ذو التيجان 👑مكتملة👑

👑الجزء 59👑

تعطات الاوامر ولحد الساعة متحكمين فزمام الامور .. فاقت روح الندى حلات عينيها لقات وياريت مافاقت..لقات لحكيمة جنبها شداتها منعاتها تنوض لاكن خرجات من البيت وسط الساحة الي بين شجرة وشجرة واقف حارس ..مشات كتجري كتعيط على يور وبغات تخرج لاكن تعرض ليها ذو الفقار اللي كان وافقها للرياض من الصباح وشدها رجعها اللور ماخلاهاش تخرج وجلسها كيشرح ليها الوضع والخطورة اللي هما فيها  وقاليها
حنا دابا محبوسين هنا وجنود الملك اصيل مانعين علينا نخرجو ومكاينش من غيري انا وياك ..قرطبة فخطر والملك يور لحد الساعة ماضرهش وثلت ايام وانتي الاللة مولاتي غايبة .. خاصنا نفكرو فشي طريقة نخرجو بيها من هنا قبل مايفتح السلطان عينيه ويعطي الامر بالقتل ديالنا .
دفعاتو كتغوت قالت ليه ماكيهمنيش..انا كيهمني ولدي..فين ولدي خاصني نشوف ولدي
شدها جلسها بزز قاليها. تهدني هاد الغوات غيزيد غير المشاكل ..  ويقدرو يربطونا ..
قبل مايكمل كلامو دخل عليهم حكيم شاف فيهم بجوج وامر بتقييد ذو الفقار وحبسوه فزنزانة بوحدو وتوالاو روح الندى اللي كانو غيربطوها لاكن غوتات فوجه حكيم وعينيها خارجين قالت ليه سول على السبب..سول  علاش السلطان يور طعن الاصيل ..متقدرش تربطني حيت انا اللي قادرة نفك هاد الحريرة بوحدي
هز حكيم راسو شاف فيها بغضب وقاليها ماكيهمش علاش طعنو ..اللي كيهم هوا نتي دابا فقبضتنا  ونتي اللي غتخلي ولدك يجي لهنا ..نتي الطعم  ومستحيل تخرجي من هنا حية
خرجات عينيها قالت ليه انا غنخرج حية ..مول سبع رواح مزال غينوض ويقول ليكم خرجوها ..عرفتي علاش؟ حيت اللي طعنو ولدو ..الملك يور ولد محمد اصيل المرتضي بالله فهمتي
تصدم حكيم وتزعزع فبلاصتو قاليها ميمكنش..نتي كتكدبي ..ميمكنش ولدو ماشي هوا الملك يور
ضحكات ليه  والغضب كيملي عينيها قالت ليه ولدو اللي كيقلب عليه سنين هادي.. نتا اقرب واحد ليه ماقدرتيش  تشوف هادشي…
عطاها حكيم بضهرو كيشوف قدامو تالف وبدا كيتذكر كلام الاصيل على روح الندى وتذكر السفر ديالهم بعيدية لتارودانت وبدا كيجمع الاحداث وتلفت مصدوم قاليها ميمكنش..نتي حية وهادي خطة  جديدة منك
حركات ليه راسها بالايجاب قالت ليه فهمها كيف بغيتي.. انا اول وحدة فحياة الاصيل ..وغتكون عارف شنو اللي كان وقع زمان ..غنكون عارف كولشي وبرجلك مشيتي معاه لتارودانت باش يلقا ولدو ..ونتا اللي شديتي وصيفتي عبدية ..ونزيد نأكد ليك اكثر..علاش السلطان كيتودد لينا ..علاش ربط علاقة قرابة بينا ..حيت  عرف شكون هوا ولدو ..ولاكن لدو ماتقبلش باه فاش عرف الحقيقة وطعنو .. ودابا دير اللي بغيتي ..ماعندكش الحق تحبسني هنا والى وقعات شي حاجة لودي غنحرق هاد البلاد باللي فيها
غزز حكيم سنانو قاليها غادي نجيبوه..كان فالسما غيجي ..كان فالارض غيجي ..
دخل عليه احمد يافع دفع الباب قاليه حنا وسط هجوم السي ذو الفقار ..حنا وسط  اعصار من الجنود ملثمين الواحد فيهم بقوة مية راجل
تلفت ذو الفقار شهر سيفو وشدها خرجها من تما   من داك البيت  لقا الملثمين  دخلو بالخيول وسط الساحة صفاوها لكولشي بقا غير حكيم واحمد يافع وسط الساحة ..ومن بين دوك الملثمين دخل يور حيد اللثام كيشوف بالعين الحمرة وروخ الندى كتشوف فيه وضحك قالت ليه هاهوا جا اللي يوكلك كلامك ..انا كنت متأكدة ولدي مغيخلينيش هنا بين يديكم .
حط ليها السيف على عنقها ويور كيقرب منها وصحابو داخلين منتاشرين بحال الدياب فكل مكان . شدو احمد يافع طيحوه على ركابيه
وبقا حكيم فيدو روح الندى كيهددو  هازة راسها وكتبلع ريقها .. هز يور صبعو شار بيه لكل غرفة  من الغرف ومشاو الجنود دخل على ديك الغرف  خرجو من وحدة فيهم ذو الفقار ورجع عندو واحد حذر ليه الراس قاليه مولاي ..السلطان محمد اصيل فهاد الجناح 
خرج يور الخنجر لواه فيدو وقال لحكيم
عطيني مي ولا غادي نقتل ليك سلطانة
هزات روح الندى راسها قالت  لحكيم مغتقدرش تقتلني..بزز منك غطلقني
زير عليها حكيم قالييه خرج الجنود ديالك من هنا ..ولا غنسلم ليك مك كتقطر بالدم
هزات روح الندى جبدات خنجر من حزامو وراها غرساتو ليه فجنبو وعضاتو من يدو وخدات ليه السيف ضارت عليه بحال الزمان شحطاتو لضهرو حتى طاح على ركابيه ومشات كتجري عند ولدها بغات تعنقو لاكن سمح فيها دخل عند الاصيل كان عوال يقتلو حتى وقفات بيناتهم حاللة  يديها  قالت ليها لا ..لا باك..قتلني انا عاد قتلو هوا
منع الجاسوس ولقا السبة واستغل الهجوم ..دار براسو ميت  وتسل كيزحف بحال  التمساح حتى بعد عليهم وهرب ومعاه خرجات الخبار اللي عيا حكيم واحمد يافع يتسترو عليها .. اما روح الندى مابغاتش تحيد من قدام ولدها اللي الغضب كان عامي عينيه وقاليها
تستاهلي مادار فيك ..تستاهلي وياريت كن عندي يد اخرى ميتة نقتل بيها.
خرج خلاها واقفة مخلوعة كتشوف فجنابها  وضارت وراها شافت الاصيل مستلقي على السرير وبلعات ريقها كتفتف طلعات بركبتها حطات يدها على راسو وبدات كتبكي  حتى رجع يور دفع عليها الباب قاليها تحركي
ناضت كنجري قالت ليه هانا هانا وتبعاتو خرجات من الرياض طلعات وراه على الخيل وانطلق بالجنود ديالو مشاو كاملين لقصر قرطبة   ودخل هوا وياها لجناحها ووقف واجهها هاز راسو  وهي مهبطة راسها ماقدراش تنطق
بقا كيشوف فيها مطولا قاليها  بأسى شديد..كنتي ديما اعز الناس ..عطيتك قلبي  وعطيتك راحتي وكنت مستاعد نموت على قبلك.. كنت قادر ندير اللي طلبتيه مني..قادر ندير كولشي باش تعيشي ..باش ترتاحي..وديما كنفد ليك اموامرك ..ديما كنسعى  لرضاك ..
ونتي شنو درتي ليا؟ باش جازيتني؟ خبيتي عليا الحقيقة وعيشتيني كذبة قد هاد الكون..كنت حاس بيك مخبية شي حاجة ولاكن منويتش فيك الغدر ..واخا تصرفاتك غريبة كنقول هي اصلا هاكاك من نهار حليت عيني ..طايشة .. متمردة كتر مني..ولاكن ماشي غدارة ..ماشي كدابة.. طلعتي لا طايشة ولا متمردة ..طلعتي العكس..كدابة وخاينة وغدارة ..غدرتيني فسنين عمري كلها وكتشوفي لي فعيني وتقولي لي باك مات.. فاللخر كيطلع با هوا الاصيل بشحمه ولحمه وعضمه ..الراجل اللي كنت ديما كنحاول نتقرب منو ونكون بحالو ..اللي كنشوفو مثلي الاعلى وشركت معاه الطعام وكندخل ونخرج انا وياه..لاااا ..واللي كنت غنتزوج بنتو؟!!! اويييلي يا وييلي
شد راسو كيبكي وضار جلس ساد عيني قاليها
طيحتيني فالحرام  وخليتني نشوف فوحدة اللي اصلا ختي..ونجلس مع امير اللي فالاصل خويا؟!! حياتي كلها وانا عايش بوحدي ..كلها وانا متعايش مع نفسي..عارف ماعندي عائلة وعائلتي هي نتي.. وفاللخر ..شنو فاللخر؟ًطلع السلطان محمد اصيل باا..وعندي جوج امراء خوتي  وثلاتة اميرات خواتاتي ..عندي عائلة قد هاكا وفهاد السن عاد جاية تقولي لي..علاش هادشي؟ بغيتني نتاقمي قوليها من الاول ناخدو حقنا بجوج ..ولاكن نتي مانتاقمتيش منو..نتاقمتي مني ودمرتيني وشتتيني وكرهتيني فحياتي ..كرهتيني فيك وفالنهار اللي حليت عليك عيني ..عمرني مغنسمح ليك ..استاغليتيني ..لعبتي بيا ضحكتي  عليا  درتي بيا ما بغيتي.. حسبي الله ونعم الوكيل فيك وفيه ..انا خاصني نقتلك نتي وياه ونقتل راسي موراكن فديك اللحضة ولاكن قدرة الله منعاتني ..حيت مادرت لا بيدي لا برجلي باش نمشي لجهنم بسببكم .
حيد خاتم السلطة من يدو لاحو قدامها وهي فالارض كتسمع وتبكي حتى تكور الخاتم جا بين يديها وقال ليها كيمسح وجهه وعينيه حومر
من اليوم…نساي باللي فيوم من الايام ولدتيني..ولا عندك شي ولد ولا شي حمار ..من اليوم مابقات حتى حاجة كتجمعني بيك ..ها السلطة ..ها النفود وها الذهب وها الكنوز ..ربحي بكولشي ونتي قادرةتسير بلاد كما سيرتيني ..
ضار بغا يمشي لاكن ناضت كتجري شداتو كتبكي قالت ليه ماتخلينيش وتمشي..فين غتمشي انا مك انا تعديت عليك وانا ..
غوت فوجهها حتى زعزع جناحها  قاليها  عدبتيني.. مرضتيني ..مابقيتش باغي نشوفك ولا نسمع  خبارك ..وا نسايني
نتر يديها خرج من جناحها وعبدية والخدم كلهم مجموعين مخلوعين غير شافوه كلشي تنشر ..بقات غير عبدية مافاهمة والو .. داز قدامها وقف شاف فيها قاليها حتى نتي..اللي حسبتك بحال مي طلعتي بحالهم ..كنت عايش وسطكم بحال الكلب ولاكن نستاهل ..