ذو التيجان 👑مكتملة👑

👑الجزء 96👑

مشات لاللة عيشة عند روح الندى مبسمة وهمسات فودنها وناضت معاها وبغات حتى عبدية تنوض لاكن ماخلاتهاش روح الندى تمشي معاها ومشات بوحدها دخلات لواحد الصالة كبيرة مضورة بالسدادر  دايرة لثامها على نيفها ولايحة عليها حايك عبدية اللي جات بيه ودخلات عندو للصاللة لبعيدة على الصدع لقات تما القاضي يحيى واقف كيتسناها ..لابس البلدي على حقو وطريقو ونقي كيشعل النور كيسطع من وجهه ولحيته كتلمع ..غزال ومسرار وحشم يشوف فيها بقا كيشوف فالارض ورحب بيها قاليها
نهار كبير هادا الاللة روح الندى ..نهار كبيري..شرفتيني ونورتيني مرحبا بيك  والف مرحبا
وراها فين تجلس وهي كدور فعويناتها جلسات قالت ليه ترحب بيك الجنة السيد القاضي
هز عينو فيها  كيرمش حشم قاليها يحيى ..غير يحيى كافية
تبسمات قالت ليه الله يكبر بيك بيك السي يحيى
جلس جنبها بعيد عليها كيشوف قدامو ساكت وهي ساكتة بدات كدخلها الزيت وكتعرق ماكانتش كاع متوقعة غادي تحشم على عرضها حتى هي وتتوثر .. قاليها منين فالخوت الاللة روح الندى
تنهدات شافت فالجنب قالت ليه ضاروري نقول بيك السي يحيى؟
هز عينو فيها قاليها الى جات على خاطرك ماكرهتش نعرف
بقات ساكتة ومابغاش تكمل ديك الخطوة اللي بدات بالكدوب وقالت ليه
انا الاميرة روح الندى ..
بقا كيشوف فيها قاليها واش بنت السلطان ؟
حركات راسها بالنفي قالت ليه لا  السي يحيى..انا كنت فواحد الوقت من الحريم ديالو 
تصدم ومشات التبسيمة من على وجهه ونزلات عليه خيبة امل قاليها شنو قلتي؟
قالت ليه بهدوء  ما عندك علاش تدهش السي يحي
انا حرة ..
بقا السي يحيى كما هوا عليه فخيبة الامل واخا قالت ليه حرة مالقا ما يقول
بقات كتشوف فيه قالت ليه بان لي هادشي زعجك السي يحيى..الى كان شي مشكل نمشي بحالي دابا
هز عينو بحسرة قاليها لالا حاشا …الله اودي الاللة روح الندى مرحبا بيك فأي وقت الدار دارك
قالت ليه وعلاش تبدل لونك ؟ انا لبيت الدعوة وصافي وخاصني نرجع  بحالي
ناضت قالت ليه  ماديرهاش مني قلة الصواب الى قللت راحتك
وقف شاف فيها بأسى متردد يهضر وقاليها خليك حتى تعشاي معانا ..
قالت ليه ماشي لعشا اللي جابني السي يحيى ..خليت ليك الراحة
وقفها قاليها بلاتي الاللة روح الندى..
وقفات شافت فيه قالت ليه نعام
بقا ساكت كيشوف فيها وفعينيه توثر كبير وتنهد قاليها عاودي  هاد المجية مرة اخرى الى جات على خاطرك.. ماتغبريش علينا
قالت ليه ان شاء الله ..السي يحيى خليت ليك الراحة
خرجات قدامو غمزات عبدية ناضت ديك الساعة من بلاصتها تبعاتها للعربة وقبل متقلع تلفتات روح الندى شافت جهة باب الرياض لقات القاضي واقف كيشوف فيها وتبسمات ليه ومشات بحالها .
خرجات عمدو لاللة عيشة لقاتو واقف مهموم قالت ليه نسبقو لعشا السي يحيى
بقا ساكت وهي كتهضر وطلات عليها قالت لقه سي يحيى..ياك لاباس السي يحيىى
تنهد شاف فيها قاليها ديري اللي بان ليك اعيشة..انا غنطلع نرتاح شوية
دخلات روح الندى فالسر لجناحها وماضحكات ما نطقات..عبدية غير تابعاها كتشوف فيها وخلاتها على خاطرها عاوناتها بدلات حوايجها ومشات نعسات  فالشرفة تحت النجوم بحال العادة باش تهرب من عقل السلطان .
صبح الحال وصبحات جالسة فديك الشرفة نيت بتحتية ديال لقميص ابيض خفيف والطبلة دالفطور  وشعرها محلول ساهية كتشوف فالجبال
وقفات عليها عبدية قالت ليها مالك صبحتي شاردة؟ من لبارح ونتي ماشي حتى لهيه
تنهدات روح الندى  قالت ليها حرت اعبدية.. ماعرفت اش ندير
استغربات عبدية قالت ليها علاش اش وقع ؟
قالت ليها روح الندى لبارح هضرت مع القاضي ..قلت ليه شكون انا..وشفت اللون تبدل فوجهه..حسيت بيه كان باغي يقول شي حاجة وتراجع ..منكدبش عليك اعبدية..هادشي درتو فالاول غير ضحك كنت متأكدة منلقاش اللي ينسيني فالاصيل ولا يعمر عيني..ولاكن بان ليا هاد اللعب صدق بصح.. كنحس بالقاضي محتل تفكيري.. كبر بيا وماكرهش يجلسني فوق رموش عينيه .. حسسني بنفسي وبقيمتي ..حسيت براسي مرى اعبدية وحسيت بمشاعري تحركات  من جهة اخرى..عجبني الحال وماعرفت ما ندير..بان ليا القاضي تراجع على شي فكرة عندو فراسو ..شفت الحسرة فعينيه..اول مرة نكره السلطة والملك ..اول مرة  نتمنى لو كنت بسيطة مايخاف مني حتى واحد ما يعاملني حتى واحد  زوين بسبب الخوف..اول مرة نحس بمعاملة زينة حقيقية بلا خوف ..ولاكن فاش عرفني شكون انا تبدل وعرفت الفرق بين المعاملة النابعة من القلب وبين المعاملة بالاجبار..عاد عرفت علاش يور كان كيرتاح فالبساطة ..حيت جال وعرف الدنيا وخفاياها .. شحال زوينة الحرية اعبدية ..عرفتي شنو ..انا ونتي مكاينش بيناتنا فرق.. بين العبد والامير مكاينش فوق..الفرق فاللباس والتاج ..اما العبودية فهي نفسها
بقات عبدية ساكتة ساهية وكتنهد قالت ليها شنو اخرت هادشي دابا اروح الندى
هبطات روح الندى راسها قالت ليها عادي نوقف هادشي.. داك السيد ماشي ديالي وانا ماشي ديالو ..نخاف عليه من الأدية.. الى تأدى بسببي عمرني نسامح لراسي اعبدية ..شي فرحان وشي فكعان ..هادا حال الدنيا ..
اليوم السعد فقصر قرطبة ..وصل المرسول ليد   يمامة  من عند الخادم الضعيف البنية القصير الاسمر لاكن الذكي وعقلو كبير ..حط ليها الجواب وسط الخبز ديال الفطور وقدموه ليها ..حلاتو قرات الرد
" هاج البحر بالحوت ..طعم واحد كافي يخلي الحوت يموت "
شافت قدامها تبسمات وفسرتو قائلة
هاج البحر بالحوت بين الخوت .. الحوت شي كيشبه لشي ماتفرق بيناتهم حتى بقشرة..كيعني التوام ..البحر كيعني القصر .. طعم واحد كافي يخلي الحوت يموت
هادي خصها شوية دالوقت باش نخلي الخوت يتقاتلو ..ولا خصها شي حيلة مدروسة ماديرش الريحة
تنهدات وخرجات مافطراتش ونزلات  كدور فالقصر وكتفكر وتشرف فالركاني وتستلهم الافكار حتى خرجات فعابد شافتو لاول مرة تصدمات ..حدر راسو دار بيه ماشافهاش وقال وهوا دايز
السلطان يور كيبلغ ليك السلام
تلفتات وراها شافتو وحلات عينيها فدهشة تبسمات وتذكرات الجاسوس ورجعات بحالها كتجري دفعات الباب دخلات جبدات ورقة وقلم وقالت
والله لا بقات ليكم هاد البلاد يا الكفرة بالله
زممات وكتبات النتيه بالريشة  بشوية فوق ورقة صفراء
تلفت وراك وقدامك راه قصير القامة نحيف الوجه كينهش فعضامك .. ناقص من ولادو الصغير  ..وسطل كحل جنب البير وخفيف بحال الطير.حمامة من عش لعش   دور من سطح لسطح تجمع فالقش .
لوات المرسول وخشاتو فالخبز ورسلات الصينية تعرض ليها الخويدم الخفيف القافز طيرها فالهواء قنتها وجبد الورقة من وسط الخبزة جمعها ومشا مدها لعابد لاعين شافت لا لقب وجع .