خرجات شادية حانية الراس وتكات على واحد الحيط كترد النفس.. الحمد الله ماقطعاتش ليها راسها ..وحتى هي كانت باغا ترجع للقصر وترتاح من القهرة والزلط.. عندها الحق عويشة اللي لسقات مابغات تخرج ..اما حتى حسابات شادية خرجو فالصو وحساب ليها الفقر ساهل .. قبل كانت كتاكل وتنعس ماعارفاش منين كتجي النعمة حتى وقفات عليها برجليهت ورجعات تخمم ليل ونهاو اشنو تاكل غدا ..الهم كيقتل وكيشرف وكيدير جميع الامراض.. اش داها لقصوحية الراس وهي ماليها لا والي لا تالي ..لقصر قدو قداش والبيت كي داير والماكلة اللي عمرها حلمات بيها كتلقاها واجدة .. اش داها لشي تمارة والخوف كل ليلة خايفة يهجم عليها شي واحد ولا يشدها شي واحد يبيعها فسوق العبيد .. مشات كدور بشوية عليهت وتفكرات عويشة ختها وقالت اجي نمشي نشوف فين وصلات وشنو كدير
هبطات للعمبر كتختل وطلات لقاتو مقمح بالبنات ماشي بحال من قبل كانو فيه بنات قلال .. دابا بقوة البنات مابقاتش قادرة تعرف عويشة فين هي ..شافت حتى عيات ورجعات اللور تصادفات مع بصيرة شادة فسبأ غادية بيها
بصيرة: شنو كديري هنا ؟؟
حدرات شادية راسها وقالت : جيت نشوف ختي تلت سنين والزيادة ماشفتها
عقدات بصيرة حجبانها وقالت شكون ختك ؟
ردت شادية وقالت : ختي عيشة ..واش نسيتي علينا انا وختي عيشة وشادية
صغرات بصيرة عينيها وقالت ليها ااه ..عويشة.. ايوا عويشة مابقاتش فالعنبر ..
استغربت شادية وقالت
فين مشات خرجات من القصر؟
ردت بصيرة وقالت
حولناها لبرج الاسود
زاد استغراب شادية وقالت
برج الاسود؟ وعلاش؟
ودت بصيرة وقالت : اللي غير زايدة فالعمبر كنخرجوها تخدم فالقصر .. هادشي اللي كاين .. ونتي الى بقيتي كدوري بلا شغل ماتعرفي اشمن باب يسيفطوك ليه ولا برج يطلعوك ليه
زادت بصيرة وجارة وراها سبأ اللي شافت فشادية ومشات حتى هي ماعارفاش اشنو باغين بيها .. دخلاتها بصيرة للمطبخ الملكي وقفاتها وهزات راسها فرئيس الطباخين وقالت
يعقوب..
تلفت يعقوب بو كرشي كبيرة وقرع الراس عليه تزارة وهز عينو فسبأ بانبهار وقال
اش هاد الوجبة ؟!!جراتو بصيرة وقالت ليه بصوت منخفض
سمع مزيااان الاوامر .. هاد الطاوسة بغيتك تروديهت مزيان .. بغيتها تربا وتتعلم الصبر .. حيت راه معلمة لكلشي الا الصبر والدراع ماعندهاش.. بغيت نرجع المرة الجاية نلقاها ناضية ماضية تتحط على الجرح يبرا.. ومابغيتهاش تآدا. حيت من العمبر وتحت الوصاية .. والى تمردات ماتحطش يدك فيها وعيط ليا انا نتكلف بيها .. يالاه نفد
دار يدو على راسو وقال : نهار كبير هادا نهار غليض غادي تزهى بهاد الغزالة معانا فالكشينة
جراتو خزرات فيه وقالت
الى سمعك مول الي غادي يحيد ليك الزهو من جميع البلايص ونتا كتشوف بعينيك .. حدر عينيك راه الصبع الصغير هاديك ..وعزيز على مولاه يلاه بدا
مشات عند سبأ اللي واقفة كتشوف فالكزينة ودور عينيها فصمت وقالت ليها بصرامة
سمعي مزيان .. مابقا ليك مكان فالعمبر وهادا مكانك من اليوم .. ديري هاكا ولا هاكا غتشوفي ما اكثر .. يعلم الله اش درتي حتى نزلو عليك بهاد العقاب..وعلى اي .. حمدي الله اللي عاقبوك بشي حاجة تنفعك ..ماتعرفي ليوم ولا غدت يسوط فيك الريح وتلقاي راسك الله كريم .. لا دراع لا ركابي ..تعلمي ماينفعك وبلا متمردي.. راكي فداو القانون ومولاي مكيضلمش.
مشات خلاتها واقفة مخلوعة ورجعات اللور كتشوف فديك الروينة اللي فالكشينة .. وقف عليها يعقوب كيشوف ويبعد عينيه وقال
سمعي مزيان .. الى مادرتيش داكشي اللي كنقولليك متلومي غير راسك .. يالاه تحركي نقي ديك باطاطا كلها اللي فديك السلة ..وفاش تسالي رقدي الحمص كامل اللي فداك السطل .. وطلقي راسك راه مشا الحال
بلعات ريقها كتشوف فيه وقالت
وكيفاش غندير نقيها وانا مكنعرفش؟؟؟
مشا لديك السلة هز واحد البطاطا قشرها قدامها وشار بصبعو ..هاكا ديري. ليها يالاه تحركي
تنهدات كدور فعينيها ومشات جلسات حدا الشبكة هزات الموس وبطاطا وبدات كتقلب منين تبدا
كان فهاد الاثناء الملك يور داخل من الصيد وعلى يديه صماطي دالجلد بحال العادة والسروال والسترة مغبرين .. نزل من فوق العود داخل وتعرض ليه عابد حادر راسو وقال
الحمام سخون واجد امولاي.. شكون تبغي نرسل ليك مع البنات
رد وهوا كيحسد من يديه الجلدات وقال
رسل ليا متعة . حدر عابد راسو ومشا كيجري علم بصيرة اللي دخلات على العنبر فالباب وقالت
متعة ..
وقفات متعة اللي كانت جالسة كدفر لصاحبتها شعرها وشارت ليها بصيرة براسها وتبعاتها كتجري وتلعب بتوبها وضحك ودارت رقصة بكتافها للبنات اللي معاندينها ومشات
رجع يعقوب يشوف فين وصلات سبأ من بعد ما غاب عليها حوالي نص ساعة لقاها شوهات البطاطا ورزاتهم فسلة مشات كلها مع القشور وخلات ليهم فالسطل حبات منقيين قد المشمامشة.. ضرب. يعقوب فهادو فاش شاف داك الضلم اللي رات فبطاطة ونوضها من تمت حيد ليها البقية ويعدها وهي هازة يديها وفيها جرحة وقال
وكلت عليك الله لا نتي لا اللي جابتك .. نتي اللي كنتي نتقصاني فهاد الكشينة
بعدات من حداه تخطات ديك الروينة وقالت
شوف صبعي كيف كيسيل بالدم ونتا كتغوت عليا؟!! مالها شهوة منها منقية حسن من شي ناس
دار يديه على حنابو كيشوف فيها وقال
الزين فالدفلة وحار .. والعروسة اللي مكتشوف راسها ركيزة ديال الدار عروسة غاملة بحال الكركاهة الخامجة ..ايوا طفرناه معاك
هزات صبعها قالت ليه عضر معايت بالادب ولا غنعطيك خو جوابك اللي تبات كتفكريه
عيبها كيقلدها وجلس كيتناكر هوا واياه حتى جا خادم الطباخ هاز صينية ديال الفاكية وقال
شي واحد يوصل هادي لحمام مولاي بالزربة
شد يعقوب الصينية وقاليها شدي وصليها ..ولا حتى السخرة متعرفي ليها .. يالاه سربي راسك
شدات الصينية كتشوف فيها وقالت
هادي ساهلة .. غادي غير نوصلها ونرجع ماشي بحال ديك بطاطا طريقها لاوية
مشات كتجري بيها للجناح الملكي لاكن وقفات فالباب كتشوف فجنابها وقالت
ويلي؟؟ وشكون غيدخلها ؟؟ ..
هزات عينها فالحارس اللي على ليمن. قالت ليه بابتسامة. عافاك دخل هادي لداخل الى جات على خاطرك
رد وراسو القدام : مننوع عليا الاللة .. نتي اللي خاصك دخليها
حلات عينيها حطاتها قالت ليه : هيه !! والله مندخلها .
حطاتها فالارض ورجعات اللور بغات تمشي لاكن خافت من المشاكيل وهي مزالة غارقة فيهم ورجعات هزات الصينية طلت على الحناح من لداخل لقات الحس مقطوع ..سبقات رجلها وهي لابسة قفطات كحل خفيف مليفة غير بالعقاد من القدام على للارض والسفيفة بالباج مايلة للدهبي شوية وفيه فتحات من الجناب حتى للركبة محلولين بالسفيفة ونازل مع جسدها فخياطة مخزاينة متولة بالكمام وبلغة من الصم فالكحل والاصفر وشعرها المموج فالجنب والفرقة الوسط .. زيرات شفاها مع بعض كتختل وصفاء رجليها وكدامها الحومر كيبانو وتقدمات كدور عينيها المكحلة اللي كيطيحو الزردور من فوق الصور ورموشها المولوية تقول غير سنابل الزرع .
قالت ماهنا حد ومشات نيشان دفعان باب الحمام الخشبي المنقوش. دخلات بلا سلام حتى كتلقى قدامها منضر شهوة منو يا سلام .. اشمنك يا بخار وزليج الفسيفساء داير بالحيوط .. الوخام فالارض كيزلق والشمع فقناتو مضوي بالخيوط .. النافورة الوسط كتخرخر والماء بحنابها ضاير.. وسريج مدور بالرخام وسطو ماء بالبخار .. مزينو الشمع الكبير والصغير ووسطو سيدي ومولاي مكسل ناعس العيون
اما البنات فنص توب زايدين الحمام صهد فوق السخون .. بقات المسكينة سبأ مصدومة حالة فمها وماعرفات تزيد ولا ترجع
تبسمات ليها متعة اللي شافتها دخلات وتقدمات قالت ليها
سبأ .. حطيه هنا
ي زادت وسط داك الدخان كتقرب من السريج وحل عينيه شاف خيال كيقرب بين ديك الضبابة حتى قربات كتفت حطاتو جنبو وشافت فيه بنص عين لقاتو كيشوف فيها بنص عين كتسخر ..حدرات راسها بغات تمشي وقبل ماتوصل للباب هز يدو من وسط الماء حدا الصينية دفع زلافة دزبيب سمعات وسط الحمام كتقرقب . . تلفتات شافتها تشتات وشافت فالبنات تحمعو يهزوها وضارت قدامها بغات تخرج .. هز صبعو شار ليها وقاليها
نتي اجي جمعيها
تلفتات شافت فيه مافهماتش شكون كيقصد وقالت كتشوف فالبنات
انا؟!!
شافت فيه بتساؤل وشار ليها بعينيه وهوا كيشوف فيها نيشان باش تجمعها وحط يدو متبعها ..
تراجعو البنات اللور رحعو لشغلهم وخلاوها واقفة وعنقها كيعرق والصهد وبدات كتشوف بجنابها وعيونها كتقطع فالقلب .. بلعات ريقها وتحنات بشوية حيدات بلغتها حطاتها فالجنب ووقفات المسكينة هزات طرف قفطانها طلعاتو على لحزام وزادت جنب الساريج جالسة على صبعان رجليها كتلقط فالزبيب حبة بحبة ومولاي السلطان متكي ساد عينو ووراه متعة كدلك ليك عنقو .. جات العين فالعين بين سبأ ومتعة وسولاتها الاخيرة بعينيها مبسمة على سبب الحزن اللي على وجهها .. لاكن سبأ حركات راسها بالنفي ومسحات جبهتها من الصهد سخفانة وناضت وقفات حطات الزبيب فالبلاصة ديالو .. فتح السلطان عينيه شاف فيها وقاليها
منلقا حتى حبة فالارض
هبطات راسها قالت ليه جمعتو امولاي كله
شار بيدو قاليها صافي سير ي وخرجات هزات شربيلها وسدات الباب.. يالاه مشات جات وخدة من البنات قالت كتجري قالت ليه مولاي.. هاهوا لقيتو لهيه طايح
هز عينو شاف فيها شوفة خلاتها تحشم من تصرفها وحدرات عينها حطاتو ومشات بقات متعة غير متشوف فيها معوجة سيفتها باشمأزاز
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
