عروسة الميخالي [بالدارجة المغربية 🔞♨️مـكـتـمـلـه]

PART 30

عـروسـة الـميـخـالـي"

             "شـمـس الـضـحى"

     "لن أنسىٰ بشاعة ما أشعرتني به ."

    _______________PART 30_____________

•سيمانه دازت عندها غير بين بيتها ولمشيان عند لمحامي لي وكلات باش يتولى قضيه طلاقها....يوم جر يوم حتى وصل اليوم الموعود ، فاقت غير بزز ، يومين من ورا ما جات لدارهم وهي مريضه ، طلبات الطبيب، الساعه حتى حد ما لبى طلبها ، كولشي نافرها....دخلات للدوش ، قضات حاجتها ، غسلات وجهها وسنانها ، مشطات شعرها وخرجات للماريو ، لبسات غير عبايه فوق من الشوميز ديال نعاسها ، ولات معكازه وما عندها لا جهد لا طاقه ، خشات رجليها فواحد الطالون فالأحمر ، ضرباتها بواحد التعكيره فنفس اللون ، دارت ليكخون ديال الشمس ، هزات صاكها وخرجات ، نزلات لقات باها ومها جالسين كيفطروا ، لقات السلام ولا من مجيب ، زفرات بضيق وخرجات ،حلات صاكها ، جبدات تيليفونها ، دوزات الخط ، تفتح فوجهها ، تبسمات ونطقات بصوت خافت وهي كتدور فعينيها مخافة أن جواد يخرج ليها من شي قنت ويبدا عليها ثاني.

مهرة: أنا ليوم غادي نمشي للمحكه ، غادي تجي لعندي يـ

•••••[قاطعتها بنبرة ساخره] : أختي راكي من قبيله ونتي كتبربري ، شكون نتي لي مصونيه على خطيبي فهاد الصباح!

مهرة [خرجات عينيها] : كيفاش خطيبك! واش داويه على منير!

••••[قهقهات بصوت عالي] : إيه احبيبه ، ولا ما تيقتيش صبري نفيقوا ليك.

منير [بصوت ناعس] : بعدي من أ سهام ، خليني ننعس أحبيبة ، راه باقي عندي ما يتقضى من بعد.

مهرة: أويلي على سهام ! واش الخدامه!

سهام [بنرفزة] ؛ كنت الخدامه ، أما دابا وليت لالاك الكلبه....وشوفي آخر مرة تصوني على هاد النمرة ولا والله حتى نقولها لعمتي تقولها لباك ، ياك تزوجتي بشي شارف ، سيري رجعي خلاص ليه وهني الدنيا من صداعك وفشوشك الخاوي لي ما يتحد.

قطعات عليها وخلاتها هكاك كيف الراس المقطوع ، غا كتتخبط ، حبسات دموعها وحلفات ما تطيح دمعه ، على الاقل غير بين ما تسالي المعمعه ديال طلاقها...خرجات لبرا لقصر فين الطومويبل بالشيفور كانت واقفه طلعات ، وبلا ما يسولها تحرك ، حيت گاع عيباد الله فخبارهم ما جاري.

ساعه ديال الطريق وكانت فوسط قاعة المحكمة ، دخلوا المحامين والقضاة،بقى غا السي طارق لي تعطل ، وبين ما كولشي كتتسناه تحل لباب وتم داخل هو وبنتوا ومو...مشا جلس فالجهة لي مخصصه ليه ، شاف فمهره بنص عين ، تبسم وحنا راسوا بالزربه.

ميلودة [بصوت خافت وعينيها على محامين مهرة] : جوج ديال المحاميين أوليدي ، [حسات بالحزن على فلذه كبدها] مالك بحالي أولد كرشي ما عندك زهر!

طارق [بنبرة هادئة] : ماشي الزهر أمي ،هاذا راه القدر ، شوية ديال الصبر وغادي تتقاد الدنيا غير هني بالك وما تهزيش همي.

ميلودة حسات بقلبها تقبض عليها بغات تنطق الساعه ما خلا ليها القاضي فين ، فتاتح الجلسه وقال شلا كلام وكلام ، وابرز ما جا على طرف لسانوا الصلح ، لي فكل مرة كيتذكر ،كيغبوا محاميين مهرة يطيروا عليه ، وكيبداو يتقلاو بحال فلفه فالزيت... عطى للطرفين الكلمه ، طارق رفض يدلي بأي حاجة ، ومهره يلاه ناضت باش تنطق ، طاحت على طولتها للأرض ، الدنيا تقلبت ، حتى حد ما عرف مالها ، ميلودة شافت ولدها كيتشوا على مراتوا واخا ما قادرش يقرب ليها ، زطمات على نفسها وناضت لعندها ، حيدات الناس لي داروا عليها ، قلبتها على جنبها ليسر ، حلات ليها فمها شوية ، جرات ليها لسانها ، شدات ليها فيدها ، غمضات عينيها أو بدات كتاخد ليها فنبضها ، فوسط من داك السقيل كسرتوا من لي صاحت.

ميلودة: أوييييلي مييييمتي...[هزات عينيها فطارق لي بقوة الخلعه، مع نطقات مع كان عند راسها] الصكعه حامله!!