا هنا ..غير تكاي تسنطي لعضامة
قالت ليه وعلاش مالي عبدة ولا جارية ؟
قاليها جلسي تركني راحنا فحرب الاللة ماشي فالسفر ..
تصدمات قالت ليه شنو؟ فحرب؟
قاليها اييه فحرب مع احتلال قرطبة وغادي تنوض قريب وماشي فصالح حتى واحد يخرج برا البلاد..
قالت ليه واش ناويين ترجعو قرطبة ؟
قاليها الى درتي عقلك وماخرجتيش لينا بشي كارثة من الجنب ..عاونينا بسكتات اروح الندى وتكمشي ..الى قنطتي ها الغابة وها السوق وها المدينة وعطا الله فين ديعي..ولاكن تمشي برا البلاد ممنوع
بقات ساكتة كتشوف فجنابها وقالت ليه الى كان على قرطبة ماشي مشكل نصبر
هز حاجبو فيها وخرج مشا خلاها واقفة وجلسات قالت لعبدية ردي هادشي ..مكتاب عليا نتختل فنصاص اللي بحال سراق الزيت
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
