ذو التيجان 👑مكتملة👑

👑الجزء 38👑

استقبلهم الملك يور وجنبه ذو الفقار وكان فديك الليلة البراقة المحتاجة لشاب شجاع وسيم يكمل لوحتها الفنية .. كان  تقيل برزانته وجميل فتواضعه ومحتارم بتعامله وانيق بأدبه وجامع جميع صفات الملوك الجميلة .. تصافح مع الاصيل بالصدر وعيون شهرزاد عليهم بجوج  كتغلغل وصدرها كان كينفاجر  وفدات لتوازن والتركيز وهي كتشاهد داك العناق الحار بين جوج دالملوك الل عمرها شافتو فشي مملكة من قبل.. شار ليه الملك يور بيدو ودخل معاهم تحت اضراء الشموع البراقة واستقبلهم فبهو كبير محلول على حديقة فسيحة باش يمتعو النضر بزينة الورود اللي صاوبوها خصيصا لهاد الحفل ويسمعو لخرير المياه اللي كيجري والنافورة فالجنب كتشرشر .. لقا الاصيل نضرة خفيفة مستغرب لغيابها لاكن ماهي الا لحضات وهوا كيقلب بعينيه حتى تمات نازلة مع دروج من الرخام كبار واشعين وسط البهو  بحال القمر كيتمشا على رجليه.. كانت فأناقة بيضاء فقفطان من الثليجة مخزاني مفتوح بالسفيفة من الجناب حتى للخصر و تحته  شبكة من الحرير كتبين منسادلة بخيرط الصم الذهبية وشربيل من الصم الحر ومضمة ذهبية بحجر خضر فاتح سماوي  والجوهر محموع فالعنق  ابييض كتوسطو حجرة ذهبية وحوالق بلدين مواتين مع المضمة  والشعر بحال الماء هابط وراها كيبري تقول شلال  كحل ونازل كيشرشر  .. جامعة اطرافه الامامية للور فتسريحة خفيفة ضريفة والفرقة الرسط كتبري باليوضة  متوسطها تاج بحال السفينة مذهب ومحجر بحجر سماوية .. هللات عليه بوجها المشرق بحال البدر ووصيفاتها موراها وبملامح باردة  بلا تعابير معينة ضوات المكان عليهم تقول كانت ناقصاهم غير هي.. شاف فيها الاصيل جايا وبقا هاز عينيه متبع خطواتها كأنها يالاه تولدات من جديد.. اما الملك يور فعاد رتاح وبرد فاش خرجات من جناحها وطلات عليهم واخا  باين عليها هابطة وخليا قلبها فالبيت .
تقدم شد ليها فيدها وباسها وقال
نهار كبير هادا الاللة مولاتي .. الفرحة ماتكمل بلا بيك
مارداتش عليه بقات ساكتة وتقدمات فصمت للضيوف ..مارحبات ما نطقات .. تقول بلعات لسانها .. حتى حاجبها ماحركاتو .. تقول مكيبانوش قدامها . اما لاللة شهرزاد فتقول جايا غير باش تبركك وتعرف اشنو فالمزيودة  وشنو اللي راه كيجرا وهي فالقصر مكاين لا اللي يجي لها خبار ولا هضرة.. وجاتها الفرصة فين ماخصها تزكل حتى نضرة .. تحلل وتفصل ووفلان روح الندى بعينيها حتى كانت غتجيبها على راسها.. ضرباتهت بالعين وتعكلات قبل ماتزيد شي خطوة .. شد فيها الملك الاصيل من جيه والملك يور من جيه ووقفوها بحال شي جوهرة خاصة بالملوك
قادات وقفتها وجرات يدها من يد الاصيل وقلبات وجهها ساكتة  وجلسات معاهم فجلسة فوق الارض كلها وسائد من الريش وميادي نحاسية محطوطة وزرابي .. جمعات رجليها جنب فوق وسادة كبيرة حمرا بين الاصيل ويور الليتكاو كل واحد فجهة  على يدو  ولاللة شهرزاد فجهة الاصيل علي ليمن وعينها فالجنب على روح الندى اللي مكتشوف فحتى واحد فيهم ومكتشاركهمش الهضرة لا فالسياسة. ولا فالحياة الخاصة ..  تقدمات ليه طبايق الحليب والتمر معمر ومشكل .. والفواكه الجافة والطرية وانواع الاجبان والحلويات والحوالا تفرقو مشويين .. لاكن لاللة روح الندى فضلات تاكل لحم لارنب وقالت لوحدة من لخدم
جيبي لحم لارنب..ويكون مشوي على لفحم بلا عطرية
تلفتات ليها لاللة شهرزاد وقالت
علاش لحم لارنب بالضبط الاللة روح الندى .. عندك شي مشكل فالصحة لقدر الله ؟
ضحك الاصيل وقال
لحم لرنب مافيه شحمة ولا لحمة مدسمة .. وخفيف ضريف على المعدة الى كانت معصبة
ماجاوباتوش وبقات ساكتة وسمعات لاللة شهرزاد حتى هي طلبات لحم لرنب مشوي على الفحم  وابتسمت ليهم وهي كتسمع  لكلامهم  اللي كامل سياسي.. ملات روح الندى من الجلسة معاهم وناضت وقفات قالت ليهم سمحو ليا
انا مابقا لي  شغل فالسياسة .. وكيعجبني نشوف الارنب وهوا كيتشوا
ميلات راسها ليهم باحترام ومشات خلاتهم جالسن خرجات للجردة اللي قدامهم فين كيشويو الحوالا ومشات للشواية دالارنب وقفات حداها وبدات كدورها بيدها  وتشويها .. واحد الشوية داز الهوا على نيفها منسم بنسمة من غير ريحة الشوا .. حسات بيه وراها ودورات عينيها للجنب كتحس حتى تأكدات منو وراها وكملات الدورة ديالها للارنب كتشوي ساكتة .. تكلم وقال ليها ولدي خصو يعرف شكون باه
حلات عينيها وزدح قلبها وتلفتات شافت فيه عيني عينك وقالت
شنو كتقول؟
هز حاجبو وقال : كنجلس انا ولدي فطبلة وحدة .وهوا معارفش شكون باه ..
استغربات وقالت: وشكون هاد باه اللي خصو يعرف
قرب منها الاصيل حتى وصل لنيفها وعقدهم وقال
انا..
دورات وجها بعدات شوية وقالت
شكون قاليك نتا هوا باه ؟؟اش هادالتخربيق؟
ضحك بسخرية وقال
لا نسيتي .. كان مرفوع عليك القلم فاش قلتيها بفمك .. وانا تأكدت بلا ماتحتاجي تعتارفي.. بفمو قالي شكون مو
دارت يدها على فمها كتتهرب وقالت
هادشي غير تخربيق غير كدب عليك .. واصلا كان مرفوع عليا القلم واش كاين شي وتحد كيتيق فواحدمرفوع عليه القلم
خلاتو ومشات كتتهرب بعدات وماعارفاش حتى فين غادية .. تبعها جرها من يدها دورها وقرب منها بجدية وقال
يا اما غتقولي ليه شكون باه بطريقتك. ولا غنقولها ليه انا بطريقتي.. ختاري الطريقة اللي عجباتك فيهم
عقدات حجبانها وقالت
هادي غير هضرة خاوية
هز راسو وقال واخا هانتي غتشوفي بعينيك الهضرة العامرة
ضار بغا يمشي وجراتو من دراعه بالزربة شدات فيه وقالت كتفتف
غير بلاتي.. مالك على هاد الزربة مزال حتى متأكدتي مزيان
صغر عينيه شاف فيها وقال
كاين شي واحد كيتسطا على ربيبو ولا شي واحد من غير ولادو؟. امم؟
سدات عينيها وهزات يديها بنفاد الصبر  من يعد ما عرفات راسها حصلات وعرفاتو عرف الحقيقة وقالت
واخخخااا.. واخا .. يور ولدك صافي.. تهنيتي؟؟
رد وقال: عارفو ولدي خاصو هوا يعرف باه .. انا باقي حي باقي نشتف على عشرة بحالك ونتي قتلتيني وصفيتيها ليا فمرة ماخليتي ليه حتى امل باش ميسولكش على باه ..شنو غتقولي ليه دابا؟ امم؟ شنو ؟؟  انا ماعندو علاش يحقد عليا بحالي بحالو بجوجنا لعبات بينا مو .. نتي اللي غترفع عليك  القلم  عاوتاني
بلعات ريقها جمعات النفس سادة عينيها حتى استحمعتت قوتها وحلات عينيها فيه وقالت
انا عندي ميات سبب .. انا ضحيت .. انا نفدت بجلدي وعشت على قبل ولدي.. عشت لولدي ومادرتش ولاد من غيروو ومافرطتش فيه  وما   استمعت حتى دقيقة بلا ولدي.. هاد  باه اللي كتهضر عليه يمكن نسا شنو دار فمو .. نسا العذاباللي دوز عليها .. نسا المحاين ونسا على كاع الايام الكحلة اللي شافت.. ماشفع ليها لاسنها الصغير .. ولا حتى ذرة من داكشي اللي كانت كتكن لباه .. حتى داك العشق ماكانش باه كيشوفو .. مشافش  علاش كانت كتحمل وتنسا دغيا غير من تبسيمة منو .. ماشاف حتى حاجة .. مشافش شحال كانت كتبغيه وشحال حلمات وبنات وعلات معاه .. وشحال فرحات فاش حملات وتمنات تولد ولدها وتربيه بين واليديه بجوج. ماشي تهرب بيه وتولدو فوق سفينة والشتا كطيح عليه.. هاديك البنت المسكينة الدرويشة اللي نية وهبيلة وكطير من المقلة وماعارفاش عواقب الاخطاء ديالها .. هاديك البنت اللي شحال من مرة تكرفستي عليها وحكمتي عليها بحالها بحال  الرجال وهي متقدر تهز حتى دقة .. وكتاكل الدق وكتنسى ..كتاكل الطرش وكتنسى .. كيتكرفس عليها وكترجع ضحك وكتنسى .. هاديك البنت اللي يالاه قالت بسم الله فالدنيا  مزال عاد بدات كتعلم .. عاد بدات الصيام وعندك فداك القبر .. عاد بداو اخطائها يتحسبو وكتابها تحل .. قلبها ابيض وعقلها صغير وعاد كتتعلم .. هاديك المسكينة ترمات فالحبس بحالها بحال الكلاب وبحال  العبيد والشفارة والرجال .. وتضربات بالسوط وتجلدات مية جلدة وحتى واحد مادخل يفكها ولا يشفع ليها .. منها للجلاد.. ضهرها منو للسوط .. واش سولتي راسك شي مرة ؟ سولتي راسك وقلتي مع راسك  نفرقبين عقاب الرجال وعقاب النسا؟؟ واش قدرتي ترتاح وبنت صغيرة كتتعدب فداك الحبس .. ربي  رحمني وشاف من جيهتي ونتا حرام واش حنيتي فيا..وعلاش؟ حيت خويت اتاي على سيديهم قويسم ..الامير اللي  ماخاصش الناموسة تعضو .. وهادشي بلا منقصد وترجيتك وتحنيت عند رجليك .. تحنيت وبكيت وخليتيهم هزوني هاكاك كنطلبك .. اشنو دنبي؟. اشنو دنبي انا ندوق عداب جهنم وانا من المسلمين ويالاه حق عليا الصيام؟؟ اشنو  دنبي  نتلاح فالمطمورة ويتلاح عليا الحجر ونبقا تما بالجوع  والعطش.. اشنو ذنبي حتى ذلني  داك الذل كله .. وعمرني تشكيت ..حيت دغيا كنسى.. كنت صغيرة وكنسى.. ولاكن دابا لاا ..دابا تبدلت .. تبدلو فيا بزاف ديال الحوايج .. تعلمت من الدنيا مايكفيني باش نواجهك ونواجه اللي بحالك .. معارفش شنو دار على راسي ..كتشوفني هاكا قدامك واقفة عادي..ولا معارفش اشنو داز عليا وشنو تعلمت من الدنيا  من نهار حليت عيني عندك فداك القصر.. اللي حتى الصيام مانتش كنعرف ليه .. ونزيدك ما كفس.. يتمتوني وشردتوني حتى وليت كنقول للبراني با .. صفيتوها لعائلتي ودمرتو قبيلتي وحرقتنا مجموعين ..سلالتكم لعنة وصابتنا.. ولاكن ربي كبير وكان ديما كيشق ليا طرقان وينجيني من الضلم ديالكم وديالك نتا بلخصوص.. هاد الراس هاز كل كبيرة وصغيرة من النهار الاول عندك فداك القصر حتى لدابا .. ومابقاش كينسى ..  واللي دارت عليه كيعقل عليها كما كنعقل  انل على سميتي.. هااا ولدك لداخل..سير عندو قوليه فوجهه انا  هوا باك ..انا هوا جلاد مك وقتال خوالك .. انا هوا اللي غنتقتلك ونتا فكرش مك ونقتلهت حتى هي معاك كن ماهربات ديك الليلة بيك وقطعات بيك البحور فنصاص الليل
خلاتو واقف وعطاتو بالضهر مشات ماتلات كلات ولا شربات ..طلعات نيشان لجناحها بلا ماينتابه حتى واحد وسدات عليها وطاحت فالارض شادة وجهها وكتبكي وتنوح حتى سخفات وجلسات رتاحت وناضت وقفات شافت قدامها بحقد وقالت
غادي نتخلص منك .. غادي نتخلص منك على كل ما درتي فيا ومغنخليكش تزيد تعدبني كثر من هاكا