روح الندى من قوة الصدمة والعجب اللي شافت رجعات باللور مخلوعة والدروج وراها فالبرج نساتهم وطاحت تركبات جات هي فجهة والتاج فجهة والبلغة فجهة ووصيفاتها كيتجاراو وهي عينيها مخلوعين الصورة دسبأ قدام عينيها وراسها مقلوب ماقدراتش تحرك يابسة وهازة واحد اليد تا قالت صافي الموت هادي لكن حتى هي طلعات بسبع رواح هزوها هبطوها مرابعة كيجيرو بيها لجناحها ومشاو كيجريو عند السلطان اللي مزال مصدوم فالميت اللي رجع حيا قدامو والطبة دايرين بيه حيدو ليها القطن من نيفها وهي جالسة مكمشة فالكفن مخلوعة تقول رجعات من الغيبوبة
حدر ليه عابد الراس سخفان بالجرى قاليه مولاي لاللة مولاتي طاحت من الدروج
كمل عليه عابد ومشا كيجري عندها لجناحها لقاها مجبدة كسدة وحدة مكتحركش وشد فيدها كيسول مالها ..كانت عبدية غادي تقوليه منين طاحت لاكن زربات عليها روخ الندى قالت ليه طحت فصالة الضياف فدوك الدروج اولدي.. كنت غنموت
بقا غير كيشوف والحكيمة كدور بيها هزات راسها قالت ليه الحمد لله امولاي على سلامة لاللة مولاتي.. ماوقع ليها هرس ولاكن ضاروري خصها ترتاح مقصحة بزاف
سدات عينيها سخفانة لاكن ماقدراتش تسكت قالت ليه اشنو وقع ؟؟ الميت ناض ولا شنو
تنهد قاليها ماماتش دقات القلب سكتات فديك الوقيتة اللي شافها الحكيم ومن بعد رجعات وبقات غايبة حتى فاقت فوق النعش.. سبحان الله كتاب ليها عمر جديد
شهقات روح الندى قالت ليه انا اللي غنموت
باس يدها وطبطب عليها قاليها الله يطول عمرك وعطي الراحة راسك شوية
حركات ليه راسهت بالايجاب ويالاه بغات تسد عينيهت وناض هوا وقف دخل عابد كيجري هاز فيدو مرسول قاليها لاللة جاك مرسول من قصر الحمرا
تلفت السلطان شاف فيه باستغراب قاليه من قصر الحمرا وشاف فروح الندى لقاها صفرا مابقا عارف صفورية الخلعة من داكشي اللي وقع ولا من الطيحة اللي طاحت .. قالت لعابد بالزربة عطيني المرسول غيكون من عند لاللة شهرزاد بحال العادة
رجع السلطان كمل طريقو مشا وشدات المرسول قراتو وشافت فعبدية اللي حاطة يد على يد واقفة رقالت ليها شنو بغا مني هادا عاوتاني قالي خصو ضاروري نتلقاها هاد النهار حدا الواد المنحوس ؟!! شنو اللي ضاروري عاوتاني ؟
دورات عبدية راسها كتسوط قالت ليها حمدي الله بعدا وشكريه اللي البنت كتاب ليها عمر جديد اما كن راه ذنبها على رقبتك ليوم الدين
عبسات روخ الندى قالت ليها جيبي ليا ورقة ونرد عليه
مدات ليها عبدية شنو بغات كتبات ليه مرسول باش مايتأملش يتلاقا بيها ولا يعاود يفكر يتلاقاها ورسلاتو ليه وحطات يدها على جبهتها كترتاح حتى داها النعاس ونعسات النهار كامل حتى قالو ماتت لاكن فالخقيقة ردات عذاب الليلة الفايتة حتى ماعقلاتش على راسها لولا عبدية اللي دخلات فيقاتها ووقفات حاطة يد على يد قالت ليها كتنهد
جاو عندك الضياف .. قالو بلا ميعديوك حتى للواد
شافت فيها روح الندى وهي كتحرك يدها بزز وعنقها محطوط بحال الترابي وقالت ليها مخلوعة شكون؟
حطات عبدية يد على يد قالت ليها الاصيل بشحمه ولحمه ..وراه مع السلطان فقاعة الصيافة وجبدو الهضرة عليك قاليه طاحت من الدروج ..ودابا راه جاي يطمن عليك ففراشك ايوا كي جاتك هادي؟
شهقات روخ الندى حتى بغات تهضر وتحل الباب دخل وفالبلاصة حدرات ليه عبدية الراس خرجات من حداه خلاتو معاها داخل كيشوف فيها مكسلة وهي متبعاه بعينها وقال كيضحك
طحتي فواحد المصيدة اجا ماخرجك منها .. موحااال تفلتي هاد المرة
عقدات حجبانها قالت ليه شنو بغيتي علاش جيتي
قرب من السرير تكا بيديه على الحديدة قدامها شاد فيه وقاليها باستفزاز كيضحك
نوضي تكعدي فكي ولدك راه بغا يتزوح بختو
خرجات عينيها مصدومة قالت ليه شنووو
نفض يديه ومشا كيتسارا ليها فجناحها ويشوف قاليها ولدك بغا يتزوج بنتي .. وعطيتها ليه .. جيت نعلمك باش توجدي للعرس .. ساعا لقيت دنوبي وصلو قبل منوصل
هزات راسها وبغات تجلس واخا مقادراش تتحرك وراسها كيمشي ويجي بلاصتو شاداه بزز وقالت مخلوعة
كيفاش بغا يتزوج اش كتخربق اشمن ختو ؟؟
تلفت الاصيل هز راسو نفخ حتى تفش وقال ليها باغي القرب الاللة .. لبارح جا عندي باغي يتناسب معايا ولمح ليا على جويريا
دارت يديها على حناكها قالت ليه. اوييلي على باغي يتناسب معاك ومالقا معامن ؟!!!
هز حاجبو قاليها ااه الاللة الى نتي كتشوفيني لتحت ولدي كيشوفني قدوة ليه … ولدي اللي غبرتيه على وجه الارض وكبرتيه مكيعرفش باه الخايب اللي نتي كيبان ليك مكيسواش كيحساب ليك حتى ولدي غيكون بحالك.. طلع كيشوفني مثله الاعلى .. ماشي نتي اللي مثله الاعلى والقدوة ديالو وكيسعى للقرب وبغا يتزوج لاسباب سياسيةًويعلم الله واش بيناتهم شي حاجة
ضربات راسها وناضت من الفراش وقفات حتى كانت غطيح وشدات فيه كلاها بيدو ردها لناموسيتها وقالت ليه
بيناتهم؟!!! اش بيناتهم؟!! ودمك بارد تقول ماشي ولدك ؟!! عاجبك الحال اويلي شهاد الموصيبة شهاد الكارثة
دار يديه عاى جنابو كيشتت النضر في حيرة وقال ليها المشكلة جويريا مهتمة ومعجبة بيه .. شوفاتها ليه فاش جا اخر مرة ماشي عادية .. والى كانت وقعات بيناتهم شي حاجة فالسر راه غتكون كارثة عليا وعليك وعليهم وصافي الله يرحمنا جميعا .
شدات وجهها بين يديها مصدومة وناضت كتجر ققفطانها المحلول وتزطم فيه حتهضر بوحدها وشعرها الملوي كيتحل ورا ضهرها وجلس هوا بلاصتها تكا على ركابيه مهبط راسه كيفكر فصمت وكيسمع ليها كتقول مع راسها
ميمكنش !!! اش داه ليها وفين وامتى ؟ اويلي!! فهاد العالم كله مابانت ليه غير جويرية ؟!! يتزوج ؟! يتزوج كاع فكر فالزواج هوا كاع
تلفت شاف فيها قالها الحريرة ماشي فهادشي.. عادي يفكر يتزوج راه الزواج ويبغي يتناسب معايا راه كيشوف فهاد الزواج بزاف ديال المصالح .. اللي غينفعو البلاد وينفعوه هوا مع باقي البلدان لاخرى.. ونتي شخصيا حاشة السامعين عارفة شنو كيعني الزواج بالنسبة لملك وسلطان ولا حاكم وخليفة ودي عينك على كاع السلاطين شوفي زوجاتهم شكون هما غتفهمي علاش .. فالحياة العادية هادشي طبيعي وعادي وكايشوفوًفيه منفعة كبيرة
هزات يدها كتفكر بتوثر وقالت ليه
عطا الله الحريم اشكال وانواع عندو فالعمبر مالو طار للزواج
هز حاجبو فيها قاليها وبغيتيه ميتزوجش ؟!! علاش بالسلامة الاللة ؟
قالت ليه عرفتي شنو غندير .. غادي نزوجو شي وحدة من العمبر ونسد ليه على صبعو
وقف كيضحك ويسرح عينيه قاليها اش داك لشي عرش وشي مشاكل ونتي مقادرا حتى تفهمي حياة السلاطين علاش دايرة .. يتزوج بوحدة اللي اصلا هي ملكو ..جارية عندو مزوج بيها بلا فاتحة !! بحال الى غنعاود نتزوج انا بشهرزاد وفهامة عندك ..الاللة راه ملك كيختم على مرى حرة .. اميرةولا ملكة سلطانة بنت خليفة بنات صحاب التاج اللي ميمكن تكون جارية كيستولى عليها بسهولة وفنفس الوقت تكون بنت سلطان عضيم باش يزيد بالبلاد القدام ..اما جارية علاش غيتزوجها ؟! اش ناقصو معاها باش يتزوجها
بقات ساهية كتشوف فيه وقربات منو خزرات فيه مزيان وقالت
ليه ناقصها الحرية .. ناقصها تفك من القيود ديالها
ربع يديه كيشوف فيها مطولا مصغر عينيه وقال ليها اجي نتي بعدا .. انا كاع ماحررتك ..هربتي ليا ونتي جارية ولاكن كاع ماحررتك
هزات حاجبها فيه قالت ليه ومن بعد ؟! حررتيني ولا ماحررتينيش المهم حررت راسي وليت ملكة مكتشوفنيش؟! انا كلي ومكنباش ليك ؟!!
قاليها وزواجك من السلطان اللي مات ماشي باطل؟! ولا نسيتي؟!
هزات كتفها قالت ليه مكيهمش.. المهم تحررت .. ودابا حنا فولدنا اللي غيتزوج بنتك .. اللي طاح حبو على الحرام ديالك كيفاش غنفكو هاد الزعلوك هادا هاا؟
هز عينيه فيها قاليها هاد الزعلوك نتي زعلكتيه.. زعلكتيه مزيان ودابا فكيه ماترميش عليا مصيبتك اللي اصلا ماختاريتش نكون معاك فيها غير بزز
جمعات شنايفها بتحدي قالت ليه ايوا سير شوف اش دير .. نتا اللي ولدك غيتزوج بنتك اما انا ولدي غيتزوج بنتك ماشي بنتك غنهيطها بغراف دالما ونضرب الطم يالاه
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
