قالت ليها عبدية اش بغيتي عندها المرى عزات عليها بنتها مسكينة هزو الحمل بوحدهم !! لا عوين لا رحيم وساكتين ..والى بصح كانت البنت بنتو راه غتجيب الحق عليك
خرجات عبدية مشات لبيت شادية دخلات لقاتها جالسة فواحد الركنة شادة بنتها كترضعها وساكتة ومها معاها كطوي حوايج الترابي فالكموسة ..شافت فيها مسعودة بنص عين مداتهاش فيها وتنهدات قالت
حسبي الله ونعم الوكيل فالضالم
دارت عبدية يد على يد قالت ليها لا حولة ولا قوة الا بالله العلي العضيم
نوضي ابنتي يالاه تكلمي لاللة روح الندى كتسناك ..وحتى نتي امسعودة
ناضت مسعودة شدات فيد شادية قالت ليها نوضي يالاه نشوفو شنو غادي تقول هاد المرة ..الله ياخد الحق .
شافت فعبدية وقالت ليها بنتي بنت الاصل والمفصل اعبدية..والله شاهد على هادشي ..مامسوها يدين من غير يدين ولدكم الله يرحمو ويغفر ليه على ما دار فالبنت وبنتها ..لا هي باها سلطان ولا مها اميرة ..غير شادية الدريوشة بنت مسعودة والجيلالي الحطاب لهلا يطيحها ليه في ودن ..ماتقد تقول ييه ولا لا قدامكم..درتو فيها مابغيتو ولاكن ربي كبير ..حنا ها حنا صابرين حتى يحن مولانا وهازين الدقة في قلبنا ..والدعوة بيكم لله سبحانه
بقات عبدية ساكتة كتشوف فيها وجرات مسعودة شادية قالت ليها زيدي ابنيتي زيدي ..زيدي نشوفو. شنو ثاني نسات لاللاهم مادارت فينا عاد تفكراتو
طلعو ورا عبدية لجناح روح الندى ودخلو حادرين الراس..شادية دايرة الزيف على راسها ديال الشلوح ولابسة قفطانها الحمر وشادة بنتها فيدها مغطياها وصوتها كيبكي ويتسمع فارجاء البيت ..اما مسعودة دايرة يد على يد بسروال قندريزي والقفطان مجموع فالخزام والشمار على يديها والزيف على راسها ازرق بالهدف وكتشوف فالارض وتنهد
وقفات روح الندى كتشوف فيهم وفداك الترابي وقالت لمسعودة ياك هضرت معاك قلت ليك سدي فمك
قالت ليها مسعودة انا ماقلت غير الحق الاللة..وربي شاهد عليا
خرجات فيها روح الندى عينيها قالت ليها ومزال زايدة فيه !! الحق ؟!! واش بنتك شبعات زهو ورجال وجايا كتقولي الحق دابا؟!! ولاكن انا اللي سكت ليك نهار الاول
قالت ليها شادية انا الالة روح الندى ماشبعت والو ..فاش مابغيتي نحلف ليك نحلف واحق سيدي بن عاشر ما قربني شي واحد من غير المرحوم ..
ردت روح الندى بغضب قالت ليها سكتي يا اللفعة بفمك اعتارفتي ولا صافي تنادم معاك الحال !! سمعي امسعودة اخر الكلام ..غتهزي بنت بنتك .. وغتخرجي من القصر وتعيشي نتي وياها برا يالاه نفدي
خرجات شادية عينيها قالت ليها وانا ؟!!قالت ليها روح الندى نتي ماعندك فين تمشي..مك اللي غتخرج
عنقات شادية بنتها ووقفات ورا مسعودة اللي كتفتف من قرار روح الندى وقالت ليها نمشي مع امي انا منتفرقش على بنتي
قالت ليها مسعودة الله يالاللة وشدرنا ليك ؟! اش. درنا حتى تجازينا بهاد الشتات
خرجات فيها روح الندى عينيها قالت ليها قلت ليك هزي البنت وسيري ولا غندفنك حية هنا
بدات مسعودة تبكي وشادية تبكي وشي لاسق فشي كيرغبو والبنت كتغوت فيديهم حتى سمع يور صوت البكا فجناح روح الندى وهوا مع السلطان غادي يوريه جناحو بنفسه اللي جنب روح الندى ..وقفو بجوج كيسمعو صوت طفل صغير والصدع والغوات ومشاو دخلو عليهم لقاو الروينة نايضة .شافتهم روح الندى وقفزات من بلاصتها قادات الوقفة وزراق وجهها وقالت لعبدية ديهم من هنا حتى لمن بعد يالاه
ضارت عندهم عبدية كتنخزهم وهما ملاسقين شي لاسق على شي حتى تلفت يور جهة شادية اللي مخبية ورا مها شافها وقاليها
شادية!!!
هزات عينيها شافتو وكانت غطيح بالصدمة وحلات فمها قالت ليه هااا!!!!
شاف الترابي فيدها وروح الندى كتخرج عينيها فعبدية متقول ليها خرجيهم والاصيل كيتفرج فكلشي وكيشوف فيها ويشوف فمسعودة ومها وقاليها اش واقع هنا اروح الندى؟!!
شار يور بيدو لعبدية قاليها بلاتي تسناي
قرب من شادية ومها مخلوعة كترجع باللور وتشد فبنتها وكتسولها شكون هادا؟!!
اما شادية تصمكات بقات غير كتشوف فيه وهوا كيقرب منها ويشوف فديك التربية اللي كتغوت وقاليها شنو هادشي ؟!
غوتات روح الندى من بلاصتها مكمشة يديها قالت ليها بغضب شاااادية
خرجات فيها عينيها باش متهضرش وسكتات بقات كتفتف ومسعودة كتشوف هنا ولهيه والاصيل عاد مزاد استغرب لروح الندى وردة فعلها وعقد حجبانو كيشوف فيها حس بشي حاجة تما مخبية ماشي حتى لهيه وشار بيدو جهة الام وبنتها قاليهم وقفو ..
بقاو عينيه تابتين على روح الندى قاليها شنو كيوقع هنا ؟
بلعات ريقها ورافعة راسها خرجات ضحكات بزز قالت ليه والو غير غلطو وو وكنعاقبهم .. مسعوودة خرجي بنتك وسيري من هنا تحررركي
داخت مسعودة ماعرفات مادير وبنتها كتبكي وتشوف فيور وكتحرك ليه راسها بالنفي والخلعة فعينيها لاكن مسعودة طلقات الرمانة فالارض وشافت فروح الندى بنص عين وحطاتها بوجهها قدامهم وهزات صبعانها قالت ليهم انا فعارك امولاي السلطان ..انا فعارك شرف من حالي وحالي بنتي راه هاد البنية هادي بنت المرحوم السلطان يور
غوتات روح الندى وسدات عينيها بغات طرطرق كتشطح فبلاصتها قالت ليها مسسسسعووداااا
شافت فيها مسعودة كترعد وشافت فالسلطان اللي مصدوم من كلامها ويور قدامها ماعمرها شافتو ولا عرفات شكون وقالت ليه كترجاه
والله مكنكدب عليك امولاي هاحنا نحسبوليها من الاول..واحق مولاي الضاوي هاد البنت حفيدتك عاد ولداتها بنتي شادية هادي شي شوية دالوقت ونكراتنا لاللة روح الندى بغات تخرجني انا وبنت بنتي للزنقة ..الضلم هادا امولاي حق ربي الى الضلم
دارت الزيف على نيفها كتبكي اما السلطان قلب وجهو بحال الشيطان جيهة روح الندى شاف فيها ويور جر شادية دوز يدو على راسها وهبط عينيه شاف فديك البنت مسكينة ودوز يدو على غطاها وراسها الصغير وتلفت عند روح الندى والشر فعينيه ومشا قرب ليها وهي توجع اللور كتبلع ريقها قالت ليه شنو؟!! شنو شفتي ؟ كتكدب ياك
هز يور راسو وعينيه فروح الندى كيخزر قال لعبدية خرجيهم الاللة عبدية وردي بالك على بنتي ومها حتى نجي
حلات روح الندى عينيها مصدومة شافت فيه ومسعودة اللور جهة الباب كتشوف فعبدية قالت ليه هاا؟ اينا مها انا؟
قالت ليها عبدية زيدي وسكتي كحالت عليك مع لاللة روح الندى ولاكن عندك الزهر فلتي من هادي دابا
خرجاتهم وخلات غير روح الندى واقفة بين السلطان والامير ماكاين اللي يفكها وكتشوف فهادا وتشوف فهادا وتمتم قالت ليه انا ولدي والله ماعرفت واش بنتك؟ ماقدرتش نتيق راه ديك المسخوطة كدابة وشيطانة
قاليها السلطان وبهدوء كيشوف فيها ويديه وراه
كاين شي شيطان قدك .. شكاندير انا هنا ماجيتيش علمتيني بحاجة بحال هادي؟
قالت ليه كتفتف باش غنعلمك ؟! راه مشات غبرات شهور وزيادة ورجعات وقبل ماخلات مادارت ماخلات عبيد ولا خدم راه بفمها قالتها لي وهاد الموصيبة اللي جا كتمشي معاه وعاد كانت على علاقة مع العبيد شحال هادي فقرطبة قبل مادخل للخلوة
جمع يور القبضة ديدو كيشوف فيها ويسمع اش كتقول وقاليها سكتي…سكتي براكة
قالت ليه والله مكنكدب عليك انا مك وعارفة مصلاحتك ..هاد اللفعة ماقصراتش من جهدها قبل ما دير معاك شي علاقة وانا دابا مزال ماقدراش نتيق باللي البنت بنتك!!! اويلي ميمكنش
ربع الاصيل يديه لاقا حجبانو كيشوف فيها وهي من نيتها كتهضر لاكن يور نفد ليه الصبر وقال ليها هاديك البنت بنت الشرف وبنت الاصل..نقا من الماء دالشتاء .. صعيب عليك تفهمي هادشي وتميزي بين بنات الاصل وبنات الزنى …من اليوم ماعندك حتى علاقة بيها ..لا هي لا مها ولا خواتاتها.. ومن ليوم انا المسؤول على هاد الناس وماعندكش فيهم حق ..وحتى ديك البنت ممنوع تمسيها ولا تقربيها .مننوع تهضري معاهم ..من ليوم هما خارج الخطوط ديالك تفاهمنا
عطاها بضهره خرج خلاها واقفة والروح بغات تخرج ليها مارضاتش قدام السلطان وبلعات ريقها وهزات خنافرها كارمة فبلاصتها .. دوز السلطان على لحيتو وبدا كيضحك قاليها
لحنش كيولد ماطول منو .. جاب ليك الله لي يحك ليك زنافرك اروح الندى..هاي هاي ،،هاد الشر كاع خرج منك
قلبات وجهها كترمش قالت ليه انا وولدي هادا هوا حالنا ..مرة مصالحين مرة مغايرين .
قاليها لاالاا باين وهاد المرة فاض ليك الكاس مع ولدك اروح الندى ..مشراارة مع راسك
شافت فيه قالت ليه انا كنحتارمك امولاي ..حتارمني
قرب من وجهها قاليها مشهي فيك شي سلخة نيت
ميلات وجهها فالسما مكمشة فمها قالت ليه الله يرحمها ديك الوقت كانت النية
هز حاجبو قاليها عنداك يحساب ليك كبرتي عليها.. ولا كتعناي بولدك ..والله غا لما شديتك سلختك مزيان هاد المرة بيدي .. يا المشرارة كحال ليك القلب نكرتي بنت ولدك وبغيتي تسيفطها للزنقة.! نعلة الله وعليك
خزر فيها وخرج خلاها واقفة غير مشا جلسات فالارض غوتات كترعد قالت لوصيفتها اللي دخلات كتجري جيبي ليا مسعوووودة الله يعطيها الموت
دخلات عبدية ديك الساعة رجعات سمعاتها قالتها بغيض بغات طرطق وقالت ليها تبتي مابقات لا مسعودة لا غيرها ..دابا نيت تلاقيت سمو الامير قالي ممنوع دوري بساحتهم ..كمديها وسكتي بلا متزيدي ترونيها دابا نتي درتيها بيديه
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
