🗡🥀#رِيْبَة_جُورِي🥀🗡

حلقة 13

حلقة 13
#جوري_تحكي
كبست عالكاب الي كان فوقي وخرجت للبلكونة الي ف بيتي.. قعدت عالكرسي وهزيت راسي شوي.. بقيت نغزر للڤمرة و الفجر الي حلّ و انا لتو ماغمضتش عيني و لا غفيت من البارح.. ليلة كاملة عديتها و انا نخمم ف كلام خالتي.. على قد ما حبيت ناخذو بعين الاعتبار و نعمل بيه على قد ماخفت كان نندم من وراه.. دورت بعينيا شوي وغزرت للفيلا الي كانت قدامي.. للحظة هاذي مش مصدقة انو صار قريب مني لدرجة هاذي ورغم المسافة لقصيرة الفاصلة بيناتنا نعرف انو مستحيل كان شي نهار نتلقاو فيها.. خاطر حد فينا ماينجم يقرب للآخر من جديد.. طلعت يدي وكبست على راسي شوي من وراء لوجيعة الي حسيتهاا.. نفس لوجيعة الي كنت نحسها ف المصحة و لغاية تو مش عارفة سببها.. تكيت براسي لتالي وغمضت عينيا حاولت نرتاح شوي و نغفى حتى ساعة.. رجعت حليتهم فيسع عالحس الي سمعتو ف الطريق.. شديت ف الدربوز الي كان قدامي ووقفت.. عديت بعينيا عالطريق الي كان مقابلني.. حليت عينيا على وسعهم اول ما ريت لخيال الي كان واقف من بعيد.. حسيت دمي جمد في عروقي من الخوف الي حسيتو وين دقات قلبي قوات فجاة.. حتى ريقي حسيتو وحل ف حلقي خنقني.. ورغم هكا لانجمت نتحرك و لا نبعد عينيا من عليه.. كبست بيديا عالدربوز خفت لا نطيح من وراء ساقياا الي رعشو و اطرافي الي نملو.. خذيت نفس طويل وحركت ساقياا بالسيف وقربت اكثر لاخر طرف ف البلكونة اما شي مانجمتش نلمحو بقيت نشوف كان ف الجهامة الي كانت واقفة و تفاصيلها ضايعة مني من وراء الظلام.. ريتو كيف تحرك وشق نفس الطريق الي شقيتو انا ليلتها.. بقيت واقفة ف بلاصتي نرد ف النفس بالسيف.. غمضت عينيا على دمعتي الي نزلت.. طلعت يدي وعديتها على رقبتي مسحت لعرق الي بقى يتسرسب فوقي ووخرت بخطواتي لتالي ورجعت ترميت عالكرسي.. كبست بيديا على ركايبي و بقيت نتنفس بالشوي.. رجعت هزيت عينيا وغزرت للفيلا متاعو.. لحظتها حسيت روحي وصلت لخانة إليك.. لقيت روحي ف لعبة تقيدت من وراها ف زاوية مسكرة وحدي مش عارفة طريق خروجي منها منين وكيفاه.. اصلا حسيت روحي عجزت بش نتحرك وحدي كيما خفت من فكرة انو فما طرف اخر هو الي يكون متحكم ف اللعبة هاذي.. دمعتي نزلت بالوقت من وراء احساس الوحدة الي تملكني و خلاني نقرر نلتجألوو بعد كل شي صار.. عديت بيديا الزوز على وجهي مسحت دموعي وتكيت براسي لتالي هذا لكل وعينيا مابعدتش لحظة من الفيلا متاعو.. اول ماشفت نور الشميسة الي ضرب فياا هزيت روحي وقمت من بلاصتي.. دخلت للبيت وبقيت نمشي بالشوي بش مانفيقش سارة خاطر مش حابة اسئلتها عالصباح ماعنديش قوة بش نحكي شي كيما مانحبهاش تعرف اني خارجة ولا وين ماشية تو.. دخلت لتوالات غسلت حالتي ورجعت لدريسينغ حليتو وخذيت اول قطايع كانو قدامي ورجعت لتوالات.. لبست سروال دجين و مريول نوار لميت شعري لتالي و بقيت نغير ف الضمادات وحدي.. اول ماكملت هزيت ساكي وخرجت فيسع.. طلبت تاكسي ونزلت لجنينة ترميت عالكرسي بقيت نستنى ف التاكسي حتى يوصل.. طلعت يدي وكبست على جبيني.. غمضت عينيا بالقوي عالوجيعة الي رجعت ضربتني ف راسي فجأة.. رجعت حليتهم على صوت التزمير.. قمت من بلاصتي فيسع وخرجت ريت التاكسي كيف وصلت.. قدمت بخطواتي ناحيتها حليت الباب وطلعت.. حسيت الحروف هربو مني وماعرفتش ننطق العنوان.. تقويت على روحي شوي عطيتو العنوان و تكيت براسي عالبلار.. بقيت نغزر لطريق وسارحة ف الخطوة الي قدمتلها تو للحظة تمنيت كان نرجع اما ما لقيت حتى حل اخر غير هذاا.. حسيت قلبي وجعني و تملكني احساس غريب.. احساس مخلط بين الخوف و الندم اما اغلبهم كان.. كان الوحش.. وحشي ليه حسيتو قطعلي قلبي طول السنين هاذم.. ورغم هكا ماحبيتش نشوفو و لا نسمعو اما لقيت روحي مجبورة.. فقت من سرحتي على التاكسي كيف وقفت.. هزيت راسي وغزرت للبلاصة الي وقفنا قدامهاا.. بلعت ريقي ونزلت راسي حليت الساك خذيت لفلوس خلصت التاكسي ونزلت.. بقيت واقفة جامدة ف بلاصتي.. كبست على ساكي بالقوي خذيت نفس طويل وقدمت بخطواتي لداخل.. اول ما دخلت وقفت اول واحد عرضني نحكي
انا :" صباح الخير.. سا..سامحني بش نسالك.. نحب.. نحب نقابل المحقق بدر السياف.. هو موجود ؟"
هو :" اي موجود.. شكون نقلو ؟"
فركت يديا في بعضهم من التوتر الي حسيتو نحكي
انا :" قلو.. قلو جوري.. جوري بالنور "
هو :" انت عندك موعد معاه ؟"
هزيتلو براسي لا برشة مرات نحكي
انا :" لا لا.. اما هو.. هو يعرفني يعني احنا.. احنا صحاب "
هو :" باهي تفضل معاياا "
ريتو كيف اشرلي بيديه عالطريق.. نزلت راسي و بقيت نتبع فيه من تالي.. كنت كل مانقرب كل ما دقات قلبي تقوا اكثر و كرشي توجعني اكثر واكثر.. حتى دموعي حسيتهم ملاو عينيا و مع اول ترميشة بش ينزلو..ريتو كيف وقف يحكي
هو :" هذا مكتبو.. استنى نخبرو و نرجعلك "
هزيتلو براسي باهي من غير حتى كلمة.. ريتو كيف دخل و سكر الباب وراه.. تكيت عالحيط وبقيت نغزر للباب من بعيد.. اطرافي نملت وساقياا جمدت اول ما ريت الباب تحل حتى انفاسي حسيتهم ضاعو مني ف لحظة من الخوف.. اول مرة نحس بشعور الخوف هذاا.. خفت لا يرفض مقابلتي كيما خفت لا يكون قبلهاا.. للحظة ماعرفتش انا شنوة نحب بالضبط.. حسيت روحي ضعت مرة اخرى.. هزيت راسي على صوتو يحكي
هو :" تفضل... مسيو بدر ف انتظارك "
عديت بلساني على شفايفي وهزيتلو براسي باهي.. قدمت بخطوات رزينة ناحية البيرو ودخلت.. قلبي خظ بالقوي اول ما عينيا قابلت عينيه.. هبط لقلم الي كان في يديه و استوى في قعدتو.. ضيق عينيه فيا كانو مش مصدق الي انا قدامو.. ثواني عديتهم واقفة نغزرلو.. رغم اني جيتو بساقياا بعد السنين هاذم الكل.. اما مازلت مش مستوعبة وجودي معاه في نفس المكان..عديت بعينيا عليه اكثر للحظة حبيت نشوف تفاصيلو الكل و نتمعن فيها.. حبيت نثبت في وجهو اكثر ممكن نلمح الغزرة الي كنت نعرفها قبل اما ما لقيتهاش.. غزرتو ليا كانت باردة ماتعبر على شي.. فقت من سرحتي فيه كيف وقف و تبسم يحكي
بدر :" جوري بالنور.. اخر حاجة كنت نتوقعها هي زيارتك لياا "
رمشت عينيا و عديت بلساني على شفايفي نحكي
انا :" نعتذر منك خاطرني جيتك على غفلة من غير موعد "
بدر :" لا تو هذا كلام.. انت تشرف ف كل وقت "
اشرلي بيديه عالكرسي يحكي
بدر :" تفضل شبيك واقفة "
قدمت ناحية الكرسي وقعدت وين هو رجع قعد ف كرسيه مقابلني..عدا بعينيه عليا يحكي
بدر :" قلي تشرب حاجة ؟"
انا :" لا لا عيشك.. اصلا مانيش بش ناخذ برشة من وقتك.. انا.."
تكا بظهرو عالكرسي.. عقد بحواجبو مستغرب وقص عليا يحكي
بدر :" استنى ساعة قلي انت لباس؟؟ شبيه راسك ؟ "
نزلت عينيا منو ووطيت في صوتي شوي نحكي
انا :" لباس.. هو.. هو يعني الموضوع هذا الي انا جيت على خاطرو..بخصوص الي صارلي "
ضيق عينيه عينيه فيا يحكي
بدر :" كيفاه ؟ فسرلي اكثر تراه ؟؟"
كبست على ساكي بالقوي وهزيت راسي معاه نحكي
انا :" بدر بش مانطولش عليك.. انا هنا خاطرني محتاجتلك.. نحبك تعاوني "
هز بحواجبو يحكي
بدر :" محتاجتلي؟ انا ؟؟ بش نعاونك انت ؟؟"
حسيت روحي تربثت قدامو و ماعرفتش ننطق.. هزيتلو براسي اي من غير حتى كلمة.. شفتو كيف وقف و بعد على بيروه دار ناحيتي وقعد على حرف البيرو مقابلني يحكي
بدر :" باهي.. احكيلي تراه شنوة الي صار بش خلاك تجيني بساقيك و تطلب مني هكا ؟"
حسيت روحي تخنقت من وراء دموعي الي ملاو عينيا.. ضميت على شفايفي وهزيت راسي معاه نحكي
انا :" ليلتين لتالي فما شكون تهجم علياا وين الغابة الي بعد السيتي وضربني على راسي.. و انا مانجمتش نحكي لشرطة الي صار كيما ما لقيت حد اخر غيرك انت نحكيلو و نطلب مساعدتو بش نعرف شكون وراء لحكاية "
بدر :" علاش ما لقيت حد غيري؟ و سي سليم وينو ؟ و.. وماهر وينو ؟ من المفروض تتفكرو هو اول شخص.. تتفكرو و تطلب منو هو المساعدة قبلي و قبل الناس الكل.. مش هكاا ؟ "
بقيت نغزرلو من غير حتى كلمة اصلا ماتصورتش بش يرجع يجبدلي عليه من جديد.. شديت ف البيرو وقمت من بلاصتي وقفت قدامو نحكي
انا:"بدر انت تعرف مليح علاقتي مع بابا كيفاه من قبل "
خذيت نفس طويل ورجعت نحكي
انا :" كيما تعرف انو علاقتي بماهر وفات من وقت الحادثة.. و ما بقى حد ف حياتي غيرك يعرف الي صار وقتها بش انجم نحكي معاه "
طبس راسو ناحيتي و تبسم على جنب يحكي
بدر :" صار انا كنت و مازلت ف حياتك زادة ؟ من وقتاه ؟؟؟"
دورت بعينيا عليه وركزتهم ف عينيه إلي بقات مركزة معاياا هي زادة نحكي
انا :" نقصد .. نقصد مانجمت نحكي لحد غيرك خاطر كان انت تعرف شنوة صار وقتهاا.. و انا شاكة الي صار مربوط بالحادثة لقديمة.. يعني هذا الي نقصدو "
بدر :" و المطلوب تو ؟"
فركت يديا في بعضهم و قربت منو شوي نحكي
انا :" نطلب منك انك تعطيني شوي من وقتك تسمعني و تخليني نحكيلك كل شي صار من الاول و صار تو.. خاطر..... "
قص عليا يحكي
بدر :" لحكاية الي صارت من الاول انا نعرفهااا.. حتى اني نعرف الي صار فيهاا بالتفصيييل الممل "
بعد عليا فجأة و رجع يحكي
بدر :" و انا تو ما عينيش بش نرجع نسمع لا الي صار قبل و لا الي صاار بعد.. سامحني مانجمش نعاونك.. جيت للبلاصة و للانسان الغالط "
بقيت نغزرلو كيفاه كمل كلامو و رجع لبلاصتو.. حسيت روحي جمدت في بلاصتي ماعرفتش شنوة نعمل.. قد ماحضرت روحي للمعاملة هاذي منو اما ماتخيلتش اني بش نتوجع هكاا.. اصلا ف اللحظة هاذي ما خممت كان ف شنوة بش نعمل و لشكون بش نمشي كان نخرج من الباب هذا تو.. بدر هو آخر امل عندي.. تقويت على روحي وحركت ساقيا بش نقدم ناحيتو غزرتلو نحكي
انا :" ب.. بدر امان.. اسمعني و بعد....."
تهزيت و تحطيت على يديه الي ضربت ف البيرو وصوتو كيف صاح يحكي
بدر :" ياااا عون "
سمعت لباب تحل وراياا.. بقيت نغزرلو من غير ما نتلفت.. هزني وحطني بعينيه يحكي
بدر :" وصل المداااام "
غمضت عينيا على كلمتو التالية وين دمعتي الي كنت حابستها نزلت.. رجعت حليتهم على صوتو يحكي
بدر :" و مانحب حد يرجع يدخلي من غير موعد "
تلفتت للعون الي قرب مني بش يخرجني.. جبدت يدي منو و رجعت غزرتلو ف عينيه نحكي
انا :" باهي كان مش على خاطري.. على خاطر الايامات الي كانت بيناتنا "
ريتو كيف رجع غزرلي اما المرة هاذي بغزرة تخوف.. عينيه تحلت فيااا و غماقت.. وجهو حمار و عروق رقبتو بانت اكثر.. كبس عالورقة الي كانت قدامو وبقى يغزرلي و يحكي
بدر :" اخرج و خلاهااا.. قتلللك اخرررج "
كبست عالبونية متاعي من الرعب الي حسيتوو مكن فيا و سرا في بدني.. ريتو كيف وقف وقدم ناحيتي.. شهقت بالقوي كيف هد عليااا فجاة و شدني من مرفقي.. لزني للحيط و طبس علياا.. صدرو كان يتهز و يتحط و النفس متاعو السخون كان يضرب فيااا.. كبس على مرفقي يحكي 
بدر :" عاود شقلت.. *** قتلللك حل فمك و سمعني شنوة قلت "
حليت شفايفي بسيف نحكي
انا :" ق.. قتلك عاوني.. على خاطر الايامات الي.. الي كانت بيناتنا  "
تبسم على جنب يحكي
بدر :" وهي كانت فما حاجة بيناتنا؟ شبيني ما نتفكرش؟تراه فكرني شنوة كان بيناتنا...غير الكذب "
انا :" بدر امان خليني نفسرلك.. اسمعني شوي كهو "
غمضت عينيا بالقوي على يديه الي ضربت ف الحيط بجني يحكي
بدر :" اسكت اسكت.. مانحبك تفسرلي شي.. انا محيت من مخي اي ذكرى جمعتني بيييك.. انت كنت غلطة ف حياتي و انا صلحتهاا "
انا :" عندك حق ف كل كلمة.. نعرف الي انت مغشش مني تو اما امان خليني نفهمك.. اعطيني فرصة وحدة وانا مستعدة ف اللحظة هاذي نحكيلك كل شي "
بدر:" كيفاه عندك وجه و جاية تطلب مني هكاا ؟ بعد كل شي انت عملتو كيفاااه تجي لهنااا ؟"
انا :" سامحني بدر.. سامحني ام.."
طلع يديه وحط صبعو على شفايفي يحكي
بدر :"اششش.. الكلمة هاذي مانحبش نسمعهااا.. خاطرها اكبر كذبة تتقال من فم جوري بالنور.. كذبة انا شبعت بيهاا قبل.. و علاه رجعت تووو.. علااااه "
غمضت عينيا بالقوي و رجعت حليتهم نحكي
انا :" بدر.. انا ماعندي حد غيرك.. كلهم مشاو و خلاوني.. انا وحدي والله.. مش عارفة شنوة بش نعمل"
حط يديه على خدي و مسحلي دمعتي الي طاحت يحكي
بدر :" باهي باهي ك هكاا اناا موافق اني نعاونك امااا..."
حط يديه جنب راسي و طبس عليااا اكثر عدا بعينيه على وجهي و غزر لشفايفي يحكي
بدر :" اما شنوة بش تقدملي مقابل مساعدتي "
حطيت يديا على صدرو حاولت ندزو.. اما قوتي خانتني قدام جهامتو الي زادت غطاتني.. شدني من يدي و كبس علياا يحكي
بدر :" ارركحح.. شبيك تغششت.. خمم مليح ساعة.. ياخي انا طلبت حاجة مستحيلة.. حاجة ماعطاتهاش جوري بالنور قبل لغيري ؟"
حاولت انحي يدي من يديو نحكي
انا:" سيبني..انت واحد ساقط.. انت عمرك لا عرفتني.. انت ماتعرفش جوري "
هز بحاجبو يحكي
بدر :" صدقني انا اكثر واحد نعرف جوري..صرت نعرفك لدرجة انت ماتتوقعهاش "
بعد علياا عدا بيديه على شعرو وغزرلي بنظرة حرشة يحكي
بدر :" المهم قلي شنوة خممت.. موافقة على عرضي ؟"
تبسمت باستهزاء نحكي
انا :" تصدق.. خليتني مانندمش على الي عملتو فيك قبل.. انت تستاهل كل حاجة ريتها مني.. و مهما تحكي تو و مهما تبين انك نسيت.. انت تكذب بدر "
قدمت ناحيتو وقربتلو حتى بدني لمس بدنو.. هزيت راسي معاه وغزرت ف عينيه.. طلعت يدي و حطيتها على خدو نحكي
انا :" خاطر حتى انا نفهمك من غزرة عينيك.. انت مازلت موجوع مني..جرحك مازال محلول على هذاكا قاعد تتصرف هكاا.. تحب تبين انك نسيتني و نسيت الي كان بيناتنا مع انو عينيك تقول ف العكس من اول مادخلت انا هناا "
بعد عليا و ضحك يحكي
بدر :" رجعنااا لنفس النقطة.. لهدرجة عشقك لروحك و غرورك مصورينلك اني مازلت مهتم بيك و نخمم فيك.. خليني نقلك كلمتين خليهم بين عينيك ونحبك تتفكرهم ف كل لحظة تخمم فيها انك ترجع لهنااا.. انت حتى شي جوري.. صدقني حتى الكره مانكرهكش.. انا نسيتك لدرجة مانحبش نحس حتى احساس اتجاهك مهما يكون.. و بش مانكذبش عليك.. يعني كان خممت فيك و جيت على بالي بالصدفة.. نحس روحي نتقزز منك نحس باشمئزاز.. مش عارف كيفاه بش نوصفلك.. اما نحس روحي عايفك و عايف كل لحظة عديتها مع ساقطة كيفك "
مسحت دمعتي الي نزلت بكف يدي نحكي
انا :" لهدرجة؟"
بدر :" واكثر.. واكثر من الدرجة هاذي زادة.. كان ف بالك بش نصدق تمثيلك هذا و دموعك راك غالطة.. خاطر مانستغربش كان نلقاك رجعت لنسختك لقديمة..لحقيقتك.. ماتنساش ف الاخير الطبع غلاب "
هزيتلو براسي باهي وتنهدت نحكي
انا :" عندك حق.. عندك حق انا نستاهل هذا الكل.. انا الساقطة الي غلطت و لازمها تخلص مش هكاا.. وعالظاهر بش نبقى حياتي لكل نخلص وحدي.. الكل عاش حياتو و اولهم انت.. وجوري بقات عالهامش.. اصلا صدقني معادش فما وجود لجوري لقديمة.. هي ماتت عندها سنين"
بدر :" كملت كلامك؟ هذا الكل مايهمنيش.. وتو نحبك تقلب منظرك من هناا ورد بالك تخمم انك ترجع خاطر وقتها بش نخليك تندم "
هزيتو وحطيتو بعينيا نحكي
انا :" اصلا نفضل اني نموت و لا نرجع لواحد كيفك.. خليتني نندم خاطر رجعت طلبت منك تساعدني مرة اخرى بعد الي عملتو فياا "
ضحك باستهزاء يحكي
بدر :" ميسالش قول الي تحب.. المرة هاذي بش نعديلك كلامك بكيفي.. خاطر نعرف وضعك الصحي "
كمل كلامو و غمزني.. في اللحظة هاذي تمنيت كان الأرض تتشق وتبلعني من وراء كلامو وشنوة يقصد بيه.. قداه حقرت روحي و قداه نقمت عالدنياا الي وصلتني لهناا.. بعدت عليه و عطيتو بظهري بش نخرج.. رجعت تلفتتلو غزرتلو ف عينيه نحكي
انا :"نوعدك بش يجيك نهار وتندم على كلامك هذا وقت تعرف لحقيقة كاملة..اما وقتها بش يكون فات الفوت ومستحيل كان نسامحك يا بدر..كان تموت قدامي مش بش نسامحك على كلامك هذاا.. على هذاكا رد بالك تنسى النهار واللحظة هاذي.. رد بالك يابدر "
تبسم على جنب و هزلي براسو باهي من غير حتى كلمة.. عطيتو بظهري وقربت للباب بش نخرج اما وقفت على صوتو كيف ضحك باستهزاء يحكي
بدر :" سبيطار لمهبلة يستنى فييك ايااا تحرررك "
جملتو خلاتني ناقف في بلاصتي جامدة.. استندت بيديا عالحيط من وراء الترهويجة الي حسيتها مع بدني الي رعش و النفس الي وحل في حلقي خنقني.. كبست على يدي من وجيعة راسي الي رجعت هدت علياااا.. ثانية وحدة حسيت روحي فيها غبت و مشيت لدنيا اخرى .. غمضت عينيا على صوتو كيف صاح وراياا يحكي
بدر :" قتلك اخرررج "
رجعت حليتهم فيسع وقتها حركت ساقيا بالسيف وقربت للباب حليتو من غير ما نتلفت وراياا وخرجت نجري.. حبيت نبعد عليييه بالك ننسى كلمتو الي خلات نار تشعل في قلبي.. اول ماخرجت لشارع ووقفت نرد في النفس من النسمة الي كانت تضرب فياا.. مسحت دموعي الي ملاو خدي.. كنت كل ما نمسح دمعة تهبط اختها تجري وراهاا..
كركرت ساقياا وقعدت على اول كرسي عرضني كبست على ساكي بين يديا عنقتو وطرشقت بالبكاء.. حسيت روحي بش تخرج مني مع دمعة و كل شهقة.. وجيعة قلبي الي قوات حسيتها ذبحتني.. الي صار لداخل خلاني نسخف على روحي خلاني نندم اني استرخصت نفسي وجيتو بساقياا.. انا كيفاه فكرت انو ممكن يسامحني.. كيفاه نسيت كل شي صار كيفاه رخصت روحي ليه مرة اخرى و صدقت انو ممكن يعاوني بعد كل شي.. كيفاه غلطت هكااا مش عارفة.. كلامو لياا و غزرتو خلاوني نتفكر لبلاصة الي دنيا رماتني فيهااا كيما خلاتني نتفكر السبب وراء وجودي غادي.. دموعي هبطو اكثر كيف تفكرت اني صرت وحدي.. خفت من شنوة يستنى فياا و كيفاه و منين بش نلقى القوة..
هزيت راسي شوي على الصوت كيف نادى باسمي.. مسحت دموعي وبقيت نغزر لكريم الي قدم ناحيتي.. وقفت من بلاصتي وين هو قربلي اكثر ووقف قدامي.. تبسملي يحكي
كريم :" جوري ؟ عاش من شافك يا طفلة "
انا :" اهلا كريم.. شحالك لباس ؟"
كريم :" الحمدلله انا لباس.. احكيلي انت وينك شحالك؟ قلي ساعة شتعمل هناا ؟"
انا :" شي.. كنت بش نمشي تو "
كريم :" استنى وين عندك تمشي.. خليني نضيفك قبل "
انا :" لا لا عيش خوياا.. خلى مرة اخرى "
كريم :" بدر ف بالو بيك هناا ؟ تحب نخبرو ؟"
هزيتلو براسي لا نحكي
انا :" لا.. اصلا انا كنت حذاه.. حكينا شوي و تو لازمني نمشي "
كريم :" باهي خليني نوصلك عالاقل "
انا :" خلي عليك.. بش ناخذ تاكسي "
كريم :" باهي على راحتك.. اما لازمنا نتقابلو والله توحشتك و توحشت اياماتناا "
ريتو كيف حط يديه ف جيبو و جبد كارط حطها ف يدي يحكي
كريم:" هنا تلقى ارقامي الكل.. كلمني ف اي وقت خلينا نعملو برنامج باهي "
تبسمت نحكي
انا :" باهي انشالله.. نخليك تو..فرحت اني شفتك كريم "
كريم :" انا زادة فرحت ياسر اني شفتك "
تبسمتلو من غير حتى كلمة وعطيتو بظهري ومشيت.. بقيت نمشي ومش عارفة طريق الي بش نشدو.. اصلا ف اللحظة هاذي مش عارفة ف شنوة قاعدة نحس بالضبط.. كل الي نعرفو اني تعبت من كل شي.. حاسة اني ندور ف نفس النقطة.. و مافماش مخرج من كل الي انا فيه.. بعد الي صار مش عارفة كيفاه بش نكمل.. كل الي نعرفو تو اني صرت وحدي و قدامي زوز حلول كهو.. يا نهرب وحدي يا نواجه الي صار وحدي زادة..