🗡🥀#رِيْبَة_جُورِي🥀🗡

حلقة 2

الحلقة الثانية
#جوري _تحكي
#بعد_خمسة_سنين

" ياسميييييين "
حليت عينيا على اسمها الي ضرب في راسي.. صوتي لتو بقى ينادي علاها في أحلامي.. خمسة سنين وانا نجري و نصيح في نومي بش نلقاها.. اما كل مرة كنت نلمحها فيها نرجع نضيعهااا.. و كان وصلت ولقيتها وقتها ندخل في كابوس اخر.. و باب لخروج يزيد يبعد علياا.. بقيت نغزر للحيط الي كان مقابلني.. حيط ابيض مافيه حتى شي كل مانثبت و نركز فيه نحس روحي نتوه و مانجمش نخرج.. اصلا البيت هاذي بكلها متاهة.. خمسة سنين و انا عايشة فيهاا.. توحشت الألوان و التفاصيل.. توحشت الشارع و الهواء.. هنا كل شي لون واحد.. من لحيوط للفرش للروبة الي لابستها.. الي صارت زيي الرسمي في حياتي.. هزيت روحي شوي.. عديت بيديا الزوز على وجهي و طلعتهم لشعري.. خذيت نفس و قمت من الفرش.. بقيت ندور مش عارفة شنوة نعمل .. وقت فتحان الباب مازال عليه بكري.. قربت لشباك و قعدت عالحرف.. حطيت يديا عالبلار و بقيت نعدي في صبعي عليه.. مانيش عارفة فاش نكتب بالضبط.. حاسة عقلي مشوش لدرجة اني مش واعية بافعالي.. سمعت الباب الي تحل ورايااا.. دورت راسي وين ريتها هي كيف كل صباح.. اول وحدة نشوفهااا و نصبح علاهاا.. خمسة سنين وهي لاهية بياا.. شفتها كيف قربتلي اكثر تبسمتلي تحكي
سارة :" صباح الخير جوري.. كيفاه تحس في روحك اليوم ؟"
قمت من الحرف ووقفت قدامها هزيت بكتافي نحكي
انا :" كالعادة.. ليوم قمت راسي يوجع مش فاهمة علاه "
سارة :" رقدت مليح البارح ؟ "
انا :" اي.. من وقت عطيتني الدواء مافقت بشي "
سارة :" باهي ايجا معايا اشرب دواك تو ترتاح.. ساعة قلي تحب تفطر هناا و لا تهبط اللوطة "
قربتلها دورت بعينيا علاها نحكي
انا :" سارة.. امان مانحبش دواء.. اليوم قمت مرتاحة والله.. خليني مانحبش نرجع نرقد نحب نبقى فايقة شوي ليوم.. كل مانرقد نزيد نتعب كيف نرجع نشوفها "
سارة :" مانجمش جوري.. كان ماتاخذش دواك توليلي مشكلة وراس اختي.. وزيد الدكتور موصي علييك.. ميسالش اشرب و حاول انك تشد روحك.. تعرف الدواء بش يعاونك ترتاح "
بعدت علاها وقعدت على حرف السرير هبطت دمعة من عيني نحكي
انا :" خمسة سنين نشرب فيه و مارتحتش.. بالعكس ساعات هو يزيد على مابياا.. كل مانرقد و نراها انا نزيد نتعب والله.. كل يوم نقوم مفجوعة و خايفة من خيالها وتصويرتها وصوتهاا "
قعدت بجنبي و شدتني من يدي تحكي
سارة :" ماتبكيش تو راسك يوجعك اكثر.. باهي شوف انت اشرب دواك و اهبط افطر اللوطة و بعد نخرجو لجنينة .. يزيك من البيت.. هكاكا تو ماترقدش "
غزرتلها مذبلة عينيا فيهاا نحكي
انا :" اما.. اما انا.. انا نخاف كيف نهبط نفطر غادي.. نخاف منهم.. انا.. انا مش كيفهم والله.. انا مش هكاكا سارة "
حطت يداها على خدي ومسحتلي دمعتي الي نزلت تحكي
سارة :" نعرف يا روحي.. انت مش كيفهم والله نعرف .. شوف تو انا نهبط و نقعد معاك غادي.. تو نبقاو في طاولة متطرفة.. شقولك ؟ غير امسح دموعك تعرفني مانحملش نشوفك تبكي "
انا :" باهي كي هكا ميسالش تو نمشي.. ساعة قلي الدكتور جاء ؟"
ريتها كيف قامت من حذايا و حلت الدواء تحكي
سارة :" لا مازال.. بش يجي مخر شوي اليوم.. أيا حل فمك جوري و اشرب "
هزيتلها براسي باهي وعملت كيف ماقتلي.. شربت الدواء و قمت نحكي
انا :" نحب نبدل الروبة هاذي.. عندي نهارين بيها "
سارة :" اي نعرف.. البارح بعثتلك مع الفام دو ميناج روبة اخرى وحاجات تستحقهم.. برا انت هاني انا هنا نستنى فيك "
انا :" عيشك سارة..كان مش انت ماكنتش نعرف شنوة نعمل "
تبسمتلي من غير حتى كلمة..عطيتها بظهري ودخلت لتوالات بش نبدل دبشي و نهبط نفطر معاهاا .. اول ما دخلت جمدت في بلاصتي .. حسيت النفس تسكر علياا و قلبي خظ من التصويرة الي ريتها قدامي .. كبست عالبونية متاعي حتى ظوافري تغرسو في لحمي .. رسيت على سنيااا و حليت عينيا على وسعهم وين حسيت بدني صار كيف الحطبة مانجمتش نقدم و لا نرجع نوخر .. حليت فمي و بقيت نتنفس بالقوي وراء بعضو .. دموعي هبطو و صوتي بدا يخرج مني مخنوق.. نحكي
انا :" ل..لا لااااا .. شكون عمل هكااااا "
بقيت واقفة في بلاصتي و نصيييح
انا :" لااااااا مانحبش نراااك .. مانحبششش  "
حسيت بساره كيف دخلت وقفت قدامي شدتني من وجهي تحكي
سارة :" جووري.. جوري ارخف روحك و تنفس.. اهدااا جوري فيييق و اغزرلي "
انا :" ش..شكون..شكون عراهاا..شكووون؟ علاااه تعملووو هكاا كل مرة...علااااااه ؟"
ريتها كيف غزرت وراها و رجعت غزرتلي تحكي
سارة :"يمكن الفام دو ميناج.. تو نغطيها انااا استني "
خليتها واقفة و رجعت للبيت نجري.. خذيت الملحفة من فوق الفرش و رجعت لتوالات.. قربت لرخامة و طلعت فوقها ف لحظة..عديت بعينيا عالمراياا وصورتي المعكوسة الي كانت فيهاا.. لحظتها هبطو دموعي اكثر نحكي
انا :" مانحبش نرااا وجههك.. نكرهك افهممم الي اناا نكرهك.. اخررر مرة عيني تتحط في عينك.. نكرررهك نكرهههههك "
هزيت الملحفة و غطيت المرايااا بكلهااا.. لين تحجبت الرؤيا.. حسيت بيد سارة كيف شدتني من تالي تحكي
سارة :" يزي جوري.. كهو اهدااا وفاات ماتخافش "
هبطت من فوق الرخامة و ترميت ف حضنهاا نحكي
انا :" امان.. امان قلهم معادش يعريوهااا.. امان كيف نشوف لمرايااا نخاف و.. و ندخل بعضي.. امان سارة اماااان "
بقات تمسحلي على شعري و ظهري تحكي
سارة :" باهي يا روحي.. انا تو نوصيهم و معادش نخلي حد يدخل هنااا كان انا.. باهي هكاا ؟ المهم انت تنفس و ارتاح قبل مايشوفو حالتك و يزرقولك وقتها تو ترقد "
بعدت علاها و عديت بيديا على وجهي و بقيت نرد في النفس مرة و اثنين .. حاولت نهدي روحي بالشوي بالشوي بش مايزرقوليش كيف العادة .. رجعت لسبالة و بقيت نغسل في وجهي.. سمعتها تحكي
سارة :" أيا حضر روحك فيسع عزيزتي هاني لبرا انا "
انا :" باهي "
اول ماريتها خرجت وسكرت الباب..نحيت الروبة من فوقي و تعريت.. بقيت نغزر لبدني كيفاه صار اماكن الزرارق واضحة ف بدنيي .. عمري لاتخيلت حياتي بش تتقلب هكااا ف ليلة ونهار ونوصل للمرحلة هاذي.. خذيت الروبة لخرى فيسع لبستها مشطت شعري و خرجت .. قربتلها نحكي
انا :" انا حاضرة "
تبسمتلي تحكي
سارة :" محلاك جوري.. غير ناقصتك حاجة "
قربتلي و حطت يداها على وجهي و رسمتلي بسمة من شفايفي تحكي
سارة :" ناقصتك الضحكة المزيانة هاذي "
بقيت نغزرلها ساكتة ماعرفتش شنقول.. خاطر هي ماتعرفش انو برشة حاجات صارو ناقصيني غيرها.. برشة حاجات انا فقدتهم.. حاجات مشاو و خذاو الضحكة هاذي معاهم.. خذيت نفس نحكي
انا :" جعت.. خلينا نمشيو "
شدتني من مرفقي تحكي
سارة :" اي هيااا "
خرجنا من البيت .. اول ما خرجت حسيت بالخوف سرا في بدني .. الكلولار كان طووويل و الضو فيه خافت .. لبيوت كانت ياسر و البيبان مسكرة .. كل بيت هنااا وراها حكاية .. ووراها صوت مختلف عالبيت لخرى.. بقيت شادة في سارة و نمشي مهبطة راسي .. مانحبش نشوف حتى حد .. رغم اني موجودة معاهم في نفس لبلاصة اما انا مش كيفهم.. مهما الشي الي صار انا مستحيل نكون بلحق هكاا..
اول ما هبطنا دخلنا لقاعة كانت كبيرة كلها طاولات..و كل طاولة علاها مجموعة.. و كل مجموعة معاهم فرد يساعدهم و يتحكم فيهم زادة..هنااا ماتنجمش تتوقع شنوة ينجم يصير.. الهدوء و الصمت ينجمو في لحظة يتقلبو لصراخ و فوضى.. قدمت معاها وين يسربيو في الماكلة.. وقفت قدام الشاف ملالي الطبق متاعي و تبعت سارة لطاولة..طاولة كانت متطرفة بعيدة على الكل و بجنبي الشباك.. ريتها كيف قعدت مقابلتني تحكي
سارة :" أيا افطر مليح.. بش نخرجو لجنينة بعد و تقابل الدكتور "
هزيت المغرفة كليت شوي و رجعت غزرتلها نحكي
انا :" جاااد..قصدي الدكتور علاه جاي اليوم مخر ؟ مش عوايدو "
سارة :" مانعرفش والله يا جوري..قال عندو ما يعمل .. انت مستحقتلو ؟ تحب نكلمهولك ؟"
هزيتلها براسي لا من غير حتى كلمة وطبست راسي ناكل..هزيت عينيا شوي وعديتهم عالبلاصة..خذيت نفس محاولة مني بش نهدي روحي و نخمد الخوف الي سرا في بدني .. رجعت هزيت راسي على صوت يحكي
### " سارة.. لازمك تمشي تشوف لمريضة الي في غرفة 109 دكتور اشرف طلب منك انت تشوفها "
شفتها كيف قامت و غزرتلي تحكي
سارة :" جوري.. شوي و نرجعلك مانبطاش "
انا :" بش تخليني هنااا؟؟..سارة امان مانحبش نبقى هناا وحدي امان "
سارة :" ماتخافش.. حد مايكلمك والله.. كمل فطورك و تو نرجعلك فيسع بش نخرجو "
تنهدت و هزيتلها براسي باهي.. اول ما مشات و بعدت علياا .. تلكمت على روحي و هبطت راسي و عينيا .. بقيت ناكل فيسع بش اول ماتجي سارة نقوم من هنااا و نخرج .. هكاكا وحسيت بخيال وقف مقابلني .. غمضت عينيا و رجعت حليتهم .. مانجمتش نهز راسي و نواجه الشخص الي كان قدامي .. حسيت قلبي خظ بالقوي على صوت ضحكو الي كان غريب وكيفاه كان يضرب ف الطاولة ب ساقيه ب طريقة مرعبة.. لحظتها حسيت بالخوف مكن فيااا اكثر.. تمنيت كان جات عندي قدرة و نهرب منو و من لبلاصة لغريبة الي غرقت فيهاا وحدي....