🗡🥀#رِيْبَة_جُورِي🥀🗡

حلقة 16

حلقة 16
#بدر_يحكي
لفيت المنشفة على وسطي.. وخذيت وحدة أخرى.. بقيت نشيح ف شعري و في نفس الوقت نغزر لروحي ف المراياا.. وين لقيت روحي سرحت ف ليلة لبارح من جديد.. لتو مانيش مستوعب الي عملتوو.. ماعرفتش وقتها انا لوين حبيت نوصل ب شي الي عملتو..مش عارف كان حبيت نثبت لروحي و لا ليها هي اني نسيتها وكرهتها.. كل الي نعرفو اني مش نادم خاطر ممكن هذاكا أقل شي تنجم تراه مني.. حطيت المنشفة عالرخامة ورجعت للبيت.. هزيت راسي شوي نغزرلها كيفاه مازالت راقدة.. عديت بيديا على شعري وقربت ناحية الدريسينغ.. خذيت حوايجي وكنت راجع لبيت البانو.. وقفت على صوتها وراياا تحكي
ليال :" بونجوور "
تلفتتلهاا ودورت بعينيا عليها نحكي
انا :" بونجور "
ليال :" شبيك فقت من تو ؟ "
انا :" عندي خدمة.. ارجع ارقد انت "
هزتلي براسها باهي ورجعت تسطحت.. دخلت لبيت البانو بدلت حوايجي و ريقلت اموري وخرجت.. ريتها كيف كانت مفتحة عيناها وتغزرلي.. تبسمتلي تحكي
ليال :" صحة يا روحي "
هزت روحها شوي و تقعدت.. غزرتلي ورجعت تحكي
ليال :" خارج تو ؟"
انا :" اي.. انت خليك هناا من غير ماتروح "
هزتلي براسها باهي من غير حتى كلمة.. لفت روحها بالملحفة و قامت من الفرش.. قربت ناحيتي ووقفت قدامي.. باستني من خدي وغزرتلي تحكي
ليال :" خليني نلبس حوايجي ونهبط نحضرلك فطورك "
انا :" لا ماعينيش "
ليال :" باهي.. و بش تتأخر ؟؟ "
نفخت بالقوي و قحرتلها نحكي
انا :" شنوة ليال ؟ من وقتاه الأسئلة هاذم ؟"
ليال :" مانقصدش.. جيست حبيت نعرف "
بعدت علاهاا وقربت ناحية التابل دونوي.. خذيت تاليفوني و مفاتحي.. سمعتها كيف رجعت تحكي
ليال :" باهي عالاقل قلي وقتاه بش نبداو ف الخدمة؟"
تلفتتلها نحكي
انا :" على قريب تو تعرف "
هزتلي براسها باهي من غير حتى كلمة.. بعدت علاهاا شوي نحكي
انا :" نخليك تو "
ليال :" باهي سايس روحك "
خليتها واقفة ونزلت.. خرجت فيسع وطلعت ف الكرهبة.. خدمتها و شديت الثنية للبيرو.. طريق كامل عديتو نخمم ف الف حكاية.. وين لقيت روحي مش عارف منين نبدأ و لا على شنوة نركز بالضبط..
كبست عالفولون اكثر اول ما خيالها تعدا قدام عينياا وفرد وقت استرجعت الي صار البارح من جديد.. دقات قلبي تسارعت و انا نتفكر ف قربها مني وريحتهاا الي سكنت فياا.. حليت الشباك بجنبي وخذيت نفس من النسمة الباردة محاولة مني بش نفيق ونمحي كل حاجة خممت فيها اللحظة هاذي.. كبست عالفيتاس أكثر وبقيت نسوق.. مسافة الطريق ووصلت للخدمة.. راكيت الكرهبة على جنب ونزلت.. دخلت لبيروياا و سكرت الباب.. نحيت كبوطي رميتتو عالفوتاي وقدمت ناحية المكتب.. ترميت عالكرسي و حليت الدرج بجنبي.. مديت يدي وخذيت اول ملف كان قدامي.. حطيتو عالبيرو و بقيت نقرا فيه.. هزيت راسي عالباب كيف تفتح.. ريتو كيف دخل وقربلي.. قعد قدامي و غزرلي يحكي
كريم :" صباح الخير معلم "
سكرت الملف الي كان قدامي.. تكيت بظهري لتالي نحكي
انا :" صباح الخير.. اه شفما جديد؟؟ "
تبسم على جنب يحكي
كريم :" والله الجديد مش بش يعجبك "
هزيت بحاجبي مستغرب نحكي
انا :" شفما زادة؟؟"
كريم :" عرفك جاء مغشش و طالب يشوفنا الزوز "
كبست عالقلم الي كان ف يدي ونفخت بالقوي نحكي
انا :" شيحب عالصبااح ؟؟"
كريم :" تي منين نعرف عليه انا.. بعثلي مع العون قال يحب عليناا من غير حتى تفصيل "
انا :" اففف مانيش ناقصو عالصباح.. مكرز من ربي بش يكمل علياا هو بحكاياتو "
كريم :" شبيك على عصابك؟ ماتقليش صارت حاجة لبارح "
انا :" ماصار شي ارتاح.. المهم قلي انت وصلت لحاجة؟؟"
كريم:" اي تنجم تقول.. اليوم وصلتلي قائمة اسامي الي عندهم نفس نوع الكرهبة "
استويت قعدتي واستندت بمرافقي عالبيرو نحكي
انا :" و قداه من اسم عالقائمة ؟؟"
كريم :" مش برشة.. 5 "
انا :" اي و من الخمسة مفماش اسم نعرفوه ؟"
كريم :" لاا.. اما مدام عرفنا الأسماء لحكاية ساهلة.. على هذاكا خلاها عندي و انا تو نتصرف "
انا :" باهي.. نعمل عليك مالا.. اصلا انا مانتصورش كان بش نتفاضى الفترة هاذي "
كريم :" علاش ؟ شعندك تعمل ؟؟"
انا :" تو نحكيلك اما مش تو.. هياا قوم خلينا نشوفو لآخر شيحب مناا "
هزلي براسو باهي وقام من بلاصتو.. قمت معاه وخرجناا.. قدمنا ناحية بيروه ووقفنا.. دقيت الباب وحليتو ودخلناا.. ريتو كيف كان قاعد على بيرو.. هز راسو معاناا يغزرلناا.. وقفت مقابلو نحكي
انا :" صباح الخير حضرة النائب "
كريم :" صباح الخير "
فؤاد :" صباح الخير "
اشرلناا بيديه ورجع يحكي
فؤاد :" تفضلو اقعدو "
قدمنا ناحيتو اكثر وقعدنا مقابلينو .. غزرلي درا كيفاش وهز بحاجبو يحكي
فؤاد :" تنجم تفسرلي شنوة صار لبارح سي بدر ؟"
عقدت بحواجبي مستغرب نحكي
انا :" مفهمتكش.. شصار؟؟"
فؤاد :" والله انت بش تقلي شنوة صار بينك و بين سي خليل ؟؟"
تبسمت على جنب نحكي
انا :" ياخي طلب يشكيلك ؟؟"
فؤاد:" اي طلبني و كان مغشش.. انت كيفاه تحكي معاه هكاكا ؟"
انا :" والله انا حكيت معاه بالطريقة الي تناسبو.. فهمتو الي انا نعرف خدمتي و انو مانقبلش اي حد يتدخل فيهاا و لا يقلي شنعمل "
كبس على وجهو يحكي
فؤاد :" شوف بدر.. هاذي آخر مرة يكلمني شكون و يشكيلي منك و من طريقة تعاملك.. هاذي مش اول مرة تصير اما مذابياا تكون اخر مرة "
كبست عالبونية متاعي من العصب الي حسيتو مكني ف لحظة.. رسيت على سنيا بالقوي نحكي
انا :" والله انا نعرف مليح كيفاه نتعامل مع الناس سي فؤاد "
فؤاد :" بدر من غير نقااش.. مانحبش مشاكل خصوصا مع سي خليل و سي سليم "
انا :" انا ... "
قص عليا كريم يحكي
كريم:" تهنى سي فؤاد..معادش بش تصير حتى مشكلة "
فؤاد :" يكون احسن.. غير هكاا انجم نعرف وين وصلتو ف القضية ؟؟"
كريم :" لحقيقة سي فؤاد مازلنا ماوصلناش لحاجة ملموسة.. القضية معقدة شوي..اما انشالله بش نوصلو لحاجة على قريب "
فؤاد :" مانيش قاعد نشوف انكم بش توصلو لحاجة بطريقة الخدمة هاذي..قاعد نشوف كان ف المشاكل قاعدين يصيرو "
غزرلي و هز بصبعو يحكي
فؤاد :" و انا فهمتك يا بدر من الاول.. قلتلك القضية كبيرة و مخلية العينين مفتحة عليناا "
خذيت نفس حاولت نهدي بيه روحي شوي ونضبط اعصابي الي حسيتهم شوي و يفلتو مني.. غزرتلو نحكي
انا :" سي فؤاد.. احنا شايفين خدمتنا مليح و قاعدين نعملو كل حاجة تطلع بيديناا "
فؤاد :" خدمتك انك تشوف الجاني.. مش تعمل مشكلة مع صاحب القضية و تحل باب بلاء اخر علينناا.. على هذاكا من اليوم.. نحب تقرير يومي مفصل على مستجدات القضية.. مفهوم ؟؟"
كريم :" مفهوم "
هزيتلو براسي باهي من غير حتى كلمة.. سمعتو كيف رجع يحكي
فؤاد :" و مذابياا القضية توفى ف اسرع وقت.. قبل ما يكلفو حد اخر غيركم يشدهاا "
حليت عينيا على وسعهم نحكي
انا :" القضية هاذي قضيتي سي فؤاد.. انا بديتهاا و انا بش نكملهاا مهمااا يصير "
فؤاد :" ك هكاا مالا شوف خدمتك.. خاطر كان صار و عوضكم شكون انا وقتها مانجمش نعاونك "
انا :" باهي "
فؤاد :" تنجم تتفضلو تو "
وقفت من بلاصتي فيسع وعطيتو بظهري وخرجت.. حليت فلس الشوميز وبقيت نرد فالنفس.. حسيت دمي فور من كلامو و طريقة معاملتو.. عديت بيديا الزوز على وجهي و غزرتلو كيف وقف بجنبي يحكي
كريم :" ياخي شصار بينك و بين خليل ؟؟"
دورت بعينيا عليه من غير ما نجاوبو.. خليتو واقف ودخلت لبيروياا.. ترميت عالكرسي و جبدت سيقارو شعلتو وبقيت نتكيف.. ريتو كيف دخل ورايااا و قعد مقابلني يحكي
كريم :" بدر شصار لبارح بش فؤاد تغشش هكا ؟؟"
نفثت دخان السيقارو وغزرتلو نحكي
انا :" الطحان خليل لبارح يعلم فياا ف خدمتي.. قال الي يحب القضية توفى فيسع ومايحبش مشاكل مع الصحافة.. اما انا عرفت كيفاه نجاوبو "
كريم :" بدر انت هبلت ؟؟ ناوي تعمل مشاكل معاهم ؟؟ نسيت هوما شكون ؟؟"
انا :" مهما يكونو شكون.. مفما حد فوق القانون.. كيما انا مانيش خايف منهم ونعرف كيفاه نتصرف معاهم بلقدا "
كريم :" اي اما ماتنساش هوما صحاب عرفك.. يعني القانون هو يلعب بيه لعب "
طفيت السيقارو وقمت من بلاصتي.. قربت ناحية الشباك حليتو وخذيت نفس.. غزرت لكريم نحكي
انا :" عرفك خليه **** على روحو.. انا القضية هاذي مستحيل نسلم فيهاا مهما يكلفني الأمر "
قام من بلاصتو وقربلي.. وقف قدامي وضرب على كتفي يحكي
كريم :" باهي وسع بالك ... "
قصيت عليه وعليت في صوتي نحكي
انا :" كيفاااه نوسع بالي كريم كيفاااااه.. الطحان لبارح عرف كيفاه يستفزني.. جبدلي على بابا و قضيتو و اليوم مصبح يقود لعرفي.. اما انا مانتسماش بدر كان مانحاسبوش على هذا الكل "
كريم :" استنى فهمني.. شنوة قال على بوك ؟"
انا :" قال الي انا ماربحتش ف القضايا الكل و الدليل على هذاا قضية بابا وانو مازال ف سجن لتو "
كريم :" ماتركزش مع كلامو شيهمك فيه.. هو حب يستفزك و عرف النقطة الي تنجم توصلو لهذاا "
انا :" انت تعرف انو النقطة هاذي اخر همي.. كيف ما قتلو لبارح بابا عمل و قاعد يخلص.. مفما حد فوق القانون "
كريم :" باهي شنوة بش تعمل تو ؟؟"
انا :" بش نمشي تو لطبيب الشرعي نشوف كان التقرير حضر و لا لا.. و بعد لازمني نرجع لعائلة الراجل نحب نرجع نحقق معاهم "
كريم :" باهي خليني نمشي معاك "
انا :" لا كريم.. انت نحبك تركز على حكاية الكرهبة عيش خويا..كيف ماقتلك بش نتشغل الايامات هاذم.. نحبك انت تركز فيهاا "
كريم:" باهي.. برا وسايس روحك "
انا :" باهي "
قربت لبيروياا خذيت التاليفون و المفاتح.. هزيت كبوطي ف يدياا و غزرت لكريم نحكي
انا :" نخليك تو.. بيناتنا تاليفون "
كريم :" باهي "
خرجت من البيرو و طلعت ف الكرهبة.. رميت الكبوط على جنب وخدمت الكرهبة وشديت الثنية وفرد وقت ف يدي التاليفون.. حليتو وحطيت الرقم قدامي طلبتو.. شوي وقت وهز علياا يحكي
هو :" وي بدر ؟"
انا :" خلينا نبداو خدمة على قريب.. مانحبش نزيد نضيع وقت اكثر "
هو :" باهي انا حاضر.. ساعة انت ضامن الطفلة الي معاك ؟"
هو :" اي ضامنهاا.. مالا انت ابدا ف خدمتك مدامك قريب منهم تو حتى نكلمك ونقلك شنوة بش نعملو "
هو :" باهي بيناتنا تاليفون "
علقت عليه ورميت التاليفون عالكرسي بجنبي.. كبست عالفيتاس اكثر و شديت ثنية السبيطار.. قد ماحاولت نهدي روحي مانجمتش.. حسيت النفس كبس علياا ولعصب بقى يهز فياا و يحط منهم الثلاثة.. عملتو متع اليوم خلاتو يحل باب جهنم على روحو على بكري.. مازال مايعرفش مع شكون طاح اما على قريب بش نخليه يعرف هو و شريكو...