عروسة الميخالي [بالدارجة المغربية 🔞♨️مـكـتـمـلـه]

PART 8

"عـروسـة الـميـخـالـي"

             "شـمـس الـضـحى"

     "لن أنسىٰ بشاعة ما أشعرتني به ."

    _______________PART 8_____________

•ضربات الشميسة الدافيه فعينيها وهي تخسر سيفتها ، تجبدات وتكسلات وهي تنوض ، بدات كتحل فيهم بشوية ونطقات.

مهرة: شحال ما كنحملش هاد الشمس ديال الصباح [بدات كتحك فشعرها] شحال غادي تكون الساعة دابا!

مليودة [من عند السرجم لي تحتوا مباشرة كاينه العشه ديال لرنب [الأرانب]] : لحضاش هادي، لبسي خلاص وخرجي باش تدوشي إلى بغيتي حد الحمام باقي حامي.

مهرة [بحدة وهي مخنزرة فيها] : علاش واقفة تما! وعلاش كتطلي وكتتطفلي عليا! [ضمات يديها لعندها وأضافت] وكون دابا كنت أنا وداك لميخالي كنديروا شي حاجة [علات حاجبها فيها] أشنو! غادي تتفرجي فينا!

ميلودة [ ببرودة] : ماني قليلة لحيا ابنتي ، [تمات غادا بحالها] لبسي وخرجي راه طارق جاب ليك شغلك وحوايجك كاملين من عند دار باك... وغادي نعاود نقول ليك لبسي وستري راسك شوية بديك البيجامة على لقليله غا بين ما تقادي ديالك .

مهرة تبعات ليها العين حتى مشات بحالها ونطقات بعدما هزات البيجامه لي كانت باقه جديده وبتيكيته ديالها ، حيدات ديك الشوميز ولبساتها ، جاتها طويلة بزاف وعريضه ، قلبات عينيها وخرجات...وفطريقها لمراح لقات كل ما كان ليها عند عمتها جاها ، حتى من لمرايا صيفطتها ليها ، لمحات طارق جالس كيلعب مع ندى وهي تقرب لعندوا ونطقات بنبرة سامه.

مهرة: يا كما عطاوك لفلوس وشديتيهم من عندهم الميخالي! إلى بصح [مدات ليه يدها] أرا طلعهم ليا نشوف !

ندى [بحدة بعدما ناضت وقفات] : ما باقيش تقولي لبابا مييخاالي أختي عفاك.

مهرة [حطات يديها على جنابها وخرجات عينيها فيها] : غادي تمشي بحالك تجلسي للأرص البرهوشه ولا غادي نصليها معاك حتى تدوخي [هزات عينيها فطارق لقاتو مضيق عينيه فيها ومبتاسم، حسات بنخصه فقلبها، بلعات ريقها وأضافت] مالك كـ كـ كتشوف فيا! واش ما رضيتيش حتى نتا نقول عليك ميخالي!

طارق [بنبرة هادئة] : بقاي تقوليها حتى لين تشبعي... غير هو الله إرضي عليك بعدي من بنتي شوية.

ميلودة لي كانت فالزريبه كتحلب فالبݣيرات ديالها ، سمعات صوت مهرة وهي تم داخلة عليهم.

ميلودة: آش كاين ، لاش الصوت العالي فعز النهار!

مهرة [بنبرة ساخرة] : جيبي التيليكوموند ونقصي صوتنا ، [تبسمات وأضافت] آه لا ، نسيت نتوما ما عندكمش التلفازة.

ميلودة [حطات السطل لي عامر حليب ،ونطقات وهي كتسمح فيديها بطابيلة ديالها] : فايقة معطلة وزايداها بالهدرة! [شافت فندى لقاتها كتبكي] سيري نكسي زريبة البقر من الروث سيري.

مهرة [شافت فين كتشوف]  : يلاه المنمشه سيري شطبي على قلبك للحِيوان بحالك سيري.

ميلودة [رجعات عينيها لمهرة] : كنت داوية معاك نتي ماشي مع ندى [اضافت ببرودة] عندك ساعة بالحساب ، إلا ما ساليتيش فيها غادي نسد عليك لباب ونخليك منك لشتا لي راها جاية فالطريق.

مهرة [خرجات عينيها] : عااودي أشنو قلتي!

ميلودة: ما كتتعاود غير الصلاة والسلام على النبي..[اضافت بجفاء] غادي تمشي بوحدك ولا نديك!

•بعدما بقات كتطلع وتهبط فالنفس قدامهم وكتنطق بكلام وسبان مخلط ما بين الداريجه والانجليزيه شافت بلي حتى حاجة ما غادي تتحرك فيهم ، حنات راسها وخرجات لزريبة لي مع دخلات ليها ضربات فيها ريحة الروث حتى تقلبات، هزات واحد الشطابة ديال الدوم كانت تما كبيرة ونطقات.

مهرة [بنرفزة] : شوف على حالة يا سيدي يا ربي وليت فيها شوف [بدات كتشطب وعينيها مدمعين] واش يرضيك وحدة بحالي أنا مولفة بالخدم والحشم تتلى بيها الأيام وتولي كتشبط زبل البقر حاشا وجهك لكريم!

طارق [وهو مسند على لباب ديال لكوري] : دوزي خرجي [شافها قفزات، كمش حواجبو وأضاف] حوايجك كثار بزاف ، يلاه يلاه تقاديهم وتشوفي لي غادي تصلح من لي لا.

مهرة [بحدة بعدما شيرات عليه بالشطابه ، وكون ما لقاش ليها يدو كون خسرات ليه لوجه] : كيفاش لي تصلح من لي لا الميخالي!

طارق [بنبرة هادئة]: الله اهديك ،راه سميتي طارق ماشي الميخالي...وقصدت بكلامي الى بغيتي مي تكون زوينة معاك ما تلبسيش قدامها لا هي لا ندى لحوايج لي شوية [سكت لوهلة وأضاف] راك عارفة.

مهرة [وهي مقربة لعندو] : نلبس لي بغييت الميخالي ، لا نتا لا ديك مك ولا بنتك ما سوقكم فيا....[ضربات فيه وتمات مبعدة عليه باش تدخل لدار وهي حانية راسها..وما جات فين تهزوا حتى خرجات فشي حد، شدات فراسها ونطقات وهي كتطلع فالأنثى لي كانت نسخة طبق الأصل عن ندى] فين كانوا عينيك باش خرجتي فيا!

نسرين [بنرفزة] : واش نتي هي بنت داك الحاكم لي تزوج بيها طارق ياااكي!