اخيرا بعد الصراع والمجهودات الجبارة اللي دارت فجناح الامير قدرو يهدنوه وخلاوه يرتاح وغطاوه بتوب خفيف وقفلو عليه الجناح خلاو معاه غير الملك محمد اصيل.. قرب منو وهوا ناعس ومسح على راسو وقال
حياتي كلها كنقلب عليك .. ومغنسمحش للموت تخطفك مني
خلاه كيرتاح ومشا كيسوط خرج للشرفة ديال جناحو كيطل ويتأمل روعة المكان اللي كتبين المدينة كلها .. بقا ساهي مطولا وجلس على واحد الكرسي من الخشب ودار يدو على خدو كيخمم حتى ضلام الحال وحس بالحركة لداخل فالبيت ودخل يتفقد الامر لقا الامير ناض جلس كيتنفس ويديه على الفراش كيشوف فالارض ونشف من العرق والصهد ونقز ديك الحالة اللي كان فيها .. هز الامير عينيه لقا الاصيل قدامو وتصدم بقا كيشوف فيه .. قرب الاصيل وتبسم وقال
كي بقيتي؟ رتاحيتي شوية؟
بقا الامير كيشوف فيه ويتسائل بعينيه على شنو كيدير فقلب جناحو وجاوبو الملك على اسألته وقال
عارفك دابا مصدوم كتقول شنو كندير هنا .. سمعت باللي وقع وجيت .. لقيتك فواحد الحالة صعيبة ومابغيتش نمشي ونخليك حتى نرتاح من جيهتك
وقف الامير مهموم والحزن على وجهه وقال بعفوية
مي خرجات من القصر وماعرفتش فين تكون مشات..
رمش الاصيل وقال:مك !!
مسح الامير على وجهه وقال : حساب ليها الملك قتلوني.. غيكونو المسحيين اللي دارو فينا هاد الحالة باش يستوليو على الارض بسهولة
جمع الاصيل النفس وطلقها وقال:
علاش ماقلتيش باللي الملكة روح الندى مك
تلفت الامير وقال :انا ماشي فهادشي دابا اجلالة الملك ..انا خاصني نلقاها قبل مايديرو فيها شي حاجة ..مغنسمحش لراسي عمرني نسمح لراسي انا السبب فهادشي
شد راسو وضرب واحد الطبلة بغضب وبدا ينهج ويلوم راسو .. قرب ليه الاصيل وحط يدو على كتفو وقال
ماتخفاش على مك انا لقيتها وهي فالحماية ديالي دابا
تلفت الامير شاف فيه وقال مصدوم
لقيتيها ؟ فين وفين هي بغيت نشوفها
شدو الاصيل من كتافو وقال
قلت ليك هي فالحماية ديالي ومرتاحة .. واحسن تبقا بعيدة باش ميستهدفوهاش مرة اخرى..من الاحسن خليها غابرة وخلي العدو يرتاح ويحتافل بفعلتو اللي فشلات .. تيق بيا . . انا جنبك ومغنخليكش فهاد الحرب بوحدك
تهز الامير من بلاصتو بغضب قلب واحد الطبلة فالسما وقال كيترعد وكشاشكو خارجة
قسما لزما مغنرحم فيهم شي واحد .. والله حتى نحرقهم كلهم ونردم قشتالة فوق راسهم ونشتت اراضيهم تشتات
تبتو الاصيل وهوا كيشوف فيه بتبات وكيدرس شخصيتو وقال
غادي نديرو هادشي مجموعين .. انا ونتا .. ومن اليوم مغاديش تبقاو بوحدكم .. تيق فيا اولدي… احمم حسبني بحال باك ..ولا حسبني باك ..انا كنواعدك مغنخليكش بوحدك .. وغنساندك وغندعمك بدمي ولحمي
بقا الامير مستغرب غير كيشوف فيه وحشم من السخاء اللي سخاه بيه الله وقال
شكرا .. انا معمرني منسا ها الوقفة ديالك معانا
تبسم الاصيل وقربو عندو عنقو وسد عينيه حمع تنهيدة طويلة وطلقها
بعد الامير شوية وشاف فيه مطولا وقال
انا رتاحيت ليك ..وحاس باللي غادي نكونو اصدقاء حقيقيين من هنا لقدام
تبسم الاصيل ومسح على دراعه وقال
غنكونو اكثر من الاصدقاء .. كنواعدك بهادشي .دار الامير يدو فيد الاصيل واقترح عليه ينضم للاتحاد ويتحد الاسلام فقبضة وحدة .. فسر ليه الاصيل انه غيبقا مالك لبلادو لاكن الفرق هوا يكون تابع للدولة الاموية ومايبقاش منعزل وغيبقا سلطان على بلادو وحتى الى وقعات شي حاجة فغيكون عمدو الدعم والسند وحتى فالغزوات ديالو الى طلب الدعم غيلقاه وان الهدف ديالهم نشر الاسلام ويزيدو يتمددو فالارض اكثر واكثر…
رحب الامير بالفكرة ولقاها مناسبة وفضل ينضم للدولة الاموية ويقوى على انه يبقا منعازل واهدافه محدودة .. لقا ان البلاد غتكون فأمان اكثر وهي تحت السيادة الاسلامية في حالة ما وقعات شي حاجة قدرها الله . جبد ليه الاصيل اتفاقية الانضمام وانضم ليهم الامير بكل صدر رحب وهاكا اصبحات الاندلس موحدة ومامقسماش وتحت القياد المسلمين.. فرح الاصيل بهاد الانضام وحتى الامير لقا راحته وخرج من ديوان الملك محمد اصيل مبتاسم وقال
رتاحيت من جهة البلاد وأمنتها .. دابا خاصني نرتاح من جهة الملكة روح الندى
رتب الاصيل على كتفه وقال
سير طمن عليها ..وانا غنوجد الدعم للهاد الحرب .. كوني هاني مربوحة ان شاء الله
تصافح الامير مع الاصيل لاكن جرو الاخير ضمه وقال
هاكا كيتصافحو الحباب
ضحك الامير وركب الخيل ديالو خرج من القصر وبقا الاصيل واقف هاز راسو فالسما وكتنهد .. اخيرا وحكيم وحداه واقف .. تلفت بابتسامة وقال
اخيرا دخلات قرطبة للدولة الاموية ..ومابقاش هاد المسمار خارج من الحيط ..كلفني مجهود كبير ولاكن يستاحق
تبسم حكيم وقال: اكثر حاجة فاجأتني هي قرار الامير..فكر فالبلاد اكثر مايفكر فراسو
رد الملك بسعادة وقال : كنت ديما كنتمنى يكون عندي ولد بحالو .. يكون راجل..الحمد لله عطاني الله اكثر ما تمنيت… راجل بميات راجل عاطي الاولوية لماههوا مفيد.. نشر الاسلام فوق كل اعتبار ..هادا هوا ولي العهد اللي محتاجة ليه الدولة الاموية ..غيكون ليه شاه عضيم فيوم من الايام ..الطريق اللي سالك طريق صحيحة واللي كيسلك الطريق الصحيح كيوصل واخا تكون طريقو طويلة
تبسم حكيم وقال :ماتنساش باللي كاين امير سلطان.. وكيشوف راسو ولي العهد من هنا القدام امولاي
رد الاصيل وقال: انا كنشوف وهما كيشوفو .. واللي كيستاحق الولاية هوا اللي غياخدها..المسألة متعلقة بالرسالة ماشي بولادي ولا بولاد اخرين احكيم.. وسلطان كيفكر فالولاية والسلطة ..ولاكن مكيفكرش فما بعد الولاية والسلطة وشنو الهدف من السلطة .. كاينين ناس دراوش وناس دنوبهم على رقبتنا .. خصنا نفكرو ليهم قبل منفكرو لراسنا … هاد السلالة استشهدو فيها بزاف ومنهم خوتي.. وهدرو دمهم على البلاد باش ماتشتتش .. وانا دوزت حياتي كلها لحد الان كنقاتل ونحارب فسبيل الله وسبيل الاسلام .. هاد المجهود كامل اللي كيتقال فكلمة ساهلة تخرج من الفم ..ميمكنش نعطيه لشي واحد ماعارفش معنى تكون حاكم .. تكون ملك ولا سلطان .. سلطان على ا مة .. امة معولة عليك وغتحسابك غدا قدام الله
وصل لامير للرياض ودخل كيجري متلهف يشوف مو .. داز وسط الخدم والوصفات كيقلب ولقاها فالجردة على واحد المخدة جالسة ومتكية على العود ديالو وكتمد ليه العلف بيدها وساهية .. مشا طاح قدام رجليها كيبكي فعفعها وهز راسو كيسبو ليها يدها ويطلب منها السماحة وهي مصدومة كتشوف فيه وتمرر يديها على وجهه وترمش ماقادراش تصدق .. بدات كضربو وهوا كيعنقها وانفاجرات بالبكا وجراتو عنقاتو كتبكي .. بكات البكا اللي مابكاتوش فالموت ديالو ورجع معاها كولشي خرجاتو دموع وكتغوت وتقول ولدي حي .. ولدي حي
بقات هاكاك كتغوت حتى رجع ليها عقلها ووقفات مع صهيل الخيل اللي وقف برجليه وبدا كيسوط.. طاحو بجوج بالدموع واحد كايواسي لاخر وخرجها من تما هي والخيل وركبها رجعها للقصر بالزغارت والحليب والتمر ستقبلوها .. عمت الفرحة ورجعات الحياة للقصر من جديد ورجعات الروح فروح الندى وبقوة الفرحة ماخلات مادارت .. خرجات الصدقة وتصدقات وامرات فبناء مسجد على اسم " رحمة الله" اللي نزلات عليها فعز البؤس والحزن .. فهاد الاثناء اللي هي كتحتافل وتخرج الصدقات وتفك عقد الناس وكربتهم كما تفكات عقدتها وكربتها كانت الحرب نايضة بين قرطبة وقشتالة .. وكانت حرب مدمرة ومجزرة لا تنسى بقيادة الملك محمد اصيل والامير يور جنبا الى جنب.. بتعاون الاخوان اصحاب يور اللي خرجو من حيت لا يدري العدو تتسلطو على الجزء الرئيسي اللي فيه ملك قشتالة و من جهة اخرى كمل الامير على خطة لاللة روح الندى وصب اطنان من الزيت فالانابيب اللي كانت ماشية تخت الارض حتى لفين رصى العدو وتبعها بنياران مشتعلة تفجرات على اثرها الارض اللي تحت الجيش فالمقدمة على حدود قشتالة بحال البركان .. شتات الصفوف الامامية كلها فضربة وحدة وكانت خطة ناجحة وضربة قاضية لملك قشتالة وكملو الحرب باندفاع جيش الملك محمد اصيل على بقية الجيش المتبقي ..ملك قشتالة هرب بجلدو وخلا المجزرة وراه اللي دازت فضرف ساعتاين وتمت ادابة المسحين ادابة لم يحدث مثلها في التاريخ . وخرجات قشتالة منهازمة ومشا فيها اربعين الف محاوب مسيحي وخرجات قرطبة منتاصرة و ومية مستشهد مقابل الاربعين الف مسيحي
أنت تقرأ
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
