🗡🥀#رِيْبَة_جُورِي🥀🗡

حلقة 15

حلقة 15
#جوري_تحكي
حليت الدريسينغ ودورت بعينيا عالروب الي كانو معلقين قدامي.. مديت يدي شوي وعديتها علاهم.. بقيت نعدي بالوحدة بالوحدة مش عارفة اناهي الي نختار فيهم.. تبسمت من غير ما نشعر من وراء الأحساس الي راودني فجأة.. للحظة حسيت روحي رجعت لخمسة سنين لتالي.. نفس الوقفة ونفس الحيرة إلى كنت نعيشها كل ليلة قبل ما نخرج نسهر.. فقت من سرحتي على صوت سارة تحكي
سارة :" يااا هاذم لكل روب عندك ؟؟؟ محلاهم كل وحدة تنسيك ف لخرى "
ضحكت على جنب وغزرتلها نحكي
انا :" والله كانو عندي اكثر من هكاا مش عارفة وين مشاو.. قبل كنت مغرومة بالمظاهر ياسر "
سارة :" لحق يتقال.. عندك ذوق مزيان.. امان شوف هاذي محلاهاا "
ريتها كيف جبدت روبة حمراء و حطتها على بدنهاا ورجعت تحكي
سارة :" هاذي تهبل.. شقولك كان تلبسها هي ؟؟"
حطيت قصتي وراء وذنياا وهزيتلها براسي لا نحكي
انا :" لا مانحبش نلبس هاذي "
سارة :" علاش ؟؟ ساعة محلاهاا "
انا :" نعرف محلاهاا سارة و صدقني نحب نلبسها اما مانجمش "
عقدت بحواجبها مستغربة تحكي
سارة :" علاش ؟ "
غمضت عينيا بالقوي و رجعت حليتهم نحكي
انا :" سارة امان شوف الروبة كيفاه عريانة من ظهرها.. مانجمش نلبسها "
سارة :" مفهمتكش.. يعني معادش تلبس العريان ؟"
نفخت بالقوي نحكي
انا :" سارة ياخي نسيت لي تراس الي ف ظهري.. مانجمش نلبس هكاكا.. مانحب حد يرا بدني كيفاه صار "
حطت يداها على فمهاا و غزرتلي تحكي
سارة :" يااا سامحني والله نسيت لحكاية.. ميسالش تو نختارو روبة اخرى "
انا :" باهي هياا اختار معاياا.. غير هكاا الروبة الي ف يديك صارت متاعك.. مبروك على اختى "
سارة :" لا مانجمش نقبلهاا.. باين غالية برشة.. مانجمش ناخذها "
شديتها من يداها وكبست علاهاا نحكي
انا:" صدقني مفما شي غالي عليك.. غير هكا هاني قتلك حاجات ك هكا انا معادش بش نلبسهم.. و زيد احنا صرنا خوات حوايجي و حوايجك واحد.. مش هكاا "
تبسمتلي تحكي
سارة :" اكيد خوات.. عيشك جوري "
انا :" هياا ايجا اختار معاياا.. و ماتنساش انت بش تقدلي شعري و تمكيجلي.. بش تكون انت مرايتي "
ضحكت وقربتلي ووقفت بجنبي وين بقينا نغزرو لدريسينغ.. مديت يدي وجبدت الروبة الي حسيتها مناسبة لياا و للحفلة هاذي.. تلفتت لسارة نحكي
انا :" اخترت هاذي.. شقولك فيها؟"
سارة :" اي محلاهاا.. البسها هي "
انا :" باهي مالا تفاهمناا.. هاني بش نبدأ لبس و نكملو تحضير مع بعضنا "
سارة :" باهي نخليك مالا "
عطاتني بظهرها خرجت و سكرت الباب وراهاا.. حطيت الروبة على جنب ونحيت دبشي.. رجعت خذيتها وبقيت نحاول نلبس فيها وحدي.. ماحبيتش نخرج لسارة تساعدني.. خاطر مانحب حد يرا بدني كيفاه صار.. اول ماكملت لبست نزلت عينيا وعديتهم عالروبة النوار الطويلة الي كانت سانتري على بدني.. هزيت يدي وعديت بصوابعي عالكول v متاعها وين صدري كان ظاهر شوي.. نزلتهم للحزام الفضي الي كان محطوط على خصري.. فرد وقت غزرت للفونت الطويلة الي مخليا شطر فخذي يبان.. خذيت نفس طويل وقدمت ناحية الباب.. حليتو ورجعت للبيت.. ريتها كيف هزت راسهاا معاياا.. حلت عيناها فيا وضحكت تحكي
سارة :" يااا جوري محلاك والله.. تهبل الروبة عليك "
عديت بلساني على شفايفي نحكي
انا :" والله هذا بالضبط شنوة كانو يقولولي قبل.. كل حاجة نلبسها كانت تخرج علياا و تزيد تحلى "
قرصتني من خدي و تبسمت تحكي
سارة :" يا عيني عالغرور "
ضحكت نحكي
انا :" هذا ما يتسمى شي..انت ماريتنيش قبل.. كنت مغرورة اكثر من هكااا.. وعالظاهر من الليلة بش نرجع نتغر "
سارة:" ههه لحق لازمك.. طلعت تهبل فيها "
انا :" عيشك سارورتي.. هياا خلينا نكملو..قريب الوقت "
سارة :" اي قريب.. اصلا كنت نطل من البلكونة.. الطريق مليان كراهب.. عالظاهر الضيوف وصلو "
هزيتلها براسي باهي وقربت ناحية لكوافوز.. حليت اول درج جبدت منو العلبة الي قابلتني.. قعدت عالكرسي وفتحتها.. مديت يدي وخذيت القلادة منهاا.. هزيتها شوي ودورت بعينيا على سلسلتها الي كانت فينو  وركزتهم عالموتيفة الي كانت ف الوسط على شكل وردة صغيرة.. رمشت عينيا برشة مرات نمنع في دموعي عالنزول.. هزيت راسي على صوت سارة تحكي
سارة :" ياسر محلاهاا القلادة.. بش تلبسها هي ؟؟"
انا :" اي بش نلبسها.. اصلا قبل كنت ديما بيها.. القلادة هاذي احلى و أغلى هدية عندي "
وقفت وراياا وهزتلي شعري حطتو على جنب تحكي
سارة :" ك هكا البسها مالا.. و خليها ديما معادش تنحيها"
حطيتها على رقبتي و قفلتهاا.. تلفتت لسارة تحكي
سارة :" شعرك بش تخليه مفرود على كتافك ؟"
انا :" اي جيست نحب نلم خصلات منو "
سارة :" باهي دقيقة "
رجعت وقفت وراياا وبقات تصففلي ف شعري.. شوي وقت وكملت.. سمعتها كيف تحكي
سارة :" و تو كملنا شعراتك.. نتعداو للمكياج "
دارت ناحيتي ووقفت قدامي.. هزتلي راسي شوي وطبست علياا تحكي
سارة :" مع انو زينك مايستحقش مكياج.. اما خلينا نعملو حاجة خفيفة "
ضحكت نحكي
انا :" ههه باهي تصرف كيف ماتحب..المهم حاول تغطيلي اثر الجروح كان مازالو "
سارة :" لااا معادش فما أثر لجروح متخافش "
هزيتلها براسي باهي من غير حتى كلمة..ريتها كيف خذات تروس المكياج و بدات تمكيجلي.. شوي وقت وسمعتها تحكي
سارة :" يا ريتك كان تشوف روحك يا جوري.. طلعت محلااااك "
قمت من بلاصتي وغزرتلها نحكي
انا :" ميسالش سارورة.. يكفي إلى انت قتلي "
سارة :" تو جاء وقت الطالون و نكونو كملنا "
انا :" اختار انت الطالون على ذوقك.. ف بيت الدريسينغ فما ركن خاص بالطالونات.. اختارلي واحد "
هزتلي براسها باهي و عطاتني بظهرها دخلت للبيت.. لحظتها هزيت يدي وعديتها على وجهي.. غمضت عينيا و حاولت نتخيل روحي من خلال لمساتي.. نزلتهم لشعري الي كان مفرود شوي.. تبسمت من غير مانشعر كيف حسيتو طوال.. رجعت حليتهم على صوت سارة تحكي
سارة :" نظن هذا احلى واحد بش يطلع مع فستانك"
خذيتو من يداها نحكي
انا :"اي محلااه "
سارة :" هيااا البس فيسع و انزل.. معادش بكري سندريلا "
ضحكت على كلمتها و قعدت عالكرسي.. لبست الطالون ورجعت وقفت.. دورت بكلي نحكي
انا :" رايك؟"
سارة:"انا متأكدة انك بش تكون احلى وحدة فالحفلة "
انا :" عيشك سارورة "
ريتها كيف هزت بحاجبهاا وتبسمت على جنب تحكي
سارة:" متحمسه بش نعرف رأي جاد كيف يراك هكا "
قحرتلها نحكي
انا :" سااارة يزي "
سارة :" ياخي شقلت اناا ؟ يعني نحب نعرف شنوة بش تحكيو كهو.. مش قتلي قلك بش يحضر "
انا :" اي قال هكاا و مانعرفش "
سارة :" باهي باهي.. اياا انزل معادش وقت "
انا :" متأكده انك تحب تبقى هناا وحدك ؟ مش بش تقلق ؟؟"
سارة :" لا مانقلقش.. تو نحط فيلم و لا نرقد.. ماتخممش علياا.. المهم انت نحبك تتفرهد و تغير الجو "
انا :" باهي سارورتي.. و انت زادة كان قلقت انزل حذاياا رد بالك تحشم "
سارة :" باهي.. اياا امشي عاد "
هزيتلها براسي باهي من غير حتى كلمة.. خذيت نفس طويل وهزيت روبتي شوي.. عطيتها بظهري وخرجت من البيت.. كنت كل ما ننزل درجة من الدروج كل ما دقات قلبي تقوا اكثر.. بقيت نرد ف النفس بالشوي بالشوي محاولة مني بش نهدى.. و رغم هكا مازلت حاسة بالتوتر ماكني لدرجة حسيت بوجيعة خفيفة ف كرشي.. اول مانزلت وقفت ف بلاصتي نغزر للاضواء الي كانت صادرة من الجنينة و الناس الي كانو مالينهاا.. وخرت بخطواتي لتالي من الخوف الي سيطر علياا فجأة من وراء الأفكار و الذكريات الي حاصروني.. وين لقيت روحي استرجعت اخر ليلة سهرت فيهاا بكامل تفاصيلهاا..حسيت لخيالات و الأصوات رجعو هدو علياا من جديد.. هزيت يدي ولقفت الدمعة الي تحصرت بين جفوني خذيت نفس طوويل وقدمت بخطواتي اكثر.. رغم كل المشاعر الي كنت حاستهم جزء كبير مني ماحبش يهرب.. حب يقدم ويواجه الناس الكل.. حب يتقوى على روحو ويحارب كل الذكريات خاطر ممكن هذا الحل الوحيد الي بش يخليهم يتلاشاو...