🗡🥀#رِيْبَة_جُورِي🥀🗡

حلقة 1

#رِيْبَة_جُورِي 🥀

▪️️بَيْنَ الْعَقْلِ وَ الْجُنُونْ هَأنَا أتَأرْجحُ تَائِهة ...  لَا أدْرِي مَنْ أكُون ؟
هَذَهِ أنَا وَ لَسْتُ أَنَا ! ▪️

#الحلقة_الأولى
#جوري_تحكي

هزيت الكاسة من فوق الطاولة شربت الي فيها الكل من غير نفس وقمت ناحية لبنات..غمضت عينيا وبقيت نتمايل مع صوت الموسيقى حتى وصلت حذاهم..عليت في صوتي نحكي
انا :" شنوووة عجبببكم الجووو ؟؟"
ميليسا :" اي عاللخر.. عيشك جوري خاطر جبتناا معاك "
انا :" الليلة هاذي ليلتكم عزيزتي..خاصة انت ياسمينتي.. نحبك تشيخ..الليلة هاذي نحبهاا تبقى راسخة ف بالك "
ياسمين :" هههه هذا الظاهر والله.. الليلة هاذي مستحيل كان ننساهاا..راني بش نطيييير من الفرحة "
انا :" لا هكاا اناا متاكدة..حد فينااا ما بش ينساها "
فرح :" ياااا جوري غنايتك بدات..اياا اطلع فيسع "
انا :" السهرة تو وين بدات "
غمزتهم وخذيت الكاسة من يداهاا شربت الي فيها الكل من غير نفس ورجعتهالهاا..هزيت روبتي بيدي و طلعت فوق الطاولة..شفت الاضواء كيف تطفات و الضو الرئيسي تمحور عليااا و العينين كيفكيف كانت كلها مركزة معايااا..غمضت عينيا و سرحت مع الغناية.. بدني كان يتحرك مع كل نوتة يسمعها..حطيت يديا في شعري ونحيت الربطة الي كانت فيه وين حسيت بيه كيف هبط مسترسل حتى لخصري أعلن حريتو وراياا و بقى يتمايل معاياا هو زادة.. بقيت مغمضة عينيا.. نستحلى فيه و هو يدغدغلي في ظهري الي كان عريان بكلو.. بقيت هكاكا مش فايقة بشي..لحظتهاا حسيت روحي في عالم آخر.. عالم متاعي انا وحدي..ملكي.. حليت عينيا وتبسمت على جنب اول ما شفت النظرات الي كانت تبع فيااا.. اصلا مش حاجة جديدة عليااا..انا هناا جورية الحفلة.. مفماش وحدة تنجم تنافسني و تفك الاضواء و نظرات الاعجاب مني.. بدني و تصرفاتي الي بقصد و لا من غير قصد قادرين يغريو اي انسان هنا مهما كانت قوة ثباتو.. عديت بلساني على كامل شفايفي ورجعت شعري لتالي.. عطيتهم بظهري و كملت رقص.. بقيت هكاكا حتى لين لغناية وفات.. هبطت من فوق الطاولة على صوت التصفيق و التزفير ورجعت بجنب لبنات الي كانو يغزرلولي و يضحكوو..
ميليسا :" محلاااك جوري ومحلى رقصك.. ياخي ديما هكاا انتومااا هناا ؟"
فرح :" اي عرض جوري لازم منو..السهرية ماتحلاش من غير شطيحها و تزعبينهاا "
ميليسا :" بصراحة بش نولي ديما هناا انا عجبني الجو "
هزيت بحاجبي نحكي
انا :" بالله ؟؟ هاذي آخر مرة تجيو هنااا.. جبتكم الليلة بش تحتفلو بنجاحكم وكهوو "
ياسمين :" والله بالنسبة لياا انا هاذي آخر سهرية.. من الليلة مانيش بش نكون معاكم  "
ميليسا :"سايي قررت بش تسافر ؟ ياخي بوك وافق ؟؟"
ياسمين :" اكيييد وافق.. تعرف سلومتي مايرفضلي شي.. قال انو هاذي هدية نجاحي "
عديت بعينيا عليهاا وتبسمت على جنب نحكي
انا :" ياسمين دلولة بابا عاد الي تحب عليه تلقاه.. مش هكا ياسمينتي؟.. ايا كمل سهرتك عزيزتي نحبك تعمل جو "
ضحكتلي وهزتلي براسها أي.. تبسمتلهاا من غير حتى كلمة و رجعت لطاولة متاعي خذيت البوشات و مشيت فيسع لتوالات.. حسيت روحي تخنقت من وجودي معاهم غير كلام ياسمين الي حسيتو كبس على صدري.. كان لازمني نبعد علاهم و نتنفس بش نرتاح شويااا.. و مفهوم النفس و الراحه عندي مختلفين عالكل.. حليت الباب و دخلت تكيت بيدي عالرخامة بش مانطيحش.. حليت السبالة و بليت رقبتي و صدرى.. خذيت البوشات وجبدت سيقارو منها كان متحضر مخصوص ليا انااا.. جبدت معاه الولاعة شعلتو وحطيتو بين شفايفي.. اول ما خذيت نفس منو حسيت روحي من موندو اخر.. طرت فوق السحاب من بلاصتي.. نفثت الدخان و طلعت عينيا نغزر لروحي في المرايا.. ضحكت و انا نشوف في روحي.. كانت عندي كل المقومات الي تتمناهم اي طفلة.. عندي الجمال..المال..الاسم العالي..الجاه.. اما بين هذا لكل كانت فما حاجة ناقصة ف التصويرة الي قدامي..حاجة ضاعت مني و ماعدتش لقيتها.. عديت بيديا على شعري و تنفست شوي.. عطيت بظهري للمرايا و تكيت عالرخامة.. بقيت نتكيف و سارحة كل مرة في حاجة.. قد مانشرب بش ننسى نلقى روحي غاطسة من جديد في دوامة الماضي.. فقت من سرحتي على حس الخطوات الي سمعتهم لبرا.. طفيت السيقارو وهزيت روحي بالسيف بش نشوف شكون.. حليت الباب دورت براسي يمين و يسار ماريت شي.. رجعت دخلت و سكرت الباب من جديد ماحبيتش نرجع لوطة فيسع.. بقيت بش نرتاح شوي رغم اني مانحبش الهدوء و السكات.. اما ساعات نلتجألهم بش نصفي ذهني الي بقى مشوش من وراء النهار هذاكااا.. مانعرفش قداه بقيت في التوالات لين حسيت روحي فقت شوي وقتها كان لازمني كأس آخر فيسع.. هزيت البوشات و رجعت وين السهرية.. ترميت عالفوتاي وين كانت طاولتنا في ركنا الخاص.. ركن مايبقاش فيه الي يجي.. ركن خاص ب جوري بالنور ..
زدت عبيت الكاسة بقيت نترشف و نغزر للناس كيفاه عاملين جو ويشطحو..الضو كان خافت وصوت الموسيقى عالية و لبلاصة مليانة بالناس.. عديت بعينيا بش نشوف لبنات الي كانو يشطحو على جنب اما رجعت نزلتو فيسع كيف حسيت النفس متاعو السخون ضرب في رقبتي من تالي.. عضيت على شفايفي اول ما دور بيديه عليا ووشوش في وذنيا يحكي
ماهر :" وين كنت.. من بكري نلوج عليك  "
عديت بلساني على شفتي الفوقانية ودورتلو راسي قربت شفايفي لشفايفو وغزرتلو ف عينيه نحكي
انا :" علاه تلوج عليااا.. تكونش توحشتني ؟"
بعد من ورايا ودار ناحيتي قعد جنبي.. غزر لشفايفي و بعد عدا بعينيه على كل قطعة في بدني من لفوق للوطة يحكي
ماهر :" انا ديما متوحشك جوريتي  "
انا : " هههه احسبني صدقتك.. كنت في التوالات حبيت نرتاح شوي.. راسي وجعني "
ماهر :" سمعت انو عرض الليلة فاتني "
انا:" كالعادة.. انت ديما تحضر مخر "
طلع يدو على شعري حطو على جنب و بعد عدا بصوابعو من على رقبتي هبطهم حتى ناحية شق صدري يحكي
ماهر :" سامحني حبيبي..الله غالب تعرف خدمة مش مني.. اما شنوة الزين هذاا الكل.. محلاااك الليلة "
انا :" نعرف.. الي موجودين الكل قالولي هكاا "
قربتلو شوي و حطيت صبعي على شفايفو..بقيت نطبطب علاهم بالسياسة نحكي
انا :" اما بالطبيعة لكلام من شفايفك أنت ديما غير الكل.. مش هكا.. انت تحبني اكثر منهم.. كيما انت تراني وتعرفني مليح غير الناس الكل الي هناا.. مش هذا كلامك!! "
عقد بحواجبو مستغرب يحكي
ماهر :" ياخي قداه شربت انت ؟؟"
هزيت بكتافي و قلبت شفتي اللوطانية نحكي
انا :" مانعرفش.. برشة لين مانجمتش نعدهم "
ماهر :" استنى استنى شنوة الريحة هاذي؟.. ماتقليش رجعت للهم هذاكاا.. تكيفت مرة اخرى ؟؟ شوصيتك انااا جوري؟ ياخي ماتفهمش انت *** ؟"
انا :" اففف..ياخي حاجة جديدة علييك؟؟ لااا..انت ماكش راجلي بش توصيني و نضطر نسمع كلامك.. انا مانيش بش نقص علييه قتلك هذا عندي برشة.. تحب تقبلني مرحبااا.. ماتحبش حاجة تخصك هذيكااا "
ماهر :" تي يزييي عاااد شوف حالتك..منين جبتها المرة هاذي؟شكون الي باعهالك حل فمك ؟"
انا :" مانقووولش.. و حتى كان بش تعرف وحدك و تهددو كيف الي قبلوو بش نلقى غيروو.. على هذاكا ماتعبش روحك.. خليني على راحتي وماتضغطش عليااا.. بش مانفدش منك حبي "
ماهر :" ياخي تحب ترجع كيف ماكنت.. ماصدقت لربي انك بريت.. كمل هكااا ***.. اما انا نعرف كيفاه نتصرف.. خاطر تعرف كان بوك يسمع شنوة بش يعمل فيييك "
انا :" تصرف كيف ما تحب انا الي ف مخي بش نعملو عجبك عجبك.. ماعجبكش حاجة تخصك.. وزيد مدام انت معاياا كيف خيالي ليل ونهار مايصيرلي شي.. بابا متهني عليا معاك و انت تعرف هذا.. غير انت ماتقلوش "
ماهر :" انا مانقلوش.. اما هو اكيد بش يسمع.. تعرف الي في كل بلاصة عندو عين.. كيف ما عرف اول مرة بش يعرف تو.. و زيد جوري ماتنساش انت مش وحدك هنااا.. مدام جبتها معاك لازمك تحل عينيك و تكون صاحية.. عالاقل الليلة.. خاطر كان تصيرلها حاجة بوك مايرحمكش.. تعرف كل شي الا ياسمين "
حسيت بغصة وحلت في حلقي من كلامو.. رسيت على سنيا نحكي
انا :" ايجااا لصحيح.. كلكم خايفين على ياسمينتكم مش على جوري.. ياسمين وردة بنفس واحد تذبل فيسع باهي وجوري؟ نموت وحد فيكم مايحس بيا..هي الصغيرة و المدللة..اما انا ك نتصرف هكا نولي مانحشمش وفاسدة "
ماهر :" جوري ماقصدتش ان.."
رمشت عينيا برشة مرات نمنع في دموعي عالنزول.. قصيت عليه نحكي
انا :"حتى كان تقصد..مانحس حد فيكم..وهي ماتخافش علاهاا مش بش يصيرلها شي.. عالأقل الليلة "
تبسمت على جنب و قربت وجهي ناحية وجهو غزرت ف عينيه نحكي
انا :" اخطانا من لكلام هذا توو.. خلينا عاملين جو خيير.. مانحبش نفسد لمود متاعي "
حط يديه وراء رقبتي و جبدني ليه.. باسني من جنب شفايفي يحكي
ماهر :" مانحبكش تتغشش مني.. انا نحكي هكااا على مصلحتك و راس حبي.. ساعة تعرف الي انا توحشتك  "
انا :" امممم.. انا زادة "
ماهر :" شقولك كان نمشيوو من هناا ؟"
انا :" لاااا..والي ف مخك تنساه..قتلك الف مرة الموضوع هذاكاا انساه ماهر.. انت تعرف انو الي صار وقتهاا غلطة و مستحيل كان نرجع نكررهاا "
ضحك على جنب وضيق عينيه فيا يحكي
ماهر :" علاش مستحيل.. تو صار عندك مبادئ حبي "
انا :" مش حكاية مبادئ.. اما انا نعطي لحاجة بكيفييي ووقت مانحب ووين مانحب..نظن انت تعرف هذاا مليح..غير هكا ك نعرسو وقتها طالبني بالي تحب عليه حقك.. اما تو ماتحاسبني على شي..خاطر مانيش بش نرجع نعطيك شي "
ماهر :" انت تعرف الي العرس مش وقتو خاطر تو... "
قصيت عليه نحكي
انا :" خاطر تو عندك ظروف و مشاكل مع بابا و بلا بلا بلا.. كيف ظروفك تتحسن وقتها نحكيو مالا.. ماتزيدش تطيرلي كيفي تو "
ماهر :" شقولك كان تحكيلي مع بوك خليه يسهلي المشروع الجاي.. وقتها عرسنا ينجم يصير حبي "
هزيت بحاجبي وضحكت باستهزاء نحكي
انا :" ساعة انتوما صحاب عاد وتتفاهمو جات ف هاذي وتحبني نستوسطلك ؟"
ماهر :" بوك وتعرفو مع لفلوس ماعندوش صاحب.. و زيد ك يعرف انو لحكاية ف مصلحتك اكيد بش يقبل "
تنهدت بالشوي و هزيتلو براسي باهي.. خذيت الكاسة من يديه و رجعت استويت في قعدتي من غير ما نزيد معاه كلمة.. شربت الي فيها و رجعت نغزر للبنات الي قربو شوي ناحيتنا.. ضيقت عينيا كيف ماريتهاش معاهم..
تنطرت من بلاصتي فيسع و بقيت نلوج علاها بعينيا.. شفتو كيف قام معاياا يحكي
ماهر :" شبييك جوري ؟"
انا :" ياسمين.. ياسمين مفماااش وين مشااات ؟؟"
ماهر :" اهدااا.. ابقى هنا تو نشوفها و نرجعلك "
بعدت يديا علييه ماسمعتش كلامو و قمت.. اول ماتحركت بش نشوفها.. حسيت الدنيا دارت بياا و بش نطيح.. راسي رزن و رقبتي كبست عليا من تالي.. هاذي اول مرة نحس حاجة كيف هكااا.. شديت في الطاولة وطبست نحيت الي في ساقيا.. رديت النفس و مشيت نجري نشوف فيهاا.. حسيت روحي توترت من صوت الي علا اكثر و الناس الي دارو بياا وماخلاونيش نتعداا.. حسيت ببدني عمال يترخف و عينيا بدات تطيح..كبست بيديا على رقبتي و عضيت على شفتي اللوطانية وين حسيت بدوخة غريبة و تنميل ف بدني.. بقيت ندور هكاكا مش عارفة وين نلوج و لا منين نبداا.. هذا وصيتها بش ماتغيبش لحظة من قدامي.. وصيتها بش تبقى مع صحباتهااا.. اما كالعادة تصرفات لفروخ لشكون تخلاهم.. قربت من لبنات حبيت نسالهم اما حتى وحدة فيهم ما كانت معدلة معايا.. بعدت علاهم و بقيت ندور من بلاصة لبلاصة.. المشكل انها ماتعرفش لبلاصة و لا تعرف ناسها.. هاذي اول خرجة ليهااا.. تلفتت بش نشوفو هو وين مشى.. مالقيتوش زادة.. نفخت بالقوي و خرجت لبرا نشوف فيهاا.. الدنيا كانت فارغة و ظلمة وين حسيت روحي بش نهبل.. شديت في الحيط و تركزت عليه.. بقات كان عينيا تدور وين حسيت بالخوف تمكن فياا.. لحظتهاا ماعرفتش كيفاه صحت على قوة صوتي
انا :"  ياسميييييين "

#رَيْبَة_جُورِي🥀
#سمر_عياري 🍓