🗡🥀#رِيْبَة_جُورِي🥀🗡

حلقة 12

حلقة 12
#بدر_يحكي

رميت السيقارو عفست عليه بساقياا وقدمت بخطواتي اكثر لوسط الطريق.. بقيت ندور بعينيا عالبلاصة ونخمم ف شنوة ممكن يكون صار هناا بالضبط.. نزلت راسي نغزر لبقايا لمراياا الي بقاو منشرين ف القاعة.. طبست شوياا وهزيت طرف منهاا.. عديت بصبعي مسحت دمها الي كان مغطيهاا وغزرت لروحي منهاا.. للحظة تمنيت كان شكي طلع غالط و انو الي صار مجرد حادث.. اما القطعة الي ف يدي خلاتني نتاكد اكثر انو احتمال كبيير لحكايات مربوطة ببعضها...
غمضت عينيا بالقوي وين لقيت روحي نتخيل فيها شنوة الشي الي تنجم تكون عاشتو هناا.. كيفاه ظهر قدامها؟ و كيفاه هجم علاهاا؟ شنوة حست ؟ و اهم سوال زعمة كان شافتو و لا ؟.. كيما بقيت حاير ف شكون الي ينجم يكون وراء هذا الكل ؟.. وشنوة غايتو بالضبط منها ومني انا زادة.. لقيت روحي محصور ف الف سوال و سوال.. اسئلة عارف مش بالساهل بش نلقى اجابتهم..حليت عينيا وهزيت راسي على صوتو وراياا يحكي
كريم :" لقيت حاجة ؟"
قمت من بلاصتي وهزيت بيديا ف وجهو نحكي
انا :" كيف ماتوقعت مرايااا "
رميتها ف القاعة من جديد ونفظت يدي نحكي
انا :" قلي انت لقيت حاجة ؟"
كريم :" لاا.. حاولت نشوف أقرب كاميرا مراقبة اما كلهم بعاد.. لبلاصة ياسر متطرفة بدر "
انا :" و مع هذا شوف تسجيلات كاميرا متاع اقرب فيلا.. ممكن نلمحو اي حاجة تساعدنا "
كريم :" باهي "
انا :" انت كمل شوف من الطرف هذاكا وانا نشوف من هنا"
هزلي براسو باهي عطاني بظهرو ومشى لطرف الغابة لمقابلني.. بقيت ندور ونشوف ممكن نلقى اي حاجة تساعدني و انجم نشد بيها طرف خيط مع اني متأكد انو صعيب ياسر.. لبلاصة ياسر متطرفة و الغابة توصل لأكثر من طريق يعني مش بش نقدر نحدد الوجهة الي جاء و مشى منهاا.. تلفتت فيسع على صوتو ورايا كيف نداني بالقوي..
كريم :" بدرر  "
قربتلو فيسع وقدمت ناحيتو.. ريتو كيف كان مطبس و يعدي بيديه عالوحل الي كان ف الغابة.. هز راسو معاياا وغزرلي يحكي
كريم :" شوف أثر ساقيين "
قربت اكثر و طبست بجنبو بقيت نغزر لاثر الساقين الي كانو مطبوعين عالوحل وواضحين مليح.. شيعت بعينيا علي الطريق الي مشى منو من غير حتى كلمة.. سمعت كريم يحكي
كريم :" خلينا نشوفو الطريق هذا لوين يوصل ممكن نلقاو كاميرا "
هزيتلو براسي لا و اشرتلو بصبعي نحكي
انا :" ما يوصل لشي "
كريم :" كيفاه ؟"
انا :" شوف الطريق هذا يوصلك لآخر الغابة وين تلقى روحك وراء الفيلات من تالي.. و غادي بلاصة خالية اكثر من هناا مافيها شي و ماتوصل لشي"
كريم :" يعني الي عمل هكاا يعرف لبلاصة مليح "
انا :" نظن هكاا يعني يعرف منين يدخل و يخرج و متأكد انو مفماش كاميرا ممكن تصورو على هذاكا هو شق من هنا"
كريم :" و مع هذا خلينا نقدمو اكثر ممكن نلقاو اي خيط يوصلنا "
قمت من بلاصتي و ضيقت عينيا نحكي
انا :" تعرف شنوة اكثر حاجة محيرتني؟"
قام معاياا ووقف قدامي يحكي
كريم :" شنوة ؟"
انا :" إذا هو بلحق جاء من غادي.. مالا كيفاه عرف انها خرجت من الفيلا ؟ يعني الطرف هذاكا بعيد على فيلتها مستحيل ينجم يشوفها و لا حتى يلمحها من بعيد.. مالا هو كيفاه كان مترصدها و خرج ف وجهها وتقابلو ف النقطة هاذي بالضبط؟"
كريم :" تقصد ينجم يكون معاه حد اخر ؟؟ وهو خبرو بخروج جوري ؟ "
هزيت بحاجبي نحكي
انا :" والله هذا التفسير الوحيد الي نجمت نوصلو "
كريم :" مالا خلينا نشوفو كاميرات المراقبة الي قدام فيلتهاا ممكن نلمحو شكون "
انا :" ممكن مع اني متأكد انو ماكان وراها حد.. انا شيعتها بعينيا كيف خرجت كيما شفت الطريق.. ماريت حد وقتهاا "
كريم:" ممكن يكون متخبي بين الانهج "
انا :" احتمال.. مع اني حاسس مش هذا الي صار.. انا متأكد فما حلقة ضايعة عليناا "
كريم :" باهي خلينا نمشيو ساعة من هنا و بعدها نخممو شنوة لازمنا نعلمو "
هزيتلو براسي باهي وسبقتو.. رجعت ناحية الكرهبة  وقفت وبقيت نغزر للبلاصة مرة اخرى.. للحظة حسيت روحي تهت ف الحكاية اكثر.. أثر الساقين الي ريتهم خلاو حيرتي تزيد.. كيفاه هي جات من طريق و الي هجم علاهاا من طريق آخر؟.. كيفاه عرف انها خرجت ف الوقت هذاكا بالذات ؟.. حسيت روحي كل مانزيد نتعمق ف الأسئلة كل ما نضيع و شكي يكبر اكثر.. فقت من سرحتي على صوت تاليفوني الي نوقز.. جبدتو من جيبي استغربت من الرقم الي مانعرفوش.. هزيت نحكي
انا :" الو ؟"
الدكتور:" صباح الخير سي بدر.. معاك الدكتور مقني "
طلعت يدي وكبست على جبيني نحكي
انا :" صباح الخير دكتور "
الدكتور :" كلمتك بخصوص لمريضة جوري "
انا :" نسمع فيك "
الدكتور :" هي فاقت و حالتها مليحة.. وبش تخرج لعشية زادة "
انا :" باهي.. و ما حكات شي هي بخصوص الي صار؟"
الدكتور :" لا قالت ماتتفكر شي وهذا شي طبيعي ف حالتها"
انا :" فهمت عليك.. عيشك دكتور "
الدكتور :" العفو "
علقت عليه وتلفتت لكريم الي مازال يدور في البلاصة و يشوف.. حكيت على جبيني نحكي
انا :" هيا خلينا نمشيو.. يزيك ليوم "
هز راسو معاياا و ضحك يحكي
كريم :" والله تعمل مزية خليني نمشي نرتاح شوي "
طلعت ف الكرهبة وين طلع هو بجنبي.. دورت راسي غزرتلو نحكي
انا :" وين بش ترتاح ؟بش نتعداو للبيرو نسيت ورانا قضية"
كريم :" لا مانسيتش سي بدر.. اما مانيش منجم نركز.. من وراك فايق الخمسة متاع الصباح "
خدمة الكرهبة وشديت الثنية نحكي
انا :" يزي ماتشكي و تبكي.. امشي اشرب قهوتك تو تفيق.. عرفك مرجني بالتلفونات "
كريم :"ربي يصبرني منو..حتى انا طلبني و ماهزيتش عليه"
تبسمت على جنب نحكي
انا :" هو يحبك برشة عاد وزيد انت تتصرف هكا "
كريم :" لا هكاكا محبتنا متبادلة "
انا :" اي واضح "
كريم :" تو اخطى التفدليك.. شنوة ناوي تعمل ؟"
كبست بيديا عالفولون نحكي
انا :" ف شنوة زادة ؟"
كريم :" شنوة ف شنوة ؟ ف جوري ؟"
انا :" شبيها ؟ شعندي نعمل ؟"
كريم :" بش تكمل تشوف شكون وراء لحكاية و تعرف الي هجم علاها و لا لا ؟"
غزرتلو على جنب و رجعت غزرت لطريق نحكي
انا :" انت ماشي ف بالك اني قاعد نشوف تو على خاطرها هي ؟؟"
كريم :" مالا ؟"
انا :" انا كان بش نكمل نبحث ف الحكاية جيست بش نشوف شكون وراء الجواب الي وصلني وشنوة يقصد بكلامو.. مش على خاطرهاا "
كريم :" ك هكا علاش خلطت وراهاا للمشفى؟ و انت مازلت حتى ماعرفتش بحكاية الجواب ؟ وزيد مخلي رقمك عند الطبيب بش يقلك على حالتها ؟"
انا :" ياخي قاعد تحقق معاياا ؟"
كريم :" لااا اما نحب نقلك الي انت تعمل ف هذا على خاطرهاا زادة مش كان على خاطر روحك "
انا :" ماتكونش متأكد لهدرجة.. خاطر بعد روحي انا معاد نخمم ف حد كيما مايهمني ف شي خاصة هي.. كان لازمني نتصرف هكا بش نعرف شكون الي قاعد يلعب معاياا من بعيد ونعرف شنوة غايتو مني "
كريم :" بش نحسب روحي صدقتك "
عليت ف صوتي شوي نحكي
انا :" كرررريم تعرررفني مااانحبش طررريقة حديثك هاذي.. كيما مانحبش نرجع نحكي ف حاجات قديمة ماتخلينيش نفد عااااد "
كريم :" باهي باهي هاني سكتت "
انا :" و مذابيك تبقى ساكت ثنية كاملة "
كريم :" حاضر عرفي "
كبست بيديا عالفولون ونزلت على الفيتاس.. غمضت عينيا بالقوي و رجعت حليتهم حبيت ننسى اي حاجة تخصهاا هي و خاصة كلام كريم و اسئلتو الي غدرني بيهم.. لقيت روحي بلحق مش لاقي اجوبة لتصرفاتي الي صارو البارح.. ورغم هكا انا مش نادم على حتى خطوة كانت مني ليلة لبارح خاطر منهاا هي انا عرفت الي فما سر مشترك بيني انا وياها.. سر بش نكشفو على قريب على خاطر روحي انا كهو مفماش سبب غير هذاا.. لازمني نعرف شكون الي قاعد يلعب معايا من بعيد هكا و نحاسبو.. و وقتها بش نمحي اي نقاط مشتركة بيناتنا..