🗡🥀#رِيْبَة_جُورِي🥀🗡

حلقة 25

حلقة 25
#جوري_تحكي

نهارين تعداو و انا بين الخدمة والدار..نهارين عديتهم مع جاد هو الي يوصلني و يروح بياا..رغم كل شي صار مانجمتش نقطع علاقتي بيه..خاطر مهما يعمل عندو برشة حاجات تشفعلو عندي..عمري لا ننسى وقفت جاد معاياا..غير هكاا كيف خممت لقيت انو عندو الحق كيف يحب يعرف الي صار..يحب يعرفني انا شكون..أي حد ف بلاصتو كان بش يتصرف هكاكا..اصلا يمكن هذا الكل غلطتي من الاول خاطرني بقيت ساكتة لتو..اما بلحق شي اقوى مني..خايفة لا نحكيلو وقتها بلحق بش نخسرو..غير اني مانحبش جاد يعرف و لا يشوف وجهي لقديم..نحبو يبقى ديما معاياا..مانحبش نخسرو كيف ماخسرت الي قبلو..كيما عديتهم نهارين نخمم عليه..حكاية كرهبتو بقاتلي كيف الكابوس مانجمتش ننساها..ف بالي زادة كيف ماحكيتلوش لحقيقة وخبيت عليه حكاية الجواب الاخير هكاكا بش نحميه..نبعدو على المشاكل بش مايتضرش..اما عالظاهر الي خفت منو صار..ورغم خوفي عليه جزء مني مش منجم يقلو ابعد..خاطر خوفي بش يتفاقم ف بعدو علياا..وقتها بش نحس روحي وحدي من جديد..مانعرفش هاذي انانيه و لا خوف مانعرفش..كل الي نعرفو اني نحب جاد يبقى ف حياتي..خاطرني بلحق مستحقتلو..مستحقة لشخص يخاف عليااا و يحميني..شخص ناثق فيه و مانخافش من قربو..شخص مايحكمش عليااا و مايغزرليش على اساس اني مذنبة..شخص مايحبنيش نبكي و ك نبكي يمسحلي دمعتي..هذا الكل نحسو مع جاد..كيما نحسو مع سارة و جوهر..الي بقاو معاياا للحظة هاذي..نهارين عديتهم بيناتهم..جوهر بالسيف بش اقتنع بحكاية جاد..اما حبيتو هو يرتاح زادة قريب شهر وهو يوصل فياا و يروح بياا..عالاقل جاد يعوضو شوي..غير سارة الي بقات لاهية بياا كاني بنتها مش صاحبتهاا..رغم اني حسيتهاا متغيرة النهارين هاذم..صارت ديما ساكتة و سارحة وكيف سالتهاا قالت متحيرة على امهاا..عندهاا لحق ف الاخير هي خلات عايلتهاا و بقات تعاني فياا انا..على هذاكا ماحبيتش نشد صحيح معاهاا و حاولت نرتحهاا النهارين هاذم..ماحبيتش نزيد نتعبهاا معاياا.....
كبست عالكاب دوبان وخرجت نجري من بيت البانو على صوت التاليفون الي نوقز..قربت فيسع ناحية التابل دونوي..هزيت التاليفون وقعدت على حرف الفرش..تبسمت كيف ريت رقمو..رديت عليه نحكي
انا :" صباح الخير "
جاد :" صباح النور..ماتقليش لتو راقدة ؟"
انا :" لا لا فقت من بكري..كنت ندوش على هذاكاا مارديتش عليك فيسع "
جاد :" صحة..قلي شحالك ليوم؟"
انا :" الحمدالله بخير..و انت ؟"
جاد :" لباس..طلبتك بش نقلك حضر روحك بش نتعدالك بكري "
عقدت بحواجبي نحكي
انا :" على قداه بكري ؟"
جاد :" بعد ساعتين هكاكا..نكمل الخدمة الي ف يدي ونجيك طول "
انا :" باهي مالا تفاهمناا "
جاد :" اي ماقتليش وين ناوية نمشيو؟؟ "
عضيت على شفايفي نحكي
انا :" مازلت مانعرفش جاد..يعني لتو ماقررتش..شرايك ك نتقابلو نتفاهمو مع بعضناا "
جاد :" نهارين تخمم جوري ؟"
انا :" شعندي نعمل ؟ عندي برشة بلايص نحب نمشيلهم و ماعرفتش نختار بيناتهم "
جاد :" باهي مالا.. قوم حضر روحك فيسع مانحبش نبقى نستنى ياسر "
ضحكت نحكي
انا :" هههه بالله سي جاد ؟ عالظاهر بش نبطل مالا "
جاد :" لا ك هكاا نستناك مالا.. اياا قوم لازمني نعلق عندي مريضة تستنى فياا "
انا :" باهي مالا نتقابلو بعد..ربي عينيك "
جاد :" عيشك "
علقت عليه التاليفون ورميتو على جنب..قمت من بلاصتي وقربت ناحية الدريسينغ..غمضت عينيا بالقوي على وجيعة راسي الي هدت علياا..وجيعة مش عارفة سببها شنوة..تغيب و ترجع.. و ك ترجع ترجع بقوة اكثر..غير الدوخة الي ساعات نحسها حتى و انا راقدة..اما عالاقل هذا الكل اهونلي من التخيلات الي كنت عايشتهم.. رجعت حليتهم و استندت بيديا عالدريسينغ وفرد وقت عديت بعينيا عالحوايج بقيت واقفة مش عارفة شنوة نختار..اصلا ماعنديش برشة كل شي بقى ف الفيلا وماحبيتش نرجع ناخذ شي من غادي على هذاكا بقيت نلبس من عند سارة زادة..تلفتت على صوت الباب كيف تحل وين ريت سارة دخلت تحكي
سارة :"ياخي وينك ؟ لفطور بش يبرد بقيت نستنى فيك "
نفخت ورجعت غزرت لدريسينغ نحكي
انا :" اففف سارة مالقيت مانلبس و جاد قلي قريب يجي "
قربتلي ووقفت بجنبي تحكي
سارة :" علاش مالقيت ما تلبس؟ اصبر تو نعطيك حاجة"
بعدتني من قدام الدريسينغ وقربت هياا..ريتها كيف بقات تقلب حتى جبدت قطعة ف يداهاا..تلفتتلي وحلتهاا قدامي..وين ريت روبة صوف ف النوار طويلة شوي..غزرتلها تحكي
سارة :" شرايك ؟؟ نتصورها تخرج عليك عاللخر "
هزيتلهاا براسي لا نحكي
انا :" لاا مانحبش روبة..شوفلي سروال ومريول خير "
سارة :" تي بالله يزيك من السراول.. راك خارجة تتفرهد جوري..قلي تراه قداه عندك ماخرجتش تتفرهد "
وخرت بخطواتي لتالي وقعدت عالفرش.. هزيت بحواجبي نحكي
انا :" 5 سنين..أكثر شوي"
سارة :" بالضبط..على هذاكا حاول انك تستغل النهار هذا..البس و مكيج يزيك من الحالة هاذي جوري..حاول انك ترجع تعيش حياتك بلحق..ياخي قداه عمرك راك صغيرة.. علاش ديما وجهك هكاا و لبستك كيف ماجاء..هاك صرت تخدم ارجع اتلهى بروحك شوي "
عديت بعينيا عليها من غير حتى كلمة بقيت نخمم ف كلامها بيني وبين روحي..حسيت روحي بلحق ماعنديش الرغبة بش نرجع كيف ماكنت قبل..يعني آخر همي اني نرجع لاهية بلبستي ووجهي..اصلا وجهي خمسة سنين ماغزرتلوش مانعرفش حتى شنوة الي تبدل ف ملامحي..كيما ماحبيتش نكسر بخاطرها عالاقل اليوم نعمل برايهاا مانيش بش نخسر شي..خذيت نفس طويل ومديت يدي ناحيتها نحكي
انا :" باهي هاتها مالا "
ضحكت وقربتلي..حطتها ف يدي تحكي
سارة :" اياا البس و نشف شعرك..و بعد اعمل شوي مكياج تخرجش وجهك اصفر هكاا "
هزيتلها براسي باهي نحكي
انا :" باهي سارورتي "
سارة :" و خف روحك راني جعت والله ومانحبش نفطر وحدي "
تبسمت نحكي
انا :" باهي شوي ونخلط علي..شبيك تخرنن ياسر انت "
قحرتلي تحكي
سارة :" أسأل روحك للا "
قمت من بلاصتي وقربتلهاا..دزيتها بالشوي نحكي
انا :" ايااا اخرج عاااد بش تعطلني "
سارة :" باهي سيبني هاني خارجة "
ريتها كيف ضحكتلي وخرجت..كبست عالروبة ف يدي وبقييت نغزرلهاا..رجعت للفرش حطيت الروبة وحليت الكاب دوبان..نحيتو وبقيت نلبس ف حوايجي..اول ماكملت عديت بيدي فوق بدني وطبست راسي نغزر للروبة..كانت طويلة تحت الركبة و مسنترة على بدني..رجعت قعدت عالفرش وخذيت المنشفة الصغيرة بقيت انشف ف شعري حتى شاح..خليتو مفرود وراياا وخذيت تروس المكياج وبقيت نمكيج شوي شوي..عملت روج خفيف و شوي مسكارا بالسيف حسيت روحي مش منجمة هكاا من غير مراياا اما بقيت نحاول.. اول ماكملت قمت فيسع لبست البوط متاعي..رجعت هزيت تاليفوني حطيتو ف الساك وهزيتو هو وكبوطي وخرجت وين ريت سارة قاعدة ف الصالة منزلة راسهاا و غاطسة ف تاليفونهاا لدرجة انها مافقتش بياا.. قربت حذاهاا حطيت ساكي و كبوطي على جنب..هزيت بحاجبي كيف ريتهاا بلحق مش فايقة بياا..نحكي
انا :" احم احم.. انا جيت "
هزيت راسها معاياا فيسع وغزرتلي..حطت تاليفونهاا ف جيبها ووقفت..تبسمتلي تحكي
سارة :" سامحني جوري..سرحت شوي "
انا :" فما خبر على امك ؟؟ هي مليحة؟؟"
سارة :" اه..اي اي مليحة "
حطيت يدي فوق زندها نحكي
انا :" سارة كان تحب براا طل عليهاا تبقاش هكاا متحيرة امان.. انا راني مليحة والله وزيد هاو جوهر و جاد معاياا "
سارة :" لا مفماش داعي بش نمشي.. هي لباس عليهاا تو.. ممكن الايامات الجاية نمشي نطل عليهاا نهارين و نرجع "
انا :" باهي على راحتك.. نحبك تعمل اي حاجة ترتحك سارة ماتضغطش روحك على خاطري "
تبسمتلي تحكي
سارة :" باهي..عيش اختى جوري "
بعدت علياا شوي وعدات بعيناها علياا..هزت بحاجبها تحكي
سارة :" ساعة قلي شنوة الزين هذا الكل..طلعت تهبببل ياسر خرجت عليك الروبة.. محلااااك "
ضحكت نحكي
انا :" عيشلي اختي..عينيك لحلوين سارورتي "
سارة :" هياا خلينا نفطرو "
هزيتلها براسي باهي وخرجنا للكوجينة..قعدت عالطاولة و عديت بعينيا على فطور الصباح الي كان منصوب..رجعت هزيت راسي وغزرتلها نحكي
انا :" يعطيك الصحة سارة "
سارة :" صحة و بالشفاء "
تبسمتلها من غير حتى كلمة..هزيت فنجان القهوة وعملت رشفة.. سمعتها كيف تحكي
سارة :" أي احكيلي وين ماشين انت وجاد بعد؟؟"
بلعت اللقمة الي ف فمي وهزيت بكتافي نحكي
انا :" مانعرفش.. مازلت ماقررتش لحق "
سارة :" انت شنوة اكثر بلاصة توحشتها وتحب تمشيلهاا؟"
انا :" برشة لحق.. يعني انا قبل ماكنتش نشد الدار بالكل.. كل يوم تلقاني ف بلاصة.. كانت عندي صاحبتي اسمها فرح.. كنا ديما مع بعضناا "
سارة :" ووين هي تو ؟"
نزلت راسي وعديت بلساني على شفايفي نحكي
انا :" م.. مانعرفش.. من ليلة الحادثة مانعرف شي على حتى حد فيهم "
رجعت هزيت راسي وحطيت شعري وراء وذنياا نحكي
انا :" و مانحبش نعرف..خاطر هوما صارو من الماضي..و الي عملوه فياا مستحيل كان انجم ننساه و لا نتعداه..على هذاكا بلحق مانحب نعرف عليهم شي "
سارة :" شيهمك فيهم..الي عمل تو يخلص "
تبسمت على جنب نحكي
انا :" هاني قاعدة نشوف ف شكون قاعد يخلص "
سارة :" يزي ماتقول هكاا..الي عملوه فيك تو يتحاسبو عليه..الدنياا تدور جوري و كل حد مصيرو يذوق من الكاس الي ذقت منو انت "
انا :" الي شفتو انا طول الثمنية سنين مانتمناش حتى لعدوياا يشوفو..اهم شي عندي تو انهم مايرجعوش لحياتي..خاطر وقتهاا ممكن بلحق نحاسبهم و انا مانحبش نخوض الشي هذاا سارة..مانحبش حتى نواجههم "
سارة :" خايفة منهم ؟"
بقيت نغزرلها ثواني من غير مانجاوبهاا..سؤالهاا خلاني نتفكر برشة حاجات و نسأل روحي بلحق كان انا خايفة منهم و لا من روحي..بلعت ريقي نحكي
انا :" لا..مش خايفة منهم..انا خايفة من لحقيقة الي ممكن نسمعها منهم..خايفة من الاجابات متاعهم..انا متأكدة انو حد فيهم يعرف شنوة صار الليلة هاكي..يعرف حتى تفصيلة صغيرة..تفصيلة ممكن تغير كل شي "
سارة :" اي ك هكاا علاش ماتحكيش معاهم ؟؟ مدامك متأكدة و انها ممكن تغير كل شي.. تحرك اسأل و شوف ممكن تثبت براءتك "
عديت بيديا على عينيا ورجعت غزرتلها نحكي
انا :" وممكن لعكس.. ممكن تثبت ادانتي سارة..ممكن نسمع حاجة تاكدلي اني قت••لت اختي.. وانا مانحبش نسمع هذا.. خاطر ماعنديش قوة و لا جهد للحقيقة هاذي..ممكن وقتها بلحق نهبل ونخرج من عقلي و نرجع وين كنت.. على هذاكا هوما و الليلة هذيكاا وكلشي صار انا سكرت عليهم وخليتهم وراياا..يكفي الي قاعد يطارد فياا لتو و انا مش عارفتو شكون "
سارة :" ممكن حد منهم "
هزيتلها براسي لا نحكي
انا :" لااا "
سارة :" شبيك متأكدة هكاا ؟؟"
تكيت بظهري لتالي نحكي
انا :" فما تفاصيل ف الجوابات الزوز.. لا تعرفهم فرح و لا ميليسا صاحبة ياسمين "
سارة :" و ماهر ؟؟؟"
حسيت قلبي ضرب على اسمو الي اخترق مسمعي..كبست عالبونية متاعي بالقوي وخذيت نفس بالقوي خاطرني حسيت بنفس الخنقة الي تمكني قدام سيرتو..اسمو برك يخليني نشوف ملامحو قدامي و نشم ريحتو مرة اخرى..يخليني نرجع نسمع صوتو وكلامو الي دمرني.. رمشت عينيا برشة مرات نمنع ف دمعتي الي زغللت ف عينيا عالنزول نحكي
انا :" ح..حتى ماهر مايعرفش "
سارة :" انت متأكدة؟؟ ياخي مش كان خاطيبك كيفاه مااا مايعرفش ؟"
انا :" سارة قتلك مايعرفش..بدل عليناا الموضوع.. كنا نحكيو عالخرجة شموصلنا هناا "
سارة :" باهي باهي.. هياا كمل فطورك مالا قبل لايجيك جاد"
هزيتلها براسي باهي ورجعت ناكل بالسيف..حسيت روحي تخنقت من لحديث عالليلة هاكي من جديد..فما تفاصيل ف حياتي كل مانسترجعهم نسترجع معاهم نفس لوجيعة و القهرة..كيما نحس بالخوف لا نرجع نعيشهم من جديد و لا نرجع حتى نواجههم..غير هذاا حسيت صدري ثقل علياا من وراء الشي الي بقيت حابستو و رافضة اني نبوح بيهم لأي حد..مش عارفة شنوة السبب اما حاجة اقوى مني مخليتني مانجمش نحكي لا لسارة و لا لجاد و لا لجوهر.. رغم قربهم مني مانجمش نخليهم يشوف كمية الغدر و الكذب الي كانو فياا.. غير المستنقع الي رميت روحي فيه.. مستنقع بقى وسخو لاصقني لغاية ليوم..بقى كيف النقطة الكحلة ف حياتي..الي مستحيل كان بش يجيها نهار وتتمحى.....