بعد مرور ثلاتة اشهر ..
مرت الثلات اشهر على الحرب .. ودارت العدة على المستشهدين اللي مشاو فالحرب.. وتبدلا الاحوال وبدا فصل جديد.. فصل الربيع اللي نور بقدومو الدنيا وبهج بألوان المدينة والاندلس المزخرفة كاملة .. اجمل منطقة على وجه الارض فالزينة والزخرفة والفن والابداع .. منها كيتفرق الفن وكيتفرقو الالحان وكيتعلمو الشعراء الشعر والاداب و منبع للحياة وملحأ للكثير من المهاجرين فداك الزمان .. بلاد البهجة والفرحة والنشاط والرقص والطرب الغرناطي والاندلسي بصفة عامة .. كان الفن والملحون والالحان كلها من مميزات الاندلس .. بحيث كانو النساء كيعطيو قيمة كبيرة للفن والغناء وكانت اجمل النساء هي اللي كتنضم الكلام وتشتر الاشعار وترقص بحزام .. كانت قصورها من اجمل القصور وزينتها كتتميز على زينات العالم بأكمله حتى صبحات هدف للصليبين اللي كان الحلم ديالهم يستولو عليها بكل مافيها .. باراضيها واشجارها وجمالها ونسائها وادبها وتقافتها وحتى رخرفتها الغربية اللي تخلطات بالزغرفة البلدية المغربية وعطات واحد الفن اللي ماقدروش يعطيو ولو الشبه ديالو من بعد . او حتى التقليد .
من بعد اتستقرات البلاد وحطات ساس صحيح وتوحدات وبدات كتنمي راسها .. ساقت لاللة روح الندى الخبار فجناحها وخبرها الامير بانضمامه للدولة الاموية .. طيحات من يدها التحفة الاثرية واللي كان طبسيل ساوي ثرات من يدها بقوة الصدمة تهرس بين رجليها وشافت فيه قالت بلسان تقيل
شنو درتي؟؟؟ اشنو ؟؟
دور وجهه ساكت شوية ورجع قال
وقعت تعاهد مع الدولة الاموية
حلات عينيها وقالت
بايعتي الاصيل !!! بايعتي الاصيل وحطيتي رقبتنا بين يديه!!! هضر ؟؟ وااش بايعتيه
بقا ساكت مطولا وشاف فيها قاليها هادا هوا الصح .. هادشي اللي خاصو يكون .. فالاتحاد قوة وهاد القوة غتزيد تكبر الى بقينا مجموعين .. اما الى تعاندنا غادي تتقسم البلاد وتشق وكل يحكم باش ما بغا وهاكا غيكون ساهل على العدو يصيدنا بحال الحجل واحد مور واحد..دابا حتى واحد ميقدر يحط عينو على شبر من ارضنا مادامنا هاكا متاحدين ..من اللول كنا يد وحدة مكانتش قشتالة تستهدفنا . اشنو فيها الى قدمنا الدعم لبعضياتنا وكانت عندنا كلمة وحدة وطريقنا واحد..واش ماشي الهدف ديالنا نقضيو على الصليبيين وكاع كفار الكرة الارضية ونحكمو الارض بالدين الاسلامي..
غوتات بغضب وقالت
اشمن ارض. اشمن حكم واش كتحلم ؟؟ واش كتحلم؟؟ شكون اللي كيفكر فهاد الارض وهاد الدين الاسلامي اللي كتهضر عليه بوحدك مغتقدرش وعمرك مغيكفيكش وغضيع حياتك فشي حاجة اللي مغتقدرش توصل وحطيتينا قدام الاصيل عبيد من بعد ما كنا مستاقلين ومرتاحين
رد بغضب وقال
انا الى مادرتش وماكفانيش عمري ولادنا يقدرو…حفادنا .. حفاد احفادنا .. حنا نجرو وهما يجرو وربي معانا وربي ناصرنا وناصر الاسلام
هانتي قلتيها بفمك ..عمرنا على قد الحال مكافيش باش نوصلو لشنو بغينا .. وفنفس الوقت مغنبقاش خالدين فهاد الاستقلالية وهاد الهز والجاه اللي نتي باغا.. اخرتها كلنا غنهيطو تحت هاد الارض اللي كنمشيو عليها وغيمشيو فوقنا اجيال واجيال وغيبقا غير دين الحق ودين الله عز وجل وشنو قدمنا وشنو اخرنا ..حنا عايشين عايشين ها العز ها الجاه ها السلطة ها المال .. عطانا الله كلشي ..ولاكن ماشي باش نستحودو على كلشي ونسرطوه ونساو راية الاسلام اللي علاش حنا اصلا كاينين ..
غرغرو عينيها بدات كتبكي وقالت
علاش بالضبط الاصيل علاش؟؟؟ علاش تعاهدتي معاه كنتي تعاهد اي واحد من ملوك الدولة الاموية ولا قيادها ولا طلب الانضمام وهما غيرحبو بيك ..علاش مشيتي للاصيل بالضبط ودرتي يدك فيدو غادي يبقا ديما شانت بيها وحاسب راسو كبيرنا وغتسجل عليه توحيد الاندلس وغيبقا مدكور فالتاريخ ..علاش بالضبط هوا ؟؟
رفع يديه على جنابو وقال معصب
ماشي شغلي فهادشي فاش نموت كاع لايذكرني لا تاريخ ولا حاضر ولا ماضي مايدعيوش فيا غير الناس وغنكون مرتاح مع راسي..واش كتفكري غير فشنو غيتذكر .. واش حنا عرفنا شنو غيوقع؟؟ واش عارفين شنو كاين من هنا لقدام ..واش غتشقق البلاد من جديد ويبان شي واحد من حفادنا ويلمها ولا تزيد تكبر وتتضخم ..واش حنا عارفين شكون فينا غيذكرو التاريخ ولا شكون فيها اعضم من لاخر !؟؟ حنا كنديرو جهدنا واللي جايين غيديرو جهدهم المهم كل واحد يموت على عهدو وعلى بلادو واللي فجهدو يديرو
ضربات فخادها وقالت كتتغبن
اويييلي على الحنش دورني من كاع الجوايه .. دورني وحلف ووفا
بقا الامير كيشوف فيها مافهم ا كتقول ومشا بغا يخرج وصل حتى للباب وقال
المهم انا كنت جاي باش نقول ليك باللي غيجي الملك محمد اصيل عندنا للقصر من دابا واحد الثلت ايام ..احتفالا بهاد النصر اللي كسبنا مجموعين
شدات راسها ولقات فيه التاج وهبطات يديها شدات وجهها وقالت كدور بجنابها
وجايبو حتى لعندي يتشفا فيا ويهز عليا مناخرو .. ويزيد عليا بالتهديدات ويمرضني فحياتي
تنهد الامير كيشوف فيها وقال
لاحولة ولا قوة الا بالله العلي العضيم .. مالكي على سو الضن ..ماوصلنا لا بعيب لا بعداوة ومن اطيب خلق الله ..مالكي معاه هازة من جيهتو
سدات عينيها كتبركم بفمها خلاتو حتى خرج وهزات واحد التوب عضاتو وغوتات لربي اللي خلقها وضربات يديها مع الارض وجلسات حادرة الراس كتبكي
التحضيرات للاحتفال بدات فالقصر وكلشي كيتجارا ..الطباخ كيطير وينزل والسوق مغلغل والخدم فالزرابي والورد كيفرشو وفتخمال القصر كيهزو ويحطو .. البلاد كلها فرحانة الا لاللة روح الندى اللي جالسة فجناحها فكعانة .. سهات وخممات حتى عيات فالاخير رسلات ذو الفقار للديوان يجمع ليها المجمع كامل ويخبر الامير ويتسناوها تهبط ..ناضت بخطوات تقيلة قدام المرايا وطلقات يديها خلات الخدم والعبيد يجهزوها وحطو التاج على راسها ورافقوها والكل كيحني ليها. تحلو ابواب الديوان الملكي ولقات الكل واقف حاضر والامير على راسهم ..خوا البلاصة فين كان واقف وحدر راسه ليها دازت رافعة راسها وجلسات بلاصتها وقالت
جمعتكم ليوم .. وبهاد المناسبة . .. اللي برهن ليا فيها سمو الامير على مسؤوليته ووده وفائه لبلادو وشعبه .. هاد الحرب كانت اختبار لينا كاملين..كاين اللي نجح فالاختبار ..وكاين اللي فشل.. وفيها حطات النقط على الحروف.. ووضحات جميع الامور.. ليوم .. وبإسمي واسم الشعب اللي حب هاد الامير ..وعشقه وقدم ليه الولاء.. كنعلن على تنازلي لكرسي العرش لملكم ولي عهدكم .. الملك يور بن محمد..
اللي كيستاحق هاد المكانة اكثر مني .. واللي البلاد محتاجة لملك بهاد القلب وهاد العقل وهاد القوة .. محتاجة لملك هدفه نشره الاسلام والحفاظ على اراضيه وشعبه قبل من نفسه . اللي كيضحكي ومقدم حياته وسنين عمره كلها فداء لهاد الرسالة ..
هي تهضر والامير مصدوم من كلامها وكيشوف فيها بعيون عابسة ماراضيش على هاد القرار اللي نزل من السما بلا مايكون ليه علم بيه..
كملات كلامها ووقفات حيدات الخاتم من يدها وقدم ليها ذو الفقار وثيقة التنازل على العرش وتقديمه لودها .. ختماتها قدامهم وتلفتات شافت فالامير كتسناه يتقدم لاكن ماتقدمش.. بدا كيبان فعينيه التمرد لاكن روح الندى شافت بعيون باردة وقالت
انا كنتيق فالامير.. كنتيق فيه وحتى نتم تيقو فيه .. حيت عمرو غيحشمكم ولا يطيح بقيمتكم لارض قدام اللي يبغيكم واللي يكرهكم
جمع القبضة ديدو كمشها وسد عينيه كيترعد وتقدم كأنه هاز الحديد فرجليه وهبط قدامها ركبع على ركبته .. تلفتات للصندوق اللي قدمو ليها هزات منو سيف الملوك قدماتو ليه وهزات الراية مطوية قدماتها ليه وفوقها خاتم الختم الملكي اللي كيعرفو العالم كامل وعارف انتمائه .. هزات كذلك التاج المتوارث عن اجدادها واللي دفعات عليه الغالي والنفيس باش لقاتو ولقات ثراتها واصلها واحتافضات بيهم طيلة هاد السنين حتى جا الوقت اللي جبداتهم فيه وقدماتهم لسمو الامير اللي صبح ملك فمكانها وناض خوات ليه المكان وقفاتو بلاصتو وهوا متبعها بالعين كيشوف فيها والصهد كيخرج من نيفو .. حدر ليه الديوان كامل الراس وحدرات ليه حتى راسها ودقات الاجراس فالقصر وانتشر الخبر حتى وصل عند الاصيل وفاتو حتى وصل للدولة الاموية كلها وكان اول واحد كيهنأ الملك يور هوا محمد اصيل ..اللي بعث ليه رسالة تهنأة وقار قراها الملك يور وهوا فجناحو ساد عليه وعارف باللي انكسار روح الندى هوا اللي خلاها تسلم ليه كلشي..
تلفت من بعد ما قرا التهنأة وقال لذو الفقار
مزال سادة على راسها وماباغا تشوف حتى واحد
رد ذو الفقار وقال
مزال امولاي.. والتحضيرات جاهزة لاستقبال ملك غرناطة ..
تنهد الملك يور وشار ليه بيدو خرج ورجع لشغالو هاز الهم من جهة روح الندى .
تعاشات العشية وها الملك الاصيل وصل بهبته وقامته للقصر مرافقاه لاللة شهرزاد فعربة موراه وهوا على الخيل بلباس رسمي انيق وعلى راسو تاج من ذهب داير على جبته والخيل داخل وكيرقص برجلو والعبيد والهدم مستفين على طول الطريق مستقبلين الملك وعشيرته ..
نزل من العود وجنبه حكيم وتلفت للعربة مد يدو لاللة شهرزاد نزلات بحال الشمعة مضوية فقفطان كان قاصد ومقصود لهاد المناسبة كأنها فمسابقة اجمل امرأة فالعالم .وفعلا كانت اكثر من جميلة وهي اميرة والابتسامة على وجهها وجنبها ملك الملوك شاد بطولو وعرضه ووسامته اللي البنات فريعان شبايهم طامعين يكونو مكانها .
أنت تقرأ
ذو التيجان 👑مكتملة👑
Romantizm💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
