عروسة الميخالي [بالدارجة المغربية 🔞♨️مـكـتـمـلـه]

PART 14

عـروسـة الـميـخـالـي"

             "شـمـس الـضـحى"

     "لن أنسىٰ بشاعة ما أشعرتني به ."

    _______________PART 14_____________

"كون غير سمعت لكلام طارق وبقيت فالبيت ،عليها قال بلي خايف عليا"

حديث داخلي بينها وبين راسها ، قاطعتوا السيدة لي كانت جالسه فجنبها بعدما مدات يدها لشعرها ونطقات.

لعزيزه: إوا قولي ليا أبنيتي ،هاد السالف لي هكا طويل ،اش كتديري ليه!

مهرة [نتراتو ليها من بين يديها] : عادي ، شمبوان والبلسم ديالو ، ما نديرش ليه المشطه فالدوش وصافي.

لعزيزه [تبسمات ودارت شافت فمرات ولدها لي كانت مقابلة معاها] : شوفي ديك الگرده ديال مرات ولدي شعرها كيداير ، درت ليها نفقة لغزال ودم الجمال، وحلف لا لان ورطاب ،حلفة حلفة.

سعاد: وا حالي من حالك العزيزه ، حتى أنا عندي بنات ولدي قتلهم ليا غا القمل والصيبان ، هكاك مززر فشعرهم ،كبه كبه ،ما خليت ما درت ليه ها الحرمل ها الشبه ها القطران ،بقا ليا داك لما لي فالمدينة شفتوا عند بنتي لي مجوجه تما في ويجانطي [اليوسفيه] يقولو ليه لما ديال القطيع.

نجاة: إوا آش كتتسناي ،قولي ليها تخزن ليك شي قريعه وتجيبوا ليك ، خلطيه مع حنينه ودسيه ليهم فالجدر ديال راسهم ، ياك هو لما ديال القطيع باينه غادي يقطوا.

مهرة [بصوت خافت] : راه غادي يقطع فيهم الروح ماشي القمل [هزات عينيها فعروسة لعزيزة لي كانت حايزه ولدها كترضع فيه] شحال عندوا!

منانة: طالع فربع سنين أختي.

مهرة: و باقيه كترضعيه!

لعزيزة: ومالها لي ما ترضعوا ، آش تظل أصلا مقابله من غيروا ، أنا بوه خليتو فصدري يرضع حتى وصل لعشر سنين ،هو بزوله وختو بزوله.

ميلودة [وهي كتجغم من كاسها] : لاواه العزيزه ، الفطام خاصو يكون فعامين ، راه كيدي ليها فصحتها دروك .

نجاة: خليك منها وقولي لينا آ ميلودة ، جينا ننوبوا على هل الغابه ونشوفوا السروال ، باش نتوكدو بلي ولد سي المختار الله ارحموا ولد لفحوله.

ميلودة [وعينيها على مهرة] : ولدي كلكم كتعرفوه ،شاد من ديما رجلوا عليكم وتيقاروا ولازم دارو ، ما غاديش يبغي لي يشوف شغلوا هو ومراتوا.

مهرة [بعدم فهم] : على آش داويين!

سعاد: على سروال صبيحتك أبنت شيخ لقبيله ، هاداك لي خاص راجلك يعلق ليك فيه لهديه.

مهرة [بصوت خافت بعدما تزنگات] : إوا حتى يدخل بيا عاد نشوفوا السروال ولهديه[مع حولات عينيها وهي تلمح طارق غادي خارج لبرا،جمعات النوضه وتبعاتو حتى لعند الزربيه]طااارق.

طارق [بلا يدور يشوف فيها] : خير إن شاء الله!

مهرة [قربات لعندو ،وقفات قدامو ،هزات عينيها فيه بحكم أنه طويل عليها بزاف ونطقات] : فين غادي!

طارق [بلا ما يشوف فيها]: غادي نازل للغابه.

مهرة: أشنو عندك فيها!

طارق [ببرودة] : نشوف ما نجيب ليكم للعشا ، ونبيع شي قراعي كانو عندي لواحد السيد.

مهرة: نمشي معاك!

طارق: سوق الغابه ما كيحطوش فيه لعيالات رجليهم.

مهرة [ميلات راسها] : ولبنات!

طارق [حنا عينيه لعينيها] : بحال بحال [تخطاها وتم غادي ناحيه العود ديالو]دخلي لدار ،لغمام مغيم ، غالباً الشتا غادي تصب دابا شوية ، وقولي لمي معاك راه الدجاجه لي بغات دبحتها ليها ،بقى ليها غا الترياش .

ركب فوقوا وتم غادي تحت نظرات مهرة لي تبعات ليه العين حتى بدات الشتا كتنبش عليها ، حطات يديها فوق راسها ودخلات وهي تلقى لعيالات واقفات على لخروج.

مهرة :صافي غاديين!

نجاة: هاذا وين ابنتي هاذا وين.

لعزيزة: نخافوا تزيد الشتا تتجهد علينا ،ويطيح الظلام ونولو ماكله لذياب.

ميلودة: الله إعرضكم للخير.

سلموا عليها في حين مهرة بقات بعيدة عليهم باش تتفادى سلامهم ، دارو لحافهم على راسهم وخرجوا زادو مع الطريق بحالهم.

ميلودة: دابا سيري بدلي ابنتي ، وخزني داك لقميص راه عزيز وغالي.

مهرة [تلاحت للأرض، حطات الطبسيل ديال الحلوى بين يديها وبدات كتاكل]: طارق مشا قالك للغابه باش يجيب ما تطيبي للعشا.

ميلودة: أنا ما مطيبه هاد الليلة والو ، باقي لمسمن باقي لبغرير ،باقي لبراد عامر ،لي جاه الجوع ها لميدة عامرة وباقا محطوطه ،ينوض ليها وياكل.

ندى [لي كانت ساده عليها فبيتها كيف قال ليها باباها سمعات حس لعيالات تقطع وهي تخرج] : لحال بدا كيبرد أمي ، ديري لينا غا شي شعريه بماطيشه ندفو بيها كروشنا.

مهرة: الليمونيه عندها لحق فهادي.

ميلودة : سيري جيبي الدجاجه لي دبح بوك مت من العشه سيري [تمات غادا للكوزينة] رجايا فالله ،كنت نبات نصلي باش يعطيني مرات الولد ،الساعة نهار عطاها ليا ،طلعت زرگه ،ما تعرف لا لذا ولا لذيك الله إحفظ.