ذو التيجان 👑مكتملة👑

👑الجزء 60👑

سمح ليهم فالجمل وما حمل وخرج من القصر جهة الخيل وعبدية تابعاه كتبكي وترغبو   وتسايس معاه يجلس..كان اثنائها يمامة جاية جارة الفرس ديالها دور بيه شوية فالقصر وشافت الصدع نايض بعيد وقربات كطل عليهم من بعيد وتسمع سمعاتو قاليها
حتى نتي بحالك بحالهم ..بنيتو سعادتكم على ضهر تعاستي انا.. جيتو لهنا باش ضربو بيا  السلطان  الاصيل ..كاع انجزاتكم كلها على ضهر الانتقام ..ودابا  كما ربحتو  غادي تخسرو .. كملو فشنو كديرو و إياكم شي واحد يتبعني ..خليت ليكم القصر والبلاد ديرو فيها مابغيتو نتوما قادين بيها يا رباعة الشهلاهبية
طاحت عبدية كتغوت قالت ليه فين باغي تمشي؟!! فين غادي تمشي وتخلي مك ..فين غادي تمشي وتخلينا ماعندنا لا والي لا تالي
لحقات عليه روح الندى كتجري حتى طاحت وناضت وقفات كتغوت قالت ليه ماتمشيش..انا منقدرش نعيش بلا بيك ..منقدرش حرام عليك ..انا ضحيت ..انا تعدبت وتكرفست عليك
غوت من فوق الخيل قاليها بغضب كيضرب صدرو
نتي لعبتي بياااا. ضحكتي علياااا
قالت ليها حتى انا بحالك ..حتى واليديا ماتو وخلاوني..انا كاع كتر منك  انا قتلو ليا اهلي وحبابي
رد بغضب قاليها ودرتيني قنطرة باش تردي دقتك ..  باقي عندك الوجهك باش تهضري..حياتي من اللول للخر كلها كدبة ..كلها حتى حاجة ماصحيحة ..فضلتي تسكتي حتى توصلي اشنو بغيتي..ماشي من حقك ..ماشي من حقك ديري فحياتي مابغيتي وتقتلي اللي بغيتي وتحيي اللي بغيتي.. واجهي مصيرك  وبعدي مني ماتستاهليش نضحي عليك ..بحالك بحالك ماحسن منو فوالو ..خليت ليكم الله ينتاقم منكم
دارت يمامة يدها فمها مصدومة ودورات عينيها شافت عبدية كضرب فخادها وتغوت قالت ليها صافي ..صافي بردتي.. هادشي اللي بغيتي توصلي .. هادا مورادك .. حسبي الله ونعم الوكيل حسبي الله ونعم الوكيل فيكم ومادرتو فيه وشتتو الشمل  ..ها الانتقام ..ياك قلت ليك بعدي من هادشي لا يبليك وغيجي نهار وتندمي .. ياك قلتها ليه هاهوا النهار وصل
ضرب يور الخيل مشا منوض الغبار وراه وطارت يمامة على العود ديالها دازت وسط عبدية وروح الندى كطير مخشية فسلهامها والنقابعلى نسفها مشبك تبعاتو كتجري خلاتهم طاير ليهم العقل كيغوتو حتى سخفو بجوج وهزوهم كل وحدة فبيتها ودارو بيهم .
اما يور خرج  كيجري ماخلا ماقطع ..قطع الاجبال وقطع الوديان وقطع الطرقان الطويلة حتى وصل لابعد نقطة فطرف البلاد واللي كانت قرية صغيرة فيها اكواخ صغيرة معزولة وبعيدة   مع غروب الشمس.. دخل بلا عقل راكب فوق الخيل كيتمشى بيه واهل ديك القرية كيشوفو شكون هاد الغريب اللي جا عندهم   خرج من بين الاكواخ الفقيرة حتى وصل لواحد الواد بين جبال كبار والشجر خضر ونزل على الواد شرب وخلا عودو يعتق وجلس على واحد الحجرة مهبط راسو كيبكي ..بقا هاكاك والخيل غادي جاي حداه كيتسارا حتى سمع صوت الخش وراه وتلفت بالزربة لقا يمامة كتتقدم جيهتو والفرس مربوطة وراها ..تصدم ومسح وجهه  عرفها من عينيها ولباسها  بلا متحيد ليه اللثام وقال
منين خرجتي؟؟ شنو كديري هنا؟
هبطات اللثام كتشوف فيه بأسى قالت ليه تبعتك من القصر
قاليها الطريق كلها ونتي تابعاني؟؟
بقات ساكتة كتشوف فيه وقالت ليه ما عندي مندير فالقصر الى ماكنتيش نتا فيه ..هديتني هاد الفرس باش فين ماحليتي ورتاحليتي نكون معاك ..
بقا غير كيشوف فيها مستغرب من كلامها وقاليها. شنو كتقولي؟؟ باشمن حق تخرجي من القصر واش دابا انا فيا ولا فيك؟؟؟
هزات راسها قالت ليه انا ماعندي مندير تما ..غنمشي معاك فين ما مشيتي ..
تعصب عطاها بالضهر شد راسو كيتعصر وتلفت عوت ليها فوجهها وهي سادة عينيها قدام الغضب ديالو قاليها علاش تبعيني..علاش خرجتي من القصر.. انا صافي مابقا عندي والو ..ماعندي والو سيري رجعي للقصر ..انا ماعندي فاش نفعك
بقات ساكتة خلاتو كيغوت رجع عليها الحر ديالو كامل وهي ساكتة كتشوف فيه كيطير وينزل  حتى خرج الغدايد كلها وجلس شد راسو بين يديه تهدن عاد قربات منو بشوية جلسات حداه وحطات يدها على راسو قالت ليه علاش كتبكي؟ شنو واقع ليك
هز راسو كيمسح على وجهه قاليها حياتي كلها وانا عايش  فكدبة قد الويل.. انا ماشي هوا انا
بقا كيشكي ويبكي وقال ليها حياتي كلها وانا عند بالي با مات فالحرب كما قالت لي مي ..
دوزات يدها على راسو قالت ليه وشكون باك ؟! علاش باك ماماتش؟
ضحك والدموع ملاقين حدا نيفو هز راسو شاف قدامو قاليها با . با هوا اللي درتو مقلي الاعلى وقدة ليا..با الحقيقي هوا الملك محمد اصيل
نترات يدها مصدومة وقفات قالت ليه شنو؟؟؟ شكون
هبط راسو ساكت وهي واقفة كتشير بصبعانها وتقول
الملك الاصيل؟!! الملك الملك اللي رباني وقراني وهداني ليك؟ هوا نفسه باك
هز عينيه فيها قاليها هوا نفسه .. وانا عمرني عرفت هادشي حتى ليوم
شدات فحناكها قالت ليه اذا نتا هوا ولي العهد ؟؟ ماشي الامير سلطان؟!! لالا الامير سلطان خوك؟!! ياربي السلامة شنو هادشي
شدات جبهتها ورجعات جلسات حداه مصدومة حتى هي وهوا كيشكي  فالاخير تلاوها جالسين تحت واحد الشجرة حدا شعالة ديال العافية والليل طايح وهوا متكي على رجلها كيعاود ويهضر وهي متكية على الشجرة كتسمع وتمسح على راسها حتى عيا وقالت ليه
ولاكن واخا هادشي كامل اللي وقع .. مكانش خاصك تخرج من البلاد..نتا امولاي ماشي ديال نفسك..نتا عماد قرطبة ..مايمكنش تخلي رواح الناس معلقة  وتخرج وتسمح فكلشي.. نتا  تزاديتي امير امولاي.. وابن ملك قدو قداش لايستهان بيه..بلعكس خاصك تفرح حيت باك هوا الاصيل بنفسه ..مكاين لاياش هاد الغضب كولو اللي غيدمرك ويدمر ليك حياتك امولاي..نتا قوى من انك تخليه يسيطر عليك..نتا قوى نن كاع موجات الغضب ميمكنش تضعاف وتستسلم
شاف فالسما كيتهد قاليها  هادشي كبر من اللي سمعتي..الاصيل دوز على مي السراط ايمامة ..دوزها على الواد عطشانة..محنحها واخر خطوة ليها كان غيتقلها وانا فكرشها .. مارحمهاش..وباه مارحمش عائلتها ..بسب مشاكل عائلية ناضت الحرب. بيناتهم وقتلوهم كاملين وبقات المدينة خالية  نجات وكبرات مع شلاهبي مكانتش كتخرج من الدار ..كان لقاها تاهية فاش مشا يجيب التواب من مراكشي.كان تاجر ولقاها فطريقو داها رباها فغرناطة..هي فاش شافت الاصيل تعلقات بيه بزاف ..بغاتو اكثر من نفسها ..ولاكن هوا كان ضالم ..تعدا عليها  حتى لاخر نهار خربات فيه ورجعات للقبيلة اللي بقات خالية فيها بدات حياة جديدة
مسحات يمامة على شهرو قالت ليه هانتا قلتيها بفمك..هي غير ضحية وعاشت حياتها كلها  معدبة..علاش تزيد تعذبها مسكينة وهي كتشوف فيك املها الوحيد وماعندهاش من غيرك.. بمن خليتيها دابا؟ نقولو الاصيل طاغية ..واخا انا ماشفت منو لا طغيان ولا حتى حاجة ..ولاكن مك شنو دنبها مسكينة حتى تعاقبها ..
هز عينيها فيها قاليها  ساهلة يكدب عليك شي واحد طول حياتك ونتا كتيق فيه تيقة عمية
تكات راسها على الشجرة قالت ليه حتى واحد ما احسن من لاخر ..حتى انا قتلو ليا عائلتي كلها ومنعت غير انا ..شنو غندير؟ هانا متعايشة ..اما انت امولاي راه عندك والديني  تفتاخر بيهم . ماقلتيش مع راسك لمن خليتها ؟ واش لاباس ولا مريضة؟ واش كلات ولا صامت..تلقاها مسكينة جالسة كتبكي وتلوم فراسها ..ماشي عدل تعاقبها وهي خدات من العقاب ما يكفيها ..رأف بيها يرأف بحالك الله ويتزع هاد الغمة   عليك ويشفي الجرح اللي فقلبك