🗡🥀#رِيْبَة_جُورِي🥀🗡

حلقة 23

حلقة 23
#جوري_تحكي

اسبوع تعدا من وقت الي بديت خدمة.. رغم التعب و السهر اما كنت حاسة روحي مرتاحة بلحق خاطر بالنسبة لياا هاذي اول خطوة جديدة ف حياتي.. بداية اني نلقى و نسترجع روحي من جديد.. غير وجود جوهر و سارة معاياا طول الوقت الي خفف علياا خوفي.. اسبوع كامل وجوهر يوصلني و يروح بيااا رغم اني حكيت معاه اما رفض حتى انو يسمعني.. كان هذا شرطو بش يخليني نستمر ف الخدمة.. و سارة الي كانت معاياا ف الدار لاهية بياا و بماكلتي و دواياا.. الأول مرة بعد سنين طويلة نحس اني محاطة بعايلة و عندي دار.. بالوقت بديت نتعود بوجودي ف دار جوهر.. فكرة اني ضيفة عندو بدأت تتلاشى من بالي.. يعني و اخيرا بعد سنين من الضياع انا استقريت.. و فكرة اني نخرج من حذاه تو استبعدتها عالاقل ف الوقت الحالي.. اما بين هذاا الكل و رغم الراحة هاذي صحتي بقات تتراجع.. لوجيعة ماحبتش تخف علياا غير الدوخة و الكوابيس الي مازالو مرافقيني..
حليت عينيا على نهار جديد.. تلملمت بين لغطاء و هزيت روحي وقمت.. دخلت لسال دوبان نحيت حوايجي، فردت شعري ودخلت تحت الدوش..حليت فوقي لماء وين حسيت روحي فقت مليح و تفرهدت عالصباح.. اصلا ليوم حاسة اني قمت ناشطة و فرحانة مش عارفة علاش.. يمكن بلحق نفسيتي بدأت تتحسن مع حياتي الجديدة.. هزيت راسي شوي و بقيت مستحلية لقطرات الماء فوقي وفرد وقت ندندن ف غناية وحدي..مانعرفش قداه بقيت هكاا حتى حسيت روحي جعت.. سكرت السبالة وخرجت فيسع من الدوش لبست الكاب دوبان متاعي وخذيت منشفة صغيرة.. رجعت للبيت وقفت قدام الدريسينغ.. بقيت انشف ف شعري و فرد وقت نغزر نختار شنوة بش نلبس.. حطيت المنشفة فوق كتفي ومديت يدي هزيت سروال دجين غامق و مريول صوف ف الباج..رجعت للفرش نحيت الكاب وبقيت نلبس.. اول ماكملت فردت شعري على كتافي وخذيت تروس المكياج.. عملت روج خفيف و شوي مسكارا..حاولت نعمل من غير مراياا على قد مانقدر..رغم كل شي مازالت مش منجمة نتجاوز برشة حكايات لغاية تو.. رجعت التروس وهزيت تاليفوني حطيتو ف جيب سروالي وخرجت من البيت بش نشوف سارة.. تبسمت اول ماريتها هي وجوهر ف بيت لفطور.. قدمت بخطواتي ناحيتهم نحكي
انا :" صبااح الخير "
هزو رؤوسهم معاياا و غزرولي يحكيو
جوهر :" صباح النور "
سارة :" صباح الخير "
قدمت اكثر حذاهم وقعدت مقابلتهم.. ريت سارة كيف غزرت لجوهر و رجعت غزرتلي تحكي
سارة :" جوري ياخي عندك وين ماشية ؟"
عبيت كاسة العصير و خذيت رشفة منهاا..نزلتها وغزرتلهاا نحكي
انا :" اي ماشية نخدم "
سارة :" و من وقتاه و انت تمكيج هكاا للخدمة "
ريت جوهر كيف تبسم و هز بحاجبو يحكي
جوهر :" والله بديت نقتنع بيهاا الخدمة انا الي خلاتك هكاا لاهية بروحك "
رجعت شعري لتالي و غزرتلهم.. ضحكت نحكي
انا :" ههه شبيكم باهتين.. والله صار لازمني نتلهى بروحي يعني ماتنساوش الي انا نخدم بين ناس.. كيما لازمني نبقى هكاا خاطر على قريب فما حفلة ف المطعم و سي عمران وصانا بش يكون شكلنا لائق "
سارة :" حفلة شنوة؟؟ "
هزيت بكتافي نحكي
انا :" مانعرفش.. ممكن يحكي على حفلة راس السنة خاطرها قريبة "
جوهر :" امم باهي..المهم رد بالك على روحك مانوصيكش "
انا :" تهنى جوهر.. سايي راني استانست بالخدمة و بالبلاصة معادش تخاف علياا "
جوهر :" باهي.. انشالله هكاا "
تلفتت لسارة كيف تحكي
سارة :" حقهاا جوري انا خارجة ليوم "
عقدت بحواجبي مستغربة نحكي
انا :" وين ماشية ؟؟"
سارة :" للمصحة "
انا :" علاش؟؟؟ "
سارة :" عندي أوراق لازمني نحضرهم و لازمني ورقة من الخدمة..على هذاكا "
هزيتلهاا براسي باهي نحكي
انا :" فهمتك.. برا و رد بالك على روحك "
ريت جوهر كيف وقف من بلاصتو وغزرلي يحكي
جوهر :" انا ماشي للبيرو..نكمل خدمتي و نجي نوصلك..رد بالك تخرج وحدك"
انا :" باهي تهنى.. برا ربي عينيك "
سارة :" ربي عينيك جوهر "
تبسملناا وعطانا بظهرو وخرج.. رجعت غزرت لسارة نحكي
انا :" وقتاه خارجة سارة ؟"
سارة :" شوي آخر.. مازال بكري..علاش تستحقني ف حاجة ؟"
انا :" لا جيست سألت "
هزيت الكاسة وخذيت رشفة منهاا..رجعتها عالطاولة وكبست عليهاا بيدي نحكي
انا :" سارة ؟ "
سارة :" نعم "
عضيت على شفايفي مترددة نحكي
انا :" حبيت نسألك؟ ياخي بش تقابل جاد ؟"
سارة :" مانعرفش يعني كان لقيتو اكيد بش نقابلو.. علاش تحب توصلو حاجة ؟"
انا :" لا جيست سألتك "
سارة :" فهمتك..ايا كمل فطورك وماتنساش دواك.. خليني نقوم نحضر روحي انا "
انا :" باهي "
ريتها كيف قامت وخرجت.. بقيت نفطر وحدي وفرد وقت نخمم ف جاد..مانعرفش علاش لقيت روحي نسأل عليه اما بلحق جزء مني محتاجو الفترة هاذي..يعني ماننكرش انو هو الشخص الوحيد الي وقف معاياا ف وقت من الأوقات و سمعني..كيما كان هو السبب المباشر ف اني نتحرر من المصحة و نشق طريق جديد ف حياتي..
فقت من سرحتي على صوت سارة..هزيت راسي ريتها كيف حضرت روحها وواقفة قدام باب الكوجينة.. تحكي
سارة :" جوري انا خارجة.. ماتنساش دواك و افطر مليح ورد بالك تخرج حتى يجي جوهر انا ممكن نبطى "
انا :" باهي سارورتي.. تهنى علياا و انت زادة رد بالك على روحك "
تبسمتلي تحكي
سارة :" عيش أختي "
ريتها كيف عطاتني بظهرها وخرجت.. كملت فطوري فيسع وقمت لميت الطاولة وقربت ناحية الرخامة بقيت نغسل ف الماعون.. اول ماكملت رجعت للبيت شربت دواياا وبقيت أنظم فيهاا.. حبيت نلهي روحي بأي حاجة خاطر كل مانبقى وحدي نحس روحي نتراجع ف خطواتي لكل من وراء صراعي مع الافكار الي يحوزوني.. مانعرفش قداه تعدا عليا وقت و انا هكاا.. رجعت لصالة وترميت عالفوتاي غزرت لساعة لقيت مازال وقت على رجوع جوهر..مديت يدي وخذيت التيليكوموند..حليت التلفزة و تكيت بظهري لتالي.. بقيت نقلب ف القنوات و انا مش مركزة معاهم..قلبي ضرب بقوة اول ما قلبت القناة الثانية وين ريت اسمو على كبر الشاشة.. قمت فيسع وقربت اكثر لتلفزة.. قعدت على حرف الطاولة وعليت ف الصوت..حليت عينيا على وسعها و انا نسمع ف مذيعة الاخبار تحكي
" نشوب حريق في المزرعة الكبرى لرجل الأعمال و المستشار السابق سليم بالنور..و لحد الان سبب الحريق لا يزال مجهول.. حسب التحقيقات المتواصلة لا يوجد أي خلل تقني يؤدي للحريق و لذلك ربما يكون بفعل فاعل.. و يذكر بأن هذه المزرعة من أهم المزارع لسيد سليم حيث انه يقوم بكل أعماله و حفلاته الخيرية هناك.. السؤال هناا من لديه الدافع للقيام بهذا الفعل ؟
ف كما علمنا مؤخرا انه تم إيجاد جثة ف احد مستودعاته.. فهل الحادثتان مرتبطتان ام لكل حادثة قصة ؟؟.. التحقيقات لا زالت متواصلة لكشف من وراء الحادث و السبب.. سنوافيكم ببقية الاخبار و التفاصيل "
بقيت جامدة ف بلاصتي مانجمتش نتحرك حسيت لخبر طاح عليا كيف الصاعقة.. غمضت عينيا على دمعتي الي نزلت اول ما تفكرت المزرعة هاكي و ذكرياتي الي فيهاا.. رجعت حليتهم وبقيت نغزر قدامي للحظة حسيت بدني خاني غير صوتي الي هرب مع شهقاتي الي وحلت ف حلقي وين حسيت روحي تخنقت.. طلعت يدي بالسيف وحطيتها فوق صدري جبدت النفس بالقوي ومسحت دمعتي.. مانعرفش كيفاه جمعت قوتي وقمت من بلاصتي.. تنطرت للبيت لبست كبوطي وهزيت ساكي وخرجت نجري.. لحظتها بلحق ماعرفتش  انا ف شنوة خممت بالضبط كيما ماخممتش ف جوهر و شنوة ممكن يصير و يعمل.. كل الي خممت فيه وحبيت نعملو اني نمشي نقابلو و نفهم منو شصار.. خاطر بالنسبة ليا المزرعة هاكي مش مجرد مكان انجم نتعداه و نكمل حياتي..المزرعة هاكي تعبر على صغري..شهدت على ذكرياتي و لمتي بعيلتي.. عشت فيها حبي.. يمكن هي لبلاصة الوحيدة الي ضحكت فيها من قلبي و شافت فرحتي.. رغم اني اكثر من ثمانية سنين مازرتهاش اما عمري لا نسيت لحظاتي الي مرت فيهاا.. كيما عندي احساس داخلي يقلي الي صار وراه حكاية.. مانعرفش بشكون مربوطة بالضبط اما حسيت انو من حقي نعرف شنوة صاير خاطرني انا جزء من لبلاصة هاكي و فرد من العيلة هاذي رغم أنف الكل...