ابتسم وقال ..مرحبا بيك
حدرات الراس لزمت الصمت وتراجعات اللور ستأذنات وخرجات من جناحو وهزات راسها كتنفس ويدها على صدرها كانت غتسخف وهي تحت الضغط قدامو .. بلعات ريقها وماعرفاتش فين تمشي حتى لمحها ذو الفقار ومشا وقف عليها وقال
اشنو كديري هنا بوحدك ؟
سرحات عينو فملامح وجهها بلا ميشعر واخا عارف داكشي لا يجوز لاكن الفتنة قدام عينيه وبيناتهم خيط رقيق ..دور وجهه كيرمش وقال شاير بيدو قدامو
كنضن باللي كبرتي فدار الشرفة وعارفة القواعد .. مانحتاج نشرح ليك ونقول ليك شنو الصح وشنو الصواب.. تفضلي معايا
حركات ليه راسها ومشات قدامو بحال النسمة والعبيد كيدوزو حداها ويتبسمو ليها .. شكون اللي مكيعشق الزين .. شكون اللي مايقدر يخضر عينيو وهي فتيلة وغادية حتى وصلها لجناح لحريم وعيط على بصيرة حضرات فالحين قدامو ..تلفتات شافت فيها وابتسمت فوجهه هاد الجمال وقالت
شكون هاد الآية
جرها من يدها بعدها شوية وقال
هاد الآية هدية الملك الآصيل وهي مميزة وتعلمات على يدو ..مغتحتاجيش تعلميها تقدري نتي تعلمي منها .. ردي ليها البال وراقبيها عنداك توقع ليها شي حاجة فجحر الافاعي ديالكم ..
ضارت بصيرة شافت فيها وقالت
كن هاني.. مللي قلتي مميزة غادي نخليوها مميزة
رجعات بابتسامة هزات راسها وقالت
مرحبا بيك.. مرحبا بيك فجنة العمبر ..تفضلي
شارت ليها بصيرة بيدها لابواب العمبر كبيرة اللي تحلو فوجهها وهي هازة عينيها كتشوف فالابواب العملاقة وسرحات عينيها فروعة المكان المليئ بالبنات والزين كيطرطق لداخل شكال والوان من جميع الاجناس..
تقدمات هازة راسها كتشوف فيهم وهما كينوضو ويتلفتو والهضرة كتقل بيناتهم حتى عم الصمت وتوجهات ليها الاعين كتراقبها وتراقب كل تفصيلة فيها وهي داخلة كتقراب بدورها المكان والوانه الزاهية كأنها فجنة نسائية وكتشوف فالاسرة والبنات وكل سرير على راسو اسم مولاتو .. داتها بصيرة لاخر سرير جا فالقنت فراس العنبر كان فارغ وحداه جدار من الخشب المنقوش ومجر صغير من الخشب وقالت
هادا مكانك ..اشنو سماك الله الغزالة
تلفتات شافت فيها كترمش بهدوء وقالت
سبأ
مدات بصيرة يدها بتبسيمة وقالت بصوت مرتفع
هادي اختكم سبأ.. حتى هي هدية لمولاي وصلات ليوم .. بادرو بالخير البنات ورحبو بيها
ناضو البنات بحال العادة كيتقدمو ويسلمو عليها وكيرحبو بيها بحال اللي كيرحبو بأي بنت جديدة دخلات عليهم للعمبر واخا راه كترو عليهم الهديات ودخلو عليهم بنات عربيات وشينويات .. كاينة اللي تقبلات سبأ ودازت وكاينة اللي غارت وحسدات داك الزين المميز وغارت .
جلسات جنب سريرها كتشوف فيهم ودارو بيها بعض البنات كيضحكو جلسو جنبها وقالت وحدة سمراء بحال القمرة
انا سهر من قرطاج
ردت البيضا وقالت
انا جنة من وغير من هنا
تكلمات وخدة اخرى وقالت
انا سميتي مُتعة رسلني امير بغداد
ابتسمت سبأ وقالت باسغراب متعة ؟!!
ابتسمت سمر وقالت : اه سماها مولاي متعة حيت كتعرف تشطح وتعاود النكات ..وكضحك
رجعات بصيرة قاطعاتهم وقالت
سمر.. يالاه
ناضت سمر ومشات مع بنات اخرين داتهم معاها بصيرة وبقات سبأ جالسة وتلفتات عند متعة وقالت
كيفاش كتعيشو هنا فالقصر؟
تنهدات متعة وقالت : بحال الاحلام .. احسن بزاف من قصر بغداد.. هنا كنقراو ..كنتعلمو .. كنلعبو .. وكنخرجو للنزاهة فغابة القصر وكنهبطو للواد الذهبي .. كيعطيونا الهادايا وكنتعاونو. فكلشي.. وديما سهرانين وناشطين .. غيعجبك الحال
ردت سبأ وقالت: وهادشي مكتملوش منو؟؟ ماعندكمش شي خدمة تزاولوها
ضحكات بنت اخرى اسمها شهد وقالت
شنو غنخدمو .. اصلا مكاينش الوقت باش نملو .. ديما الجديد ونتي شنو كنتي كديري من قبل؟
ردن سبأ وقالت:انا كبرت فدار الشرفة وكنت كنقرا .. وكنكتب وكنربي الغزال
حلات سمر عينيها وقالت : كتربي الغزال؟
ردت سبأ وقالت: اه كنربي الغزال..كان عندي الغزال فالقصر كنت كنربيه ..وكنقول ليه الشعر
ضحكات شهد وقالت
حنا عندنا غير غزال واحد فالقصر
بداو كيضحكو وضحكوها حتى هي ودوزو الوقت فتقرقيب الناب حتى رجعات ليهم بصيرة ودخلت كدق الجرس هي والخدم
شافتهم سبأ ناضو فصف واحد تقادو ولبسو حوايجهم وبداو خارجين مثنى مثنى وهي جالسة مافاهمة اش كيوقع
مشات عندها بصيرة عطاتها توب خفيف بحال اللي لابسين البنات مفتوح من الجناب حتى للركبة ويديه مجموعين من الكمام وفيه فتحة من الكتف حتى للكم والدراع كيبان .. لبساتو ولبساتو البلغة وتبعات بصيرة داتها للحديقة الخاصة بالملك وتما لقات البنات منتاشرين بحال الحمام فديك الحديقة الكبيرة .. ها اللي كتسقي الورد وها اللي كتنقي الاوراق اليابسة وها اللي كتنضف بالممسحة العروش وها اللي كترشو بالماء لحلو
لوحة فنية اكثر من رائعة .. ابتسمت سبأ عجبها الجو والبرودة ديال العشية ومشات بين البنات هزات منشفة وبدات كتمسح الاوراق من الغبار والبنات كيغنيو وبسرعة انسجمت ودارت صحابات وبداو كيرشو بعضياتهم بالماء وصوت القهقهة كيطلع حتى وصل لأذن الملك يور اللي كان دايز كيهضر هوا وذو الفقاو فديك العشية فملابس مريحة عبارة سروال خفيف وسترة وبلغة صفرا .. تلفت لمح البنات وسط الحديقة وخرج من بين الاصوار كيتمشى ووقف كيتفرج فيهم بابتسامة وهما كيلعبو نزلات لاللة روح الندى فديك الاثناء لقاتو واقف بوحدو كيتأمل فالبنات وبدات حتى هي كتشوف فيهم وتلفتات للجنب قالت لعبدية
فين هي هدية الاصيل ؟
شارت عبدية بعينها وقالت الزوينة فيهم الاللة هي هديته
ردت لاللة روح الندى وقالت: هضري وقولي بلا ماتزيدي من راسك
ضارت فهاد الاثناء سبأ بشعرها وحوايجها مرشوشين بالماء وقالت عبدية
هاهي الاللة .. غزالة فتانة
مولات الشعر القهوي الطويل..
شافتها روح الندى وقالت
جيبيها ليا لجناحي
رجعات روح الندى لحناحها ومشات عبدية عند بصيرة هضرات ليها فودنها ومشات بصيرة للجردة سلات من بين البنات سبأ وطلعاتها لجناح لاللة روخ الندى اللي كانت جالسة دايرة رجل على رجل كتسنا ..دخلات سبأ وحدرات الراس ..شارت روخ الندى بعينها لكلشي خرج وهزات راسها فسبأ وقالت
قربي لعندي
قربات سبأ حاذرة راسها حشمانة منها وروح الندى كتشوف فيها وقالت
بحال الى سبق لي شفتك .. واش فايت شفتك؟
ردت سبأ وقالت
انا اول مرة نتشرف بشوفتك الاللة مولاتي ..
تنهدات روح الندى وقالت مع راسها يمكن تشابهو ليها قوة البنات حتى ولات كدوخ ..
روح الندى: رسلك الاصيل ياك؟
حركات راسها وقالت
اه الاللة امولاتي
قالت روح الندى:منين نتي ؟ وشنو قصتك وكيفاش رسلك الاصيل
حكاات ليها سبأ على قصتها كما عاشتها من غير المجية ديالها للقصر هادي ثلت سنين ..سالات كلامها ورفعات روح الندى راسها وامرتها تمشي وجات بلاصتها عبدية حادرة الراس
هزات روح الندى حاجبها وقالت
جمعي ليها رزمتها . ورجعوها للاصيل ليوم قبل غدا
حدرات عبدية راسها ومشات علمات بصيرة اللي دخلات للعمبر فغياب الجميع وجمعات لسبأ حوايجها فرزمة ومشات جابتها من الجردة ودخلاتها للعمبر وقالت
غادي ترجع للقصر منين جيتي
تصدمات سبأ ورجع وجهها احمر وشدات رزمتها وقطعات فيها النفس وحركات راسها بالايجاب وتبعات بصيرة خرجاتها من باب الخدم فوق الخيل مرافقة بالعبيد ..شافهم ذو الفقار كيتخلتلو ومشا حصل بصيرة قطي وقال
شنو كديري ؟ شنو كتخططي
تخلعات بصيرة وقالت
اموامر لاللة مولاتي.. هي امرات نرجعو الهدية الحية للملك
زفر ذو الفقار من مناخرو وقال
واش عارفة اشنو كديري ؟؟ واش عارفة شنو هي تردي لهدية لحاكم واش باغيين تخليوها حرب ..
نتر ديها بغضب ومشا كيجري لمكان خاص فين كيجلس فيه الملك يور وكيصارب السهام ديالو وخدر راسو كينهج وقال
مولاي.. لاللة مولاتي امرات يرجعو الجارية اللي هداك الملك محمد اصيل ..وخرجوها من القصر هاد العشية
وقف فالبلاصة خرج عينيه وقال
غطير تلحق عليها وتردها لهنا .. مننوع توصل لقصر الملك محمد اصيل .. تحرك
مشا طو الفقار كيجري وينعل ويسب فبصيرة اللي دارت شغل يديها بلا متعلمو وكيتحلف عليها وركب الخيل تبع الهدية في حين زير الملك على يدو بنفاد الصبر ساد عينيه وطلع لجناح الملكة دخل عليها خلعها وقال والهضرة معكسة فحلقو مابغاتش تخرج وهوا مزير على عينيه
كتحكي نحاسي.. كتحكي نحاسي وانا كنحاول نرضيك ونتي كتزيدي توسخي الجو بينياتا.. اش داك لهدية الملك اصيل حتى ترديها ليه؟؟ اش بينك وبينو خلاك تكرهيه وتحقديه عليه
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
