عروسة الميخالي [بالدارجة المغربية 🔞♨️مـكـتـمـلـه]

PART 28

عـروسـة الـميـخـالـي"

             "شـمـس الـضـحى"

     "لن أنسىٰ بشاعة ما أشعرتني به ."

    _______________PART 28_____________

"واللي بغا يمشي وريه لباب لا تزيد كلام ، لا تحزرو لا تحبس فيه لا تعطيه سلام ، الصاحب لا مشا كاين الصحاب بالعرام ، لحبيبه يلا  مشات هالبنات راهم أولوفات ، واياك تحزن على لي فات دفناه ومات ،وياك تعشق فالخلود كاين الممات ،اللي بغاك  بغيه مرحبا، الموت موت معاه ، واللي جفاك الموت والشطابه ورش الملح وراه ..واياك تزيد فالقيمه لهاداك مول المال ، شكون هو وشكون نتا بحال بحال ، أنا نوصيك اصاحبي لا تحنيش الراس ، ما تفوت لبنادم قيمه مسطره وقياس ، تهلا فصحيحتك أخويا والباقي يتساس ، الغني الله الدايم الله ميمتي لاباس ،الطيبه في هاد الزمان فطريقها تشقى ، لمحبه الزايده للإنسان دقتها دقه ، لا تجامل لا تلاطف حد گاع لا ترقى ، واللي على سبه يبان يبان گاع ما يبقى"

•جمعات شانطتها ، ولبسات واحد لكسوه فالأسود طويله ، زادت من فوقها مونطو ديال الجلد ، علات شعرها لفوق ، خشات ليبوط فرجليها ، جرت لي ليها وخرجات ، دازت على لمراح فين كان طارق ومو جالسين ، دورات عينيها عليهم ونطقات.

مهرة [وقلبها مزير عليها] : أنا غادي نمشي بحالي ، [بلعات ريقها وأضافت] شكرا على هاد المده لي جلست فيها معاكم ، كانت وقيته زوينة واخا هكاك ، سمحوا ليا عذبتكم معايا يمكن ، [حولات عينيها لي دمعوا لطارق وأضافت] أنا غادي نمشي للمدينه ، غادي نشوف شي محامي ولا محاميه ، نكلفهم بوراق الطلاق ديالنا ، إوجدوا وغادي توصلك يمكن الدعوه للمحكمه ، [حنات راسها] تهلاو فراسكم ، وسمحوا ليا مرة أخرى.

حلات لباب وخرجات بحالها سداتو ومشات شدات فمنير لي كان باقي دايخ ، دخلات لزريبه هزات عودها ، ركبات وركباتو وراها ، دارت الشانطه ديالها فاصل بينها وبينو ، وتحركات تحت نظرات ميلودة من جنب السرجم ، تبعات ليهم العين ، دورات راسها لولدها ونطقات.

ميلودة: يرضيك تخلي مراتك تمشي مع لبارني أوليدي! يرضيك تتشوه قدام ناس الغابه ولقبيله!

طارق [ببرودة وهو كيدوز بيديه على جبهتوا] : اشنو بغيتيني ندير ليها مثلا! نربطها! واش ما عارفانيش كيف داير!

ميلودة: يااا لهاد الطبايع لي فيك يااا ولد كرشي هاااه ، العسكر لي كنتي فيه خرجتي منو غا حيت حسيتي بلي تم ماشي بلاصتك ، قلتي الناس معجبوكش ونتا تخليه واخا كنتي ميت عليه ، ويا ما سهرتي كتوجد ليه وتحفظ ، ودابا مراتك لي شفت داك آش يسموه فعينيك ليها ، خليتيها [ندبت حنوكها]يااا برودية قلبك آطارق أوليدي ياااه.

طارق [ناض وقف] : إلى لقات راحتها مع ولد عمتها ، الله اسهل عليها معاه ، دويت فالأول ، الساعه هي غادي يبقى ديما بالها معاه ، وحتى لا حبستها وضربتها غا غتحقد عليا وبلا فايده ،وانا نفضل نكمل حياتي غا ديال راسي ولا نعذب شي بنت الناس ونبزز عليها تكمل معايا ما بقى من عمري وهي نافراني وكارهاني.

ميلودة: وصافي بصح غادي تعطيها براتها! [قربات لعندو، شدات ليه فدراعو وأضافت] ما عندها فين تروح الليله من غير دار بوها ، عاود معايا ندوو معاه قبل ما يجري عليها للمدينه.

طارق [ببرودة] : سالينا أمي [نتر يدو من يدها ومشا دخل لبيتوا سد عليه]

ميلودة بقات فبلاصتها واقفه ، رجعات لسرجم وهي تلمح منانه جايه تخطوي فلحافها ، كمشات حواجبها وخرجات حلات عليها.

منانه [وهي كتنهج] : يااا توما صحيح ما سمعتوو ! واش بصح عروستكم هربت ليكم مع خليلها على لعود!

ميلودة [علات حاجبها فيها] : يا تي آش سايرة تقولي يهديك الله ، وسيري يا خيتي عگبي لخيمتك قبل لا تبدا عليك الشتا تاني وتحصلي ، ومرات ولدي جا ليها واحد من خدم بوها ، داها تشوف جداها جات لعندهم زايره.

منانة: والاكن [ولكن] علاش هي لي راكبه لقدام ولخديديم محاوطها من اللور!

ميلودة [زعفتها] : سيري امنانه يهديك الله خلاص ، لي كاينه هانتي سمعتيها [هزات صبعها وحركاتو بتحذير] وهااا ويل فمك الرايب و يتحل على ولدي ومراتوا مع عيالات لغابه ، نتي عارفه وأنا عارفه ،سنين وأنا ساتره بنتك وبنتها ومگمداها لوليدي لي ما داير لا بيدو لا برجلوا وساكته ، يا ويلك وتكبيرها فيا ، عمر النهار الزين ما باقي تحلم عينك تبصروا ، سمعتي!

#يتبع