عروسة الميخالي [بالدارجة المغربية 🔞♨️مـكـتـمـلـه]

PART 1

"عـروسـة الـميـخـالـي"

             "شـمـس الـضـحى"

     "لن أنسىٰ بشاعة ما أشعرتني به ."

    _______________PART 1_____________

"بنت حاكم القبيلة قالوا الليلة عرسها ،ولكن لعريس لا هو لا هلوا جاو ، خلاوهم يا سيدي معلقين "

"سرهم نيت ،شكون قال ليهم يصيفطوها النهار لول للمدينة تقرا عند عمتها، باينة العريس وصلتوا خبارها ودار بالناقص مسكين"

•القبيله مقلوبه برجال الحاكم ، كيجروا من هنا ولهيه ،كيقلبوا على عريس بنت سيدهم لي هرب وخلاها والحنة باقي ما كرمت على يديها، حرثوا الأرض برجليهم وما لقاو ليه ولا لناسوا حتى أثر...الشي لي خلاهم يحنوا الراس ويرجعوا لعند مول لقصر لي جاهم الأمر من عندوا .

  موسى[ببرودة وهو كيدوز بيديه على لحيتوا] : دابا عريس بنتي "مهرة" هرب ! ياك أ جواد !

جواد [وعينيه فالأرض] : قلبنا أنا ورجالي أبا حتى عيينا ،ما لقيناهمش [هز راسو وأضاف بتوثر] لخبار داعت بين ناس القبيله ،كولشي ولى كيقول بلي العيب فبنتنا ،وهاد لكلام بودني أنا سمعتوا ، دابا آش جا ما يسد علينا لفام .

  موسى: الفم لي تحل هرسوا ، ودابا سير كلم ليا ديك مك.

  سهلية [وهي داخلة] : ها مو جات [جلسات فجنبوا] سمعت بلي ما قدرتوش تلقاوه ،[هزات عينيها فولدها] دابا أشنو المعمول أجواد!

  جواد: ما بان ليا والو أمي من غير نشوفوا ليها شي واحد يسترها لينا.

موسى [نطق بحدة بعدما ناض شنق على ولدوا] : واش بانت ليك هي معرية ولا عايبه باش نشوفوا ليها يسترها أجواد! [طلق منو حتى جا طايح للأرض] آخر مرة نسمع من فمك بحال هاد لكلام.

  سهلية [دارت رجل على رجل] : جواد ما قال حتى كلمة دالعيب ،وراه عندوا الحق ، رآه حنا غادي نتشوهوا بين لقبايل وسمعتنا غادي تولي كيف الجفاف لي داز يمسح رجليه فيها.

موسى يلاه كان غادي ينطق وهوما يتموا الخدمات داخلات كيتجاراو.

  لخدامه [وعينيها خارجين] : سـ سـ سيييييدي ،لالة بنتكم ما كايناش فبيتها...قلبنا عليها باش نقطعوا الشك ولكن ما لقيناها.

جواد [ناض وقف] : كيفاش ماا كايناش![تم خارج كيجري] أنا غادي نشوف وعلى الله تكوون هربات ديال بصح.

سهلية [بصوت خافت وهي شاده فراسها] : يا ربي على هاد لبنت ، جبتها من لمدينة من عند عمتها غير باش نتبت ليها الغرس ونسكنها معايا وتبقى ديما قدام عيني ،ولكن شوف على زهر عندي شووف.

موسى [وهو تابع ولدوا كيجري] : غااادي نحيد لبووها الجلده ديال راااسها ،وااش ما كفاهاش لي بينا ،باغيه تزيد علينا!

•فالفناء الخلفي ديال قصر حاكم لقبيلة ،كانت أنثى ذات قوام رشيق ،حسناء الوجه ، طويلة الشعر ،كحلة العينين والحجبان ،راكبه فوق واحد العود* وغاديه بيه كتجري لناحية الباب لكبير وكل شوية كتدور عينيها لي حمرين باش تشوف واش ساقوا ناسها خبار غيابها...خرجات لبرا فين كانوا خدم باها خدامين وبداو كيتغاوتوا ،خصوصاً بعدما شافوها ما راداش بالها للي كان واقف قدامها عند المرمده لي فوقها محطوطين الصنادق ديال زبل الحاكم وحاشيتو كيميخل فيهم....تهز وتخبط مع الحيط....مولات العود حتى هي طاحت بعودها على الأرض بعدما خرجات فالميخالي....ناضت بالخف بعدما سمعات صوت خوها وباها من وراها نطقوا.

جواد: آش هادشي كتديري فيه آ مهرة! معامن تشاورتي باش تخرجي من الدار بلا غطا راسك!

موسى [وعينيه على لي كان جالس عند الحيط كيمسح بطرف كمو دموا] : دخلي لداخل وسيري نيشان لبيتك ،ما نشوفش وجهك قدامي.

  مهرة [وعينيها عامرين دموع] : حتى أنا ماا كنتش باغية نشوف وجوهكم..راه نتوما أبابا لي جبتوني بزز باش تزوجوني ومن بعدها تحرموني من التكمال ديال الجامعة ديالي... حيت باااغيني نبقى هنا بحالي بحال جوااد ، [أضافت بنرفزة]عببببده عند رجليكم...تزوجوني بززز باش أنا نولد لولاد لي ما قدروش عيالاتوا بتلاثه يولدوووهم ليه ،او ياخدهم ليا....من ديييما ونتوما مغرقييني فالضلم واش ما كفاكمش بلي هو لي غادي يورث بوحدوا كولشي من بعدك نتا وماما أبابا! تورثوه على ولاد كرشي!

  سهلية [ببرودة من ورا ولدها ] : ها ما دارت تربية لمدينة وختك أسي الحاكم ،حياك الله حتى بنت دمك ولات تنسب ليك ولخوها مسكين قدام لعباد لي كاين ولي ما كاين.

  موسى لي كان حالف لا نزل عينيه على لميخالي لي ناض وقف وتم غادي بخنشتوا فوق كتفوا ،نطق بصوت مرتفع خلا قلوب گاع لي ضايرين بيه يرجفوا ] : الحاااضر أناس لبلااااد يبلغ الغايب ،مهرة بنت الحاكم موسى ولد الحاكم عيسى ،الليلة رايحة وهي عروس ديال واحد الميخالي من ولاد باب الله ،ومهرها وهديتها كسوتها لي على ضهرها لاااا غير !

#يتبع