🗡🥀#رِيْبَة_جُورِي🥀🗡

حلقة 10

حلقة العاشرة
#جوري_تحكي

مانعرفش قداه تعدا عليا وقت و انا قاعدة ف الجنينة.. من وقت الي رجعت وانا عالحال هذا.. حسيت روحي تهديت مش قادرة لا نحكي و لا نتحرك كيما مانعرفش فاش قاعدة نخمم بالضبط.. اصلا لتو لا نجمت نستوعب الي صار.. شوفتوو..كلامو وحتى ريحتو الي بقاو راسخين بين عينيا استنزفوني.. لوجيعة الي حسيتها الصباح منو حسيتهاا قتلتني من داخل.. غمضت عينياا بالقوي و رجعت حليتهم على يديها كيف حطت الكاب فوقي.. شفتها كيف قعدت بجنبي تحكي
سارة :" جوري شقولك كان تدخل ترتاح شوي ؟"
كبست عالكاب بيديا الزوز ورجعت غزرت قدامي.. هزيتلهاا براسي لا من غير حتى كلمة.. سمعتها كيف رجعت تحكي
سارة :" لوقتاه بش تبقى هكا؟ من الي رجعنا الصباح و انت قاعدة ف الجنينة.. لا رضيت تاكل و لا تشرب دواك"
غمضت عينيا وخذيت نفس طويل من النسمة الباردة الي ضربتني.. رجعت حليتهم وين دمعتي نزلت بالوقت.. بلعت ريقي بالسيف نحكي
انا :" مانحب حتى شي سارة.. امان خليني وحدي "
سارة :" لا مستحيل نخليك.. اغزرلي هنااا "
قربتلي وحطت يداها على دقنونتي دورتلي راسي ناحيتهااا تحكي
سارة :" علاش عاملة ف روحك هكا ؟ حتى شي ما يستاهل انك تعمل ف روحك هكا على خاطرو.. حد ما يستاهل انك تبكي على خاطرو.. امسح دموعك وهيا معايااا  "
دورت بعينيا عليها وشهقت بالقوي من وراء الغصة الي حسيتهاا مكنتني نحكي
انا :" نحس ف روحي مقهورة ياس سارة  "
حطيت يدي على صدري و كبست عليه بالقوي على قوة لوجيعة الي حسيتها شدتني فيه نحكي
انا :"  انا..انا تذليت يا سارة..كان سمعتو شنوة قلي كان ريتو كيفاه غزرلي..هو هانني بكلامو و غزرتو ياسارة.. قلت اني بش نحاول ننسى و نتجاوز ممكن انجم نقدم ف حياتي و ننقذ الجزء الي بقى مني.. اما الي صار ليوم حسيتو رجعني الف خطوة لتالي..ب..بدر ذلني "
حطت يداها على خدي مسحتلي دموعي الي بقاو يجريو على خدي تحكي
سارة :" شيهمك فيه..خمم ف روحك.. كل حاجة انت عايشتها تو بش تتعداا كاني ماصارتش صدقني.. انت بش تتعدا هذا الكل ووجيعتك بش تخف مع الوقت وبش تنسى الي صار.. غير انت قاوم و صدق هذاا "
هزيتلها براسي لا برشة مرات نحكي
انا :" لا لا لا مستحيل كان انجم نتعدا هذا الكل.. انا تحطمت ووفيت.. جهدي طاح مانجمش نقاوم اكثر من هكاا..انا مستحيل ننسى قهرتي من الراجل الي حبيتو.. مستحيل جروحي تبرا.. قلبي يوجع يا سارة.. يوجع برشة والله.. نحس ف روحي مخنوقة  "
ريتها كيف قربتلي وحلت يداها ناحيتي.. لحظتهاا ترميت في حضنها وطرشقت بالبكاء.. كبست على سارة بيديا الزوز نحكي
انا :" نحب ننساه.. نحب ننسى كل حاجة تخصو.. اما مانجمتش.. تسعة سنين و انا نوهم ف روحي بشي هذاا اما انا نكذب.. تسعة سنين بقيت بين نارين لا عرفت نكرهو و لا نكمل ف حبو.. تسعة سنين ضاعو من عمري و انا نستنى.. نستنى ف معجزة ترجع تجمعني بيه "
غمضت عينيا على يديها الي كانت تمسح على شعري وظهري تحكي
سارة:" يزي عيش اختى يزي.. انا مانعرفش شنوة حكايتك معاه اما صدقني هو مايستاهلش دموعك.. كان حبك بلحق راو ماتخلاش عليك السنين هاذم الكل وماوصلكش للحالة هاذي ليوم"
انا:" اما..اما انا كيف نجي نلوم نعذر.. انا زادة وجعتو.. انت ماتعرفش انا.. انا شنوة عملت فيه "
سارة :" كلنا نغلطوو ياجوري.. و انت اكيد ماكنتش تقصد تعمل اي حاجة مدامك حبيتو "
بعدت علاهاا شوي وغزرتلها نحكي
انا :" لا مكانتش غلطة خاطرني قصدت كل حاجة عملتهاا وقتهاا.. كنت واعية مليح انا ف شنوة نعمل "
سارة :" شنوة الي عملتوو؟؟"
رجعت عنقتها من غير حتى كلمة.. تكيت براسي على كتفها وغمضت عينيا نحكي
انا :" ماتعرفش خير.. خاطر ممكن وقتها حتى انت تكرهني كيفهم وتمشي "
بعدت علياا شوي وطلعت يداها مسحت على شعري.. تبسمتلي تحكي
سارة :" انا مش ناوية نمشي.. بش نبقى وراك و معاك ديماا.. رد بالك تخمم ف عكس هذا "
بعدت علاها ورجعت استويت قعدتي نحكي
انا :" باهي "
سارة :" هيا قوم معاياا..الطقس برد والشتاء بش تصب "
انا :" اسبقني انت.. انا نحب نزيد نبقى شوي وحدي "
سارة :" باهي ماتتاخرش "
هزيتلهاا براسي باهي من غير حتى كلمة.. ريتها كيف رجعت للفيلا ودخلت.. كبست عالكاب بيديا الزوز وقمت من بلاصتي.. قدمت بخطواتي ناحية باب الفيلا ووقفت.. غمضت عينيا وهزيت راسي لفوق بقيت نستحلى في النسمة الباردة الي كانت تلعب بشعري.. خذيت نفس منهاا وين لقيت روحي ارتحت شوي و دقات قلبي تنظموا من جديد.. رجعت حليتهم وبقيت ندور فيهم عالبلاصة.. حسيت دقات قلبي رجعو ضربو بقوة ومسو ف ضلوعي اول ما لمحتو واقف قدام الشباك من الفيلا الي كانت قدامي.. حليت عينيا على وسعهم كاني حبيت نتاكد انو بلحق هو قدامي و انا مش نتخيل.. لقيت روحي نسيت الي صار الكل ف اللحظة هاذي ماخممت ف شي غير اني نبقى نغزرلو و نملي عينيا بشوفتوو.. رغم انو بعيد علياا اما لقيت روحي نتامل ف تفاصيل وجهو الي بقات محفورة ف داخلي.. بدني رعش ونفس حبس في حلقي اول ماريت وحدة بين يديه.. شفايفو الي تحطو فوق شفايفهاا كانو كيف الجمرة الي تحطت ف قلبي.. طلعت يدي وحطيتها فوق فمي نكتم ف شهقاتي الي صارت مسموعة..
حسيت ساقياا خانوني وماقدرتش نتحرك ونهرب من هناا.. بقيت واقفة جامدة ف بلاصتي عجزت بش نبعد من قدامهم.. هزيت يديا ومسحت دموعي الي نزلو يجريو على خدي وخرت بخطوات رزينة لتالي.. اول ماتلفتت للفيلا متاعنا مانجمتش نقدملهاا حسيت بالخوف سيطر عليااا فجأة منهاا.. هي السبب ف كل حاجة انا عايشتها تو.. هي دمرتني.. ناسهاا و حيوطهاا هوما الي خنقوني.. وخلاوني نعيش الخسارات هاذم الكل.. جمعت طرف القوة إلي بقاتلي بالجهد ورجعت وخرت بخطواتي لتالي اكثر.. لحظتهاا حليت باب الفيلا لكبير وخرجت نجري.. بقيت نجري ومش عارفة وجهتي بالضبط كان المهم عندي نهرب من هناا قبل ما روحي تطلع اكثر.. سيبت الكاب الي كان فوقي وخليتو يطيح عفست عليه بساقياا وبقيت نجري اكثر.. رغم البرد كنت حاسة روحي قاعدة نتحرق من وراء النار الي شعلوهاا فيااا.. اول ما بعدت شوي وحسيت بالتعب استهلكني وقفت و استندت بيديا على اول حيط عرضني.. طبست شوي وبقيت نرد ف النفس بالشوي بالشوي محاولة مني بش نهدى.. هزيت راسي و بقيت نشوف ف البلاصة الظلمة والفارغة الي كنت فيها وقتها وين استوعبت انا شنوة عملت.. دورت بعينيا حبيت نلمح طرف نور حتى من بعيد بش نطمن شوي اما شي لقيت روحي بعدت عالفيلات الكل ووصلت وين الغابة الي ف اخر طرف.. الظلام الي كان مغطي لبلاصة مع السكوت خلاوني نخاف ونترعب.. اطرافي نملت وساقياا جمدت اول ما لمحت لخيال الي هف قدامي.. عديت بلساني على شفايفي نحكي
انا :" س.. سارة انت هاذي ؟"
تهزيت وتحطيت على صوت الڤزاز الي تكسر وراياا.. تلفتت فيسع ودورت بعينيا عالبلاصة بالك نلمح حاجة ونفهم شنوة الي صاير اما لقيت روحي نحوم ف الظلام الي بقى يجبد فيا اكثر.. كتمت انفاسي وتخبيت وراء الشجرة الي كانت مقابلتي.. طبست بركايبي وحطيت يديا على فمي سكرتو.. حسيت بدني شوّك من العرق الي لبني وبقى يسرسب تحت حوايجي.. صدري بقى طالع هابط و قلبي ضرب بقوة.. ضيقت عينيا شوي نشوف ف الضو الخافت الي ضرب فيا من بعيد.. عقدت بحواجبي مستغربة كيفاه كان يطفى ويشعل ثلاثة مرات وراء بعضهم كاني إشارة لحاجة.. استندت بيديا عالشجرة وهزيت روحي بالسيف.. خذيت نفس طويل وبقيت نقدم بالشوي بالشوي ناحية الضو.. عينيا تحلو على وسعهم اول ما ضوء شعل اكثر ونور لبلاصة الكل لحظتهاا صحت على قوة صوتي اول ماريت شكون ماسك مراياا دائرية موجهها قدامي و كان متخبي وراهاا.. حسيت روحي بش نهبل وانا نشوف ف روحي بكامل تفاصيلها الي نسيتهم.. هزيت براسي لا برشة مرات وطلعت يدياا على شعري كبست عليه بالقوي حتى حسيتو بش يتقطع بين يديا.. ورغم صوتي الي بحاح بقيت نصيح لين عروقي حسيتهم بش يتقطعوو.. جمدت في بلاصتي مانجمتش نتحرك.. ساقياا رزنو و معادش هازيني لدرجة اني حسيت روحي بش نطيح على طولي.. قلبي وقف اول ماريتو قدم مني فجاة وكان يجري ناحيتي.. صوتي خرج مني يصيح
انا :" لاااااااااا "
حسيت بدني ترهوج من لمراياا الي ضربتني بقوة وطاحت على راسي.. لحظتهاا ساقياا ترخفو وطحت ف القاعة بين لڤزاز الي تفرت ف كل بقعة.. حسيت بالدم السخون الي نزل من راسي سرح ف وجهي و تغلغل في شعري.. حليت عينيا شوية نغزر لتصويرة الضبابة الي كانت قدامي وين حسيت بالجهامة الي وقفت قدامي صوت النفس متاعو كان واصلي مع صوت حثلة ساقيه.. حاولت نتقوي على روحي شوي ونهز راسي معاه بالك نلمح هو شكون اما مانجمتش حسيت الدنيا دارت بياا وراسي رزن اكثر.. لحظتهاا قوتي وفات ومانجمتش نقاوم.. رغم الخوف الي بقى مسيطر علياا وعشش ف قلبي غمضت عينيا واستسلمت لكل شي.....
#رَيْبَة_جُورِي🥀
#سمر_عياري 🍓