ذو التيجان 👑مكتملة👑

👑الجزء 56👑

حدرات شادية راسها قالت ليه تصبح على خير امولاي
ودازت جنبو باش تخرج لاكن شدها من يدها وقفها وهي عينيها كيدورو رجع وجهها اصفر وقربها منو اكثر كيشوف فيها ويتأمل وجهها وشد ليها فالدقن ديالها قبلها وجرها من خصرها قربها حتى نسات مها وباها ولقات راسها فوق السرير بين يديه سايحة..حيد ليها القفطان كيتأمل تفاصيل جسمها   ونزل على صدرها حتى بدات تشهق وحلات عينيها شافت فيه قالت ليه منقدرش..منقدرش
هز راسو شاف فيها قاليها علاش متقدريش؟
بلعات ريقها قالت ليه غتقلني مي
ضحك حتى تسدو عينيه وقاليها مك فاش تبان  جيبيها لي
سكتات كترمش وماعاوداتش نطقات وتلفتات شافت فشمعة مضوية حداها وساطت عليها بيدها طفاتها .
اما حمامة القصر وصلات مقجوجة لبلاصتها ..تكاوها وكانو البنات كيوجدو راسهم ينعسو ..تلفتات جنب سريرها شافت متعة غابرة وقالت بتعب  فين متعة
ردات عليها عبدية قالت ليها متعة عيانة ..حولنها لبيت اخر فير تسنطي نتي على عضامة  الاللة
تقلبات على قلة دالما شربات منها وكان سرير شادية مقابل مع سريرها ومكتوب عليه سميتها ..بقات جالسة حاضياها ترجع  والكل نعس والضواو طفار وشادية مزال مارجعات ..تبقات هاكاك يمامة كتنسناها ومعنقة واحد الوسادة على صدرها كتبكي والدموع كيتلاقاو فدقنها وكل مرة تسمع حس وحدة فالبنات دخلات من دار  الوضوء ولا مشات تقضي حاجتها كتلفت بلهفة ..سهرات طول الليل كتسنى قدوم شادية حتى تسدو  عينيها وصبعات رموشها السوداء ملاسقة مع بعضها بسبب الدموع .
فاقت هي اخر وحدة وعينهيها حومر سولات على شادية قالو ليها البنات باللي مكيعرفوهاش وعمرها دخلات العمبر ولاكن مؤخرا جهزو ليها فراشها يعني قريب غادي تدخل
ناضت يمامة بقفطانها اللي نعسات بيه وقفات   دايخة ويالاه زادت خطوة دخلات عليهم شادية بوجه احمر مبسمة والحوالق والعقيق فيديها وراسها مرفوع بقا كلشي كيشوف فيها متبع ليها العين وباينة عليها راجعة من الخلوة غير من اثار الزينة اللي واضحة عليها .. تمات داخلة وبصيرة وراها توريها سريرها حتى وصلات عند يمامة اللي واقفة ومكمشة فيدها بلغتها اللي تلبس خارج زرابي العمبر البيضاء وشعرها  الناعم المدرج على جناب كتافها وكتشوف فيها والبكية شاداها
هزات شادية راسها تنهدات شافت فيها مزيان وهزات يدها كانت حاطة نبالة من الذهب الخالص منبتة بالالماس وقالت ليها
خصارة متكملتيش معانا الليلة ..كن هداك مولاي بحال هاد النبالة
بلعات يمامة ريقها حتى قطرات عينها على خدها وتبسمات شادية بشفقة قالت ليها مسكييينة ..كتبكي حيت ماعطاكش النبالة!..ماتبكيش دابا نجيب ليك بحالها المرة الجايا احبييبتي
بلعات يمامة غصة فقلبها وخرجات مارداتش عليها مشات دخلات للزريبة  دالجمال ديالها وجلسات فواحد القنت ساكتة وساهية كتخمم وقالت كتمسح عينها
غير بلاتي عليك اشادية ..شنو قضيتي اصلا بحالك بحال البنات اللي فالعمبر كلهم حتى وحدة ما احسن ما احسن من الاخرى ..
صبحات روح الندى واقفة شادة جنبها كتنفخ من العيا واول حاجة دارتها عيطات لعابد  يحضر ليها شادية.. مشا نيشان  للعمبر عيط ليها وغير سمعاتو صفار وجهها وتفكرات الخط اللي مالحقاتش تشوفو  وداها النعاس مباشرة من بعد الجماع وفاض فقات لقاتو واقف قدام المرايا كيلبس حوايجو .
بلعات ريقها وناضت مشات معاه لجناح روح الندى ودخلات حادرة راسها .
ضارت عندها روح الندى كتركب الحلاقة فودنهت وقالت ليها  دوزتي الخلوة ..ايوا سربي راسك اري ليا شنو شفتي طلقيني
بلعات شادي ريقها كدور عينيها ومتلقات حتى حل من غير تألف ليها قصة وكدبة تخرجها وقربات منها قالت ليها شفت فطريقو ارض واضية حرير .الاللة..ولاكن شفت جنبو عرق كيضرب كبير ..حبل سري متشبت بيه ..وهاد الحبل هوا نتي الاللة
تبسمات روح الندى عجبها الحال وقالت ليها واش شفتي شي حاجة خايبة تقدر توقع بيني وبينو ؟
تبسمات شادية قالت ليها بلعكس الاللة ..شفت كل خير  بينك وبينو .. شفت الرضى من عندو والرضى من عندك ..
فرحات روح الندى قالت ليها مزياان ..ايوا ومابانش ليك شي مسخوط تما بيناتنا باغي ينوض الفتنةبيني وبينو
دورات شادية عينيها قالت ليها اه اه الاللة كاينة ولاكن واخا يعيا يرمي فالفتيلات عمرو يقدر يفرقكم ..نتي ضو عينيه وهوا تحت طاعتك الاللة . يدو مسلمة  وفايامو غنشوفو خير وخمير كثير
هزات روح الندى يديها فرحانة شكراتو  وقالت ليها هادا خبار زين رزين ..عاد تهنيت ورتاح قلبي ..ولاكن شنو على الموت اللي طلع ليك فيديك
ترددات شادية وحسات براسها حصلات وقالت ليها مطلعش ليا الاللة ..طلع ليا طول عمره وفرحة ايامو
شهقات روح الندى من الفرحة وقالت ليها سيري يا شادية كما حيدتي الحمل على ضهري وزحتي الهم على قلبي لله ينورك ويفرحك ..انا غادي نتهلا فيك مزيان
هزات رزمة من المال عطاتها ليها وقالت ليها سيري متعي راسك حتى نحتاجك ونعيط ليك
خرجات شادية وحطات يدها على صدرها رتاحت ومشات شادة الرزمة غادية وكتحسب فيها قرص بقرص..

فهاد الاثناء وصل  رسول قصر غرناطة عند السلطان يور وقابلو فالباب وهوا خارج وحدر راسه قاليه مولاي..وصلاتك امانة من سلطان محمد اصيل المرتضي بالله
تلفت شاف جنبو مرى كبيرة كيبان عليها الوقار والادب وقال ليه هادي هي الامانة ؟
حنا الرسول راسو وقاليه اه اسيدي
تلفت شاف فيها باستغراب وهي مهبطة راسهاوقال
وشكون نتي ؟
حدرات راسها قالت ليه انا المعلمة الادبية امولاي اللي علمت الجارية سبأ الادي وحسن التصرف وتنضيم الكلام من الالف للياء
هز حاجبو تفاجأ وضحك بسخرية كيشوف فيها وقال. ..اهاه اذا نتي الشاعرة اللي خطفتي قلب جاريتي حتى مابقاتش كتشوف من غيرك !! مشاء الله
خلاها لعبيد تكلفو بيها ومشا يشوف شغال البلاد وقال بينو وبين نفسه ..وعلاش اصلا رسلت نشوفو وانا متأكد  قراتها مرى!!
رجعات يمامة للقصر من الاسطبل ومشات لبلاصتها طاحت فيها معنقة واحد المخدة.  رجعات شادية للعمبر رافعة راسها شافت فيها ناعسة مكمشة وقالت لبنت حداها كضحك
حاسة براسي عيانة ..مانعستش اللي كامل..كنحس بضهري مقسوم
طلعات يمامة الغطا على راسها سدات ودنها وبقاو البنات فالعمبر كيشوفو فيها وقالت وحدة لوحدة بغيرة
تقول هي اللي دخلات ..منين جابو لينا هاد  عوا عاوتاني
كملات شادية كلامها كتشوف جهة يمامة وقالت
باقا سبأ ناعسة ؟! مسكينة عرفتو شنو وقع ليها لبارح ..مسكينة وحلات ليها حبة دالعنب كانت غتقتلها ..شحال بقات فينا ..متعاتنا بحكايتها ولاكن ماكملاتش لينا الحكاية خلاتنا متشوقين ..ايوا ليوم تكملها لينا  خليها ترتاح باش تقدر تسهر معانا
بقاو لبنات غير كيشوفو فيها  وقالت ليها  سمر ايوا منين جيتي اختي؟
ضحكات شادية قالت ليها هداتني لاللة روح الندى لولدها الغالي.تنهدات سمر قالت ليها اممم ..
وقلبات عينيها خلاتها كتلوى  وحاضية يمامة حتى رجعات ليهم بصيرة خرجات كل فوج بوحدو وطلات على يمامة لقاتها مغطية وخلاتها ترتاح من الخنقة داابارح .لاكن يمامة ضبرها السرير وناضت  جمعات حالتها وخرجات  مشات للجردة كتمسح الورد وترش حتى تعاشات العشية وتعشاو البنات وكل وخدة خلدات للنوم ومن بينهم شادية وبقات يمامة جالسة فبلاصتها وحداها سمر كيهضرو بصوت من خفض
قالت ليها يمامة فين مشات متعة علاش مابقاتش فالعمبر؟
قالت ليها سمر الله واعلم اختي؟ لبارح الصباح بكري سخفات لينا فالفطور وهزوها من تما ماشفناها
حطات يمامة يدها على خدها قالت ليها اويلي ياكما ماتت
قالت ليها سمر لا موحال غتكون مريضة وصافي مسكينية  .. شوفي هاد بنت الحرام نهار كامل وهي كتفرس فينا.. ماكرهتش نشدها نريشها
ضارت عندها يمامة قالت ليها انا ماكرهتش نمشي نهز شي مقص ونقزب ليها داك الشعر
دخلات عليهم بصيرة  والضواو طافين وترماو بالزبة تغطاو دارو راسهم  ناعسين..مشات بصيرة بحس مقطوع قصدات يمامة وحركاتها حتى شافت فيها وخطات صبعها على فمها قالت ليها قطعث الحس..ونوضي تبعيني
لاحت يمامة الغطا وناضت تبعاتها وسمر كطل و حتى بنات خرين هزو راسهم كيطلو من بعد ما خرجو وناضو وقفو بصمت ..وقفات سمر حتى هي معاهم كتسول بعينيها قالت ليهم مالكم نضتو شنو واقع
ردو بصوت خافت قالت ليها وحدة نتي ماشي شغلك دخلي سوق راسك
مشاو قصدو شادية بشوية وجبدو موس حطوه على وجهها حتى كانو غيضربوها وشهقات سمر قالت ليهم لااا غادي تمشيو فيها ميرحمكمش..الى بغيتو تربيوها ربيوها بشوية ..غير شعرها كافي
شافو فيها بحقد وشدو شعرها  ونزلو عليه بالموس