🗡🥀#رِيْبَة_جُورِي🥀🗡

حلقة 20

حلقة 20
#جوري_تحكي

ايامات تعداو و انا عند جوهر.. على قد ماحاولت نتعود و نتصرف على طبيعتي هناا مانجمتش رغم معاملة جوهر لياا كيفاه مخليني على راحتي و لاهي بياا زادة اما من آخر حاجات صارولي صرت حاسة روحي حمل ثقيل على اي انسان بش ندخل ف حياتو.. والي متعبني اكثر صحتي الي عمال تتراجع و لوجايع الي عمال تزيد.. معادش عندي قوة بش نهز راسي من قوة لوجيعة الي فيه.. هذا غير الكوابيس و التخيلات الي صرت نراهم حتى ف اليقظة.. مش عارفة شنوة الي قاعد يصير معاياا بالضبط اما كل الي نعرفو انو بلحق معادش عندي قوة لحتي شي.. كملت غسلت الماعون الكل وقربت ناحية الرخامة خذيت الكافتيار بش نحضر قهوتي.. جوهر اغلب وقتو يعديه لبراا يخدم يرجع مخر وين نلقى روحي وحدي كل مرة نعمل حاجة بش مانحسش بالقلق و نلهي روحي بش مانخممش..
غمضت عينيا و استندت بيديا عالرخامة اول ما حسيت بوجيعة راسي رجعت هدت علياا.. حسيت بدني ترهوج و الدنياا دارت بياا فجأة.. حليت عينيا و بقيت نرد ف النفس بالشوي بالشوي و مع هذاا دقات قلبي بقات تتسارع كاني نجري على بلاصتي.. بلعت ريقي بالسيف و خذيت كأس القهوة و تلفتت بش نقعد عالطاولة.. جمدت ف بلاصتي اول ما سمعت صوت الي نادى باسمي.. حسيت الدم جمد ف عروقي و اطرافي نملت وين كبست عالكاسة ف يدي و دورت بعينيا عالدار الكل.. غمضت عينيا بالقوي اول ما صوتهاا رجع تكلم و نادالي.. تهزيت وتحطيت كيف رجعت صاااحت بالقوي نطرت الكاسة من يدي ووخرت بخطواتي لتالي حتى تضربت ف الرخامة.. هزيت يدي وغطيت وذنياا كيف سمعت صوتهاا رجع همس ف وذني بالشوي مع صوت دقات قلبي الي بقات تضرب فياا.. ساقياا رخو بياا وين  طحت ف القاعة و تلكمت على روحي.. للحظة حسيت بالخوف تمكن فياا مع وجيعة راسي ورقبتي الي كبست عليا.. انفاسي ضاقت و كأنو حجر تكدس فوق صدري خنقني.. حتى ريقي عجزت بش نبلعو.. تلفتت شوي عاليمين و حليت عينيا على وسعهم وين دمعتي نزلت بالوقت.. بدني رعش و انا نشوف فيها قدامي تضحك كيف الايامات الي فاتو بالضبط.. بقيت نغزرلهاا كيفاه مطبسة على راكايبهاا بجنبي وتغزرلي ف غزرة تخوف.. هزيت براسي لا برشة مرات نحكي
انا :" لااااا مش صحيح.. مش بلحق.. انت مش موجودة تو.. انت مش هناا..انا نتخيييل "
غمضت عينيا بالقوي و حطيت يدي فوقهم وين حسيتهاا غرقت ب دموعي و عرقي الي ملالي وجهي.. عضيت على شفتي اللوطانية بالقوي اول ما سمعت صوت ضحكتهاا.. شهقت بالقوي كيف حسيت بملمس يداهاا فوق كتفي تحكي
توليب :" جووووري.. انا رجعتلللك.. شبيك ماتحبش تغزرلي "
قاومت رعشت شفايفي بسيف نحكي
انا :" ج.. جوري انت.. انت تحلم.. انت تتخيل تو.. فيييق.. هذا.. هذا.. هذا كابوس و بش يوفى.. توليب ماتت.. هي مش موجودة.. هذا مش صحيح فييق "
توليب :" متأكدة انا متت.. حتى كان متت انا عايشة فيك.. اناا هي انت.. انا مرايتك جوري "
هزيت راسي معاها و غزرتلهاا من غير حتى كلمة.. تنطرت من بلاصتي نحكي
انا :" انا قت-للللتك.. و مستعدة نرجع نقت-لك كان تظهر قدامي مرة اخرى.. مستعدة حتى نق-تل روحي المهم مانشوفكش "
توليب :" انت بش تبقى ديما تراني.. بش نخليك عايشة ف الخوف لدرجة انك ماترجعش تشوف وجهك لين تموت "
تلفتت فيسع للرخامة و هزيت اول صحن عرضني.. رميتو عليهاا اما مازالت واقفة قدامي وتضحك بطريقة مستفزة.. حسيت اعصابي فلتت مني و معادش انجم نتحمل اكثر.. خذيت الصحن الثاني و الثالث و بقيت نضرب فيهاا و نصيح على علو صوووتي.. للحظة حسيت الدنيا ظلامت قدامي و ضياقت بياا و كل شي يجبد فيااا مع صوتي الي بقى يخرج مني و خانقني ف حلقي و صياحي الي زاد ف وجيعة راسي.. تهزيت وتحطيت اول ماحسيت بيديه دارت علياا بالقوي.. بدني ترخف اول ماريحتو تغلغلت فياا.. نزلت الصحن الاخير من يدي و طحت ف القاعة مرة اخرى.. تكيت براسي على صدرو من غير حتى كلمة.. كبس علياا بالقوي يحكي
جوهر :" اشششش جوري.. اهدى اهدى.. شبيك شصارلك "
حطيت يدي فوق يديه نحكي
انا :" ج.. جوهر شوف.. شوف هي.. هي قدامي.. توليب.. تغزرلي.. هي رجعت مرة اخرى "
جوهر :" جوري مفما حد.. ماتخافش.. انت تتخيل "
هزيت يدي الي كانت ترعش و اشرتلو بصبعي نحكي
انا :" لا لا اهيكااا واقفة غادي.. هي تغزرلي و تضحك.. جوهر امان.. قلها تمشي امان بعدهااا علياااا "
جوهر :" صدقني مفما حد.. حاول انك تهدى و تتنفس.. مجرد كابوس و تو يمشي.. انت قاعدة تتخيل فيهاا كيف الايامات الي تعداو.. هي مش صحيحة "
بعدت يديا من عليه و تلفتتلو.. ترميت عليه و عنقتو بالقوي.. كبست عليه بيديا الزوز نحكي
انا :" جوهر..انا خايفة امان ماتخلينيش.. امان هزني من هناا "
بعد علياا شوي ووقف.. طبس علياا وحملني ف حضنو.. غمضت عينيا وحشيت راسي ف رقبتو ساكتة كان دموعي عمال يهبطو اكثر من الاول.. دخلنا للصالة و حطني عالفوتاي يحكي
جوهر :" ارتااح شوي.. خليني نجيبلك كأس ماء "
شديتو من يديه بالقوي نحكي
انا :" لا لا رد بالك تمشي.. رد بالك تخليني هناا وحدي "
هزلي براسو باهي وقعد بجنبي.. دور بيديه عليا وجبدني عندو حضني يحكي
جوهر :" باهي هاني حذاك.. يزي من لبكاا "
غمضت عينيا بالقوي نحكي
انا :" جوهر.. جوهر انا حاسة روحي بش نهبببل.. والله والله ريتهاا والله سمعت صوتهاا و حسيت بيداهاا فوقي.. امان معادش تخليني امان.. هي بش تبقى ترجعلي ديما "
عدا بيديه على ظهري و شعري يحكي
جوهر :" باهي معادش نخليك.. اما صدقني هي مش موجودة.. توليب ماتت..انت تتخيل فيهاا حاول انك تنساهاا "
بعدت عليه شوي وهزيت راسي معاه.. غزرتلو ف عينيه نحكي
انا :" ه..هي قتلي.. قتلي انا عايشة فيك انت.. قتلي بش نخليك حياتك الكل معادش تغزر لوجهك.. جوهر.. جوهر كيفاه بش ننساها و هي عايشة فياا ؟؟
حط يديه على خدي ومسحلي دمعتي الي نزلت يحكي
جوهر :" هي مش عايشة فيك.. هي ماتت و معادش بش ترجع.. انساها... "
قصيت عليه نحكي
انا :" كيفاه بش ننساها وقتلي دمها هو نفسو دمي و..وانا مسخت يدي بيه.. ك..كيفاه بش ننساها وقتلي ملامحها نفسهم ملامحي انا و..وشعرها هو شعري.. ح..حتى صوتي ساعات نخاف منو خ..خاطرو نفس صوتها.. ك..كيفاه بش ننساها وهي جزء مني.. انا.. انا وليت خايفة من روحي.. نخاف كان نشوف روحي ف المراياا خاطرني بش نراهاا هي.. ب..بش نرا نسخة منهاا فيااا "
جوهر :" حاول تتغلب على خوفك.. حاول انك ماتخممش فيهاا..حتى كان انتوما نفس الملامح ونفس الوجه.. هذا مش معناه انت توليب وهي عايشة فيك.. انت جوري.. تفكر الي انت جوري لقوية كيف ما انا نعرفك قبل.. بش تاقف على ساقيك و بش تغزر لروحك و تعفس على كل شي و تتعدا.. هاذي هي جوريتي الي انا نعرفهاا و تربيت معااهاا.. انت قاومت برشة حاجات قبل و تحملت برشة ضربات و انا شاهد على هذاا.. تو زادة نفس الشي.. انت بش تتحمل حتى تبرى.. كيما مانحبكش تخاف خاطر انا بش نبقى معاك و بش نحميك حتى من تخيلاتك هاذم "
انا :" باهي جوهر انا علاش صاير فياا هكا ؟ انا شنوة عملت بش نستحق هذا.. علاش حتى حد ما حس بياا و عرف شنوة صار بالضبط.. راني والله تعبت.. معادش عندي قوة بش نتحمل ضربات اخرى.. معادش انجم نقاوم اكثر.. كيفاه بش نتحمل هذا الكل ياجوهر.. كيفاه بش نتحمل لوجيعة هاذي منهم الكل.. راهم ماخلونيش ناقف على ساقياا "
جوهر :" انت ماعملت شي.. و حتى كيف عملت خلصت.. كلنا نغلطوو و انا والله حاسس بيك من قبل مش من تو.. و لازمك تتحمل بالشوي بالشوي تو ترتاح.. شيهمك فيهم الكل انا بش نخليك تبعد علاهم مستحيل نخلي مخلوق فيهم يرجع يقربلك.. مانحبك تخمم ف حتى شي تو كان ف روحك و ف صحتك..لازمك تتعدى هذا الكل..يكفي انت تقاوم وتاثق فيا "
هزيتلو براسي باهي من غير حتى كلمة و تكيت براسي على كتفو.. حسيت روحي تهديت من لبكا.. سمعتو كيف نفخ يحكي
جوهر :" جوري شوف ساقيك.. اطلع عالفوتاي مليح تراه "
طبست راسي وغزرت لساقياا ريتهاا كيفاه كانت بالدم.. ماحسيتش لا كيفاه تضربت و لا تجرحت.. طلعت عالفوتاي مليح وين جوهر هزلي ساقياا.. شمرلي سروال البيجاما يحكي
جوهر :" ماهيش حاجة كبيرة ماتخافش.. ممكن لڤزاز تنطر عليك متاع الصحون.. خليني نجيب نعقملك الجرح "
دورت بعينيا عليه من غير حتى كلمة.. قام من حذايا و حطلي ساقياا عالفوتاي يحكي
جوهر :" ماتخافش.. غمض عينيك حتى نرجعلك "
هزيتلو براسي باهي وغمضت عينيا.. بقيت نتنفس بالشوي بالشوي محاولة مني بش نهدي دقات قلبي الي بقات تضرب و نتمالك اعصابي.. رجعت حليتهم كيف حسيت بيه رجع قعد حذاياا.. حط لبوات فرماسي على جنت وقربلي شوي يحكي
جوهر :" ساعة اشرب دواك بش تهدى.. حل فمك "
هزيت راسي شوي و شربت دواياا من يديه.. غزرتلو كيف تبسملي يحكي
جوهر :" بالشفاء "
انا :" عيشك "
جوهر :" اياا خليني نعقملك جرحك ونمشي نحضرلك عشاك "
عضيت على شفايفي نحكي
انا :" خلي عليك جوهر.. انا شبعانة "
جوهر :" لا لازمك تغصب على روحك.. تشرب ف الدواء لازمك تتغذى مليح "
انا :" باهي تو نقوم نحضر معاك.. اصلا سامحني انا قلبت الكوجينة.. و كسرت كل شي.. اما والله حاجة اقوى مني انا وقتهاا.... "
قص علياا يحكي
جوهر :" اشش ماعندك علاش تطلب ف السماح و ماعندك علاش تبررلي.. انت ارتاح كهو و اسكت "
تبسمت بالسيف و رجعت تكيت براسي لتالي.. غمضت عينياا كيف حسيت بالدواء حرقني ف ساقيااا وفرد وقت بقيت نخمم ف الي صار دقايق لتالي كيفاه حالتي وصلت هكاكاا.. حسيت بالخوف رجع سيطر علياا خفت لا نبقى هكاا و لا نزيد نتعب اكثر وقتهاا شكون بش يتحملني و قتلي حتى انا مش متحملة روحي.. رجعت حليت عينيا على صوت جوهر يحكي
جوهر :" كملت.. اياا خليك هناا.. تو شوي و نرجعلك "
انا :" باهي "
ريتو كيف قدم ناحية التلفزة حلهاا و خذا التيليكوموند.. و رجع حذاياا حطو بجنبي يحكي
جوهر :" خلي التلفزة تونسك.. و انا هاني لبرا حذاك.. ك تستحقني ناديلي "
انا :" عيشك جوهر ربي يخليك "
جوهر :" ما عملت شي "
عطاني بظهرو وخرج من الصالة.. دورت على جنبي و حطيت عينيا ف التلفزة اما مخي كان سارح بعيييد.. بقيت نخمم ف روحي و ف حالتي.. ممكن بلحق جاء الوقت الي لازمني نتقبل فيه اني وحدة مجنونة و مريضة و انو بلاصتي الي كنت فيهاا هي مكاني الطبيعي.. اصلا من وقت الي خرجت و انا تاعبة حالتي ازدادت سوء اكثر كيما لقيت روحي خسرت الكل و ماعندي حد.. على هذاكاا من اللحظة هاذي لازمني نقرر و نحدد حياتي كيفاه بش تكمل.. ياا نبقى هناا و نقاوم كيف ما قلي جوهر.. يا نرجع وين كنت و نرتاح و نستسلم.....