عروسة الميخالي [بالدارجة المغربية 🔞♨️مـكـتـمـلـه]

PART 11

عـروسـة الـميـخـالـي"

             "شـمـس الـضـحى"

     "لن أنسىٰ بشاعة ما أشعرتني به ."

    _______________PART 11_____________

•جالسة فالبيت ،حاطه بيسيها قدامها وخاشية وجهها فيه حتى تمات داخلة عليها ميلودة لي كانت عجنات وخبزات وطفات على لغدا...حطات يدها على لباب ونطقات.

ميلودة: راجلك باقي ما جاي ، راه وصاني قبل لا يدي ندى ويمشي باش نقول ليك تدخلي للحمام تعومي .

مهرة [هزات عينيها فيها ،سدات بيسيها ونطقات] : ميلودة ، واخا نسولك!

ميلودة [ببرودة] : عومي وديك الساعه لي سولتي عليها نجاوبك.

مهرة رمات الپيسي وناضت كتجري خرجات ، وقفات عند لباب ديال برا ونطقات وهي كتدور فعينيها.

مهرة: الحمام فين!

ميلودة [من وراها] : رآه قدامك ، حدا الزريبه ، بردت ليك الما ،وحطيت ليك الفوطه ، حكي مزيان ،وغا بشوية عليك باش تجيبيها مع الغدا نيشان.

مهرة تبمسات ومشات دخلات للحمام لي كان مبني غير بالطين والتبن ، غارسين فأرضوا جوج برامي كبار ، كتوصلهم من لتحت العافيه ، بدات كتحيد فحوايجها وصندالتها ، حطات رجلها على الأرض وهي تحرقها ، رجعات ما حيدات من رجلها ، جرات واحد البيدو جلسات فوقوا وبدات كتعوم وهي كتدندن...غسلات شعرها ودارت باندوش ، ويلاه هزات لفوطه وبغات تخرج ،سمعات حس طارق.

طارق: ما لقيتش لعشوب لي بغيتي أمي ، لقيت غا شي حاجة قليله وصافي.

ندى: جبنا ليك الحلوى معانا حتى هي ، ما لقيتش لگليه.

مهرة لوات عليها الفوطه،وخرجات لعندهم هكاك بشعرها الفازگ مطلوق.

مهرة: ما جبتوش ليا معاكم أنا شي حاجة!

طارق [شاف فيها بنص عين] : ما وصيتيني على والو.

مهرة [بنرفزة] : على الأقل غير شي سقاطه ،ولا شي بواطه ديال الويفي.

ميلودة: زيدي دخلي لبيتك راكي غادي تمرضي زيدي.

مهرة قلبات عينيها وتمات داخله كتتمايل ، دخلات لبيتها ، ردات لباب ، حلات لمجر لي فيه جمعات حوايجها ، جبدات دي سوتيان وسترينغ فالأحمر ، لبساتهم ، لوات شعرها فالفوطه ، هزات واحد الدوني فالأبيض هو أو واحد الشورت قصير حد ترمتها ، لبساتهم وجبدات لكريمات ديال لحمها وشعرها ، جلسات على طرف الناموسية وبدات دلك فداك اللحم يا ما تدلك حتى حمار ، نشفات شعرها ولواتو فواحد الزويف نقي ، لبسات تقيشرات طوال مرسوم فيهم سبونجبوب ،خشات رجليها فبونطوقها الدافيه وخرجات لعندهم للمراح فين كان طارق وبنتوا جالسين كيتسناو فميلوده تحط لغدا...ترمات حداهم ،قربات لودن ندى ونطقات بصوت خافت.

مهرة: فين خبيتوا الحلوى!

ندى: علاش! أشنو بغيتيها!

مهرة [رجعات اللور ونطقات بنرفزة] : أويلي على أشنو بغيتيها ، آش غادي ندير بيها مثلا ، باينه غادي ناكلها.

طارق [ببرودة وعينو على تيليفونو] : جايين بالعشيا شي ضياف ،داكشي علاش جبتها على قبلهم ، إلى بغيتيها نتي ، خلي حتى لغدا ونهبط تاني نجيبها ليك.

مهرة [كمشات حواجبها] : شكون لي جاي!

ميلودة [وهي هازه الطاجين فيد والخبز فيد] : شي عيالات كنعرفهم ، سمعوا ولدي تزوج ،وتافقوا فما بينهم يجوا يشوفوك.

مهرة [بنبرة ساخرة] : آش غادي يشوفوا فيا! مالهم عمرهم شافوا بنادم!

طارق: كل ناس وعاداتتهم ،وهادي عادتهم ، ما يقدر حد يقول ليهم عليها لا.

ميلودة [جلسات ،قطعات ليهم الخبز ونطقات بصوت خافت بلا ما تهز عينيها فيهم] : عندك الصح أوليدي ، أما هو دير بالك مع الامانه باش يشوفوها حتى هي.

طارق [وفمو عامر] : آش من أمانه أمي!

ميلودة [ببرودة] : عربون دخلتك على مراتك وصافي.

طارق [بنفس البرودة بعد ما هز عينيه فيها] : الزيف!

ميلودة [وهي حشمانه منو] : إيه اولدي.

طارق [حول عينيه لمهره لي كانت على درايه بتقاليدهم ،لقاها كتدور فعينيها كي بومه وساهيه] : باقي ما كاينش هاد الساعه ، حتى لمره أخرى إن شاء الله.

مهرة [فاقت من سهوها] : بحال إلى فالمره الأخرى غا غادي يكون.

ميلودة: إوا هاذا ما زواج ما والو أبنتي ، إلى غا لا كنتوا غادي تبقاو على هاد الحال تفرقوا وهنو الوقت.

طارق [خبط يدو مع الميده حتى قفزهم ، شرب لما ونطق بنبرة جافة وعينيه على ندى] : إلى ساليتي ،سيري لبيتك ، هزي كتوبك ،وقراي ما غادي ينفعك الله ارضي عليك أبنتي واخا!

ندى: و و واخا أبابا.

طارق [ناض وقف] : أنا فبيتي أمي ، إلى خصاتك شي حاجة عيطي.

ميلودة: وغداك أوليدي!

طارق [وهو غادي لبيتوا]: ما كانش فيا الجوع أصلا.

ميلوده [وعينيها على مهرة] : ما غاديش تنوضي تتبعي راجلك وتشوفي مالو!

مهرة [قطعات ليها الخبز وبدات كتاكل] : خليه يضبر لراسوا ،انا مالي فيه آ ميلودة.

ميلودة [قلعات ليها الخبز من يدها] : تهزي شوفيه تهزي.

مهرة [ناضت بالزعاف] : آش فداك الميخالي ما يتشاف الله اهديك.

ميلودة [ببرودة] : ميخالي ولكن قابل عليك وساترك ، راكي ما جيتيهش فأيامو أبنتي ، ولقيتيه دورك ما باغيش يقسى عليك ونتي صغيرة ، أما كون كاع ما تحلي عليه فمك وتنعتيه بالميخالي.

مهرة [وهي غادا كتتمايل لبيتها] : ولات أمنيتي دابا نعصبوا باش نشوف هاد القساوه لي فرعتوا ليا راسي بيها كي دايرة.

ميلودة: إوا سيري ، غا لا سد عليك لا تعيطيش علينا.

#يتبع