وجع الاصيل للبهو فسيفة اخرى غير السيفة اللي خرج بيها .. الهضرة دروح الندى فرشات ليه الحقيقة كلها بالوانها قدام عينيه .. فيقاتو من سبات كان تناساه ودازو عليه سنين.. فكراتو فالصغيرة والكبيرة اللي تنسات بين الاحداث اللي عاش طيلة هاد السنوات .. فدقيقة جات بحال الموت فكراتو فاللي بقا عاقل واللي نسا عليه .. ضار بيه القصر ديالها وتخنق فيه .. حتى النعمة مابقاش قادر يدوقها وحتى الماء ماهبطش مع حلقو .. جلس جنب الملك يور وبقا كيشوف فيه والبنات قدامهم كترقص وتلعب .. لا صوت فودنيه ولا صورة كتحرك قدامو من غير وجهه ولدو اللي مهني من هاد الحقيقة المرة . تلفت على غفلة بابتسامة للاصيل وقاال
بغيت نشكرك على داك النهار اللي عتقتيني فيه وانا مصاب.. عتقتيني من يدين دوك اللي ماعرفتهم قطاطعية ولا صليبيين .. شكرا اللي داويتي جرحي فداك الرياض ..وسمح ليا ضربت رجالك حيت حسابني بين يدين ولاد الحرام ومافكرتش حتى دقيقة فاش حليت عيني
سد الاصيل عينيه وتنهد تنهيدة عميقة ماقال حتى كلمة .. عقلو فجهة اخرى وخايف شي نهار يتقلب ولدو ويتحجر قليو ويحقد ويكره ومايبقاش بهاد الصفات النبيلة كما جرا لروح الندى .. خايف يكتاشف الحقائق المرة ويمسو الغدر من اقرب الناس ليه لي كيتيق فيهم .. خايف عليه من الانكسار والخذلان اللي كيتسبب فنشأة روح شيطانية كل ما كان فيها الجرح اعمق كانت الروح اخبث وعمات العينين بالانتقام وسودات القلب وقضات على كل بذرة نضيفة ومبادئ وقيم كبرو معاه .. فضل يسكت ومايزيدش يتحايل او يستعمل اساليب ابليس مع اشخاص يحال يور .. ويخلي الاساليب الشيطانية للي هما شياطين فسيفة الناس.تنهد وناض وقف بغا يودعو لاكن الملك يور طلب منو يجلس معاه اكثر وماسخاش بيه وبالسهرة معاه ..لاكن الاصيل كان محتاج للوحدة وودعو وخدا معاه لاللة شهرزاد اللي حققات فالملك يور مزيان وابتسمت ليه وركبات عربتها مشات .
من بعد ما ودعهم الملك يور رجع لجناح لاللة روح الندى اللي كانت مزالة جالسة فالارض وساهية كتشوف قدامها .. سمعات الطرق فالباب لاكن رفضات تشوف شي واحد ..تكلم يور من ورا الباب وقال
انا ولدك ..باغي نهضر معاك شوية ماتحليش ليا؟
ردت بنفس السيفة المصمرة وقالت
محتاجة نرتاح
تنهد وخلاها ترتاح ومشا لجناحو سد عليه عقله معاها ماعرفش كيفاش يراضيها وكيفاش غيرتاح وهي مامرتاحاش.
صبح الحال عليهم وحتى واحد ماصبح كيف الصباح المنور .. وحتى واحد ماقدر ينعس وكلها وهمو وماداقو طعم النوم والراحة ..
صبحات لاللة روح الندى لابسة سلهامها الكحل وجاهزة باش تخرج .. خرجات بكري ركبات فوق العود ومدات مرسول لذو الفقار وقالت
رسلو لملك غرناطة فالحال
حدر الراس مشا فدمو لرسول القصر وانطلقت هي شدات طريقها ونسمة الهوا النضيفة كتستنشقها .. وصل الرسول فالحال لقصر الاصيل وعطاه المرسول من يدو ليد حكيم اللي قدمو مباشرة للاصيل وهوا فجناحو صابح مكسور ..صبح على مرسول روح الندى وفتحو بالزربة لقاها كاتبة ليه موعد جنب الواد اللي شافتو فيه اول مرة فحياتها وهي كتغسل شعرها مع عبدية وطامو وطلبات منو يلتاخق بيها فلحين .. لوا المرسول وناض بالزربة شار بصبعو للعبيد يعطيوه حوايجه يمشي يشوف اش بغات وخرج من القصر فوق العود نيشان للواد لقاها دايرة قب السلهام و كتمشى على جنبو .. نزل على الخيل وهبط عندها جنب الواد تقابل معاها وقال
باستغراب
شنو اللي خلاك تصبحي على هاد الواد ؟
ضحكات وهي كتسارا جنبو وقالت
هاد الواد هوا اللي لقاني بيك نهار الاول .. باقي كيشرشر .. قلت غيكون نشف حيت شحال من حال تبدل
قرب منها وسد عينيها ماعرف باش يبدا .. شافت فيه قالت ليه فكرتي فالهضرة دالبارح؟
مزال مصر ولدك يعرف الحقيقة
تنهد وقاليها
غادي يعرفها ليوم ولا غدا .. واخا منقولهاش ليه انا غادي يعرف حتى حاجة مكتبقا مخبية..
هزات راسها شافت فيه بمكر وقالت
الا القهرة والبؤس اللي كيبقاو فالصدر مخبيين
جبدات من طياتها خنجر بلا مايشوفو وكانت غتعرسو وسط كرشو كن مافطن بيها وشاف المكر فعينيها وشد ليها يدها وناب الخنجر كيبري على حزامو وهي بكل كره وحقد كتعصب معاه باغا دخلو وسط مسارنو .ك وكتردد بسانها
طال الزمان ولاقصار غادي دوق السم اللي دقت .. غادي نقتلك بيديا
سمع كلمة السم وشك لايكون الخنجر مسموم وغير جرحة منو تقدر تقضي على واحد فيهم .. لوا ليها يدها بالزربة وطيح الخنجر من يدها لاحو فقاع الواد وهبط ليها يدها وقال كيشوف فيها
كنا بجوج صغار.. كنا بجوج طايشين وماخاترينش.. كنت قاصي فحكامي وكنتي كتصرفي بطيش وحتى انا كنت عصبي ودقت المرار .. نتي تعدبتي فقصري عام .. وانا تحرقت على ولدي اعوام .. مابقاش عندك علاش تزيدي تنتاقمي نتاقمتي تقبلت انتقامك .. وكنطلب منك نفتحو صفحة بيضا .. ننسا شنو شربتيني وتنساي شنو داز عليك .. ونطفيو هاد الغضب وهاد النار اللي شاعلة بيناتنا
غزات سنانها وقالت
عمرني مغنمشي معاك فطريق وحدة .. عمرني مغنخط يدي فيدك .. خديتي مني كلشي ..كلشي وباغي تاخد مني حتى ولدي
شد لي يديها اللي كل شوية باغا تهزها ماتايقش فيها وكيقول الى طلقتها غتجبد عليه شي عجب اخر من بين حوايجها .. زفر كنهج وقال
كلشي غيرجع ليك ..شنو بغيتي غيرجع ليك .. نساي اللي وقع وكلشي غتوصلي ليه بالخاطر .. اصلا ولدك هوا ولي العهد هوا اللي غيخلفني.. هوا اللي غيحكم كلشي.. شنو بغيتي اكثر من هادشي.. مغتربحي والو بهاد الحقد
تسيفات عليه وطرطقات عينيها وقالت اصلا ولدي ماهامو لا جاه ولا سلطة ومن غدا يخلي ليك كلشي ويطلع يرعى فالجبل .. مزال غالط بزااا ف غالط ومزال معارف شنو ولدتي .
رد وقاليها عرفيني .. باغي نعرف ولدي وباغي نقربو مني .. وماباغيش نآديك وكنطلب السلم معاك .. واللي خديتو ليك نردو ليك
عززات سنانها وقالت ليه رجع ليا شبابي وصغري ويامي ورجع بيا الدزمان اللور
بلع ريقو كيصارعها وقال
كن بيدي كن رجعت الزمان اللور .. وحتى دابا باقا شابة باقي مافاتك والو .. نعلي الشيطان انا مابغيتش نآديك مابغيتكش تآدي راسك .. نساي اللي فات وخلينا نفتحو صفحة جديدة
نترات يديها رجعات اللور ومشات ركبات على العود ديالها وقالت ليه كتنهج
عمرني مغنسمح ليك وحقي غناخدو منك يا بيا ولا بيك
ضربات العود ولاحت القب على راسها وعطات رجليها للريح مشات بحالها
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
