تفكر يور ولدو وبلا ميحس تبسم قاليه بغيت نشوف ولدي
فهاد الاثناء دخل المسير كيطير على شهرزاد هاز صبعو قاليها لاللة لاللة لاللة ..صدمة العمر الاللة..صدمة ما بعدها صدمة انا مللي ماسكتش ليا القلب فيها راه عمره يسكت
ناضت وقفات قالت ليه شنو واقع ياك لاباس
قاليها نزلي فالحال تشوفي بعينيك حيت واخا نحلف ليك على المصحف ماتصدقيش شنو شافت عيني
نزلات مع الدروج تلاقات باسمهان وشامة كل وحدة منين جايا حتى هما باغيين يشوفو شنو واقع وتلاقاو فالساحة فباب القصر ولقات روح الندى واقفة لابسة قفطان ابيض تليجة بالسفيفة بلدية صفرا والتاج على راسها والوصفات وراها رافعة راسها وماتلفتاتش وراها ..بقات كتسنى حتى ضهر الاصيل ودخل مع الباب وجنبو سمو الامير يور اللي صدم الكبير والصغير ومشا النطق لشهرزاد بالصدمة بغات تهضر ماقدراتش وطاحت فالارض باغا تهضر وكتمتم ..شدوها هزوها داوها وبقات اسمهان وشامة مصدومين
شامة : ياربي شهادشي كنشوف!! واش ماشي ولد روح الندى؟!! ولد السلطان نفسه
اسمهان: ضربيني !! ضربيني واش كنحلم
بقاو كيشوفو فروح الندى فتحات يديها استقبلاتو بالحضن قالت ليه
اهلا وسهلا..مرحبا بيك فدارك .. فقصرك وبين واليديك اولدي الحبيب
حلات شامة فمها وبلا متشعر قالت لسمهان. هادي اخرت شهرزاد ههه!!! اويلي ماقدراش نتيق !! جوج صدمات!! رجوع ولد روح الندى وسقوط شهرزاد فنهار واحد ههه..ياربي شهاد السعد اللهم لك الحمد حيتيني حتى شفت شهرزاد كطيح شوية بشوية على مهلها …اخييييرا اشهرزاد طحتي وطاحت مكانتك باش شنتي وتحدو ليك ..ياك قلت ليك اسمهان راه روح الندى ماشي ساهلة ..تعقلو فاش قلت ليكم جنية ضحكتو عليا.. ايوا شوفي بعينيك روح الندى الحقيقية ..صاافي دكات الوتد الصحيح فهاد القصر اللي ميقدر حتى واحد يزحزحو
دخلات روح الندى سمو الامير يور لجناحها وتما لقا متعة جالسة فوق واحد السداري فالجنب هازة ولدها.. تفاجآت واخا سمعات من روح الندى خبار رجوعو لاكن الشوفة كانت مختالفة وتلفات ماعرفات ماتقدم ولا توخر .. وقفات حاللة فمها ماحسات بيه حتى خدات ليها روح الندى الولد بشوية وعطاتو ليه ليدو شدو ..فرح بيه وباس جبهتو ودوز صبعو على خدو وقاليها مشاء الله تبارك الله..شنو سميتوه
تبسمات روح الندى قالت ليه سميتو محمد اصيد
شاف فيها مستغرب قاليها محمد اصيل
بدات كدور فعينيها قالت ليه تولد فضروف صعيبة.. وو و راك عارف دزنا من ضروف صعيبة ماجا فبالي غير محمد اصيل قلت نسميه على اسم باك..وكن تشوف شحال عزيز على السلطان ..وشحال كيطلق يشوفو وكيسبق منو الصباح
حول يور عينيه مبسم قاليها ماشي مشكل..المهم يشبه ليا
بدات كضحك وخلاتو حتى شبع شوفة من ولدو عاد شداتو منو مشات بيه لعند وصيفتها وبقات متعة وقفة قدامو حدرات ليه راها قالت ليه على سلامتك امولاي
بغات تبوس ليه يدو وخطفها مررها على راسها بحنان قاليها مرتاحة ؟
قالت ليه الحمد لله امولاي ..وتبسم طبطب على كفتها وهز راسو بغا خرج عند الاصيل يكمل معاه الهضرة لاكن شداتو روح الندى بالكلام في حين وصل رسول القصر عند السلطان ومعاه عبد وقاليه رسول القصر
مولاي ..هاد العقد كيقول كان عبد فالقصر فقرطبة ومزال تما ..عندو شي حاجة مهمة بغا يعطيها ليك ليديك
هز السلطان راسو قاليه شنو سميتك ؟
قاليها العبد. عابد امولاي
قاليه السلطان شنو كاين ارا ماعندك
خشا عابد يدو فطيات حوايجو جبد شي حاجة وقاليه انا امولاي من الناس اللي نجاو ولاكن خدموني فالقصر ..غير بالسيف خرجت هاد الخرجة وجيت نصل ليكم الامانة اللي هادي سبع ايام وهي عندي
مدالسلطان يدو شد الامانة وكانت عبارة عن ورقة صغيرة ملوية فتحها لقا مكتوب بحال الحجاية كيقول
"حمامة ربيتوها ..لذو التيجان هديتوها
جناحها داست عليه الاقدام ..وجناح النسر هداتها الايام
فلحناني تعجن ليه ..وبمرودكم تنقش ليه"
كمش الاصيل الرسالة فيدو ودارها ورا ضهرو قاليه شكون عطاك هادشي ؟
قاليه عابد انا عطا ليها غير واحد الخادم امولاي
قاليه السلطان شنو كيوقع فالقصر ؟
قاليه عابد الله وعلم انا حدي غير فجناح الخدم ..مكنشوف شنو كيوقع مكنفهم اش كيقولو
شار السلطان بعينو للحرس قاليهم ماتخليوهش يمشي حتى نأمركم
رجع بحالو وعقلو شارد شاف يور جاي عندو قاليه جلالة الملك ..انا قررت نرجع لتارودانت ان شاء الله انا ومي وولدي
خرج السلطان يدو من مور ضهرو عطاه الورقة قاليه هاك ..قرا شنو مكتوب هنا
خدا من عندو الورقة حلها قرا الحجاية وفتح عينيه مصدوم كيشوف قدامو مامصدقش وقال
منين جات هاد الورقة
قاليه السلطان جات من قصر قرطبة.. ولاكن شكون البنت اللي كتبات هاد المرسول ..قالت ليك يمامة ربيتوها ولذو التيجان هديتوها
قاليه يور وهوا فدهشة هادي سبأ..انا سميتها يمامة..
ضحك السلطان قاليه اسم على مسمى ..نعم الاختيار والتربية ..سبحانك يا جليل كتغير الحال من الموحال
قاليه يور قالو ماتت!! تكون باقا حية؟!!
قاليه كتقول فالمرسول جناحها داست عليه الاقدام..اي بحال الطير فاش كيفقد جناحو ويطيح ..بالنسبة ليها جناحها هوا قوتها وصحتها ..وجناح النسر هداتها الايام
بقا يور ساكت كيوف قدامو قاليه بصوت ضعيف باقا حية؟؟ هادشي كيعني باللي كتاب ليه عمر جديد ثاني!! جناح النسر هداتها الايام كتقصد قوة جديدة تعطات ليها من عند شي واحد فاولاد الملك بجوج اللي فالقصر..
قاليه الاصيل ومن عند الري والشوار حيت كتقول فالسطر اللخر
فلحناني تعجن ليه
كتقصد بالحنة الفرح ..يعني يا اما غيتزوجها يا اما شي حاجة المهم جامعة بينهم كتبين انها قريبة ليه فالسعد ..
قاليه يور وشنو قصدات بمرودكم تنقش ليه كتقصدنا حنا كتقصد بالنقش الطعن هادشي اللي فهمت
دار الاصيل صبعو حدا فمو كيفكر ليه قاليه تماما ..يعني بسلاحنا غادي طعنو
الرسالة كتقول بالمعنى المختصر
انا بنتكم اللي ربيتو ولولدكم هديتو ..ذو التيجان ..كتقصد بيه اللي مو وباه ملوك ولا كانو ملوك وهوا ولي العهد على الجهات بجوج ..خسرات قوتها وصحتها ولحسن حضها ماماتتش واالي نقدها غيكون واحد من الخوت اللي مدها بالقوة من جديد وغالبا فيكون تغرم بيها حيت جامعاهم فرحة وكاسنى الوقت المناسب والرد من عندنا باش طعنو بفرحته .نوض لولدي على سلامتك جاب ليك الله فرصة ترجع بيها بلادك ماعندك فين تمشي دابا
ضحك يور قاليه ماشي خسارة فيك التربية ايامامة ..صدقتي احسن بزاف دالناس
دخلو لجناح السلطان وحطو ورقة وريشة كيتناقشو على الخطة اللي يمشيو عليها وكتب بيها الاصيل الرد
"هاج البحر بالحوت بين الخوت ..طعم واحد كافي يخلي الحوت يموت "
تنهد الاصيل قاليه على الله تفهم المعنى كما هوا..حاولت نعقدو باش حتى الى طاح فيد شي واحد مايفهم اش كيعني
شد يور الرسالة قاليه غتفهم انا عارفها شاطرة وذكية .. وغتكون كتفهم لغتهم حتى حاجة ماصعيبة عليها دابا
رفع الاصيل راسو امر الحراس يجيبو ليه عابد وغير دخلوه كان غيسخف من الصدمة فاش يور على قيد الحياة وفشل طاح على ركابيه..لاكن السلطان ماخلاش ليه فين يفكر عطاه المكتوب قاليه وصلو وعنداك يضيع منك ..كنا وصلتي لينا الرسالة فالحفظ والصون وصلها فالحفظ والصون
قرب. منو يور شاف فيه قاليه عابد! .. شخبار يمامة لاباس عليها
حدر ليه عابد راسو قاليه مكنشوفها ما كنريها امولاي..بعيدة بزاف على جناح الخدم ..الله يطول فعمرك امولاي هادا نهار السعد اللي شفناك فيه
تبسم يور قاليه الى شفتي يمامة قوليها على ماشافت عينيك ..وبلغ ليها سلامي . يالاه سير ورد البال للمرسول
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
