عروسة الميخالي [بالدارجة المغربية 🔞♨️مـكـتـمـلـه]

PART 6

"عـروسـة الـميـخـالـي"

             "شـمـس الـضـحى"

     "لن أنسىٰ بشاعة ما أشعرتني به ."

    _______________PART 6_____________

•صوت بكا السيدة لي كتولد لداخل و صوت بكا مهرة على برا...تحيرات وندبات حناكها وحيحات...ندى عيات تسكت فيها وتطبطب على شعرها الساعة كل جهدها بلا فايدة ، مهرة غير ما زايدة فيه.

مهرة [وعينيها كيف جغمة الدم] : حتى من عمتي قلبووها عليا... دابا أنا أشنو غااادي ندير فقراايتي وحيااتي ومستقبلي! صاافي أنا ضعععت ضعععت.

ندى: علاش كتقولي ضعتي ونتي معانا ، ما تخافيش إلى هوما ما بغاوكش حنا غادي نبغوك .

مهرة [دورات عينيها ونطقات بإشمئزاز بعدما حيدات ليها يدها على شعرها ودفعتها حتى جات طايحة للأرض] : راااه داااكشي علاااش أنا كنقول ضعتتت البرهوشه...وااااش وووحدة بحااالي أنا حيااااتها كلها دوزتها غير بين الزييين ولمدووون ، فأخر أيااامها تعيش مع وحدة فيها النمش فوجهها وصفره بحالك نتي.... أو واحد بحال داك لمييخالي ديال باك لي عينيه خارجين وكيخلعوا ،لحيتوا لي يمكن ما محسنها من عام الفيل ،وهاادشي بلا ما ندوي على دييك جداك لي كتشبه لكهنة معبد آمون ،وهاد الخربه لي ما فيهاش حتى أبسط وسائل العيش مـ

  قاطع كلامها طارق لي كان واقف وراها ،هاز فيدو حوايجها لي كان داهم فداك الليل ولبرد وسميقلي لجنب الواد صبنهم ليها.

طارق [بنبرة هادئة وباردة وعينيه على بنتو لي عينيها دمعوا] : ندى ، سيري أبنتي عاوني مي.

ندى [ناضت وقفات ونطقات بصوت باكي] : واش سمعتيها أبابا أشنو قالت علينا![شافتو تبسم وهي تبلع ريقها ،حنات راسها وتمات داخلة] و و واخا أبابا.

   
   مهرة مسحات دموعها وناضت حتى هي وقفات ،بغات تمشي بحالها تدخل وهو يوقفها طارق من لي نطق.

طارق: ما كانش عليك تدوي بديك الطريقة قدام بنت صغيرة آ مهرة.

مهرة [بلا ما تشوف فيه نطقات بحدة ] : مااا تنطقش سمييتي لي تذبحوا عليها الجمال بفمك الخااانز بالزبل الميخالي...وندوي كيف مااا بغيت ،ولي ما عجبوا حال يدير لقطن لودنوا باش ما يسمعش كلامي.

طارق [تبع ليها العين حتى دخلات ، طرطق عنقوا ونطق بصوت خافت] : كندوش يومياً ، وفمي ديما فيه عرق سوس ، وقالت عليه خانز! [تنهد] ياربي صبرني عليها يا ربي.

•فالداخل عند لالة ميلودة لي كانت ولدات السيدة لي جات لعندها هي وعݣوزتها وراجلها، غسلات للوليد لي تزاد ولبساتو حويجاتوا ،نقات مو وعطاتها رضعاتو...خلاتها ترد نفسها هي وناسها وخرجات للكوزينة باش تبدا فتوجاد عشاها ... وهي تلقى مهرة داخلة كتجري وكتبكي ،كمشات حواجبها ونطقات.

ميلودة : قبيلة طلات عليا ندى ،ودابا نتي ،ياك والو باس!

مهرة [بحدة] : حيييدي من طريقي ، نتي لي ناااقصاني فهاد الساعة الشارفه [ضربات فيها ومشات سدات عليها فالبيت]

مليودة بقات غير كتدور فعينيها حتى سمعات عكوزة لي جات لعندها تولد نطقات من وراها.

رابحة: دازت علينا بعودها مع الظهر ، كولشي سول عليها ، وسبحان الله من الشوفة لوله قلت باينة طارق تزوج ، [اضافت بنبرة ساخرة] وشتي كون غا درتي النية وعلمتينا من قبل ،كوراه ربي سخر ليك فيها وكون گاع ما تضرب فيك وتسبك وتزيد.

مليودة [ببرودة] : مرات ولدك تفكات ، هزوها وسيروا قبل لا يزيد يسواد ظلام الليل والطريق عليكم توعار.

رابحة: كتجري علينا آ ميلودة ياكي!

ميلودة: درت فيكم غا الخير ما ترجعوهش عليا بـ بومزوي.

رابحة [بغل] : غدا خبار ولدك نوصلها لدار منانة وبنتها ...وخليها نيت تجي تقلب عليكم هاد لخربة باش تتعلمي تجري عليا.

ميلودة: ما راني خايفة لا منك ولا من غيرك ، خوفي من ربي وحدوا ، وكون ما هو سبحانه كون واهلي سمعتك لي ما يتسمع [نهضات فيها حتى طارت من بلاصتها] يلااه جمعي قلوعك.