🗡🥀#رِيْبَة_جُورِي🥀🗡

حلقة 5

الحلقة الخامسة
#جوري_تحكي

حليت عينيا شوي شوي عالحثلة الي حسيتها لبراا .. هزيت روحي بالسيف من لوجيعة الي بقات ف راسي .. غزرت للشباك لقيت الدنيا مازالت ظلمة و النهار ماطلعش .. خذيت نفس و قمت من بلاصتي بسياسة .. دورت راسي عالبيت مالقيت شي قدامي .. حتى سارة ماجاتش عندي  .. اخر حاجة نتفكرها اني قمت و سكرت الباب بالمفتاح كيف حسيت بالخوف ..
قمت ناحية الباب الي كان مسكر و حليتو بش نشوف شفما .. تلفت يمين و يسار عالكلوار .. السكوت و الفراغ الي كانوا فيه وتروني .. الظلمة الي خلاتني مانشوف شي خنقتني و زادت في خوفي .. رجعت بخطوتي للبيت اما وقفت عالحاجة الي عفست علاهااا .. نزلت عينيا نشوف .. عقدت بحواجبي نغزر لجواب الي كان مرمي عالارض .. مش عارفة شكون حطو و لا حتى كيفاااه وصل لبيتي اصلا .. طبست و مديت يدي الي كانت ترعش و هزيتو .. سكرت الباب و شعلت الاضواء الكل بالك بنورهم خوفي يتلاشى حتى شوي .. حليت الجواب و عديت بعينيا عالسطور الي كانت فيه .. دموعي هبطو مع كل كلمة قريتها .. للحظة توقعت اني مازلت راقدة و نحلم .. هزيت بعينيا عالفرش نلقاه فارغ .. يعني انا فايقة .. انا مانيش نتخيل كالعادة .. خذيت نفس و كبست عالورقة الي كانت ترعش بين يديا .. حليت شفايفي بسيف .. نقرأ بصوت قوي .. بالك هكاكا نفيييق من الكابوس هذا
" ل.. لحقيقة قدام عينيك عندها خمسة سنين.. لوقتاش بش تبقى هاربة ؟ جرب اغزر لروحك في المراياا و تعمق في غزرتك تو تراهاا قدامك من جديد.. تو تشوف الحاجات الي انت عميت روحك علاهم.. و الا خلينا نقولو الحاجات الي انت رميتهم وراك.. ف بالك هكاكا بش ترتاح ؟ بش تنسى و ذنبك يتغفر؟ مش بساهل....
ارجع بسنين لتالي.. توغل في عقلك اكثر و تفكر كل شي صار.. انت مفتاح لحكاية هاذي يا جوري.. السر اجابتو عندك انت.. اخرج و حرر روحك.. خلي الحقيقة تظهر "
بقيت نرد ف نفس وراء بعضو .. كاني كنت نجري على قوة جهدي اما في بلاصتي .. شديت الورقة شقيتها على زوز و طيشتهاا بعيد عليااا .. مشيت نجري لتولات و نحيت الملحفة الي كانت مغطية لمراياا .. هزيت عينيا و بقيت نغزر  لروحي .. هاذي اول مرة من مدة طويلة نتعمق بنظري ف ملامحي .. طلعت يديا وعديتها على وجهي نتحسس فيه .. وجهي و ملامحي تبدلو علياا لدرجة خلاوني معادش نعقل روحي .. حسيت روحي خفت مني و بش نرجع ندخل بعضي مرة اخرى ..  بعدت علاها و رجعت خذيت الملحفة .. طلعت فوق الرخامة و غطيت لمرايا من جديد .. مانحبش نرجع نلمح روحي حتى من بعيييد .. الي نراها قدامي مش انااا .. مش جوري .. الي تظهر في المراياا تصويرة هومااا خلقوهااا فياا .. تصويرة نكرهااا و ناقمة عليهااا ..هبطت وعديت بيديا الزوز على وجهي وتنطرت ناحية الطاولة نجري .. بقيت نلوج و نفرت حتى لقيت دواياا .. حليتو و حطيت كعبات في يديا رميتهم في فمي شربتهم .. مش عارفة قداه شربت بالضبط .. اما كان لازمني نهدا و نترخى .. و هوما بش يعاونوني عالشي هذاا .. رغم اني مانحبش خاطر بش يخليوني نرجع نرقد و نحلم ..رجعت للفرش حطيت الملحفة فوقي و تلكمت على روحي نرعش .. كبست بيديا الزوز على شعري بالقوي لين ظوافري تغرسو في راسي .. غمضت عينيا بالقوي ودموعي هبطو يجريو على خدي .. بقيت نحكي وحدي
انا :" لا لا .. لازمني نخرج.. من هناا .. لازم يعرفو .. الي .. الي انا مانيش .. مهبولة .. انا مش مريضة .. انا .. انا ماعملت .. ماعملتهاش .. مستحيل كان نكون انااا وراء الي صار .. انااا مش هكااا.. انا ما قتل_تهاااش "
حسيت بدني ترخف و اعصابي فشلت .. هبطت يديا و تكيت براسي لتالي .. حسيت بنوم بدا يسيطر عليااا .. اما من وراء خوفي ما نجمتش نغمض عينيا ونرقد .. بقيت شادة روحي بالسيف حتى يطلع الصباح ..
رجعت هزيت راسي على صوت الباب الي تفتح.. بدني رعش اول ما ريتها هي قدامي.. حسيت بالخوف تمكن فيااا اكثر و دقات قلبي قوات.. للحظة الشك راودني ناحيتهااا هي.. حسيت روحي ضعت اكثر وفقدت احساس الامان الي كنت نحسو و هي معايااا....
حضنت روحي اكثر اول ما شفتها قربت مني تحكي
سارة :" جوري شبيك ساهرة لتو ؟؟ و شبيه وجهك احمر هكاا ؟ ياخي كنت تبكي؟؟ "
انا :" اقف غادي .. رد بالك تقرب مني .. ابعد ابعد "
سارة :" جوري شبيك ؟؟ ياخي خايفة مني ؟"
حسيت بدموعي هبطو اكثر من وراء سوالها .. خاطر بالحق كان صحيح .. لأول مرة نخاف من سارة .. وخرت اكثر عالفرش و حطيت يدي قدامها نحكي
انا :" ماتقربليش .. اخرج من بيتي .. مانحب حد فيكم يقربلي قتللللك اخررررج "
سارة :" مانيش خارجة حتى تفهمني شفماا .. جوري تكلم شبيك عيش أختي .. ياخي متعودة تحكي معاياا هكاا و تخاف مني شصارلك ؟"
انا :" انت بعثتها مش هكاا .. انت الوحيدة الي تعرفني هنااا.. انت وهو كهوووو "
شفتها كيف غزرتلي مستغربة..اول ما قربتلي بخطوتين.. تنطرت من الفرش و تحشيت ف التركينة.. هزيت الكاس الي كان عالتابل دونوي و ضربتو عالحيط .. كبست عالطرف الي بقات ف يدي و حطيتها على رقبتي نحكي
انا :" تقرب خطوة اخرى .. والله والله نقت-ل روحي هنااا.. مش انا مجنونة.. انا مهبووولة والله نعملهااا.. على هذاكاا اخرج من حذاياا "
سارة :" باهي باهي باهي.. هاني بش نخرج غير نحي من يدك و اهدى.. جوري عيش اختي شوف انا سارة صاحبتك .. فهمني شنوة الي صار بش خلاك تخاف مني هكااا .. شوف هاني بعيدة عليك و احكيلي و نوعدك اني نخرج  "
انا :" و .. وصلني جواب لبيتي .. انت بعثتو سارة ؟ انت الي تعرفني هنااا ..مفما حد يعرفني غيرك انت وجاد.. قلي الي هو وصلني منك و لا منو هوو امااان  "
عقدت بحواجبها مستغربة تحكي
سارة :" شقاعدة تحكي انت ؟ جواب شنوة ؟؟ اهدى و تنفس و فسرلي بالشوي خلينى نفهم معاك "
هزيت يدي الي كانت ترعش و اشرتلها بصبعي عالجواب الي شقيتو ف زوز و كان مرمي ف القاعة وراهاا .. شفتها كيف تلفتت غزرتلو و قدمت ناحيتو .. طبست و خذاتو ف يداهاا .. رجعت وقفت و لصقت الطروف ف بعضهم .. بقيت نغرزلها كيفاه كانت تقراا و مستغربة .. هزت راسها معايا تحكي
سارة :" وقتاه وصلك هذااا ؟؟"
انا :" قبيلا شوي .. سمعت الحثلة قدام الباب .. ياخي قمت بش نشوف شكون .. مشى ف بالي انت و لا جاد .. حليت الباب بش تدخلو خاطر سكرتو بالمفتاح قبل مانرقد .. كيف خرجت مالقيت حد .. اما عفست على هذاكاا .. فما شكون حطها و مشى .. سارة انا خايفة .. خايفة برشة  "
سارة :" خايفة مني انااا ؟؟ جوري كيفاه تتخيل اني نبعثلك حاجة هكااا ؟ انا كنت تحت نتعشى مع البنات حتى ممكن انك تسألهم غدوة و تتأكد منهم "
انا :" كان مش انت شكون مالا ؟ شكون موجود ف المصحة يعرفني غيرك ؟ شكون غايتو بش يبعثلي حاجة هكااا و يرعبني "
سارة :" باهي و انت تتصور الي انا عندي غاية بش نبعثلك حاجة هكااا .. خسارتك جوري والله "
تكيت براسي لتالي و بقيت نضرب فيه عالحيط و نبكي بالصوت .. حسيت روحي تضغطت من كل الجهات .. خوف و شك و ندم .. غمضت عينيا على صوتها تحكي
سارة :" جوري يزي من لبكاا ياروحي .. امان نحي الي ف يدك و اهدى .. ايجا خلينا نقعدو و نحكيو بالعقل و تو نلقاو حل مع بعضنااا .. يزي امان  "
رجعت فتحت عينيا وميلت راسي بقيت نغزرلها كيف كانت تقرب مني شوي شوي .. تبسمتلي كالعادة و مدت يداها ناحية يدي نحاتلي طرف الكاس من عندي تحكي
سارة :" هات هاذي و ايجا معايااا .. خلينا نحكيو و نفكرو مليح شنوة بش نعملووو .. ماتخافش مني هيا ايجاا "
شدتني من يدي و بقات تمشي فياا ناحية الفرش .. بقيت نتبع فيها ساكتة .. حسيت روحي فقدت قوتي بش نرد الفعل .. بالرسمي تعبت و مانجمتش ننطق كلمة اخرى .. قعدت على طرف السرير و بقيت نغزر للحيط مقابلني و ساكتة .. حسيت بيها كيف قعدت بجنبي و رجعتلي شعري لتالي تحكي
سارة :" اول حاجة لازمني نكلم جاد يرجع تو للمصحة .. و بعد هو بش يتصرف .. لازمنا نعرفو شكون موجود ف المصحة من مصلحتو يبعث حاجة كيف هكاا "
تنهدت بالقوي و غزرتلها نحكي
انا :" زعمة الي بعث هذاا من المصحة؟ يعني ديما موجود ؟ مريض و لا يخدم هناا ؟ زعمة قاعدة نرا فيه كل يوم..الف سوال طرحتو ف راسي .. و عارفة اني مش بش نلقى اجابة .. بش نبقى ديما هكااا.. بش نبقى ضايعة وحدي "
سارة :" مانعرفش شكون .. الي متاكدة منو انو موجود هناا واكيد ديما.. خاطر الوقت هذاا الباب يتسكر ما يدخل حد .. غير الي يخدمو ديما بالليل "
حطت يداها على خدي و غزرتلي تحكي
سارة :"و بالنسبة لأسئلتك بش تلقالهم اجابة سوى تو و لا من بعد .. الي عمل هكااا بش يتكشف و هو بش يحكيلنا كل شي .. اعطي فيا الثقة "
ضحكت مع دموعي الي رجعو هبطو من جديد نحكي
انا :" الي بعثهاا قلي لازمك تخرج .. قلي لحقيقة قدامك.. الي بعثهاا يعرفني نخاف من المراياا و مانستغربش انو يكون عارف السبب زادة.. اكيد هو يعرفها هي زادة.. و يعرف شصار بالضبط..هو..هو يعرفني انا شنوة عملت..هو يعرف..يعرف ذنبي "
عديت بيديا الزوز على وجهي و جبدت نفس طويل رجعت نحكي
انا :" شنوة بش نعمل سارة.. منين بش نبدأ؟ حاسة روحي تعبت.. علاش صاير هكاا فياا.. علاش قاعدين يعملو فياا هكا.. يحبو يهبلوني.. راسي بش يطرشق ياربي وعروقي قاعدة تضرب فيااا.. معادش عندي قدرة اني نتحمل اكثر .. تخنقتت والله "
سارة :" يزي جوري عيش اختي اهدي .. ماتزيدش تعب روحك اكثر .. قتلك تو نلقاو حل مع بعضنااا .. اول حاجة لازمنا نعرفو شكون وراء الرسالة .. وبعد لازمك تخرج من هنااا .. لحكاية هاذي لازمها تتحل و توفى .. و انا بش نكون معاك و نساعدك مهما يصير .. تفاهمنااا "
انا :" ت .. تفاهمنااا .. سارة ؟؟"
سارة :" نعم يا روحي "
انا :" س .. سامحني خاطر شكيت فيك .. اما حاجة اقوى مني .. صدقني خفت حتى من روحي .. لكلام الي كان مكتوب خلاني نشك ف الكل .. حسيت تفكيري تشتت لحظتهاا .. ماكنتش واعية بشي "
قربتلي ودورت بيداها عليااا .. جبدتني عندها و حضنتني بالقوي تحكي
سارة :" ماعندك علاش تتطلب ف السماح .. عندك حق انك تشك .. اما صدقني جوري انا مستحيل نضرك انت اختي هنااا .. و بش ناقف معاك لاخر لحظة .. خليك متفكرة هذاا و مصدقتو "
دورت بيديا علاهاا و تحشيت ف صدرها .. كلامها و يداها الي كانت تمسح على ظهري حسيتهم هداوني .. سمعتهاا كيف رجعت تحكي
سارة :" خليني نكلم جاد.. لازمو يجي من تو و يعرف شنوة صار  "
بعدت علاهاا و هزيتلها براسي باهي نحكي
انا :" كلمو حذايااا .. ماتخلينيش الليلة امان .. ابقى عندي سارة "
سارة :" من غير ماتقول كنت ناوية نعدي الليلة حذاك .. هياا قوم خلينا نرقدو "
قمت من بلاصتي و بعدت الملحفة .. تسطحت عالفرش و حطيت راسي عالمخدة .. بقيت نتبع فيها بعينيا كيف جبدت تاليفونهاا و طلبت جاد .. شوي وسمعتها تحكي
سارة :" دكتور ...سارة معاك .. سامحني طلبتك الوقت هذاا .. اما كان تنجم تترجع للمصحة تو ... فما حكاية مستعجلة تخص جوري ... لا لا هي مليحة اما لازمك تكون موجود تو.. اي تهنى هاني حذاهاا ماتخافش  .. نستناوك  "
شفتها كيف علقت وغزرتلي .. قدمت ناحيتي تتبسم و تحكي
سارة :" جاد ساعة و يكون هناا .. خلينا نرتاحو شوي حتى يوصل .. اياا خليلي بلاصة جنبك للا .. خذيت الفرش بكلو وحدك راك "
تبسمت بالسيف على كلامها و بعدت شوي بش نخليها مساحة انها تتكا بجنبي .. تسطحت حذاياا و حضنتني تحكي
سارة :" غمض عينيك و ارتاح .. انا هاني فايقة متخافش يا روحي .. شي ماعاد يصير  "
غمضت عينيا كيف ما قتلي من غير ما نجاوبهاا حتى كلمة .. حسيت روحي تهديت من وراء الي صار .. وفرد وقت حسيت روحي ندمت اني شكيت ف سارة .. الي صار خلاني ننسى هي شنوة عملت معاياا طول الفترة هاذي .. و شنوة مازالت تعمل معاياا ..
بقيت نتنفس شوي شوي حتى حسيت روحي هديت ودقات قلبي تنظمت مرة اخرى .. وجودها بجنبي و فكرة انو جاد ف الثنية لياا .. خلاوني نطمن شوي و نغفى من غير ما نحس بشي ....