هز الامير الدقة فجنبو وعينيه مزال كيتسدو وهوا كيجري فوق العود وكيشوف موراه واش تابعو ي واحد لقا عجاجة من الرجال تابعينو .. ضرب الخيل باللجام ويدو على جنبو مكمدها وكيجري ويقول ماجريت حتى بعد على عينيهم وتكا على العود كيرتاح وماوقف حتى وصل عند صحابو اللي كانو جالسين ناصبين الخيام ناشطين بيناتهم ..شافو الخيل ابيض جاي بشوية عليه كيتمشى وعليه جريح وناضو سرحو عينيهم تعرضو ليه وتصدمو فاش لقاو الامير عليه ويدو على جنبو .. هبطوه من فوق الخيل بشوية دخلوه لواحد الخيمة ضارو بيه كيسولو مالو وهوا مزير صابر لألم الجرح وسخفان بسبب المجهود اللي دار ..تكلم فتاح بعد الرجال عليه وقال
بعدو الاخوان شوية خليوه يتنفس.. بعدو حتى يرتاح ونعرفو منو اش وقع
ضحك السرّاد وقال ليه كنتي فارس وليتي فريسة امولاي
هز الامير تينو شاف فيه ونزل عليه فتاح للضهر قاليه واش مكتعرفش شنو كتخرج على فمك الدحش.. قد الفيل وعقلك قليل
دور السراد عينيه كيشوف فجنابو وقال
سمحو ليا غير كنت كنضحك
خرج كيحك ضهرو ويلوم راسو على قلة فهماتو وجلس فوق واحد الحجرة شاد واحد العود فيدو كيخطط بيه .. داخل الخيمة عرا فتاح على جرج الامير طل عليه وجمع الاعشاب باش كيتعالجو بدا كيضمد ليه البلاصة وهوا كيسول على العدو فين وصل وقال
شي خبار على الملكة روح الندى ..فين وصلات وشنو كتخطط ؟
رد فتاح وقال. ماعندنا حتى خبار امولاي كنتسناو نعرفو الخبار من عندك
زفر الامير وقال: ماقدرتش نوصل للقصر.. الخونة عمرو البلاد وتعرضو ليا فالطريق خطفوني ..بزز باش باش فلت من يديهم
رد فتاح وقال: كيفاش امولاي تعرضو ليك شكون غيكون تعرض ليك؟
دور الامير عينيه كيحلل وقال : ماعرفتش ولاكن غالبا غيكونو المسحيين ولاد الكلاب.. بغاو يبعدوني على الحرب وينفاردو بالملكة .. خاصني نرجع للقصر فأقرب وقت .. نتا والسراد سيرو للحدود شوفو كيوقع تما .. مابغيناش شي هجوم مفاجئ ..وديك المفاجأة ديال الصباح مابغيناش نشوفوها ..ماخصناش نصبحو على جيش قدامنا وحنت ناعسين ..مننوع النعاس..اللي نعس عمرو يعاود ينوض من النعاس خاصكم تردو بالكم
رد فتاح وقال: الجرح مزال مبرا وحرارتك مرتافعة امولاي..خاصك الراحة وخطر عليك تتحرك ونتا فهاد الحالة
طلق الامير حوايجو اللي لبسوه على لحمو غطا الجرح وهز الماء شرب وقال : ماعندناش الوقت ..البلاد فخطر وحنا كلنا فخطر اكبر من هاد الجرح افتاح ..
رد فتاح وقال:على الاقل يمشي معاك شي جوج ولا ثلاتة من الاخوان باش متعرضش لشي اغتيال اخر ونتا فطريقك امولاي
حرك الامير راسو ورتاح شوية من التعب وناض كيتألم شاد فجنبو وقال
انا قاد براسي .. خليوكم هنا وتسناو مني الاشارة .. والى عرفتي شي خبار جديدة لحق عليا للقصر
خرج الامير وهز راسو كيتفس ويجمع النفس وخدا انبلة والسهام من عند صحابو وطلع فوق الخيل اللي جابو ومشا كيجري رجع للقصر هاد المرة واخد الحذر ديالو .. دخل سالم غانم لقا كولشي كيشوف فيه وكلشي هاز راسو لا تحية لا احترام واستغرب فأمر اهل القصر وهوا داخل كيشوف فيهم من فوق الحصان حتى وصل لباب لقصر الداخلاني وشاف كولشي خارج كيجري ومنهم عبدية وذو الفقار اللي جا كيطير ووقفو كيشوفو فيه حتى نزل وقال ليهم
مالكم كتشوفو فيا بحال هاكا؟؟ عمركم شفتوني؟!!انفردات بيه عبدية وذو الفقار فجناحه من بعد الموجة دالصدمةاللي مرو بيها وجلسو كيشرحو ليه ويفسرو ليه ويعاودو ليه شنو وقع بالتفصيل الممل تصدم وناض وقف كيشوف فيهم وقال
شكون اللي سيفط ليها الحوايج والخاتم ؟
وقفات عبدية وقالت
ماعرفتش امولاي انا اللي عطاه ليا كان ملثم وغير شديت الامانة وهرب ..المشكل الكبير هوا شادية قالت للاللة روح الندى باللي الامير راه هاشنو شنو ..وبقا عقلها معاك وشادية هربات من القصر وخلات ليها الرسم ..مافهمنا شنو عنات بيه
ضار بلاصتو معصب والعرق كيسيل من جبينو وعينيه تقال بالعيا وقال
اش هاد التخربيق .. اشمن رسم ولا شادية فين الملكة ؟؟ فين مشات فين خرجات؟؟
حدر ذو الفقار راسو وقال
تبعناها امولاي نشوفو فين مشات ولاكن غبرات تقول سرطاتها الارض..طارت من قدامنا وعيينا نقلبو عليها مابان ليها اثار
شد فراسو وجلس بغا يستطا وهز يدو ضرب ذو الفقار وقال
خرجات قداام عينيكم وخليتوها هاكاك اشمن حراس انتم ولا قياد
نزل على ذو الفقار بالضرب وعبيدة مركنة ناض عندها وقف قدامها بغضب وقاال نتي ماكلفاتكش نفسك تشديها وترجعي ليها عقلها .. ولا تحبسيها فبيتها .. كن بصح كنت ميت دابا؟؟؟ كن بصح انا مت شنو غيوقع لمي؟؟ شنو الدور ديالكم فهاد القصر علاااش ماحميتوهاش من راسها علاش خليتوها خرجات
سخط عليهم الامير وهبط القصر على راس الجميع وشركهم كلهم وهز صبعو كيحلف وحوايجو فازكين بالعرق. وقال
والله معنرحم فيكم شي واحد.. كاع اللي كان حاضر وشافها غادي يودي .. سبتو وضسرتو ولاكن انا غادي نقادكم
طلع لجناحو خلى كلشي كيقفقف والبديع مهرس فالارض والحراس كل واحد فاش شاد ..ها اللي شاد نيفو ها اللي شاد راسو والعبيد شي لاسق حدى شي وحتى واحد مكيتحرك ..
تبعاتو عبدية كتعتر فجلايلها لجناحو لاكن جرا عليها وخرجات وقفات حدا الباب كتبكي وجلس شد فاطراف السرير كينهج و البيت كيدور بيه ..عيط لواحد من حراسه حضر ليه الحكيم حا كيجري وقف قدامو حاذر الراس وقاليه
شوف ليا سم نشربو دقة بطلة ..كنحس براسي كنغرق
قرب الحكيم شاف ليه عينيه وهوا كينهج ويشوف فالارض وعروق راسه كتفركع .. لقا عينيه حومر والحرارة طالعة بزاف كامل كيشرشر بلعرق ويدو على ركبتو كترجف وقال
مولاي الحالة ديالك صعيبة.. حالتك صعيبة
جرو الامير من حوايجو ووجهه احمر قاليه شكون اللي نشب ليا ديك المصيدة؟؟ شكون اللي دار هاد الفعلة دوي
بعد الحكيم تخلع وقال
بديتي كتهلوس امولاي.. السخانة طلعات ليك بزاف سمح ليا نداويك
دفعو الامير وقال بغضب
فين مشات مي ..نتا عارفها فين مشات
هرب الحكيم لبرا عند عبدية لقاها واقفة وقال كيترعد
الاللة عتقيني راه مولاي السلطان كيهلوس وخايف يقتلني وانا مادرت لا بيدي لا برجلي .شوفي ليا شي رجال شداد يوقفو معايا
مشات كتفتف عيطات لذو الفقار طلع كيجري وجهه منفوخ بالدق ومعاه رجال اخرين دخلو عند الامير لقاون جالس كيسوط وكيهضر بوحدو وفازك تقول خوا عليه سطل دالماء
دخل فهاد الاثناء الملك الاصيل للقصر بلا ميعلم لقا الدنيا مقلوبة وشي كيجري لهاد الجيه شي لهاد الجيه وحتى واحد مانتابه ليه ومشا برجلو كيدور فالقصر لقاهم كيجمعو البديع المهرس ووقف واحد من العبيد دايز كيجري وقال
سمو الامير كاين هنا ؟
حدر ليه العبد راسو وقال
كاين امولاي فجناحو
طلع الملك لجناح الامير تابع الخدم والعبيد اللي كيجريو جهة الجناح حتى وصل لقا الدنيا مرونة فالباب والحرس واقفين ودخل بالزربة لقاه عريان لابس غير السروال والفوقاني مقطع مرمي فالارض وشاد فذو الفقار كيهضر معاه ..حاول الاصيل يفهم اش واقع وتدخل وسطهم .. غير هضر قال اش كاين وهي تقفز عبدية من بلاصتها ضارت شافت فيه وتخلعات قالت ليه كتفتف
كيهلوس امولاي.. طلعات ليه السخانة وكيقول كلام مامفرزش
رد الحكيم وقال
خاصنا ندخلوه فالماء بارد ..
رد حكيم اخر وقال : الجرح مزال طري ماخصوش الماء ولا غيتعفن
شاف الاصيل فجنابو وقال
شي سطل فيه ماء بارد ومنشفات كبار .. يالاه
مشاو حضرو السطل والمنشافات وكفض الاصيل علد دراعه غطس المنشفات فالماء بارد وبدا كيهز ويطلق على عنق الامير وعلى صدره وضهره وكيعاود العملية حتى فهموها الطبة وكملو الشغل كيهبطو ليه الحرار ويقلبو الجرح وهوا كيقلب عينيه سخفان والعرق كيتصبب.. جلس قدامو الاصيل وشد ليه وجهه كيقيس الصهد وقدمو ليه الحكماء دوا فزلافة وشدها الاصيل شربها ليه بيدو وهز ليه راسو كيعطيه شوية بشوية حتى بدات الحرارة تهبط وسمع عبدية كتقول وتمتم
تعصب امولاي حيت اللي وقع هاد النهار عمرو وقع من قبل
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
