عروسة الميخالي [بالدارجة المغربية 🔞♨️مـكـتـمـلـه]

PART 10

عـروسـة الـميـخـالـي"

             "شـمـس الـضـحى"

     "لن أنسىٰ بشاعة ما أشعرتني به ."

    _______________PART 10_____________

واقفة فالبيت لي ولى بيتها ، كتطوي وكتنظم فحوايجها لي كانو مجموعين فالشانطات والصيكان... حتى تحل لباب وتم داخل طارق لعندها والصينية ديال لفطور بين يديه ، حاط فيها كاس ديال أتاي لي سخن وشوية ديال لگرون كان بايت وطبيسبل صغير فيه شوية ديال زيت الزيتون الحرة.

طارق [سد لباب بكتفوا] : حطي داكشي من يديك وفطري هو الأول.

مهرة [رمات ما فيدها ومشات جلسات على طرف الناموسية ، دارت رجل على رجل ونطقات] : مشات ديك الصفريطه ولا باقي! ما حملتهاش أنا وما دخلاتش ليا لخاطري.

طارق [جلس فجنبها ،حط الصينية على واحد لكرسي قدامها ،فيكسا عينيه فعينيها ونطق بعدما شابك صباع يديه] : ما بغيتش ندوي معاك ولا نعاكسك كيف درتي نتي قدام نسرين باش ما تشديش فخطارك ويبقى فيك لحال ،[سكت لثواني وأضاف] شوفي آ مهرة ،أنا راني ماشي ولد صغير كيف ما نتي باغية ،لا... أنا راجل كبير ،قريب نكمل 46 عام إلى ما نسيتش ، يعني راه الشرف بدا كياكل فيا ، وكياكل فالصبر والخاطر لي عندي ، لسانك كلاموا سام...مرة ندوزوا ليك بجغيمه دالما وعشرة لا مـ...

  مهرة [قاطعتوا بنرفزة] : زعما اشنوو! إلى قلت ولا درت شي حاجة ما عجباتكش غادي تعصيني عليها ياكا! هادشي لي بغيتي الميخالي تقصد!

طارق [ناض وقف] : نقدر نبان ليك ضريف ولكن الى تعصبت آ مهرة كنولي واحد آخر... وجهي الثاني ما غاديش يعجبك.

مهرة [بنبرة ساخرة] : وهاذ لوجه لي عند بالك نتا زوين راه كيعيفني حاشا خليقة ربي بقى غير الثاني...لا أعمي غا خليه عندك ، ما توريني ما نوريك .

طارق [ببرودة]: عمتك لي كانت مسخنة كتافك تبرات فيك ، وحتى داركم قلت ليهم واش تبغوا بنتكم ترجع ليكم نقز خوك وقال" إلى رجعات غادي ترجع ،ولكن في كفن".. يعني ملقاك معايا ومع مي وبنتي لا غير [سكت لوهلة وأضاف] غالباً غادي تبقاي ديما معانا ، داكشي علاش عفاك كوني تسمعي أو ولي تسكتي شوية وتعرفي أشنو كتخرجي مع فمك.

مهرة: غادي نزيد معاك شوية غادي تدير ليا السناسل.

طارق: حاشا لله ، حتى تكوني بهيمة عاد نديرها ليك... أنا كندوي معاك غير على مصلاحتك وصافي [تم خارج] فطري وسيري للكوزينة عجني معاك لمي ،راها عيات.

مهرة [كمشات حواجبها] : ما قالوش ليا راني خدامة عندكم.

طارق [وقف عند لباب وشاف فيها بنص عين] : داويين عليه زعما.

مهرة [بدات كتجغم فكويسها] : سير شوف ليها شي خدامة حيت أنا دابا راه مراتك [اضافت بصوت خافت وصل لعندو] واخا بزاف على واحد بحالك تكون عندوا دياموندة بحالي أنا.

طارق هزهز براسوا ومشا بحالو خرج ، في حين مهرة بقات وراه مغددة ، خبطات الكاس وناضت وقفات حلات الشانطات لي كان بقاو ليها ، لقات فوحدة فيهم لبيسي ديالها بكل ما ليه ، وسعات البؤبؤ ديال عينيها بقوة الفرحة ونطقات وهي كتشعل فيه.

مهرة: ظنيت غادي نبقى هنا بلا بيك أحبيبي.

•طارق بعدما خرج من عند مهرة داز لعند مو ،لقاها واقفة على شغلها فالكوزينة ، حيد ليها القصرية من بين يديها ونطق.

طارق: بلا ما تعجني أنا غادي نعجن ليك أمي.

ميلودة: ما كاين لاش أوليدي غا خليني ،ماشي جوج دلكات لي غادي يغلبوني.

طارق [حط القصرية فوق الأرض وتنهد] : قلت ليها تعجن قالت ليا ماشي خدامة عندكم...شوفي الهدرة كي دايرة.

ندى [وهي مقربة لعندوا] : ضربها أبابا وهرسها من عنقها حتى هي كيف ما كنتي درتي ليا داك النهار من لي قلتي ليا ما نخرجش نلعب عند لباب وخرجت.

طارق [ميل راسوا ونطق بنبرة جافة وباردة] : غادي نعاود نهرسك نتي إلى ما مشيتيش لبيتك وتركنتي فيه وسكتي !

ندى بلعات ريقها وتمات راجعة اللور بخطوات بطيئة حتى خرجات فمهرة لي كانت جات غير بغات تسولوا واش كاين لويفي حتى صدقات سامعة كلامهم ،حطات يدها على راس ندى لي كانت كتبكي في صمت ونطقات بصوت خافت.

مهرة: و و واش بصح فات هرس ليك عنقك غير حيت خرجتي لعبتي!

ندى يلاه بغات تنطق وهو يقاطعها طارق.

طارق [ببرودة] : ندى!

#يتبع