يخبرني انه يحب عيناي وانا لأجل عيناه اعيش

يخبرني انه يحب عيناي وانا لأجل عيناه اعيش (2).

"نجمة م تضر ولا تاخذ من وقتك "🫶🏻

سعود يوم وصل كان سامع صوتها وكان صوتها عذب وحلو مرة وفهئ بصوتها بس م كان شايف وجهها بس كان شايف شعرها من وراء لانها قلبت وجهها على وراء وكانت بتاخذ من الشبسات اللي اشترته وهم جايين وتركي يوم قرب سمع صوتها وتوه يتذكر انو اخته ف السيارة وراح بسرعة ف جهة الباب وسعود يوم حس بتركي صد وسوا نفسه م شاف وتركي يوم وصل عندها صرخ صرخة لدرجة اغلب الشبس اللي ف يدها طاح ف حضنها من الخرشة وهي عندها تحسس من الاصوات العالية المفاجئة وعلطول ناظرت فيه وهي بعد صرخت من القهر وقالت: وجع م تعرف تتكلم زي الناس جاي تصرخ ليه عندي وانت تعرف اني انفجع !!
تركي مسح على شنبه وقال : البسي طرحتك ونقابك وقبل لا يعطيها فرصة تسأل ليه قال: ف واحد هنا وهي يوم ناظرت شافت بالفعل زول رجال وعلطول لبسته الطرحة ورمته على وجهها وقعدت تلك الشبس اللي طاح ف حضنها وكملت تاكل الباقي وهي تناظرهم وش يسون رغم انو مو باين شيء تقريبا.
سعود شمر اكمامه وقال: بجيب الاغراض من سيارتي وارجع
تركي: تحتاج مساعدة اجي اشيل معك؟
سعود: لا م يحتاج الحين برجع. وبالفعل راح جاب الاغراض وقعدت يمكن نص ساعة زيادة عبال م خلصوا.
تركي بعد م خلص وشكر سعود قال: م عرفتني على نفسك
سعود: صافح تركي وقال معك معك الضابط سعود بن سلطان
تركي: تشرفنا
سعود: الشرف لي وانت م عرفتني على نفسك!
تركي ببتسامة: معك تركي بن محمد
سعود: طيب ي تركي بسالك انتو وش تسون بذا الطريق م ظني انك من اهل الديرة انت وجه جديد علي
تركي ببتسامة: ايه حنا تونا ناقلين وهذا اول يوم لنا
سعود: اها اجل م بعرقل طريقكم اكثر مع السلامة
تركي: مع السلامة وشكرا مرة ثاني واتمنى يكون لنا لقاء ثاني
سعود: ان شاءالله .
وراح ركب سيارته وتركي بعد ركب سيارته
ومشي سعود قبل تركي وكان سيارة سعود قدام سيارة تركي وف دخلة البيت سعود استغرب انو سيارة تركي وراه ونفس الشي مع تركي وليليان اللي مستغربين انو (GPS) جابهم هنا ووصلو تقريبا على اذان العصر.
سعود وقف سيارته قدام بيتهم وتركي نفس الشيء وقف سيارته قدام بيتهم الجديد ونزل سعود وتركي معه وليليان كانت تلملم اغراضها وكانت تدور جوالها وهو بيدها وتركي بضحك راح لجهة سعود وقال: سبحان الصدف اللي كذا
سعود بجمود انت ولد العم محمد!
تركي ببتسامة : ايه انا ولده البكر
سعود راح يسلم عليه للمرة الثالثة وقال: والله يوم قلت انو اسمك تركي بن محمد م جاء ف بالي ولا واحد بالمئة انك بتطلع ولد العم محمد
تركي:ولا انا توقعت انك بتكون جارنا.
سعود ابتسم على الخفيف وقال: انت قلتها سبحان من خلق الصدف.
وقال: فنجاك عندنا تفضل
تركي برفض:لا ي رجال انا جاي من خط سفر وفوق كل ذا كنت واقف بالشمس اكثر من ساعة و مواصل من امس وبروح اتطمن على بنتي وبرتاح .
سعود وهو يحسب ليليان زوجة تركي وقال: اجل انا اترك انت والمدام .
تركي لف على على ليليان وابتسم بحزن وقال: اختي مب زوجتي زوجتي متوفية وبصوت خفيف"الله يرحمها"
سعود اللي مدري ليه حس براحة وبنفس الوقت حزن على تركي : الله يرحمها ويرحم جميع موتانا وموتى المسلمين. ولف وراح لجهة باب سيارته الخلفي عشان ينزل اغراض البيت وتركي راح ليليان وهو يسالها : ليه للان م نزلتي
ليليان وهي مكشرة : تركي اتصل على جوالي ماني محصلته وتركي كان بيتصل بس شاف الجوال بيدها وطق راسها باصبعه وهي اتوجعت وقالت: آآآي تركي وجع وشفيك .
تركي بضحك: واللي بيدك ذا وشو؟
ليليان وهي تناظر يدها وتسالوا: وشو بيدي. بعدين استوعبت انو الجوال ف يدها وهي صارلها ساعة تدور عليه زي المهبولة ضحكتك باحراج وقالت: م ركزت
تركي وهو يضحك: ماهو شيء جديد عليكِ انتي وفهاوتك متعودين عليها وقام يضحك، وهناك سعود كان سامع كل شيء وابتسم على الخفيف على فهاوتها وعرف من كلام تركي انها انسانة فاهية من يومها ودخل البيت.
وتركي وليليان نفس الشيء دخلو البيت وهم يناظروه اول مرة يجون البيت ذا.
خلال ذا الوقت الجد صحي وراح اتوضى وكان بيمشي على المسجد بس شاف تركي وليليان وراحت ليليان تحضن جدها وتسلم عليه
الجد: جيتو ي بنتي
ليليان بابتسامة: ايه ي جدي تونا واصلين
الجد كشر حواجبه: ليه اتاخروتو؟
ليليان: وحنا جايين وقفت السيارة علينا فجاة وعبال م يصلحوه اتاخر الوقت
الجد وهو يهز راسه: اها تمام ي بنتي انا بروح اصلي وقال لتركي : ي تركي وانا جدك تعال صلي معي
تركي راح مع جده وليليان تذكرت ابوها وراحت تدق ابواب الغرف لانها م تعرف للان البيت ولا الغرف وهي تدق سمعت صوت امها ودخلت راسها بابتسامة وهي تقول: يمة صحيتي! وكملت وهي تقول: يمة دامك صحيتي صحي ابوي لا هنتي علي بيفوته الصلاة
ام تركي وهو تبتسم قالت: تمام ي بنتي وانتي بعد روحي صلي وارتاحي واضح انكم توكم واصلين
ليليان هزت راسها بنعم: ايه يمة تونا وصلنا والحين بروح اصلي وراحت ام تركي تصحي ابو تركي للصلاة وهناك ليليان اللي للان تكشتف الغرف وراحت الدور الثاني اللي هناك غرفتها هي وليان مع بعض و غرفة تركي وبنته اللي مكون من غرفتين بس مخلين مع بعض وغرف التؤام الطايش
تقولون وشلون يعيشون مع بعض ترا غرفتهم صح مع بعض بس كانهم غرفتين حرفيا كبيرة مرة ومقسمينها وف باب صغير مرة يحلى الغرف ويخليه صدق كانه بيت تراثي صح البيت تراثي بس هم مزينين غرفهم بشكل يعطي منظر حلو للعين
وطبعا عبود والجد والاب والام غرفهم تحت ومعه الصالة والمطبخ وبرا عند الحوش ف المقلط.
ليليان مسكت الباب وفتحته بس م انفتح وراحت ع الغرفة الي باب جنب باب الغرفة الي قبلها ويوم فتحته شافت نياف نايم ولا هو داري عن احد وعرفت انو الغرفة اللي بابه م انفتح غرفة نوف
ورجعت كملت وفتحت باب وشافت سرير كبير يكفى لاربعة اشخاص وعلى يمينه التسريحة وفيها بوكسين كبيرة مرة وجنبه مرايا طويل وجنبه ديكور شجرة صغيرة وقدامه كرسي وفوقه قطعة قماش مطبق وقبال السرير ف كنبها طويلة وطاولة والجهة الثاني مخدات ارضية وكانت ليان نايمة فوق الكنب واللآب مفتوح وواضح انها كانت تشتغل على اللآب ونامت بدون م تدري وراحت خذت من المفارش اللي بالركن وخذت بطانية صغيرة ولحفت ليان فيه ويوم راحت للشباك شافت انو غرفتهم مقابل لبيت ابو سعود وشافت واحد طالع وشكله رايح يصلي
وهي ع وشك تقفل الشباك شافت سارة واول م شافت سارة انتظرت لين الولد اللي طلع من بيتهم يروح وصارت نوعاما تصرخ وبنفس الوقت تهمس وهي تاشر على سارة وسارة حست فيها ورفعت عينها واول م طاح عينها بعين ليليان م عرفتها بس بعدين ركزت شوي ف ملامحها وعرفت انو هي وحدة من التؤام ي ليان او ليليان لانو ملامح ليليان م كان واضح مرة بس شعرها الي واضح لانو الغرفة كان ظلام نوعاما وليان وليليان شعرهم طويل طبعا ليليان شعرها طويل مرة واسود وليان شعرها يوصل لين نص ظهرها وهي دائما تحني شعرها لدرجة صار لونه بني
وصات ليليان تقول بهمس بس ينسمع لسارة تعالو عندنا
وسارة استحت نوعاما وشلون تروح عندهم وهم توهم جايين اكيد تعبانين واشرت وقالت: لا وليليان استغربت وقالت: ليه؟
سارة : استحى انتو توكم جايين واكيد تعبانين وشلون اجي عندكم واكيد اخوانك موجودين
ليليان هزت راسها وقالت: لا م عليكي كل البيت نايمين وانا طفشانة وابيك تجين وايه لا تنسي مزن بعد
وسارة حركت راسها وقالت: ان شاءالله بشوف استاذن من امي وحركت يدها وقالت : سلام
وبالفعل ليليان نزلت عبايتها واغراضها وحطته فوق السرير وراحت خذت لها ملابس من الشنطة ودخلت الحمام(الله يكرم القارئ) واخذت لها اسرع دش ف الحياة وخرجت خلال عشرة دقائق
ولبست بجامتها اللي مكون من شورت قصير وبدي علاقي وتركت شعرها بحاله لانو مبلل وراحت نزلت تحت وصارت تشيك على الصالة وترتبه وتعطره وراحت لامها وسالتها: يمة وين اغراض القهوة؟
ام تركي : بالمطبخ الحين اجي اعلمك وبالفعل فتخت شرشف الصلاة ولبست جلالها وراحت مع ليليان المطبخ وفتحت الدولاب واعطت لليليان وسالتها: بيجون احد ي بنتي!
ليليان: ايه يمة شفتي جيراننا العم سلطان !
ام تركي هزت راسها وقالت: ايه اكيد اعرفه وشلون م اعرف زوج عزيزة!
ليليان: ايه بالضبط المهم اني شفت بنته سارة وناديتها قلتلها تعالي انتي واختك.
ام تركي: ضربت ليليان براسها وقالت بحدة: و دامك ناديتي البنات ليه م ناديتي امهم ان شاءالله الحين وش بتقول عزيزة عننا؟ اااه ي راسي منك وقالت: الحين تروحين بيتهم وتقولين امي عازمتكم عندنا وبذات امهم عزيزة فاهمة!
ليليان بخوف: حركت راسها بقوة وقالت طيب والله بروح الحين اعزمهم يمة بس لاعاد تعصبي
وبالفعل حطت القهوة وشاي على النار وخففت النار شوي وراحت بسرعة لبست عبايتها المرمي ع السرير ولسبته ولبست الطرحة ورمته على وجهها وغطت وجهها بالكامل وراحت بسرعة ودقت الباب ومزن فتحته واستغربت وقالت: تفضلي ي اختي
ليليان ضحكت ونزلت الطرحة عن وجهها وقالت وهي تضحك: سلااام
مزن بفرحة: يممة ليليانو . وقامت حضنتها بقوة وقالت يمة اشتقتلك
ليليان وهي مبسوطة قالت: وانا اكثر ي روحي
مزن : والله مب كثري وجع وين اختفيتو صارلكم سنتين م جيتونا وجع وش ذي القطعة؟
ليليان: والله عاد السنتين اللي اختفينا فيها مب على الفاضي قبل سنتين جيتك وانا اتحلطم من الدراسة واليوم جيتك وانا دكتورة يعنى معذورين
مزن بفرحة رجعت حضنها بقوة: يمة واخير حلمك صار حقيقة اخخ ماني مصدقة معي الدكتورة ليليان دكتورة الاطفال اخخخ مقدر ي ناس مقدر والله اني للان احتار وشلون م بدلوك مع الاطفال انتي، وشلون قبلو طفلة بالله .
وبذا الجميلة كان سعود بيدخل بس سمع اخته وش قالت اخر شيء وعرف انو ف احد وقبل لا يتنحنح حتى قالت ليليان وهي تضرب مزن بمزح: خير نعم وش قصدك يعنى م استاهل اني اصير دكتورة!
مزن بوهق: لا م اقصد كذا بس
وليليان يوم عرفت انو مزن اتوهقت ضحكت بقوة وقالت: امزح معس امزح وهنا سعود اتنحنح م وده يكمل يسمع سواليفهم وهو حس انو صوت البنت نفس صوت الي كانت تغني بالسيارة اخت تركي بس قالت يمكن مو هي وليليان علطول رجعت الطرحة على وجهها ورحت على جنب ومزن قالت : ادخل ي سعود
وسعود دخل وهو منزل راسه بس لفته عباية ليليان وهو نفس عباية الي كانت بالسيارة وعرف انو هذي نفسها اللي كانت بالسيارة وانو مو غلطان ومشي بسرعة من عندهم ودخل غرفته عشان يرتاح.
وليليان كانه جيت سعود ذكرها ليه هي جت هنا أساسا وقالت بسرعة : اسمعي انا جيت اعزمكم انتي وخواتك وامك وقالت مرة ثاني: ترا امك اهم لانو امي بغت تصفقني لاني نسيت اعزمها والله اني خفت يوم شفت امي معصبة والحين بروح القهوة والشاي اكيد طفو
ومزن ضحكت وقالت: ان شاءالله ي روحي
ورجعت ليليان بسرعة وفتحت العباية والطرحة ورمته ع الكنب ف الصالة ودخلت بسرعة المطبخ وقفت الغاز لانو بالفعل زي م اتوقعت طفى القهوة وانكب وانقفل النار وراحت جابت الكاسات وحطته ف التبسي وراحت شالته الصالة وخذت عبايتها وكانت بتمشي بس سمعت صوت جدها وتركي وهم داخلين البيت ورجعت لبست عبايتها مرة ثاني وراحت بسرعة عند جدها وحبت راسه وراحت مع جدها للمجلس وقعدت شوي ويوم سمعت بابا بيت ابو سعود انقفل قامت بسرعة وقالت لجدها: جدي انا بدخل بيجون حريم وانت بعد روح ارتاح بغرفتك
الجد: لا ي بنتي اول م يدخلون الحريم انا بخرج اشتقت للديرة واهلها بروح اقعد معهم
ليليان: تمام ي جدي انا رايحة وحبت رأسه مرة ثاني وطلعت من عنده وراحت بسرعة على غرفتها هي وليان وحطت العباية مرة ثاني فوق السرير ويوم طالعت للكنب م شافت ليان وقامت غيرت لبسها للبس عادي لانو اول لبست بجامة شورت قصير وهي تخرج شافت ليان خرجت من الحمام(الله يكرم القارئ) ويوم شافتها ليان قالت: وين رايحة!
ليليان: بنزل تحت عند الخالتي عزيزة والبنات
ليان: هم تحت؟
ليليان حركت راسها بنعم
ليان: اجل بصلي العصر وانزل
ليليان : تمام ننتظرك ونزلت تحت وشافتهم بالصالة ومعهم ام تركي وراحت تسلم على خالتها
والبنات وقعدت معهم
مزن: وينها ليان ووين اختكم الثالثة للان م شفتها ولا مرة من يوم م كبرت
ليليان: ليان شويا وتنزل ونوف والله نايمة من التعب
ام سعود باعجاب: اسم الله عليكي ي بنتي كل مرة اشوفك تصيرين احلى من قبل ماشاءالله ماشاءالله.
ليليان استحت ومعرفت ترد وقالت : شكرا ي خالة
وشافت لؤلؤة بيدين خالتها وقالت : عادي اخذها
ام سعود: اكيد ومدت لؤلؤة لليليان
وليليان خذت لؤلؤة وهي منهارة نقطة ضعفها الاطفال
وقالت: يمة تنوكل اخخخ قلبي
ام سعود ابتسمت من كلام ليليان ولفت لام تركي وصارت تسولف معها ولليليان تقول للبنات: ي ناس وشلون اجيب وحدة بحلاوتها!😭
سارة وهي تغمز: تزوجي واحد من اخواني واضمنلك الانتاج من الحين
ليليان استحت واحمر وجهها وقالت: وجع استحي على وجهك
ومزن ضحكت بقوة يوم شافت وجه ليليان صار احمرر
وليليان قامت بسرعة ومدت اللؤلؤة لمزن وراحت المطبخ جابت الحلى من الثلاجة وصبت القهوة من جديد وقعدو يسولفو وليان بعد نزلت وصارت تسولف معهم ومر الوقت ورجعو اهل ابو سعود لبيتهم.
بعد يومين:
ليليان وليان نزلو بزعل ف الصالة عند الاهل.
الجد حس فيهم وسألهم: اشفيهم بناتي وش مضيق خاطرهم!؟
ليليان بقهر: يبه لغو إجازتنا
ليان وهي تموت من القهر والغبنة : اخخخ ليت اللعن يجوز والله للعنت خير خيرهم الله لا يوفق العدو هذا وحنا اول مرة نطلب اجازة مطولة لمدة اسبوعين بس حتى هناك...م كملت كلامها من القهر
ورجعت تتكلم: اوووف حسبي الله مدري وش اقول عنهم بس وجع صدق وجع.
الجد بحكمة: ي يبه هذا هو شغلكم لا تنسوا ليه دخلتوا ذا المجال
تذكرون وش قلتولي يوم قلتلكم الطب م يناسبكم!
فلاش باك* :
الجد: قلتوا ي يبه مو كل من يدخل الطب يناسبهم ف كثيرين دخلو الطب غصبا عنهم وكثيرين دخلو لحبهم من هالمجال بس وش صار! حاليا كل ذول الاشخاص يوميا ينقذو ارواح وكملت ليليان بحزن: ويوميا يفقدو ارواح بس برضو م ننسى بفضل الله ثم بفضل هالاشخاص الي دخلو ذا المجال ف اشخاص كثيرين عايشين حياتهم طبيعي
ليان بغبنة: الطب نعمة ي يبه
لولا الطب النفسي كان حاليا نسبة الانتحار كبير
لولا طب وجراحة القلب كانو كثيرين الحين عايشين بوجع بالقلب وحتى يمكن انهم الحين كانو ف رحمة الله
لولا طب.. كانت بتكمل بس م قدرت من الغصة اللي فيها لانو صارلهم سنة كاملة يحاولون يقنعوهم بس ماش مافي فائدة والحين من غصتها بغت تبكي قدامهم وهي م تحب تبين ضعفها لاحد وبسرعة مسكت نفسها قبل لا تبكي قدامهم.
والجد وهو خلاص بدا يقتنع بس سالهم سؤال اخير: وش يضمن لي اني لو سمحت لكم تدخلون طب بتتميزون بذا المجال وبتتفوقون فيه؟
ليليان: م بنجاوبك على ذا السؤال ي جدي بس بنوريك بافعالنا اذا سمحت لنا ندرسه .
الجد قام وقال: يصير خير يصير خير وراح دخل غرفته
ليان طلعت بسرعة غرفتهم لانها على وشك الانهيار
نرجع للواقع*:
ليان وليليان: نذكر ي يبه
" للمعلومية ليان وليليان يقولو للجد احيانا جدي واحيانا يبه من شده قربهم له "
نكمل..
ابو تركي: اجل ليه ي يبه تقولون كذا وتدعون!
ليان وهي تصد عنهم: ماهو قصدي اني ادعي عليهم بس.. من قهري ي يبه
ام تركي: يلا اجل ي يمة روحوا نامو لازم تصحون من بكرا الفجر
التؤام مع بعض بحزن: تمام
وبالفعل طلعو غرفتهم وكل وحدة دخلت بجهتها بالسرير وغصبوا نفسهم النوم وبالفعل م مر نص ساعة الا وهم بسابع نومهم.
الفجر الساعة 4:34 :
ام تركي صحت وكانت تصلي قيام الليل ويوم شافت الساعة راحت تصحي التؤام
ام تركي دخلت الغرفة وراحت جهة ليان كانت تصحيها بس م كانت تصحئ هي من النوع الي نومها ثقيل بعكس ليليان الي نومها كان خفيف مرة وهي اصلا صحيت اول م امها فتحت الباب
ام تركي بعد م تعبت من ليان وهي تصحيها واخيرا الادمية قررت تصحى
ليان: ها يمة ها شوفيني صحيت خلاص وقفي تهزيني تراني ادمية توها صاحية من النوم مو كويس انك تهزي الانسان كذا اول م يصحى من نومه.
ام تركي وهي تناظرها بنظرات وكانها تقول :احلفي بس😒.
ام تركي: اقول دامك صحيتي فخلاص وقفي تحلطم وروحي اتسبحي ترا م بقي على اذان الفجر الا كم دقيقة
ليان: حاضر يمة حاضر ، ورجعت انسدحت ثاني واخذت جوالها وكانت تشوف مدير المستشفى وهو يقولها انو اليوم عندها عملية جراحية لواحد من قسم الـVIP
ليان وهي استغربت و قامت اتربعت وكتبت لقافل مدير المستشفى: دامه من قسم الـVIP اجل ليه انا الي بسوي عمليته؟
وشافت انو م رد فقعدت تقول بصوت عالي :اكيد الحين نايم ف العسل وانا هنا صاحية من الفجر وجع اصبرو علي بس يوماً بصير مديرة واداوم بالسنة مرة بس ، اصبرو علي لين افتح المستشفى الخاص فيني.
وليليان سمعت كلامها وقالت: سبحان الله الحين عرفت ليه ربي م خلاك مديرة المشفى اكيد لانه عارف انك بتهملي مهنتك ولا كان الحين فتح دربك وكان صرتي مديرة المستشفى ي سبحان الله .وقامت تضحك علي ليان اللي فتح عيونها بصدمة وصارت تناظر فيها
ليليان بنرجسية: ادري اني حلوة م يحتاج تناظريني كذا وكانك شويا وتموتين علي وغمزت ف اخر كلامها 😉.
ليان اتنهدت وقالت بدراما: آآآه ي ربي انا وش سويت عشان ترسل معي وحدة شاركتني حتى بولادتي آآه ي الدنيا آآه بس . وقامت من مكانها وراحت دخلت الحمام (الله يكرم القارئ) وشويا واذن الفجر وطبعا لاحد سعود وابو تركي راحو يصلون.
ف بيت ابو سعود سلطان:
ابو سعود راح يصحى عياله ويوم كان بيطق غرفة سعود شاف سعود بالفعل لابس ثوبه وخرج من الغرفة بيلحق على الصلاة لا تفوته وكان مستعجل ووقف اول م شاف ابوه وراح حب راس ابوه بشويش وقال: كيفك يبه
ابو سعود: بخير ي ولدي
سعود: الحمدالله ي رب جعله دوم ، اجل مشينا!
ابو سعود: ايه يبه يلا مشينا .وصرخ وهو ينادي على احمد اللي يسوي نص ساعة بالحمام( الله يكرم القارئ) : يلا ي حمد م صارت كل ذا وانت ف الحمام يلا اخرج بسرعة بيفوتك الصلاة ترا والله لو رحت المسجد وخلصت صلاتي وم شفتك من الصفوف الاولى بحش رجولك حش وقول ابوك م قال. ومشي للمسجد.
الي م تدرون ابو سعود كان ف الرياض لسبب مجهول بس امس ف الليل رجع .
بعد الصلاة كان ابو سعود والجد سعود وابو تركي وسعود واحمد معهم يسلمون على بعض بحكم انو ابو سعود توه امس رجع من الرياض وتوه يلتقي فيهم وكانو راجعين البيت مع بعض وهم يسولفون بحكم انو بيوتهم قبال بعض
وابو تركي كان واضح ماكل هم شيء
ابو سعود: اشفيك ي محمد وش مقدر خاطرك!
ابو تركي : مافي شيء بس قاعد افكر بشيء
ابو سعود: وش هو طيب قلنا يمكن نقدر نساعدك
الجد سعود تكلم وقال: وشفيك ي محمد وش صاير!

////////////////////////////////////////////////////////////////