دوب ما شاف شكون تنطر غسان من بيروه و خرج يجري قعدت مصدومة اسراء اما بعد تفكرت الي هي تو لازم تفركس الفرصة جاتها ليديها اما مايلزمهاش تفلتها قربت من شباك البيرو ترا في غسان كلع في كرهبا و مشا كيشت هاكي الجورنال و بدات تحل في اقجرة بلواحد بالواحد و تفركس و هي ترعش كلها خايفة ليحل عليها شكون الباب
حلت لقجر لول لقات فيه فلوس و كوارط بوكار
حلت لقجر الثاني لقات فيه دوسيات الخدامة دوب ما شافت الدوسي عينيها لمعو وقالت بشوي
_ اسراء : حمد الله لقيتو
حلت الدوسي و هي تفركس فيه و هاكي لوراق داخلة بعضها لقات اسامي الخدامة كل كان بوها لا ماعندو حتى أثر .
هيا هكاك و تسمع في صوت خطوات باينة مشيت راجل نفسها تقطع اسراء و. قالت هذه اخرتي
مشا في بالها غسان و لا واحد من رجالو غمضت عينيها و حلتهم لقاتو ريان
_ ريان : اش تعمل ياخي هبلت
_اسراء : فجعتني ، اش. تعمل هوني اخرج
_ريان : قاعدة تحط في روحك في لخطر
_اسراء : كان تبعدني تو نولي في امان يلزمني نلقى هاكي سارديفيكا
_ريان : باش تلقاها اما مش تو
_اسراء: اخرج
_ريان : عرفتك باش تفركس البيرو ، غسان حب يطيح يا اسراء خرج و خلالك البيرو أما قاعد يشوف فيك باكاميرا
تصدمت اسراء و شدت في طاولة باش تطيحش و قالتلو
_اسراء: انت..
_ريان : وقفتها متخافش ، هو تو قاعد يسأل عليك في كل بلاصة ..قولي قالك حاجة و لا سألك
_اسراء (بعد ما خممت ) : لا وين نعرف
_ريان : اسراء ، نوعدك تو نلقالك الورقة اما انتي اخرج من هوني معاش ترجع لهنا
_اسراء : رد بالك تقولي نوعدك
_ريان : اثق فيا يعيشك
_اسراء : ناثق فيك قوتلي ،
دزتو و رجعت تجري تلم في اوراق و ترجع فيهم لبلاصتهم وهي ترعش كلها مالخوف كملت ريقلت كل شي و خرجت شدة بيروها تخمم .
***
غسان : احكي
_فهمي : اسمها اسراء بن علي ، عايلتها من متوفية ماتو في أكسيدون هذا الي لقيتو تو
_غسان : تمشي لأدراس متاعها و تجيلي تقرير و بعد تتعدى للجامعة تسأل اذا كان قرات غادي ولا لا نحبك تعرف كل كبيرة و صغيرة
_فهمي : حاضر سي غسان
مشا هاكا فهمي و غسان قعد وحدو هز تليفونو و طلب نيروز
_غسان: اسراء في بيروها
_نيروز : اي سي غسان ام..
علق عليها و قال لشوفور
_غسان: ماشين للشركة فيسع تحرك
مشا غسان في كرهبة عجاجة أول ما وصل هبط مالكرهبة طلع للطابق الخامس و حل البيرو بالقوة على اسراء تقدم بشوي بشوي باين الغش و التخوبيث من عيونو و بعد ضحك ضحكة كلها شر و قال .
_غسان : اسراء هيا ايجا
_اسراء : تفضل سي غسان وين
_غسان : إمشي
غسان ظاهرة علخر الي عندو حاجة مخبيها أما شنيا زعما اسراء معليها كان تبع و كهو
وصلو قدام الكرهبة وقفت اسراء و قالت
_اسراء : سي غسان تنجم تقلي و ين ماشين
_غسان : هيا اركب يا مدموازال اسراء
ركبت اسراء وهي كي العادة باش تموت بلخوف تحركت الكرهبة في طريق كلو مظلم لافيه لا بوطوات لا شي و دنيا قربت تلاظلام بشوي بشوي دخلو في جادة كلها منا ومنا شجر سرو الطويل و ما تسمع كان حس الريح الي سفرد و يخوف تنطرت اسراء شوي و بعد بدات تسأل و تصيح :
_اسراء : وين احنا ، وين هازني
_غسان : (بعد ما تبسم ) متخافش اهدا شوي
