عروسة الميخالي [بالدارجة المغربية 🔞♨️مـكـتـمـلـه]

PART 29

عـروسـة الـميـخـالـي"

             "شـمـس الـضـحى"

     "لن أنسىٰ بشاعة ما أشعرتني به ."

    _______________PART 29_____________

•واقفه قدام قصر بوها ، شاده لولد عمتها لي كيترعد بالخوف فيدوا ، ومفيكسا عينيها فعينين خوها ومها.

مهرة: قلت ليكم بغيت بابا لي يخرج لعندي ، ماشي نتوما.

سهيله: لاش جايبه معاك هاد الرعواني الديوثي هااه ، واش هاذا لي ما خلا وحدة من بنات لمدينه ما دار عليهم حتى هو يشدو فيه الناس.

منير [خرج عينيه ، طلق من مهرة ونطق بحده] : هيييييه جمعي راسك آ مرات خالي ولا ما غادي يعجبك حال.

جواد [وهو مخيب سيفتو] : آش غادي تدير ليها بالسلامه! ومالها كذبات عليك ، ديوثي وبو بنات ، راك من صغرك معروف.

منير [بنرفزة] : الشبكه عايرت الغربال ، نتا لي مزوج ربعه ولا ما نعرف تلاثه مطفروا!

جواد [بنبره ساخره] : راك قلتيها ، مزوج ، ماشي قويويد مصاحب.

مهرة[ضروها فراسها]: وصاااافي ، سكتوا الله اسكت ليكم الحسن كاملين ، [شافت فمنير] سكت شوية ، وحتارم خويا وماما عافاك.

منير: واش كتجي منهم ولا كيفاش![تبسم ونطق وهو كيهزهز براسوا] عرفتي أشنو ، خليك مع هاد القوم الهيماجي وأنا غادي نمشي بحالي من هنا ، جيت من لمدينه لهاد القاره على قبلك ، كليت لعصا على قبلك ،سمعت الهدره على قبلك ، ولكن سمحي ليا والله ما نزيد دقيقه هنا ، بقاي نتي هنا حتى تاخدي طلاقك من داك لبسيكوباط وتبعيني ، راكي عارفه دارنا فين جات.

قال كلاموا وبلا ما يسمع ليها ،حنا راسوا ومشا خرج لطريق بوحدو ، مهرة تبعات ليه العين ، زفرات بضيق ، دارت لمها وخوها ، طلعاتهم وهبطاتهم ، زاحتهم من طريقها ومشات دخلات للداخل كتجري ،نيشان لصالون فين باها كان جالس ، داير رجل على رجل ، شاد تسبيحوا بين يديه وساهي فالتلفازه ، سمع غوتها وصداعها ، أو واخا هكاك ما كلفش على راسوا يخرج يشوفها ويطل عليها ، وهادشي غا من الشوفة فيه مهرة عرفاتوا ،جلسات قدامو ، حنات عينيها لي دمعوا للأرض ونطقات بصوت خافت.

مهرة: أنا من الأول ما كنتش باغيه ، داكشي علاش بلا ما تلومني آ بابا عفاك.

سي عيسى [ببرودة وبلا ما يشوف فيها] : هزيت يدي وسلهامي وحمايتي عليك ، [ناض وقف وتم طالع لبيتوا] غير هو ، من ليوم ، الشيخ عندوا ولد واحد ، جواد ولي ذكر غيروا كذاب.

•العشيه تعاشات ، الدنيا كيف ديما ساقله وهادئة ، الشتا بدات ثاني ، الدقان فالباب ، ما عندهم لي يدق عليهم ، طارق فبيتوا جالس ، ندى ناعسه ، بقات غا هي باركه فالكوزينة كتدفي يديها وكتخمم ، سمعات لغوات ، عرفات مولات الصوت ، حلات عليها لباب ونطقات.

ميلودة: خبار الخير أ منانة!

منانة[ وعينيها خارجين] : واااا خووووك سمعني داااوية على الطفلة لي عندكم ، وشد فبنيتي شدة لعمى فالظلمه ، شبببيع فيها عصا ، كاليت عليها وهربتها ، ودابا ما عرفتها يااا خيتي فين مشات ليا كبدتي.

ميلودة [ببرودة] : سيري بحالك من هنا ، بنتك سوقها هاداك ، راها كبيرة ، سيري غا لدار ختك فالطالوع غادي تلقايها تم كيف ديما ، وخويا لا جا يسول على الطفله ، ما غادي يدي مني لا حق لا باطل ، ولي فجهدوا يجريه ، أنا نهار رجعت كبدتك من الخدمه فالمدينة وكرشها حتى لفمها ، أو ولدتها عندي هنا فداري ، حلفتني على بنتها ، وأنا تم قلدتها ، بلي رآه عمر البنت ما يعرف بخبارها بوها من عندي ،واعدت أو وفييت ، وحتى دابا أنا شاده على كلامي ، ندى بنتي وبنت ولدي طارق ، ولي قال لا ، نرفسوا برجليا ، واخا يكون ولد مي وبا.

منانه يلاه بغات تنطق وهو يقاطعها طارق لي نطق من ورا مو.

طارق: صونات عليا غير دابا نسرين ، راها طلعات للمدينه عند خالتها ، قالت ليك ما تخافيش عليها ، يبرد باها وغادي ترجع.

منانة [طاحت للأرض على ركابيها] : الله ياااا مولاي بنتي مشااات لياااا الله.

ميلودة [واخا هكاك بقات فيها ، گعدتها وتمات مدخلاها ، هزات عينيها فولدها لي كان مبدل حوايجوا ، عقدات حواجبها ونطقات] : فين أوليدي غادي!

طارق [تبسم ليها] : نجيب دوره ونرجع ، على ربي بيها يبرد قلبي ويهدا بالي أمي.

•كان لطارق ما أراد....فديك الليلة ما رجع حتى أذن لفجر ، لقى مو وندى فايقين كيتسناوه ، ما دوا ما تكلم معاهم ، حدوا شاف فيهم ومشا سد عليه فبيتوا ، وهاديك هي سدتوا....وما خرج من لبيت لي ولى كيف غاروا على سيمانه...وكون ما الدقان فالباب ومو ما كايناش لا هي لا بنتو ما كانش غادي يخرج منو ،حل وهو يلقى لفاكتور لي عهدوا بيه من سنين طويله.

طارق [وهو كيحك فلحيتو لي طوالت] : خير إن شاء الله!

لفاكتور [مد ليه واحد لبريه] : كان خاص يجيبها ليك العون القضائي الساعه ما قدش ، راك عارف أبا طارق الطريق خايبه.

طارق [وعينيه كيقراو مضمون لبريه] : الله إحفظك أسي عزيز.

عزيز يلاه بغا ينطق وهو يسد عليه طارق الباب فوجهوا....رجع لبيتوا ، جلس على حافة السرير ، تبسم بسخرية ونطق بصوت خافت.

طارق: زربانه على الطلاق كثر من لقياس آ مهرة [شرگ ورقة الاستدعاء ورجع تكا] ها حنا غادي نطلقوك ، وشوفي ديك الساعة واش غادي يدوم ليك لي بغاك فالحرام من الأول ولا لا.

النهاية غدا ولا بعدوا ، غير نصحح ، حيت واحد الشيخه ما صححات ما حطات 😒🤎