🗡🥀#رِيْبَة_جُورِي🥀🗡

حلقة 19

حلقة 19
#جوري_تحكي

ما نعرفش قداه تعدات من دقيقة و انا واقفة قدام لمرايا نغزر لروحي.. وين ركزت اكثر على ملامحي الباردة و شعري الطويل الي كان مفرود على اكتافي.. رجعت نزلتهم وغزرت لروبة البيضاء الي كنت لابستهاا فرد وقت هزيت يدي و بقيت نعدي فيها عليهاا مسحت الدم الي كان عليهاا فوقها وين تحول لونها من الأبيض للاحمر.. رجعت هزيت راسي على صوتها وراياا.. غزرتلها من لمراياا كيف كانت تبكي بالشهقة وتحكي
ياسمين :" ت..توليب ماتت.. نزفت برشة مالحقوش علاهاا.. علاش ؟ علاش حتى عملت هكا علاااااااش ؟"
حليت السبالة وحطيت يدي تحت الماء وين الدم الكل سال معاه نحكي
انا :" الي يعمل يخلص.. هي عملت و خلصت حق عملتها كيما نظن الي صار من البداية غلطتها هي..هي وصلت روحها "
ياسمين :" انت كيفاه تخمم فهمني؟ كيفاه تفرط ف اختك؟ "
هزيت راسي معاهاا و تبسمت نحكي
انا :" عادي.. كيف ما انتوما فرطتو فياا "
ياسمين :" مش كيف.. الي صارلك احنا ماعندناش دخل فيه.. اموركم حلوهاااا وحدكممم.. احناا شدخلناا..هي فاش جات "
ضيقت عينيا فيهاا نحكي
انا :" ف عوض ما جاية تحاسب فياا.. برا ودع اختك مش خيرلك "
ياسمين :" انت وحدة مريضة و مجنونة.. كيفااااه تحكي بالبرووود هذااا.. قتلللك اختك ماااتت و انت الييي قتلتهاااا "
انا :" كان عندك دليل براا اشكي لشرطة "
كملت كلامي وغمزتهاا.. ريتهاا كيف هدت علياا من تالي و شدتني من شعري بالقوي.. غزرتلي من لمراياا و حطت عيناها ف عينيا تحكي
ياسمين:" والله ما نخليك تندم يا جوري.. والله ماناخذ بحقها منك مانخليك تخلص كل شي "
هزيت يدي وحطيتها فوق يديها.. تبسمت على جنب نحكي
انا :" هكاكا تكون كتبت نهايتك بيديك انت زادة "
كبست على شعري اكثر ودورتني ناحيتهاا.. بعدت يداها من شعري و دورتهم فجأة على رقبتي كبست عليا بالقوي وين حسيت بروحي تخنقت و النفس تقطع عليااا.. حليت عينيا فيهاا و الدموع تملاو ف وسطهم مع صوتي الي هرب.. غمضت عينيا بالقوي و حليت شفايفي بسيف حاولت نصيح اما مانجمتش.. جمعت طرف القوة إلي عندي و خرجت صوتي بالسيف و صحت على علو صوتي.. رجعت حليت عينيا شوي على صوت الي حسيتو بعيد عليااا.. تلفتت على جنب وين ريتو قاعد بجنبي و يديه على جبيني يحكي
جوهر :" اشش كابوس و مشى.. ماتخافش "
عضيت على شفايفي واستندت بيديا عالفرش وقمت.. تكيت بظهري لتالي نحكي
انا :" ياخي قداه الوقت تو ؟"
جوهر :" نصف ليل فاتت "
انا :" شبيني راقدة لتو ؟؟ اصلا مانيش متفكرة شي "
جوهر :" انت رقدت ف الكرهبة و حرارتك كانت مرتفعة شوي.. حاولت نفيقك اما بقيت دايخة وتهتري.. حملتك و سطحتك عالفرش.. و بعد عمتلك كمادات و خليتك ترتاح وتو سمعت صوتك تصيح جيت بش نشوفك "
انا :" سامحني جوهر.. تعبتك معاياا "
جوهر :" مفماش تعب.. هياا قوم بدل دبشك اهوكا عم الهادي حضرلك ساكك.. لازمك تتعشى و تشرب دواك.. هاني لبرا نستنى فيك "
هزيتلو براسي باهي من غير حتى كلمة.. قام من حذايا عطاني بظهرو و خرج و سكر الباب وراه.. تكيت براسي لتالي وغمضت عينيا وين دمعتي الي كنت حابستها قدامو نزلت.. حسيت قلبي وجعني اول ماتفكرت الكابوس الي راودني قبيلا.. اصلا مش عارفة نقول عليه كابوس و لا حقيقة غير التفاصيل متغيرة شوي..عديت بيديا على وجهي وقمت..حليت الساك و جبدت اول بيجاما لقيتها قدامي.. هزيتها ف يدي وقمت من بلاصتي قدمت خطوتين ناحية التوالات ووقفت اول ماتفكرت لمراياا.. ف اللحظة هاذي ماعرفتش شنعمل حسيت بالخوف سيطر علياا كيما مانجمتش نطلب من جوهر انو يغطيهاا ماحبيتش نتعبو ونزيد عليه بمشاكلي لمعقدة.. خذيت نفس طويل وطبست راسي دخلت لتوالات عطيت بظهري للمراياا و غيرت ثيابي رجعت تلفتت و نزلت راسي مرة اخرى حليت السبالة غسلت وجهي فيسع وخرجت نجري.. نظمت لبيت شوي و حطيت ساكي على جنب و خرجت من البيت.. دورت بعينيا عالدار الكل بقيت نغزر لكل تركينة فيهاا حتى وصلت للصالة وين ريتو يحضر ف الطاولة.. قدمت بخطواتي ناحيتو وبقيت ساكتة ماعرفتش علاش مانجمتش نحكي حسيت بالحشمة فرد وقت خفت لا نكون ثقيلة عليه.. هز راسو معاياا غزرلي وتبسملي يحكي
جوهر :" تو كنت بش نجي ناديلك.. هياا ايجا تعشى "
غزرت للطاولة ورجعت غزرتلو نحكي
انا :" علاش تعبت روحك هكاا ؟"
جوهر :" مفما حتى تعب.. هياا ايجاا اقعد "
تبسمتلو وقدمت حذاه.. قعدت عالطاولة بجنبو و غزرت للصحن الي كان قدامي.. ضحكت و طلعت راسي معاه هزيت بحاجبي نحكي
انا :" باستا نورما ؟؟ تو هاذي صدفة و لا انت مازلت تتفكر لتوو انا شنوة نحب ؟ "
حك على جبينو وتبسم يحكي
جوهر :" والله مازلت نتفكر لتو.. هذا اكثر طبق انت تحبو حتى انك كنت تحكم عليناا ناكلوه معاك بالسيف "
انا :" هههه يا حسرة والله.. هو انا مش نحكم اما خالتي جميلة كانت مدللتني و تحضرلي الحاجات الي انا نحبهم "
جوهر :" والله خالتي جميلة معاك كانت تنسى حتى ولادها "
تنهدت بالقوي وتبسمت على جنب نحكي
انا :" قداه توحشتهم اكا الايامات.. و توحشت خالتي جميلة زادة.. ياريتها بقات معاياا "
جوهر :" يا ريت.. اما ساعات الظروف تجبرناا بش نبعدو.. هكا نحميو رواحنا و نحميو الي دايرين بينا"
انا :" نعرف.. و انا والله عذرتها وقتهاا.. كيف حكيت معاهاا لقيت انو هذا انسب حل ليها و.. و للاولاد زادة "
جوهر :" صحيح.. هياا تعشى صحنك بش يبرد "
هزيتلو براسي باهي و خذيت الشوكة كليت شوي بالسيف و بقيت منزلة راسي نخمم ف كيفاه بش نسالو و لا نجبدلو الموضوع.. خذيت كاسة الماء شربت منها شوي ورجعتهاا.. هزيت راسي معاه نحكي
انا :" جوهر "
هز راسو معاياا وغزرلي يحكي
جوهر :" نعم "
انا :" ميسالش نسالك ؟"
جوهر :" اي تفضل "
انا :" ياخي.. ياخي انت علاش مشيت لدار بدر؟ يعني حسب مانتفكر قبل عمركم لا تفاهمتو و..وديما كنتو تتعاركو.. حد ما كان يحب لاخر "
دور بعينيه عليا و هزلي براسو اي يحكي
جوهر :" اي صحيح.. اما تو كل شي تبدل جوري.. يعني ف الاخير احنا كبرنا و رجعنا قراب لبعضنا شوي "
انا :" فهمتك "
رجعت نزلت راسي و بقيت نحرك ف الشوكة داخل الصحن من غير ماناكل وفرد وقت نخمم ف كلام جوهر الي مانجمتش نصدقو خاطر مهما يصير مستحيل هو و بدر كان يتفاهمو شي نهار خاطر انا لوحيدة الي نعرف شنوة صار بيناتهم قبل.. رجعت هزيت راسي على صوتو يحكي
جوهر :" قلي ساعة هو كيفاه عاملك النهارين الي فاتو "
حطيت الشوكة من يدي و رجعت شعري لتالي.. تكيت بظهري عالكرسي نحكي
انا :" كالعادة.. يعني كيف ماتعرف بدر.. شي ما تبدل فيه معاملتو هي نفسها.. دمو بارد ومستفز غير انو بقى يلوم فياا بكلامو و بغزرتو "
جوهر :" جوري تسمع مني ؟؟"
انا :" اكيد "
جوهر :" ابعد على بدر.. رد بالك تقربلوو حتى من بعيد.. مهما يصير فيك ابقى ف الشارع و ماتدخلش لدارو "
عقدت بحواجبي مستغربة نحكي
انا :" علاش ؟؟ شنوة الي خلاك تقول هكاا ؟"
جوهر :" شنوة الي علاش ؟؟ ياخي نسيت شعمل فيك ف التحقيق ؟مهما حاولت معاه انا وقتها رفض يتدخل ويعاونك حتى ب كلمة وحدة.. غير الي حكيتهولي وقتها كيفاه بعث شكون لسجن و شعملو فيك "
حسيت بغصة وحلت في حلقي اول ما تفكرت كل شي صار وقتهاا.. غمضت عينيا بالقوي و رجعت حليتهم نحكي
انا :" لا لا مانسيتش.. بالطبيعه مانسيتش ومستحيل ننسى الي الشي هذاا.. اما حسيت من كلامك كانو فما حاجة اخرى وكهو "
جوهر :" مفما شي.. نحبك تعرف حاجة برك انو كل شي تبدل ف الخمسة سنين هاذم.. بدر مش نفسو بدر متاع قبل.. اصلا ما بقى شي على حالو جوري.. على هذاكا رد بالك "
انا :" جوهر ياخي فما حاجة اخرى انا ما نعرفهاش؟؟"
هز كاسة الماء شرب شوي ورجعهاا.. هز راسو معاياا وغزرلي يحكي
جوهر :" مفما شي غير الي انت تعرفو "
انا :" انا معادش نعرف شي.. خرجت من المصحة ف بالي بش نرتاح من الضياع الي كنت فيه.. ياخي لقيت روحي ضعت اكثر بيناتكم "
جوهر :" شتقصد ؟"
انا :" نقصد الي انا متأكد فما حاجة.. سكنة بدر قدام فيلتنا مش صدفة و مش من فراغ هكاكا.. خدمتو مع بابا.. غير كلامو لياا النهارين هاذم ونظرتو الي مش مفهومة.. مشيانك لدارو الليلة غير كلامك انت تو..كل شي يقول الي فما حاجة انا مانعرفهاش.. جوهر انتوما على شنية ناويين ؟؟؟"
جوهر :" استنى ساعة فهمني.. كلامو ؟؟؟ علاه هو شقلك ؟"
انا :" مش حاجة كبيرة.. بدر كالعادة يرمي كلمتين و يسكت.. اما انا متأكدة وراهم حاجة.. على هذاكا كان انت تعرف حاجة قلي امااان و ريحني "
عدا بعينيه عليا وغزرلي درا كيفاه يحكي
جوهر :" مانعرف شي.. اصلا صدقني مفما شي غير انت ماتركزش معاه ابعد عليه و كهو "
انا :" اصلا انا بعيدة جوهر.. حتى كان نحب نقرب انت تعرف الي انا مانجمش.. فما الف حاجة تمنعني.. بيني انا و بدر حاجز و مسافة طويييلة.. فجوة بيناتناا مستحيل كان تتملى و لا تتمحى "
جوهر :" يمكن أفضل شي انو الحاجز هذا يبقى.. رد بالك تهدمو خاطر وقتها بش ترجع تحل دفاتر قديمة و تفتح جروح مازلت مابراتش"
غمضت عينيا بالقوي وين دمعتي نزلت بالوقت.. رجعت حليتهم نحكي
انا :" نعرف.. اصلا ف كل الأحوال الوضع بش يبقى هكا خاطر بدر كرهني و نساني سايي..هو رماني وراه كاني ماكنتش ف حياتو "
شدني من يدي و غزرلي ف عينيا يحكي
جوهر :" جوري شصار ف الليلة هاكي ؟؟ شنوة الي صار حتى خلى بدر يوصل يعمل هكااكا ؟؟ نتفكر خليتكم ملاح.. اخر مرة حكيت فيها معاك نتفكرك كنت فرحانة بش تطير.. قتلي الي انتوما حضرتو كل شي وبش تعرسو.. كيفاه تغيير الوضع ف ليلة و نهار ؟؟"
ضميت على شفايفي نكتم ف شهقتي الي شوي و تخرج مع دموعي الي ملاو عيني اول ما ريت الليلة هاكي من جديد وين حسيت بقلبي غم علياا ووجعني كيما رجعت سمعت نفس الأصوات و حسيت بنفس اللمسات و الأنفاس تضرب فياا.. كبست على يديه و غزرتلو نحكي
انا :" صدقني ماتعرفش خير جوهر..."
قص علياا يحكي
جوهر :" جوري انا نحب نعرف.. ممكن مجاتش فرصة قبل بش نحكيو.. اما تو فرصتك.. مدامك معاياا أحكيلي ممكن نلقاو حل مع بعضناا و نصلحو الي تهد "
تبسمت على جنب نحكي
انا :" معاد فما شي يتصلح "
تنهد بلقاوي يحكي
جوهر :" جوري هو سؤال واحد.. انت علاش تخليت على بدر.. كيفاه قبلت ب ماهر.. راني للحظة هاذي مش مصدق كيفاه بقيت معاه المخلوق هذاكا.. امان احكيلي شصار ف ليلة هاذيكا "
شديت دمعتي بالسيف نحكي
انا :" جوهر يزي من الاسئلة امان.. الليلة هاكي كابوس مازال مرافقني لليوم و كابس على انفاسي.. على هذاكا مانحبش نرجع نحكي عليه و لا نتفكر.. اما كل الي لازمك تعرفو انو انا وقتها تحطيت قدام الأمر الواقع.. وصلت لخانة اليك و كان لازمني نختار "
عقد حواجبو يحكي
جوهر :" تختار شنوة ؟؟"
انا :" نختار بين موت واحد فيناا "
جوهر :" مفهمتكش؟؟ شتقصد بموت واحد فيكم ؟"
انا :" مانجمش نفهمك اكثر من هكاا تو.. لحديث معادش ينفع خاصة تو "
جوهر :" انا مانيش بش نجبرك تحكيلي بش نخليك على راحتك.. اما لازمك تعرف انو انت من الليلة هاذي ملزومة مني.. انا مسؤول عليك و مستحيل نخلي حاجة تصيرلك مهما يصير "
تبسمت نحكي
انا :" نعرف.. و لكلام هذا من قبل مش من تو.. انا عمري لا نسيت كيفاه كنت تحامي علياا كيف كنا صغار و لا نسيت وقفتك معاياا ف السجن.. وقتلي الكل كذبني انت الوحيد الي صدقتني..وقتلي حتى انا مش مصدقة روحي "
حط يديه على خدي ومسحلي دمعتي الي نزلت يحكي
جوهر :" و بش نبقى ديما مصدقك.. خاطر انا اكثر حد نعرف جوري و نعرف قلبها.. و مهما يقولو انا بش نبقى معاك و ف ظهرك ومستحيل نصدق حتى كلمة من كلامهم"
انا :" عيشك جوهر.. ربي يخليك ليا.. اما انا مذابياا نشوف حل لروحي يعني مانحبش نقلقك "
جوهر :" مانحبش نسمع لكلام هذا منك.. انت بش تبقى هناا تو ارتاااح مليح و استرجع روحك و بعد نحكيو غير هكا مفماش نقاش "
تبسمت نحكي
انا :" باهي.. عيشك "
جوهر :" هياا كمل عشاك الكل.. خاطرني محضرلك حاجة اخرى تحبها "
هزيت حواجبي نحكي
انا :" شنوة ؟؟"
جوهر :" استنى "
وقف من حذاياا وخرج من الصالة.. شوي وقت ورجع و ف يديه صحن.. حطو قدامي و غزرلي يحكي
جوهر :" هذا ليك انت "
حليت عينيا على وسعهم نحكي
انا :" يااا جوهر.. التحلية الي انا نحبهااا "
هزيت راسي معاه ورجعت نحكي
انا :" ياخي كيفاه مازلت تتفكر هذا الكل.. صدقني انا نسيت "
رجع قعد حذاياا و غزرلي يحكي
جوهر :" مانجمش ننسى حاجة تخصك جوري.. كيما حبيت نفرحك تو شوي "
انا :" والله فرحت.. يكفي انك معايا تو و ماخليتنيش وحدي "
جوهر :" باهي يزي من لحديث هذاا و كول "
هزيت لمغرفة و كليت شوي من الشيزكيك الي كان قدامي.. غمضت عينيا و بقيت نتبنن فيه و ف طعمة الكرز.. للحظة حسيت روحي استرجعت شوي حاجات انا فقدتهم.. الدنياا سلبت مني أقل الأشياء حتى الأكلات الي كنت نحبهم تحرمت منهم اصلا بلحق نسيت انا شنوة نحب و شنوة نكره خاطر حد ما سألني طيلة الخمس سنوات انا شنوة شاهية و لا شنوة نحب حتي جاد كان غافل عالتفاصيل هاذم.. اصلا ماعرفتش علاش تفكرتو ف اللحظة هاذي يعني هو مش مجبور يتفكر هذا الكل.. رجعت حليت عينيا نحكي
انا :" اممم مابنهاا.. والله انجم نقول انو هاذي اكثر حاجة فرحتني من وقت الي خرجت "
جوهر :" ههه صحة و بالشفاء "
انا :" عيشك "
بقيت ناكل و نحكي معاه كل مرة ف حاجة وين لقيت روحي استرجعت برشة حكايات و تفاصيل معاه من الماضي.. كنت مرة نضحك و مرة نحس بغصة.. اما رغم كل شي حسيت براحة غريبة خاطر جوهر خلاني نشوف انو مش لكل تغير معاياا هو بقى على حالو بقى الصاحب و الخو الي ياقف معاياا و يسمعني.. يشدني من يدي وقتلي نطيح و يحميني.. كملت تعشيت وشربت دواياا و قمت من بلاصتي نحكي
انا :" خليني نلم الطاولة و نمشي نرقد "
جوهر :" خلي عليك.. انت مازلت تاعبة.. برا ارقد "
انا :" اما.... "
قص علياا يحكي
جوهر :" جوري اسمع الكلام ماتبقاش كل شي اما اما.. قتلك برا ارتاح "
انا :" باهي كيما تحب.. بونوي "
جوهر :" بونوي "
عطيتو بظهري و طلعت للبيت.. سكرت الباب و قدمت ناحية الفرش وتسطحت.. بقيت نغزر للسقف و نخمم ف الف حكاية وين لقيت روحي حاسة بضغط من كل النواحي مش لاقية مهرب من هذا الكل.. غمضت عينيا وين تصويرتو رجعت هدت علياا من جديد رغم كل شي صاير فياا لقيت روحي نخمم فيه هو.. هو الوحيد الي واخذ حيز كبير من تفكيري.. خاطر كل وجيعة تو انجم نخليها تخمد و تخف كان وجيعتي منو ووجيعتي عليه هو زادة.. خاطر فما حقيقة وحدة انا مازلت عايشة عليهاا و متأكدة منهاا انو فما جزء مني مازال يحب بدر و مش منجم ينساه رغم كل المحاولات و جزء اخر يكرهوو و يكره كل شي صار وقتها و كل حد كان السبب فيه.....